Nǔ e Mɛsɛ́dó lɛ́ wa lɛ́ é 28:1-31
28 Ée mǐ wá agě jí wǔyɛ́yɛ́ afɔyɛ́yɛ́ é ɔ, mǐ se ɖɔ tɔtɛ́ntinto ɔ nɔ nyí Malúti.
2 Ayǐ ɔ jí nu lɛ́* nyɔ́ xomɛ dó mǐ wú b’ɛ zɛ. Yě flɔ́ myɔ, bo yí mǐ bǐ kpó xomɛnyínyɔ́ kpó, ɖó jǐ ɖo jija wɛ bɔ gbɛ mɛ lɛ́ fá wútu.
3 Amɔ̌, ée Pɔ́lu bɛ́ nakí bo kɔn nyi myɔ ɔ mɛ é ɔ, yǒzo ɔ zɔ́n bɔ jakpata ɖé tɔ́n bo tɛ́ dó alɔ tɔn wú.
4 Hwenu e ayǐ ɔ jí nu lɛ́ mɔ dan aɖǐnɔ énɛ́ ɖo Pɔ́lu sín alɔ wú é ɔ, yě jɛ ɖiɖɔ nú yěɖée lɛ́ jí ɖɔ: “É ɖo wɛn ɖɔ mɛhutɔ́ wɛ nú nya élɔ́; é tɔ́n sín xu ɔ mɛ wǔyɛ́yɛ́ afɔyɛ́yɛ́ có, Hwɛjijɔ* lɔn bónú é ná nɔ gbɛ ǎ.”
5 É ɖo mɔ̌ có, é mi dan ɔ dó myɔ ɔ mɛ, nǔ ɖě ka wa éɖésúnɔ ǎ.
6 Yědɛɛ lɛ́ ka ɖo nukún ɖó wɛ ɖɔ Pɔ́lu ná jí, alǒ j’ayǐ bo kú cúɖúɖú. Ée yě nɔ te nú hwenu gěgé, bo mɔ ɖɔ nǔ nyanya ɖě kún wa ɛ ó é ɔ, yě húzú linlin bo jɛ ɖiɖɔ jí ɖɔ nǔmɛsɛn ɖé wɛ n’i.
7 Nya nukúnɖéjí tɔtɛ́ntinto ɔ tɔn sín ayǐkúngban ɖé lɛ́ ka sɛkpɔ́ fínɛ́; è nɔ ylɔ́ nya ɔ ɖɔ Publiwúsi. É yí mǐ, bɔ mǐ nɔ gɔ̌n tɔn nú azǎn atɔn.
8 Publiwúsi sín tɔ́ ka ɖo ayǐmlɔ́mlɔ́ ɖo zan jí ɖó zozo ɖo jǐ tɔn, bɔ é lɛ́ ɖo zɛntí nyɛ wɛ. Pɔ́lu yi gɔ̌n tɔn bo xo ɖɛ, lobo sɔ́ alɔ ɖó jǐ tɔn, bo gbɔ azɔn n’i.
9 Ée nǔ nyí mɔ̌ é ɔ, mɛ e kpo ɖo tɔtɛ́ntinto ɔ mɛ bo ɖo azɔn jɛ wɛ lɛ́ é lɔ jɛ Pɔ́lu gɔ́n wá jí, bɔ é gbɔ azɔn nú yě.
10 Yě lɛ́ wlí yɛ̌yi nú mǐ, bo ná nǔ gěgé mǐ, bɔ ée mǐ ja hǔn sún gbé é ɔ, yě dó nǔ e hudó mǐ lɛ́ é bǐ sín agban nú mǐ.
11 Sun atɔn gúdo ɔ, mǐ dó tɔjíhún ɖé bɔ wuntun “Zewúsi ví lɛ́” tɔn ɖ’é wú ɖo nukɔn. Alɛsándli wɛ tɔjíhún ɔ gosín, bo nɔ tɔtɛ́ntinto ɔ mɛ ɖo avivɔhwenu.
12 Mǐ wá nɔ te ɖo tɔjíhúnglíntɛn Silakúsi tɔn, bo nɔ fínɛ́ nú azǎn atɔn;
13 mǐ gosín fínɛ́, bo wá Hlejío. Ayǐhɔ́ngbe tɔn ɔ, jɔhɔn ɖé nyi sín tofɔligbé, bɔ ɖo azǎn atɔngɔ́ ɔ gbe ɔ, mǐ wá Puzɔ́lu.
14 Mǐ mɔ nɔví lɛ́ ɖo fínɛ́, bɔ yě sa vo nú mǐ ɖɔ mǐ ní nɔ émí gɔ́n nú azǎn tɛ́nwe, bɔ énɛ́ gúdo ɔ, mǐ wlí ali ɖidó Hlɔ̌ma.
15 Ée nɔví e ɖo dɔ̌n lɛ́ é se ɖɔ mǐ jawě é ɔ, yě hun káká wá Apiwúsixi mɛ kpó fí e è nɔ ylɔ́ ɖɔ Jǒnɔyítɛn atɔn lɛ́ é kpó, bo ná kpé mǐ. Ée Pɔ́lu mɔ yě é ɔ, é dó kú nú Mawu bɔ énɛ́ ná ɛ akɔ́nkpinkpan.
16 Wǎgbɔ tɔn ɔ, mǐ wá Hlɔ̌ma, bɔ è ná gbe Pɔ́lu bónú é ná nɔ xwé e éɖésúnɔ xáya é gbe, bɔ sɔ́ja ɖé ná nɔ ɖo cícɔ́ ɛ wɛ.
17 Azǎn atɔn gúdo ɔ, é ylɔ́ mɛ nukúnɖéjí e ɖo Jwifu lɛ́ mɛ lɛ́ é. Ée yě kplé ɖó kpɔ́ é ɔ, é ɖɔ nú yě ɖɔ: “Nɔví ce lɛ́ mi, un wa nǔ ɖě, b’ɛ jɛ agɔ dó togun ɔ alǒ tɔ́gbó mǐtɔn lɛ́ sín hwɛndonúwiwa lɛ́ ǎ có, è wlí mì dó gan mɛ ɖo Jeluzalɛ́mu, bo jó mì nú Hlɔ̌manu lɛ́.
18 Ée yě kan xó byɔ́ mì gúdo é ɔ, yě jló ná ɖe mì nyi te, ɖó yě mɔ nǔ e wú yě ná zɔn dó dó ɖó kúhwɛ nú mì é ɖě ǎ.
19 Amɔ̌, ée Jwifu lɛ́ gbɛ́ é ɔ, un mɔ ɖɔ é ɖo dandan ɖɔ má vɔ́ hwɛ ylɔ́ bá yi Sezáa nukɔn, un ka jló ná dó hwɛ ɖě akɔta ce wútu wɛ ǎ.
20 Hwɛjijɔ énɛ́ wú wɛ un byɔ́ ɖɔ má mɔ mi, bo ɖɔ xó nú mi, ɖó nukúnɖíɖó Izlayɛ́li tɔn wɛ zɔ́n bɔ un ɖo wlɔ élɔ́ mɛ.”
21 Yě ɖɔ n’i ɖɔ: “È sɛ́ wěma ɖě dó mǐ sín Judée bɔ é ɖɔ xó dó wǔ we ǎ, nɔví e gosín dɔ̌n lɛ́ é ɖě ka ɖó gbe ɖé dó wǔ we, alǒ ɖɔ xó nyanya ɖě dó wǔtu towe ǎ.
22 Amɔ̌, mǐ lin ɖɔ é sɔgbe ɖɔ mǐ ní se nǔ e a lin é ɖo nu towe, ɖó mǐ tuun ganjí ɖɔ fí lɛ́ bǐ wɛ è nɔ ɖɔ xó nyanya dó sinsɛngbɛ́ta énɛ́ wú ɖe.”
23 Yě bló tuto bo ná lɛ́ mɔ yěɖée lɛ́ ɖo azǎn ɖěvo jí, bɔ yě mɛ e wá xwé e gbe é nɔ nɔ lɛ́ é sín kɛ́n tlɛ lɛ́ sukpɔ́ d’é jí. Sín zǎnzǎn káká jɛ gbadanu ɔ, é ɖe kúnnu dó Axɔ́súɖuto Mawu tɔn wú mlɛ́mlɛ́, dó tínmɛ xó ɔ nú yě, bo ná dó bló bɔ yě ná ɖi nǔ nú Jezu; Mɔyízisɛ́n ɔ kpó nǔwlánwlán gbeyíɖɔ lɛ́ tɔn lɛ́ kpó wɛ é zán dó wa mɔ̌.
24 Mɛɖé lɛ́ jɛ nǔ ɖi nú xó e é ɖɔ lɛ́ é jí, mɛ ɖěvo lɛ́ ka ɖi nǔ ǎ.
25 Ðó yě ma se nǔ jɛ yěɖée gbe mɛ ǎ wútu ɔ, yě jɛ yiyi jí, bɔ Pɔ́lu ɖɔ xó élɔ́:
“Kpó hwɛjijɔ kpó wɛ gbigbɔ mímɛ́ ɖɔ xó élɔ́ nú tɔ́gbó mitɔn lɛ́ gbɔn gbeyíɖɔ Ezayíi jí;
26 é ɖɔ: ‘Yi ɖɔ nú togun élɔ́ ɖɔ: “Mi ná se nǔgbó, mi ka ná mɔ nukúnnú jɛ mɛ ɖo ali ɖěbǔ nu ǎ; mi ná kpɔ́n nǔgbó, mi ka ná mɔ ɖo ali ɖěbǔ nu ǎ.
27 Ðó togun élɔ́ sín ayi kú atli. Yě se, é ka ɖɔ nǔtí nú yě ǎ. Yě myɔ́ nukún yětɔn lɛ́ bo sú tó yětɔn lɛ́, bo ma wá kpé wú bo mɔ nǔ ɖó nukún yětɔn lɛ́ wú, lobo se nǔ ɖó tó yětɔn lɛ́ wú gbeɖé ó. Mɔ̌ mɛ ɔ, ayi yětɔn mɔ nukúnnú jɛ nǔ e byɔ́ ɖo yě sí wɛ è ɖe é mɛ ǎ, yě ka sɔ́ lɛ́ kɔ wá gɔ̌n ce bónú má gbɔ azɔn nú yě ǎ.”’
28 Énɛ́ wú ɔ, mi ní bo tuun ɖɔ è ko sɛ́ hwlɛngán énɛ́ e gosín Mawu gɔ́n é dó mɛ e ɖo akɔta ɖě lɛ́ mɛ lɛ́ é; é ɖo wɛn ɖɔ yědɛɛ lɛ́ ná ɖótó.”
29 * ——
30 É nɔ fínɛ́ nú xwe we blěbú, ɖo xwé e éɖésúnɔ xáya é gbe, bo nɔ yí mɛ e nɔ wá gɔ̌n tɔn lɛ́ é bǐ kpó xomɛnyínyɔ́ kpó.
31 É nɔ vo* tawun, bo nɔ jlá Axɔ́súɖuto Mawu tɔn mɛ lɛ́, bo nɔ lɛ́ kplɔ́n nǔ mɛ lɛ́ dó Aklúnɔ Jezu Klísu wú; nǔ ɖěbǔ nɔ sú ali dó è ǎ.
Tínmɛ e ɖo do lɛ́ é
^ Alǒ “Mɛ e nɔ dó jǒnɔgbe lɛ́ é.”
^ Dǐkɛ ɖo Glɛ̌kigbe mɛ; xókwín énɛ́ sixú ko nɔ dó gesí nǔmɛsɛn nyɔ̌nu e nɔ bló bɔ è ma nɔ xo gló tódɔnnúmɛ e hwɛjijɔ nɔ byɔ́ é ǎ é.
^ Alǒ “gbó adɔ.”
