Nǔ e Mɛsɛ́dó lɛ́ wa lɛ́ é 21:1-40
21 É vɛ́ wǔ nú mǐ, cóbɔ mǐ jó yě dó bo sún hǔn, énɛ́ gúdo ɔ, mǐ zɔn tlélé bo wá Kɔ́si, bɔ ayǐhɔ́ngbe tɔn ɔ, mǐ yi Hlodɛ́si, bo gosín fínɛ́ bo yi Patála.
2 Mǐ mɔ tɔjíhún e xwe Fenisíi é ɖokpó ɖo fínɛ́, bo byɔ́ mɛ lobo ɖidó.
3 Mǐ ɖo tɔtɛ́ntinto Cíplu tɔn mɔ sɛ́dó wɛ, bo jó tɔtɛ́ntinto ɔ dó nyi amyɔ mɛ,* lobo kun hǔn yi Silíi, bo nɔ te ɖo Tíi, fí e tɔjíhún ɔ ɖó ná ɖe agban ɖe é.
4 Mǐ ba ahwanvú lɛ́ bo mɔ yě, lobo nɔ fínɛ́ nú azǎn tɛ́nwe. Amɔ̌, gbɔn gbigbɔ mímɛ́ gblamɛ ɔ, ahwanvú lɛ́ ɖɔ nú Pɔ́lu azɔn mɔ̌kpán ɖɔ é ní ma t’afɔ Jeluzalɛ́mu ó.
5 Ée hwe ɔ nu su bɔ mǐ ná yi é ɔ, mǐ tɔ́n bo wlí ali mǐtɔn, amɔ̌ yě bǐ, gɔ́ nú nyɔ̌nu lɛ́ kpó yɔkpɔ́vú lɛ́ kpó xwedó mǐ káká bɔ mǐ tɔ́n sín toxo ɔ mɛ. Mǐ jɛ kpo ɖo xu ɔ tó bo xo ɖɛ,
6 bo dó éɖabɔ nú mǐɖée lɛ́. Énɛ́ gúdo ɔ, mǐ byɔ́ tɔjíhún ɔ mɛ, bɔ yědɛɛ lɛ́ lɛ́ kɔ yi xwé yětɔn lɛ́ gbe.
7 Mǐ gosín Tíi, bo gbɔn xu jí, bo wá Putolemayísi. Mǐ dó gbe nɔví lɛ́, bo nɔ fínɛ́ xá yě nú azǎn ɖokpó.
8 Ayǐhɔ́ngbe tɔn ɔ, mǐ gosín fínɛ́, bo wá Sezalée, mǐ yi Filípu wɛnɖagbejlátɔ́ ɔ xwé, bo nɔ gɔ̌n tɔn. É ɖo súnnu tɛ́nwe e ɖó nyǐkɔ ɖagbe, bɔ è cyán ɖ’ayǐ lɛ́ é mɛ.
9 Nya énɛ́ ɖó vǐ nyɔ̌nu e ma ko wlí alɔ ǎ* é ɛnɛ, bɔ yě nɔ wa gbeyíɖɔzɔ́.*
10 Ée mǐ nɔ fínɛ́ nú azǎn gěgé gúdo é ɔ, gbeyíɖɔ e nɔ nyí Agabúsi é gosín Judée bo wá.
11 É wá gɔ̌n mǐtɔn, bo sɔ́ gǒjíblánú Pɔ́lu tɔn dó blá afɔ éɖésúnɔ tɔn lɛ́ kpó alɔ éɖésúnɔ tɔn lɛ́ kpó ná, bo ɖɔ: “Nǔ e gbigbɔ mímɛ́ ɖɔ é ɖíe: ‘Jwifu lɛ́ ná blá nya e tɔn gǒjíblánú élɔ́ nyí é gbɔn lě ɖo Jeluzalɛ́mu, bo ná jó è nú mɛ e ɖo akɔta ɖě lɛ́ mɛ lɛ́ é.’”
12 Ée mǐ se mɔ̌ é ɔ, mǐ kpó mɛ e ɖo fínɛ́ lɛ́ é kpó bǐ jɛ vo sa nú Pɔ́lu jí ɖɔ é ní ma yi Jeluzalɛ́mu ó.
13 Pɔ́lu ka yí gbe ɖɔ: “Étɛ́wú mi ka ɖo avǐ ya wɛ, bo ɖo tíntɛ́nkpɔ́n wɛ bo ná dó kpo awa mɛ nú mì?* Mi ní tuun ɖɔ un ɖo gbesisɔmɛ, bónú è ná blá mì, bo lɛ́ ɖo gbesisɔmɛ, bo ná kú ɖo Jeluzalɛ́mu, ɖó nyǐkɔ Aklúnɔ Jezu tɔn wú.”
14 Ée mǐ wá mɔ ɖɔ mǐ kún sixú húzú linlin tɔn ó é ɔ, mǐ sɔ́ dɔn nǔ xá ɛ ɖě ǎ,* bo ɖɔ: “Jlǒ Jexóva* tɔn ní nyí wiwa.”
15 Azǎn énɛ́ lɛ́ gúdo ɔ, mǐ sɔ́ nǔ nú tomɛyiyi ɔ, bo wlí ali ɖidó Jeluzalɛ́mu.
16 Ahwanvú e ɖo Sezalée é ɖé lɛ́ lɔ xwedó mǐ, bo kplá mǐ yi Munasɔ́ɔn, Cíplunu e xwé mǐ ɖó ná nɔ é gɔ́n; é ɖo ahwanvú nukɔntɔn lɛ́ mɛ.
17 Ée mǐ wá Jeluzalɛ́mu é ɔ, nɔví lɛ́ yí mǐ kpó xomɛhunhun kpó.
18 Ayǐhɔ́ngbe tɔn ɔ, Pɔ́lu xwedó mǐ yi Jaki gɔ́n, bɔ mɛxó agun tɔn lɛ́ bǐ ɖo fínɛ́.
19 É dó gbe yě, bo jɛ nǔ e Mawu wa ɖo akɔta ɖě lɛ́ mɛ, gbɔn sinsɛnzɔ́ tɔn gblamɛ lɛ́ é xó ɖɔ nú yě jí hlɛ́nhlɛ́n.
20 Ée yě se mɔ̌ é ɔ, yě jɛ susu kpa nú Mawu jí, bo ka ɖɔ n’i ɖɔ: “A mɔ a nɔví, Jwifu afatɔ́n mɔ̌kpán wɛ ko húzú nǔɖitɔ́, bɔ yě bǐ nɔ nyi Sɛ́n ɔ kpó kanɖódónǔwú kpó.
21 Amɔ̌, yě se bɔ è ɖɔ dó wǔ we ɖɔ a nɔ kplɔ́n Jwifu e ɖo akɔta ɖě lɛ́ mɛ lɛ́ é bǐ ɖɔ yě ní wɔn ya nú Mɔyízisɛ́n ɔ, bo nɔ ɖɔ ɖɔ yě ní ma gbo ada nú vǐ yětɔn lɛ́, alǒ xwedó nǔwalɔ e ko ɖo ayǐ lɛ́ é ó.
22 Étɛ́ mǐ ka ɖó ná wa din lo? É ɖo wɛn ɖɔ yě ná se ɖɔ a wá fí.
23 Énɛ́ wú ɔ, wa nǔ e mǐ ná ɖɔ nú we é: Súnnu ɛnɛ ɖo mǐ mɛ, bo dó akpá nú Mawu.
24 Kplá súnnu énɛ́ lɛ́, bónú hwi kpó yě kpó ní yi slá wǔ lěe Sɛ́n ɔ byɔ́ gbɔn é, lobonú a ní kpé nukún dó akwɛ́zínzán yětɔn lɛ́ wú, bónú yě ní dó sixú xwlɛ́ ta. Énɛ́ ɔ, mɛ lɛ́ bǐ ná tuun ɖɔ nǔ e è ɖɔ nú yě dó wǔtu towe lɛ́ é kún nyí nǔgbó ó, é nyɔ́ wa ɔ, ɖɔ a ɖó zǐnzán ɖagbe bɔ hwi lɔ nɔ nyi Sɛ́n ɔ.
25 Mǐ ko wlán gbeta e kɔn mǐ wá é sɛ́dó nǔɖitɔ́ e ɖo akɔta ɖě lɛ́ mɛ lɛ́ é, ɖɔ yě ɖó ná nɔ zɔ nú nǔ e è sɔ́ dó sá vɔ̌ nú vodún lɛ́ é, hun, nǔ e è glɔ́n agbɔ̌n ná bo hu é* kpó agalilɛ* kpó.”
26 Énɛ́ ɔ, ayǐhɔ́ngbe tɔn ɔ, Pɔ́lu kplá súnnu énɛ́ lɛ́, bɔ é kpó yě kpó yi slá wǔ lěe Sɛ́n ɔ byɔ́ gbɔn é; énɛ́ gúdo ɔ, é byɔ́ tɛ́npli ɔ mɛ, bo ná ɖɔ azǎn e gbe wǔsláslá ɔ ná fó dó é, kpó hwenu e è ɖó ná xwlé vɔ̌sánú dó yě mɛ ɖokpó ɖokpó tamɛ é kpó.
27 Din ɔ, ée azǎn tɛ́nwe e è ná slá wǔ ná é xwe vivɔnu é ɔ, Jwifu e gosín Azíi lɛ́ é mɔ Pɔ́lu ɖo tɛ́npli ɔ mɛ, bo sísɛ́ ahwan ɔ blěbú bɔ yě wlí i,
28 bo sú xó ɖɔ: “Izlayɛ́li ví lɛ́ è mi, mi wá d’alɔ mǐ! Nya élɔ́ wɛ nɔ kplɔ́n nǔ agɔ mɛ bǐ dó togun mǐtɔn, Sɛ́n mǐtɔn kpó tɛn mímɛ́ élɔ́ kpó wú gbɔn fí bǐ. Gɔ́ ná ɔ, é tlɛ kplá Glɛ̌kinu lɛ́ byɔ́ tɛ́npli ɔ mɛ, bo hɛn tɛn mímɛ́ élɔ́ blí.”
29 Nǔ e wú yě ɖɔ mɔ̌ é wɛ nyí ɖɔ yě ko mɔ Tlofímu Efɛ́zinu ɔ kpó Pɔ́lu kpó ɖo toxo ɔ mɛ ɖ’ayǐ, bo lin ɖɔ Pɔ́lu kplá ɛ byɔ́ tɛ́npli ɔ mɛ.
30 Hunnyahunnya byɔ́ toxo ɔ blěbú mɛ, bɔ mɛ lɛ́ zɔn kpɔ́ bo kán wezun wá, bo wlí Pɔ́lu, lobo dɔn ɛ tɔ́n sín tɛ́npli ɔ mɛ, bɔ è sú hɔn lɛ́ azɔn ɖokpó.
31 Ée yě ɖo tíntɛ́nkpɔ́n wɛ bo ná hu Pɔ́lu é ɔ, hunnyahunnya e fɔ́n ɖo Jeluzalɛ́mu toxo ɔ bǐ mɛ é sín xó jɛ ahwangán ɖaxó ahwangbɛ́ ɔ tɔn tó mɛ.
32 Tlóló ɔ, é kplá sɔ́ja ɖé lɛ́ kpó sɔ́jakanwekogán ɖé lɛ́ kpó, bɔ yě kán wezun ɖidó yě gɔ́n. Ée mɛ lɛ́ mɔ ahwangán ɖaxó ɔ kpó sɔ́ja lɛ́ kpó jawě é ɔ, yě ɖó Pɔ́lu xixo te.
33 Ahwangán ɖaxó ɔ sɛkpɔ́, bo wlí Pɔ́lu, bo ɖe gbe ɖɔ è ní sɔ́ wlɔ we dó blá ɛ ná; énɛ́ gúdo ɔ, é kan mɛ e Pɔ́lu nyí é kpó nǔ e é wa é kpó byɔ́.
34 Amɔ̌, mɛɖé lɛ́ ɖo ahwan ɔ mɛ bo jɛ xó sú jí, mɛ ɖě sú xó bo ɖɔ ɖě ɔ, mɛ ɖě nɔ sú xó bo nɔ ɖɔ ɖěvo. Hunnyahunnya ɔ zɔ́n bɔ ahwangán ɖaxó ɔ kpé wú, bo tuun nǔ e ɖo jijɛ wɛ tawun é ǎ. Énɛ́ wú ɔ, é ɖe gbe ɖɔ è ní kplá Pɔ́lu yi ahwansla ɔ mɛ.
35 Amɔ̌, ée Pɔ́lu jɛ kpekán ɔ jí é ɔ, sɔ́ja lɛ́ gbɔ bo sɔ́ ɛ, ɖó zǐngídi e ɖú wɛ ahwan ɔ ɖe é wú,
36 ɖó ahwan ɔ kpo ɖo xwixwedó yě wɛ, bo nɔ sú xó ɖɔ: “Mi hu i!”
37 Ée è ja Pɔ́lu sɔ́ byɔ́ ahwansla ɔ mɛ gbé é ɔ, é ɖɔ nú ahwangán ɖaxó ɔ ɖɔ: “Un sixú ɖɔ xó ɖé nú we a?” É ɖɔ: “A nɔ dó Glɛ̌kigbe wɛ a?
38 Hǔn hwi wɛ nyí Ejípunu e dɔn hunnyahunnya nyi ayǐ hweɖénu wá yi, bo kplá súnnu e hɛn jivǐ nuwenɔ é 4 000 yi gbětótló mɛ é ǎ nɛ́ sín?”
39 Pɔ́lu ka ɖɔ: “Jwifu wɛ nú mì, bɔ un gosín Táasi ɖo Silisíi, bo nyí toví toxo nukúnɖéjí ɖé tɔn. Kɛnklɛ́n bo ná gbe mì, bónú má ɖɔ xó nú togun ɔ.”
40 Ée é ná gbe Pɔ́lu gúdo é ɔ, Pɔ́lu nɔ te ɖo kpekán ɔ jí, bo bló alɔ nú togun ɔ ɖɔ yě ní cí xwíí. Ée fí bǐ cí tóó é ɔ, é ɖɔ xó nú yě dó Ebléegbe mɛ ɖɔ:
Tínmɛ e ɖo do lɛ́ é
^ Alǒ “tɔjíhúnglíntɛn sín akpáxwé.”
^ Blǔju tɔn, “ɖo alɔjí.”
^ Nǔ e ná jɛ é ɖiɖɔ, wɛn e Mawu sɔ́ d’ayi mɛ nú mɛ é dídó kpó jlǒ Mawu tɔn ɖiɖexlɛ́ alǒ jíjlá kpó sixú ɖ’é mɛ.
^ Alǒ “ɖo blǒbló wɛ bónú má vɔ́ da ɖo ayi mɛ.”
^ Blǔju tɔn, “cí xwíí.”
^ Alǒ “nǔ e è hu bo ma lúlú hun tɔn kɔn nyi ayǐ ǎ é.”
^ Pɔnɛyíya ɖo Glɛ̌kigbe mɛ. Kpɔ́n Xógbe ɖé lɛ́ sín tínmɛ.
