Nǔ e Mɛsɛ́dó lɛ́ wa lɛ́ é 26:1-32
26 Aglípa ɖɔ nú Pɔ́lu ɖɔ: “A hɛn ɔ, a ná ɖɔ xó dó jɛ hun dó hwiɖée jí.” Énɛ́ ɔ, Pɔ́lu dlɛ́n alɔ, bo ɖɔ xó dó jɛ hun dó éɖée jí; é ɖɔ:
2 “Axɔ́sú Aglípa, é víví nú mì ɖɔ nukɔn towe wɛ un ɖe, bo ná ɖɔ xó dó jɛ hun dó nyiɖée jí égbé, ɖo nǔ e sín hwɛ dó mì wɛ Jwifu lɛ́ ɖe lɛ́ é bǐ mɛ;
3 ɖo tají ɔ, ɖó a tuun hwɛndonúwiwa Jwifu lɛ́ tɔn lɛ́, kpó nǔ e jí yě nɔ dɔn nǔ dó lɛ́ é kpó xéɖéxéɖé. Énɛ́ wú ɔ, un ɖo vo sa nú we wɛ ɖɔ a ní ɖó suúlu, bo ɖótó mì.
4 “Nǔgbó ɔ, gbɛ alɔkpa e un zán sín vǔ ce ɖo togun* ce tɛ́ntin, bo lɛ́ zán ɖo Jeluzalɛ́mu é ɔ, Jwifu lɛ́ bǐ wɛ tuun céɖécéɖé.
5 Énɛ́ wú ɔ, yě tuun mì din é ɔ, é ko lín ɖésú; ényí é jló yě ɔ, yě sixú ɖɔ nú we ɖɔ un zán gbɛ Falizyɛn lɛ́ ɖɔhun; sinsɛngbɛ́ta énɛ́ syɛ́n tawun hú Jwifu ɖě lɛ́ tɔn.
6 Amɔ̌ din ɔ, un ɖo hwɛ nukɔn, ɖó akpá e Mawu dó nú tɔ́gbó mǐtɔn lɛ́ é sín nukúnɖíɖó wútu;
7 akpá énɛ́ ɖokpó ɔ sín jijɛnu ɖó nukún wɛ akɔta mǐtɔn 12 lɛ́ ɖe, bo nɔ wa sinsɛnzɔ́ mímɛ́ nú Mawu zǎn kéze kpó kanɖódónǔwú kpó. Axɔ́sú è, nukúnɖíɖó énɛ́ wú wɛ Jwifu lɛ́ dó hwɛ mì.
8 “Étɛ́wú mi ka nɔ lin ɖɔ è kún ɖó ná ɖi nǔ ɖɔ Mawu ná fɔ́n mɛkúkú lɛ́ ó?
9 Ð’ayǐ ɔ, un kú d’é jí ɖɔ un ɖó ná wa nǔ gěgé dó klán gbe xá Jezu Nazalɛ́tinu ɔ.*
10 Nǔ e un wa ɖo Jeluzalɛ́mu é pɛ́ɛ́ nɛ́, bɔ un sú mɛ mímɛ́ gěgé dó gan mɛ, ɖó vɔ̌sánúxwlémawutɔ́gán lɛ́ ná acɛ tɔn mì wútu; bɔ ényí è jló ná hu yě ɔ, un nɔ nɔ gǔdo ná.
11 Un nɔ dɔn tó nú yě hwɛhwɛ ɖo kplɔ́ngbasá lɛ́ bǐ, bo ná tɛ́n kpɔ́n bo ná hɛn yě gǎnnugǎnnu, bónú yě ná gbɛ́ nǔ e yě ɖi nǔ ná lɛ́ é; bɔ ɖó xomɛ yětɔn nɔ sin mì tawun wútu ɔ, un tlɛ nɔ hun káká yi toxo ɖěvo lɛ́ mɛ, bo nɔ dó ya nú yě.
12 “Gbe ɖokpó ɔ, un ɖo ali jí xwe Damási, ɖó vɔ̌sánúxwlémawutɔ́gán lɛ́ ná acɛ mì, bo lɛ́ zɔ́n mì ɖɔ má wa nǔ ɖokpó ɔ ɖo dɔ̌n.
13 Axɔ́sú è, ée un ɖo ali ɔ jí é ɔ, wěziza ɖé hɔ́n sín jǐxwé, bo lɛ́ lɛ̌ dó nyɛ kpó mɛ e zɔn xá mì lɛ́ é kpó gan 12 mɛ hwemɛ, bɔ lěe é nɔ kɔ́n gbɔn é syɛ́n hú hwesivɔ́ tɔn.
14 Énɛ́ ɔ, mǐ bǐ j’ayǐ, bɔ un se gbe ɖé, bɔ gbe ɔ ɖɔ nú mì dó Ebléegbe mɛ ɖɔ: ‘Sólu, Sólu, étɛ́wú a ka ɖo ya dó nú mì wɛ? Hwɛ̌ e sɛ́ kpo nu xwíɖíxwíɖí* sín nuvínu wɛ a ɖe é ɔ, nǔ wa dó hwiɖée wú wɛ a ɖe.’
15 Amɔ̌, un ɖɔ: ‘Hwi mɛ̌ ka wɛ, Aklúnɔ?’ Bɔ Aklúnɔ ɖɔ: ‘Nyɛ Jezu e dó ya ná a ɖe é wɛ.
16 Amɔ̌, sí te bo nɔ te ɖo afɔ towe lɛ́ jí. Un tɔ́n dó jǐ towe, bo ná mɔ tɛn dó sɔ́ we, bónú a ná nyí azɔ̌watɔ́ ce, bo lɛ́ nyí kúnnuɖetɔ́ nǔ e a mɔ lɛ́ é kpó nǔ e kan mì, bɔ un ná ɖe xlɛ́ we lɛ́ é kpó bǐ tɔn.
17 Un ná hwlɛ́n we ɖo togun élɔ́ kpó akɔta ɖě lɛ́ kpó sí; un ɖo sísɛ́ we dó gɔ̌n yětɔn wɛ,
18 bo ná mɔ tɛn dó hun nukún nú yě, lobo ná bló bɔ yě ná gosín ablu mɛ, bo wá wěziza nu, lobo gosín Satáan sín acɛ mɛ, bo wá Mawu gɔ́n. Énɛ́ ɔ, è ná sɔ́ hwɛ yětɔn lɛ́ kɛ yě, bɔ yě ná lɛ́ ɖu gǔ e mɛ e nyí mɛ mímɛ́ gbɔn nǔɖiɖi ɖíɖó nú mì gblamɛ lɛ́ é ná ɖu é.’
19 “Énɛ́ wú ɔ, axɔ́sú Aglípa, un gɔn nǔ wa sɔgbe xá nǔmimɔ énɛ́ ǎ,
20 é nyɔ́ wa ɔ, un dó wɛn ɔ mɛ e ɖo Damási lɛ́ é jɛ nukɔn, bɔ énɛ́ gúdo ɔ, un yi dó mɛ e ɖo Jeluzalɛ́mu lɛ́ é, kpó mɛ e ɖo Judée to ɔ bǐ mɛ lɛ́ é kpó, bo lɛ́ dó mɛ e ɖo akɔta ɖě lɛ́ mɛ lɛ́ é. Un nɔ ɖɔ nú yě ɖɔ hwɛ yětɔn lɛ́ ɖó ná vɛ́ nú yě,* bɔ yě ná lɛ́ kɔ wá Mawu gɔ́n, gbɔn nǔ e jɛxá hwɛvɛ́númɛ* lɛ́ é wiwa gblamɛ.
21 Énɛ́ wú wɛ Jwifu lɛ́ wlí mì ɖo tɛ́npli ɔ mɛ, bo tɛ́n kpɔ́n bo ná hu mì.
22 É ɖo mɔ̌ có, ɖó Mawu d’alɔ mì wútu ɔ, un kpo ɖo kúnnu ɖe nú mɛ e ɖo tɛn kpɛví mɛ lɛ́ é kpó mɛ e ɖo tɛn ɖaxó mɛ lɛ́ é kpó bǐ wɛ, káká jɛ égbé; un ka nɔ ɖɔ nǔɖé zɛ nǔ e ja jijɛ gbé, bɔ gbeyíɖɔ lɛ́ kpó Mɔyízi kpó ɖɔ é wú ǎ;
23 é wɛ nyí ɖɔ Klísu ɔ ɖó ná se wǔvɛ́, bɔ ɖó é wɛ nyí mɛ nukɔntɔn e è ná fɔ́n sín mɛkúkú lɛ́ mɛ é wútu ɔ, é ná jlá mawuxó, bo ná lɛ́ hɛn wěziza wá nú togun élɔ́, kpó mɛ e ɖo akɔta ɖě lɛ́ mɛ lɛ́ é kpó bǐ.”
24 Hwenu e Pɔ́lu ɖo xó énɛ́ lɛ́ ɖɔ dó jɛ hun dó éɖée jí wɛ é ɔ, Fɛsitúsi zé gbe dó jǐ bo ɖɔ: “Taɖu wɛ a hun a Pɔ́lu! A kplɔ́n nǔ káká, b’ɛ ɖo taɖu dó we wɛ!”
25 Pɔ́lu ka ɖɔ: “Un ɖo taɖu hun wɛ ǎ mɛ, Sísíjɛxá Fɛsitúsi; xó nǔgbó wɛ nyí xó e ɖɔ wɛ un ɖe lɛ́ é, bɔ yě lɛ́ xwe ali.
26 Nǔgbó ɔ, axɔ́sú e un vo, bo ɖo xó ɖɔ ná wɛ din é tuun nǔ énɛ́ lɛ́ ganjí; un kú d’é jí ɖɔ é kún dán nǔ énɛ́ lɛ́ kwín ɖokpó ó, ɖó è wa nǔ énɛ́ lɛ́ ɖěbǔ ɖo nǔglɔ́ ǎ.
27 Axɔ́sú Aglípa, a ka ɖi nǔ nú gbeyíɖɔ lɛ́ a? Un tuun ɖɔ a ɖi nǔ nú yě.”
28 Amɔ̌, Aglípa ɖɔ nú Pɔ́lu ɖɔ: “É kpo kpɛɖé, bɔ a ná bló bɔ un ná húzú klisánwun.”
29 Ée é ɖɔ mɔ̌ é ɔ, Pɔ́lu ɖɔ: “Un jló ɖɔ Mawu ní bló, bónú é lín oo, é yá oo, é ní ma nyí hwɛ kɛ́ɖɛ́ ó, loɔ, mɛ e ɖo tó ɖó mì wɛ égbé lɛ́ é bǐ ní húzú klisánwun, lěe nyi lɔ nyí gbɔn é; mi ní ma ka wá mɔ miɖée ɖo gankpá mɛ sín wlɔ élɔ́ lɛ́ mɛ ó.”
30 Énɛ́ ɔ, axɔ́sú ɔ sí te, bɔ tokpɔngán ɔ, Belenísi kpó súnnu ɖěɖěe ɖo ayǐjínjɔ́n xá yě lɛ́ é kpó lɔ wa mɔ̌.
31 Amɔ̌, ée yě ɖidó é ɔ, yě jɛ ɖiɖɔ nú yěɖée lɛ́ jí ɖɔ: “Nya élɔ́ wa nǔ e jɛxá kú alǒ gankpá mɛ é ɖě ǎ.”
32 Aglípa ɖɔ nú Fɛsitúsi ɖɔ: “Ényí nya élɔ́ ma ko vɔ́ hwɛ ylɔ́ bá yi Sezáa nukɔn wɛ ǎ ɔ, è ná ko ɖe è nyi te.”
Tínmɛ e ɖo do lɛ́ é
^ Alǒ “akɔta.”
^ Blǔju tɔn, “nyǐkɔ Jezu Nazalɛ́tinu ɔ tɔn.”
^ Kpo nu xwíɖíxwíɖí e è nɔ zán dó bló bɔ kanlin ɖé nɔ sɛ tɛn ɖidó é wɛ.
^ Kpɔ́n Xógbe ɖé lɛ́ sín tínmɛ: “Hwɛvɛ́númɛ.”
^ Kpɔ́n Xógbe ɖé lɛ́ sín tínmɛ.
