Nǔ e Mɛsɛ́dó lɛ́ wa lɛ́ é 22:1-30
22 “Nɔví ce lɛ́ kpó tɔ́ ce lɛ́ kpó è mi, mi ɖótó nǔ e ná ɖɔ dó jɛ hun dó nyiɖée jí wɛ un ɖe é lo.”
2 Ée yě se bɔ é jɛ xó ɖɔ nú yě dó Ebléegbe mɛ jí é ɔ, yě lɛ́ cí xwíí hú gǎn, bɔ é ɖɔ:
3 “Jwifu wɛ nú mì, bɔ è ji mì ɖo Táasi Silisíi tɔn; Gamaliyɛ́li ɖésú wɛ ka kplɔ́n nǔ mì ɖo toxo élɔ́ mɛ, è kplɔ́n mì lěe è ná xwedó tɔ́gbó mǐtɔn lɛ́ sín Sɛ́n tɛ́nwín lɛnwín gbɔn é, bɔ akpakpa nɔ sɔ́ mì dó nǔ e nyí Mawu tɔn lɛ́ é wú, lěe mi bǐ ɖ’é wú gbɔn égbé din é.
4 Un nɔ dó ya nú mɛ e mlɛ́ Ali nǔgbó ɔ lɛ́ é, káká bɔ yě mɛ ɖé lɛ́ kú; un nɔ blá súnnu kpó nyɔ̌nu kpó bǐ, bo nɔ bɛ́ yě dó gan mɛ.
5 Vɔ̌sánúxwlémawutɔ́ ɖaxó ɔ kpó tomɛxó lɛ́ bǐ kpó sixú ɖe kúnnu ná. Un lɛ́ yí wěma ɖo yě sí, bo ná zé nú Jwifugán e ɖo Damási lɛ́ é; dɔ̌n wɛ un xwe, bo ná yi blá yě mɛ e ɖo fínɛ́ lɛ́ é, bo ná kplá yě wá Jeluzalɛ́mu, bónú è ná dɔn tó nú yě.
6 “Amɔ̌, hwenu e un ɖo ali ɔ jí xweyǐgbe Damási, bo ko sɛkpɔ́ é ɔ, wěziza ɖaxó ɖé gosín jǐxwé, bo hɔ́n lɛ́ lɛ̌ dó mì ajijimɛ ɖo gan 12 hwemɛ tɔn mɛ mɔ̌,
7 bɔ un j’ayǐ bo se gbe ɖé, bɔ gbe ɔ ɖɔ nú mì ɖɔ: ‘Sólu, Sólu, étɛ́wú a ka ɖo ya dó nú mì wɛ?’
8 Bɔ un yí gbe n’i ɖɔ: ‘Hwi mɛ̌ ka wɛ, Aklúnɔ?’ Bɔ gbe ɔ ɖɔ nú mì ɖɔ: ‘Nyɛ Jezu Nazalɛ́tinu e dó ya ná a ɖe é wɛ.’
9 Mɛ e zɔn xá mì lɛ́ é mɔ wěziza ɔ, yě ka se mɛ e ɖo xó ɖɔ nú mì wɛ é sín gbe ǎ.
10 Énɛ́ ɔ, un ɖɔ: ‘Étɛ́ un ka ɖó ná wa, Aklúnɔ?’ Aklúnɔ ɖɔ nú mì ɖɔ: ‘Sí te, bo yi Damási; ɖo fínɛ́ ɔ, è ná ɖɔ nǔ e a ɖó ná wa lɛ́ é bǐ nú we.’
11 Amɔ̌, ɖó wěziza ɔ hɔ́n tawun, bo zɔ́n bɔ un sɔ́ sixú mɔ nǔtí ǎ wútu ɔ, mɛ e zɔn xá mì lɛ́ é hɛn alɔ ce, bo kplá mì yi Damási.
12 “Énɛ́ gúdo ɔ, nya e nɔ nyí Ananiyási, bo nɔ nyi Sɛ́n ɔ kpó gbejíninɔ kpó, bɔ Jwifu e ɖo fínɛ́ lɛ́ é bǐ nɔ ɖɔ xó tɔn ɖagbe é
13 wá gɔ̌n ce. É nɔ te akpá ce, bo ɖɔ nú mì ɖɔ: ‘Sólu, nɔví ce, lɛ̌vɔ́ jɛ nǔ mɔ jí!’ Hwenɛ́nu pɛ́ɛ́ ɔ, nukún ce lɛ́ hun, bɔ un mɔ ɛ.
14 Bɔ é ɖɔ: ‘Mawu tɔ́gbó mǐtɔn lɛ́ tɔn sɔ́ we, bónú a ná tuun jlǒ tɔn, bo mɔ nǔjlɔ́jlɔ́watɔ́ ɔ, lobo lɛ́ se gbe tɔn,
15 ɖó a ɖó ná nyí kúnnuɖetɔ́ tɔn, bo ɖɔ nǔ e a mɔ lɛ́ é kpó nǔ e a se lɛ́ é kpó nú mɛ bǐ.
16 Étɛ́ nɔ te kpɔ́n wɛ a ka ɖe lo? Sí te bónú è ná bló batɛ́mu nú we; ɖi nǔ nú nyǐkɔ tɔn, bónú Mawu ná sɔ́ hwɛ towe lɛ́ kɛ we.’
17 “Amɔ̌, hwenu e un lɛ́ kɔ yi Jeluzalɛ́mu, bo ɖo ɖɛ xo wɛ ɖo tɛ́npli mɛ é ɔ, un mɔ nǔmimɔ ɖé.
18 Un mɔ Jezu, bɔ é ɖo ɖiɖɔ nú mì wɛ ɖɔ: ‘Yǎ wǔ, bo tɔ́n sín Jeluzalɛ́mu, ɖó yě ná yí gbe nú kúnnu e ɖe dó wǔ ce wɛ a ɖe é ǎ.’
19 Bɔ un ɖɔ: ‘Aklúnɔ, yěɖésúnɔ tuun ganjí ɖɔ ɖ’ayǐ ɔ, un nɔ gosín kplɔ́ngbasá ɖé jɛ ɖěvo, bo nɔ bɛ́ mɛ e ɖi nǔ nú we lɛ́ é dó gan mɛ, lobo nɔ lɛ́ xo yě.
20 Bɔ hwenu e è ɖo kúnnuɖetɔ́ towe Etyɛ́ni hu wɛ é ɔ, é nyɔ́ nyi lɔ nukúnmɛ, bɔ un tlɛ ɖo fínɛ́, bo yí mɛ ɖěɖěe hu i lɛ́ é sín awu aga tɔn hɛn nú yě.’
21 É ɖo mɔ̌ có, é ɖɔ nú mì ɖɔ: ‘Yi, ɖó un ná sɛ́ we dó akɔta e jɛ zɔ tawun lɛ́ é mɛ.’”
22 Yě ɖo tó ɖó è wɛ káká jɛ fínɛ́. Amɔ̌ énɛ́ gúdo ɔ, yě zé gbe dó jǐ, bo ɖɔ: “Mi hu nya énɛ́, ɖó é jɛxá bo ná nɔ gbɛ ǎ!”
23 Ðó yě ɖo xó sú wɛ, bo nɔ nyi awu aga tɔn yětɔn lɛ́ dó ɖisí amyɔ, lobo nɔ nyi kɔ́gúdu dó jɔhɔn mɛ wútu ɔ,
24 ahwangán ɖaxó ɔ ɖe gbe ɖɔ è ní kplá Pɔ́lu yi ahwansla ɔ mɛ, bo ɖɔ ɖɔ è ní zán lanbá dó kan nǔ byɔ́ ɛ, mɔ̌ mɛ ɔ, émí ná tuun nǔ e zɔ́n tawun, bɔ mɛ lɛ́ ɖo xó sú wɛ ɖɔ è ní hu i é.
25 Ée yě sɔ́ Pɔ́lu mlɔ́ ayǐ, bo ja xixo è gbé é ɔ, é ɖɔ nú sɔ́jakanwekogán e ɖo te fínɛ́ é ɖɔ: “É ka sɔgbe xá sɛ́n ɖɔ è ní xo Hlɔ̌manu* e è ma ko ɖó hwɛ ná* ǎ é ɖé a?”
26 Ée sɔ́jakanwekogán ɔ se mɔ̌ é ɔ, é yi ahwangán ɖaxó ɔ gɔ́n, bo ɖó gbe n’i, lobo ɖɔ: “Hlɔ̌manu wɛ nyí nya ɔ mɛ. Étɛ́ a lin ná wa din?”
27 Énɛ́ ɔ, ahwangán ɖaxó ɔ sɛkpɔ́ Pɔ́lu, bo ɖɔ n’i ɖɔ: “Hlɔ̌manu wɛ nú we nǔgbó a?” Bɔ é ɖɔ: “Ɛɛn.”
28 Ahwangán ɖaxó ɔ yí gbe n’i ɖɔ: “Akwɛ́ wósúwósú wɛ nyɛ sú dó xɔ toví Hlɔ̌ma tɔn nyínyí sín acɛ ná.” Pɔ́lu ɖɔ: “Hlɔ̌ma ví jiji wɛ nyɛ ka nyí.”
29 Énɛ́ ɔ, mɛ e ja xixo è gbé bá dó kan nǔ byɔ́ ɛ lɛ́ é dó gǔdofɔ azɔn ɖokpó; bɔ ée ahwangán ɖaxó ɔ mɔ ɖɔ Hlɔ̌manu wɛ nú Pɔ́lu, bɔ émí ɖɔ bɔ è sɔ́ wlɔ dó blá ɛ ná é ɔ, xɛsi jɛ jǐ tɔn.
30 Énɛ́ wú ɔ, ayǐhɔ́ngbe tɔn ɔ, ɖó é jló ná tuun nǔ e wú Jwifu lɛ́ ɖo hwɛ dó Pɔ́lu wɛ tawun é wútu ɔ, é ɖɔ bɔ è tún i, bo byɔ́ ɖɔ vɔ̌sánúxwlémawutɔ́gán lɛ́ kpó Hwɛɖɔxɔsá ɖaxó Jwifu lɛ́ tɔn sín hǎgbɛ́ lɛ́ bǐ kpó ní kplé. Énɛ́ gúdo ɔ, é ɖɔ bɔ è kplá Pɔ́lu wá bo sɔ́ ɛ ɖó tɛ́ntin yětɔn.
