Nǔ e Mɛsɛ́dó lɛ́ wa lɛ́ é 18:1-28
18 Énɛ́ gúdo ɔ, é gosín Atɛ́ni bo wá Kɔlɛ́nti.
2 É mɔ Jwifu e nɔ nyí Akilási bɔ è ji ɖo Pɔ́ɔn, bɔ é gosín Italíi b’ɛ ma lín ǎ é kpó asi tɔn Plisílu kpó ɖo fínɛ́, ɖó Klódu ɖe gbe ɖɔ Jwifu lɛ́ bǐ ní gosín Hlɔ̌ma. Énɛ́ ɔ, é yi gɔ̌n yětɔn,
3 bɔ ɖó é kpó yě kpó nɔ wa azɔ̌ ɖokpó ɔ wútu ɔ, é nɔ xwé yětɔn gbe, bo wa azɔ̌ xá yě, ɖó goxɔzɔ́watɔ́ wɛ yě nyí.
4 É nɔ xwlé xóɖiɖɔ mɛ* ɖo kplɔ́ngbasá ɔ ɖo gbɔjɛzángbe lɛ́ bǐ, bo nɔ bló bɔ Jwifu lɛ́ kpó Glɛ̌kinu lɛ́ kpó nɔ ɖi nǔ.
5 Hwenu e Silási kpó Timɔtée kpó gosín Masedwáni wá é ɔ, Pɔ́lu jɛ hwenu tɔn bǐ zán dó kplɔ́n xó Mawu tɔn mɛ lɛ́ jí, é nɔ ɖe kúnnu nú Jwifu lɛ́ dó xlɛ́ ɖɔ Jezu wɛ nyí Klísu ɔ.
6 Amɔ̌, yě nɔ ɖo gbe klán xá ɛ wɛ, bo nɔ ɖo zunzun i wɛ magbokɔ, énɛ́ wú ɔ, é xúxú awu tɔn lɛ́ bo ɖɔ nú yě ɖɔ: “Hun mitɔn ní nɔ kɔ nú miɖésúnɔ; nyɛ mɛ́ ɖ’é mɛ. Bɛ́sín din ɔ, un ná yi mɛ e ɖo akɔta ɖě lɛ́ mɛ lɛ́ é gɔ́n.”
7 Énɛ́ wú ɔ, é gosín fínɛ́* bo yi nya e nɔ nyí Titiwúsi Jusitúsi é xwé. Mawusɛntɔ́ wɛ nú nya énɛ́, bɔ xwé tɔn ɖo kplɔ́ngbasá ɔ kpá.
8 Amɔ̌, Klisipúsi e nyí nukɔntɔ́ kplɔ́ngbasá ɔ tɔn é ɖi nǔ nú Aklúnɔ, é kpó mɛ e ɖo xwé tɔn gbe lɛ́ é bǐ kpó. Kɔlɛ́ntinu e se wɛn ɖagbe ɔ lɛ́ é gěgé ɖi nǔ, bɔ è bló batɛ́mu nú yě.
9 Gɔ́ ná ɔ, Aklúnɔ ɖɔ nú Pɔ́lu ɖo nǔmimɔ ɖé mɛ zǎnmɛ ɖɔ: “Ma ɖi xɛsi ó, é nyɔ́ wa ɔ, nɔ ɖo xó ɖɔ wɛ bo ma nɔ abwɛ̌ ó,
10 ɖó un ɖo kpɔ́ xá we, mɛ ɖě ná tɔ́n ahwan we bo wa nǔ dó wǔ we ǎ; ɖó mɛ gěgé nyí ce ɖo toxo élɔ́ mɛ.”
11 Énɛ́ wú ɔ, é nɔ fínɛ́ nú xwe ɖokpó sun ayizɛ́n, bo nɔ kplɔ́n xó Mawu tɔn mɛ lɛ́.
12 Hwenu e Galinyɔ́ɔ nyí tokpɔngán* Akáyi tɔn é ɔ, Jwifu lɛ́ sɛ ta kplé bo tɔ́n ahwan Pɔ́lu, bo kplá ɛ yi hwɛ* nukɔn,
13 bo ɖɔ: “Nya élɔ́ ɖo nǔ kplɔ́n togun ɔ wɛ bónú é ná sɛn Mawu lěe sɛ́n ɔ ma yí gbe ná gbɔn ǎ é.”
14 Xó ɖɔ gbé wɛ Pɔ́lu ja lě kɛ́ɖɛ́, bɔ Galinyɔ́ɔ ɖɔ nú Jwifu lɛ́ ɖɔ: “Jwifu lɛ́ è mi, ényí nǔɖé wɛ nya élɔ́ wa nyi do, alǒ sɛ́n ɖaxó ɖé wɛ é gba ɔ, é ná sɔgbe ɖɔ má xwe sɔ bo ɖótó mi.
15 Amɔ̌, ényí xógbe lɛ́, nyǐkɔ lɛ́ kpó sɛ́n miɖésúnɔ tɔn kpó jí dɔn nǔ dó wɛ mi ɖe hǔn, mi yi ɖɔ gbo ɖo miɖée lɛ́ tɛ́ntin. Un ba ná ɖɔ nǔ énɛ́ lɛ́ sín hwɛ ǎ.”
16 Ée é ɖɔ mɔ̌ é ɔ, é nya yě sín hwɛɖiɖɔzinkpo* ɔ nukɔn.
17 Bɔ yě bǐ zɔn Sositɛ́nu e nyí nukɔntɔ́ kplɔ́ngbasá ɔ tɔn é jí, bo jɛ xixo è jí ɖo hwɛɖiɖɔzinkpo* ɔ nukɔn. Amɔ̌, Galinyɔ́ɔ ɖó nu ɖo nǔ énɛ́ lɛ́ ɖě mɛ ǎ.
18 É ɖo mɔ̌ có, ée Pɔ́lu nɔ fínɛ́ nú azǎn gěgé gúdo é ɔ, é dó éɖabɔ nú nɔví lɛ́, bo dó tɔjíhún ɖidó Silíi, bɔ Plisílu kpó Akilási kpó xwedó è. É kpa ɖa dó do ɖo Sanklé, ɖó é dó akpá ɖé nú Mawu wútu.
19 Yě wá Efɛ́zi, bɔ é jó mɛ ɖě lɛ́ dó nyi fínɛ́; amɔ̌, é yi kplɔ́ngbasá ɔ bo jɛ xó jlɛ́ dó xó wú xá Jwifu lɛ́ jí.
20 Yě byɔ́ ɛ azɔn gěgé ɖɔ é ní nɔ fínɛ́ nú hwenu gěgé có, é ka yí gbe ǎ;
21 é dó éɖabɔ nú yě, bo ɖɔ nú yě ɖɔ: “Ényí Jexóva* jló ɔ, un ná lɛ́vɔ́ lɛ́ kɔ wá mi gɔ́n.” Énɛ́ gúdo ɔ, é dó tɔjíhún sín Efɛ́zi,
22 bo wá Sezalée. Gɔ́ ná ɔ, é yi* bo dó gbe agun ɔ, lobo wá yi Antyɔ́ci.
23 É nɔ fínɛ́ nú hwenu kpɛɖé gúdo é ɔ, é ɖidó, bo nɔ gosín fí ɖé jɛ fí ɖěvo ɖo to Galáti kpó Flijíi kpó tɔn mɛ, bo nɔ ɖo wǔsyɛ́n dó lanmɛ nú ahwanvú lɛ́ bǐ wɛ.
24 Din ɔ, Jwifu e nɔ nyí Apolósu bɔ è ji ɖo Alɛsándli é wá Efɛ́zi; nya ɖé wɛ bo nyɔ́ xó ɖɔ bo lɛ́ tuun Nǔwlánwlán mímɛ́ lɛ́ ganjí.
25 È kplɔ́n ali Jexóva* tɔn nya énɛ́,* bɔ gbigbɔ Mawu tɔn nɔ bló bɔ kpó akpakpa sɔ́ mɛ kpó ɔ, é nɔ ɖɔ xó, bo nɔ lɛ́ kplɔ́n nǔ mɛ dó Jezu wú bɔ é nɔ sɔgbe, amɔ̌, batɛ́mu Jaan tɔn kɛ́ɖɛ́ wɛ é tuun.
26 É jɛ xó ɖɔ jí ɖo kplɔ́ngbasá ɔ kpó adɔgbígbó kpó, bɔ ée Plisílu kpó Akilási kpó se xó tɔn é ɔ, yě dɔn ɛ dó wǔ bo tín ali Mawu tɔn mɛ n’i bɔ é sɔgbe hú gǎn.
27 Gɔ́ ná ɔ, ɖó é jló ná yi Akáyi wútu ɔ, nɔví lɛ́ wlán nǔ sɛ́dó ahwanvú lɛ́, bo byɔ́ yě ɖɔ yě ní yí i kpó xomɛnyínyɔ́ kpó. Énɛ́ ɔ, hwenu e é jɛ dɔ̌n é ɔ, é d’alɔ mɛ ɖěɖěe húzú nǔɖitɔ́ gbɔn fɛ́nú Mawu tɔn gblamɛ lɛ́ é tawun;
28 ɖó ɖo agbawungba ɔ, é nɔ ɖe xlɛ́ hlɛ́nhlɛ́n kpó agbɔ̌n kpó ɖɔ linlin Jwifu lɛ́ tɔn kún sɔgbe ó, lobo nɔ zán Nǔwlánwlán mímɛ́ lɛ́ dó xlɛ́ yě ɖɔ Jezu wɛ nyí Klísu ɔ.
Tínmɛ e ɖo do lɛ́ é
^ Alǒ “É nɔ jlɛ́ xó dó xó wú xá mɛ.”
^ Énɛ́ wɛ nyí kplɔ́ngbasá ɔ.
^ Tokpɔn Hlɔ̌ma tɔn lɛ́ ɖokpó sín gǎn. Kpɔ́n Xógbe ɖé lɛ́ sín tínmɛ.
^ Alǒ “hwɛɖiɖɔzinkpo.” Kpɔ́n Xógbe ɖé lɛ́ sín tínmɛ.
^ Kpɔ́n Xógbe ɖé lɛ́ sín tínmɛ.
^ Kpɔ́n Xógbe ɖé lɛ́ sín tínmɛ.
^ É cí ɖɔ Jeluzalɛ́mu wɛ é yi.
^ Alǒ “È kplɔ́n ali Jexóva tɔn nya énɛ́ ɖó nu wú.”
