Nǔ e Mɛsɛ́dó lɛ́ wa lɛ́ é 16:1-40
-
Pɔ́lu sɔ́ Timɔtée bónú é ná zɔn xá ɛ (1-5)
-
Pɔ́lu mɔ Masedwáninu ɖé ɖo nǔmimɔ ɖé mɛ (6-10)
-
Lidíi húzú nǔɖitɔ́ ɖo Filípu (11-15)
-
È wlí Pɔ́lu kpó Silási kpó dó gan mɛ (16-24)
-
È bló batɛ́mu nú gantɔ́cɔ́tɔ́ ɔ kpó mɛ e ɖo xwé tɔn gbe lɛ́ é kpó (25-34)
-
Pɔ́lu byɔ́ ɖɔ è ní wá dó kɛnklɛ́n nú émí kpó Silási kpó ɖo agbawungba (35-40)
16 Pɔ́lu wá wá Dɛɛbée, bɔ énɛ́ gúdo ɔ, é yi Lisítli. Ahwanvú ɖé ɖo fínɛ́ bo nɔ nyí Timɔtée; nɔ tɔn ɔ, Jwifu wɛ bo nyí nǔɖitɔ́, tɔ́ tɔn ka nyí Glɛ̌kinu.
2 Nɔví e ɖo Lisítli kpó Ikoniyɔ́mu kpó lɛ́ é nɔ ɖɔ Timɔtée sín xó ɖagbe.
3 Pɔ́lu jló ɖɔ Timɔtée ní zɔn xá émí, énɛ́ ɔ, é kplá ɛ, bo gbo ada n’i, ɖó Jwifu e nɔ nɔ xá énɛ́ mɛ lɛ́ é wútu, ɖó yě bǐ wɛ tuun ɖɔ tɔ́ tɔn nyí Glɛ̌kinu.
4 Hwenu e yě ɖo toxo lɛ́ mɛ gbɔn wɛ é ɔ, yě nɔ tínmɛ gbeta e kɔn mɛsɛ́dó lɛ́ kpó mɛxó agun tɔn e ɖo Jeluzalɛ́mu lɛ́ é kpó wá lɛ́ é nú nɔví lɛ́, bónú yě ná xwedó.
5 Mɔ̌ mɛ ɔ, agun lɛ́ nɔ fɔ́n bo nɔ ɖo dǒ lí wɛ ɖo nǔɖiɖi mɛ, bɔ nǔɖitɔ́ lɛ́ sín kɛ́n nɔ ɖo jijɛjí wɛ ayǐhɔ́ngbe ayǐhɔ́ngbe.
6 Gɔ́ ná ɔ, yě gbɔn Flijíi kpó Galáti kpó, ɖó gbigbɔ mímɛ́ gbɛ́ nú yě ɖɔ yě ní ma jlá xó Mawu tɔn ɖo tokpɔn Azíi tɔn mɛ ó.
7 Hwenu e yě wá Mizíi é ɔ, yě tɛ́n kpɔ́n bo ná yi Bitiníi, amɔ̌, gbɔn gbigbɔ mímɛ́ gblamɛ ɔ, Jezu lɔn nú yě ǎ.
8 Énɛ́ wú ɔ, yě gbɔn Mizíi dín bo yi Tlowási.
9 Zǎnmɛ ɔ, Pɔ́lu mɔ nya Masedwáninu ɖé ɖo te ɖo nukɔn tɔn ɖo nǔmimɔ ɖé mɛ; bɔ nya ɔ sa vo n’i ɖɔ: “Wǎ Masedwáni bá d’alɔ mǐ.”
10 Ée é mɔ nǔmimɔ ɔ gúdo tlóló é ɔ, mǐ tɛ́n kpɔ́n bo ɖidó Masedwáni, ɖó mǐ wá gbeta ɔ kɔn ɖɔ Mawu wɛ ɖo mǐ ylɔ́ wɛ ɖɔ mǐ ní yi jlá wɛn ɖagbe ɔ Masedwáninu lɛ́.
11 Énɛ́ wú ɔ, mǐ dó tɔjíhún sín Tlowási bo yi Samɔtlási tlɔlɔ, amɔ̌, ayǐhɔ́ngbe tɔn ɔ, mǐ yi Nɛyapolísi.
12 Ée mǐ gosín fínɛ́ é ɔ, mǐ yi Filípu, toxo ɖé wɛ bo ɖo Hlɔ̌ma sín acɛ glɔ́, bo ka nyí tokpɔn Masedwáni tɔn sín toxo tají ɔ. Mǐ nɔ toxo énɛ́ mɛ nú azǎn yɔywɛ ɖé.
13 Ðo gbɔjɛzángbe ɔ, mǐ tɔ́n sín toxo ɔ mɛ, bo yi tɔsisa ɖé tó, bo lin ɖɔ mǐ ná mɔ ɖɛxotɛn ɖé ɖo fínɛ́, énɛ́ ɔ, mǐ jǐnjɔ́n ayǐ, bo jɛ mawuxó ɖɔ nú nyɔ̌nu e kplé ɖo fínɛ́ lɛ́ é jí.
14 Nyɔ̌nu e nɔ nyí Lidíi, bo nɔ sa avɔ vɔvɔ e wi d’é mɛ lɛ́ é, lobo gosín toxo Tiatíi tɔn mɛ, bo nɔ sɛn Mawu é ɖo tó ɖó mǐ wɛ. Jexóva* hun ayi tɔn bǐ mlɛ́mlɛ́ bónú é ná wlí tó xó e ɖɔ wɛ Pɔ́lu ɖe lɛ́ é wú.
15 Ée é kpó mɛ e ɖo xwé tɔn gbe lɛ́ é kpó bló batɛ́mu é ɔ, é byɔ́ mǐ ɖɔ: “Ényí mi mɔ ɖɔ un ɖi nǔ nú Jexóva* nǔgbó hǔn, mi wá nɔ xwé ce gbe.” É zín mǐ jí bɔ mǐ gbɔ bo xwedó è.
16 Gbe ɖokpó ɔ, mǐ xwe ɖɛxotɛn, bo xo go mɛsɛntɔ́ nyɔ̌nu e jí gbigbɔ nyanya ɖe bɔ é nɔ zɔ́n bɔ é nɔ kan amɔɛ* nú mɛ lɛ́ é ɖé. Amɔɛ e é nɔ kan nú mɛ lɛ́ é nɔ hɛn le gěgé wá nú gǎn tɔn lɛ́.
17 Nyɔ̌nu énɛ́ nɔ ɖo mǐ kpó Pɔ́lu kpó xwedó wɛ, bo nɔ ɖo xó sú wɛ ɖɔ: “Kannumɔ Mawu Ajalɔ̌nlɔn ɔ tɔn wɛ nyí nya élɔ́ lɛ́, bɔ yě ɖo hwlɛngán li ɔ jlá mi wɛ.”
18 É wa mɔ̌ nú azǎn gěgé. Wǎgbɔ tɔn ɔ, agbɔ̌n tɔn kpé Pɔ́lu, bɔ é lílɛ́ bo ɖɔ nú gbigbɔ ɔ ɖɔ: “Un ɖe gbe nú we ɖo Jezu Klísu nyíkɔ mɛ ɖɔ a ní gosín jǐ tɔn.” Bɔ tlóló ɔ, é gosín jǐ tɔn.
19 Hwenu e gǎn nyɔ̌nu ɔ tɔn lɛ́ mɔ ɖɔ le e émí nɔ ɖu é sín ali sú é ɔ, yě wlí Pɔ́lu kpó Silási kpó, bo dɔn yě ɖidó axi ɔ mɛ ɖo gǎn lɛ́ gɔ́n.
20 Ée yě kplá yě wá gǎn toxo ɔ tɔn lɛ́ gɔ́n é ɔ, yě ɖɔ: “Mɛ élɔ́ lɛ́ ɖo toxo mǐtɔn wlú wɛ tawun. Jwifu wɛ nú yě,
21 bɔ yě nɔ jlá nǔwalɔ ɖěɖěe é ma sɔgbe xá sɛ́n ɖɔ mǐ ní yí gbe ná alǒ xwedó ǎ lɛ́ é, ɖó Hlɔ̌manu wɛ nú mǐ.”
22 Énɛ́ ɔ, ahwan ɔ sí te dó Pɔ́lu kpó Silási kpó jí, bɔ gǎn toxo ɔ tɔn lɛ́ vún awu dó kɔ nú yě, énɛ́ gúdo ɔ, yě ɖe gbe ɖɔ è ní sɔ́ bǎ dó xo yě.
23 Ée yě sɛ́n bǎ nú yě azɔn gěgé gúdo é ɔ, yě sɔ́ yě dó gankpá mɛ, bo ɖe gbe nú gantɔ́cɔ́tɔ́ ɔ ɖɔ é ní cɔ́ yě ganjí.
24 Ðó è ɖe gbe mɔ̌hun nú gantɔ́cɔ́tɔ́ ɔ wútu ɔ, é bɛ́ yě dó fí e è nɔ cɔ́ hú gǎn ɖo gankpá ɔ mɛ é, bo ján afɔ yětɔn lɛ́ dó sókpo mɛ.
25 Amɔ̌, ée zǎn vlɔ́ ɖó we mɔ̌ é ɔ, Pɔ́lu kpó Silási kpó ɖo ɖɛ xo wɛ, bo ɖo han ji dó kpa susu nú Mawu wɛ, bɔ gantɔ́ lɛ́ ɖo tó ɖó yě wɛ.
26 Ajijimɛ ɔ, ayǐkúngban dán wǔ syɛ́nsyɛ́n, bɔ gankpá ɔ sín dodónú lɛ́ húnhún. Gɔ́ ná ɔ, hɔn lɛ́ bǐ hun tlóló, bɔ wlɔ e è dó gantɔ́ lɛ́ é bǐ wɛ́n.
27 Hwenu e gantɔ́cɔ́tɔ́ ɔ fɔ́n bo mɔ ɖɔ gankpá ɔ sín hɔn lɛ́ ɖo nuvo é ɔ, é sún hwǐ tɔn bo jló ná hu éɖée, ɖó é vɛdó ɖɔ gantɔ́ lɛ́ ko hɔn yi wɛ sín.
28 Pɔ́lu ka sú xó syɛ́nsyɛ́n bo ɖɔ: “Ma hu hwiɖée ó, mǐ bǐ ɖo fí!”
29 Énɛ́ ɔ, dǎwe ɔ byɔ́ zogbɛ́n bo yá wǔ byɔ́ gankpá ɔ mɛ, é jɛ sísɔ́sísɔ́ jí, bo jɛ kpo ɖo Pɔ́lu kpó Silási kpó nukɔn.
30 É kplá yě tɔ́n bo ɖɔ: “Mɛɖaxó ce lɛ́, étɛ́ un ka ɖó ná wa bo ná gán?”
31 Yě ɖɔ: “Ði nǔ nú Aklúnɔ Jezu, énɛ́ ɔ, hwi kpó xwédo towe kpó ná gán.”
32 Bɔ yě ɖɔ xó Jexóva* tɔn nú é kpó mɛ e ɖo xwé tɔn gbe lɛ́ é bǐ kpó.
33 Gantɔ́cɔ́tɔ́ ɔ ka kplá yě ɖo zǎn énɛ́ ɔ mɛ, bo klɔ́ akpa yětɔn lɛ́ nú yě. Énɛ́ gúdo ɔ, è bló batɛ́mu nú é kpó xwédo tɔn blěbú kpó azɔn ɖokpó.
34 É kplá yě yi xwé tɔn gbe, bo tɛ́ távo nú yě, bɔ é kpó mɛ e ɖo xwé tɔn gbe lɛ́ é bǐ kpó j’awǎ tawun, ɖó nǔ e é ɖi nú Mawu din é wú.
35 Ée ayǐ hɔ́n é ɔ, gǎn toxo ɔ tɔn lɛ́ sɛ́ sɔ́ja ɖé lɛ́ dó, bónú yě ná yi ɖɔ nú gantɔ́cɔ́tɔ́ ɔ ɖɔ: “Ðe nya énɛ́ lɛ́ nyi te.”
36 Gantɔ́cɔ́tɔ́ ɔ ɖɔ xó e yě ɖɔ é nú Pɔ́lu bo ɖɔ: “Gǎn toxo ɔ tɔn lɛ́ sɛ́ mɛ dó bo ɖɔ è ní ɖe mi mɛ we lɛ́ nyi te. Mi bo tɔ́n azɔn ɖokpó, bo yi ɖo fífá mɛ.”
37 Pɔ́lu ka ɖɔ nú yě ɖɔ: “Hlɔ̌manu wɛ nú mǐ, yě ka ɖó hwɛ nú* mǐ cóbó xo mǐ ɖo agbawungba ǎ, bo lɛ́ bɛ́ mǐ nyi gankpá mɛ. Bɔ din ɔ, yě jló ná ɖe mǐ nyi te ɖo nǔglɔ́ wɛ a? Gbeɖé kpɔ́n! Yěɖésúnɔ ní wá bo wá kplá mǐ tɔ́n.”
38 Sɔ́ja lɛ́ yi ɖó gbe nú gǎn toxo ɔ tɔn lɛ́. Ée yě se ɖɔ Hlɔ̌manu wɛ nú Pɔ́lu kpó Silási kpó é ɔ, xɛsi jɛ yě jí.
39 Énɛ́ wú ɔ, yě wá, bo sa vo nú Pɔ́lu kpó Silási kpó, bo kplá yě tɔ́n lobo byɔ́ yě ɖɔ yě ní gosín toxo ɔ mɛ.
40 Amɔ̌, ée yě tɔ́n sín gankpá ɔ mɛ é ɔ, yě yi Lidíi xwégbe; bɔ hwenu e yě mɔ nɔví lɛ́ é ɔ, yě dó wǔsyɛ́n lanmɛ nú yě bo ɖidó.
