Nǔ e Mɛsɛ́dó lɛ́ wa lɛ́ é 3:1-26
3 Din ɔ, Piyɛ́ɛ kpó Jaan kpó xwe tɛ́npli ɔ mɛ ɖo gan atɔn mɛ hwemɛ mɔ̌,* bo ná yi xo ɖɛ hwelɛ́kɔ tɔn.
2 È sɔ́ nya e è ji afɔkponɔ tɔn é ɖé wá. È nɔ sɔ́ ɛ ɖó hɔntogbó tɛ́npli ɔ tɔn e è nɔ ylɔ́ ɖɔ Hɔntogbó ɖɛkpɛ ɖɛkpɛ é kpá gbe bǐ gbe, bónú é ná dó sixú byɔ́ nǔ mɛ e jló ná byɔ́ tɛ́npli ɔ mɛ lɛ́ é.
3 Ée é mɔ Piyɛ́ɛ kpó Jaan kpó bɔ yě ja tɛ́npli ɔ mɛ byɔ́ gbé é ɔ, é jɛ nǔ byɔ́ yě jí.
4 Amɔ̌, Piyɛ́ɛ kpó Jaan kpó kpɔ́n ɛ dáán, bɔ Piyɛ́ɛ ɖɔ: “Kpɔ́n mǐ.”
5 Énɛ́ ɔ, é jɛ yě kpɔ́n jí, bo vɛdó ɖɔ yě ná ná nǔɖé émí wɛ sín.
6 Piyɛ́ɛ ka ɖɔ: “Un ɖó kpatágan kpó siká kpó ǎ, amɔ̌, nǔ e un ɖó é ɔ, un ná ná we. Ðo Jezu Klísu Nazalɛ́tinu ɔ nyíkɔ mɛ ɔ, ɖi zɔnlin!”
7 Ée é ɖɔ mɔ̌ é ɔ, é hɛn ɖisílɔ nya ɔ tɔn bo sɔ́ ɛ sí te. Tlóló ɔ, afɔ tɔn lɛ́ kpó afɔgómɛ tɔn lɛ́ kpó syɛ́n;
8 bɔ é lɔ́n ɖo afɔ tɔn lɛ́ jí, bo jɛ zɔnlin ɖi jí, bo xwedó yě byɔ́ tɛ́npli ɔ mɛ; é ɖo zɔnlin ɖi wɛ, bo ɖo lǐnlɔ́n wɛ, lobo ɖo susu kpa nú Mawu wɛ.
9 Mɛ lɛ́ bǐ mɔ ɛ bɔ é ɖo zɔnlin ɖi wɛ, bo ɖo susu kpa nú Mawu wɛ.
10 Énɛ́ ɔ, yě mɔ nǔ jɛ wú ɖɔ nya e nɔ nɔ ayǐjínjɔ́n, bo nɔ byɔ́ nǔ ɖo hɔntogbó tɛ́npli ɔ tɔn e è nɔ ylɔ́ ɖɔ Hɔntogbó ɖɛkpɛ ɖɛkpɛ é jí é wɛ, bɔ mɔ e yě mɔ ɛ b’ɛ ɖo zɔnlin ɖi wɛ é kpácá yě tawun, lobɔ awǎjijɛ yětɔn túnflá.
11 Nya ɔ kpo ɖo títɛ́dó Piyɛ́ɛ kpó Jaan kpó wú wɛ, bɔ mɛ lɛ́ bǐ zɔn kpɔ́ bo fyá wá gɔ̌n yětɔn ɖo fí e è nɔ ylɔ́ ɖɔ Salomɔ́ɔ sín agba jí é, bɔ nǔ ɔ kpácá yě tawun.
12 Ée Piyɛ́ɛ mɔ mɔ̌ é ɔ, é ɖɔ nú mɛ lɛ́ ɖɔ: “Izlayɛ́li ví è mi, aniwú nǔ énɛ́ ka jí wǔ nú mi sɔmɔ̌? Étɛ́wú mi ka ɖo mǐ kpɔ́n wɛ cí nǔ ɖɔ hlɔ̌nhlɔ́n mǐɖésúnɔ tɔn, alǒ gbejí e mǐ ɖe nú Mawu é wɛ zɔ́n, bɔ mǐ bló bɔ nya ɔ ɖi zɔnlin ɖɔhun?
13 Mawu Ablaxámu tɔn, Mawu Izáki tɔn, Mawu Jakɔ́bu tɔn, Mawu tɔ́gbó mǐtɔn lɛ́ tɔn xɔ susu nú mɛsɛntɔ́ tɔn Jezu, ée mi jó nú Pilátu, bo gbɛ́ ɛ ɖo nukɔn tɔn é. Pilátu tlɛ jló ná ɖe è nyi te có, mi wa mɔ̌.
14 Ɛɛn, mi gbɛ́ mɛ énɛ́ e nyí mɛ mímɛ́ bo lɛ́ nyí nǔjlɔ́jlɔ́watɔ́ é. Mi byɔ́ ɖɔ è ní ɖe nya e nyí mɛhutɔ́ é nyi te nú émí,
15 bo ka hu Afɔsɔ́ɖótetɔ́gán gbɛ tɔn ɔ. Amɔ̌, Mawu fɔ́n ɛ sín kú, bɔ mǐ nyí kúnnuɖetɔ́ énɛ́ tɔn.
16 Nyǐkɔ tɔn kpó nǔ e mǐ ɖi nú nyǐkɔ tɔn é kpó mɛ wɛ gǎn wá nya élɔ́ e mɔ wɛ mi ɖe bo lɛ́ tuun é wú ɖe. Nǔ e mǐ ɖi gbɔn gbla tɔn mɛ é zɔ́n bɔ azɔn gbɔ nú nya élɔ́ bǐ mlɛ́mlɛ́ ɖo mi bǐ nukɔn.
17 Din ɔ, nɔví lɛ́ mi, un tuun ɖɔ manywɛ́ mɛ wɛ mi wa mɔ̌ ɖe, lěe nukɔntɔ́ mitɔn lɛ́ lɔmɔ̌ wa gbɔn é.
18 Amɔ̌, ɖo ali énɛ́ nu ɔ, Mawu bló bɔ nǔ e é ko ɖɔ jɛ nukɔn gbɔn gbeyíɖɔ lɛ́ bǐ jí é jɛnu, énɛ́ wɛ nyí ɖɔ Klísu ɔ ná se wǔvɛ́.
19 “Hǔn, hwɛ mitɔn lɛ́ ní vɛ́ nú mi,* bónú mi ní lɛ́ kɔ wá Mawu gɔ́n, mɔ̌ mɛ ɔ, è ná súnsún hwɛ mitɔn lɛ́, bónú kɔfánúmɛ sín hwenu lɛ́ ní dó sixú gosín Jexóva* ɖésúnɔ gɔ́n wá nú mi,
20 lobonú é ná sɛ́ Klísu e é sɔ́ é dó, dó ta mitɔn mɛ; mɛ énɛ́ wɛ nyí Jezu.
21 É ɖó ná nɔ te ɖo jǐxwé hwɛ̌, káká jɛ nǔ lɛ́ bǐ jíjláɖó, éé xó Mawu ɖɔ gbɔn gbeyíɖɔ tɔn mímɛ́ hwexónu tɔn lɛ́ jí é hwenu.
22 Nǔgbó ɔ, Mɔyízi ɖɔ: ‘Jexóva* Mawu mitɔn ná sɔ́ gbeyíɖɔ nyiɖɔhun ɖokpó nú mi ɖo nɔví mitɔn lɛ́ mɛ. Mi ɖó ná ɖótó nǔ ɖěbǔ e é ná ɖɔ nú mi é.
23 Mɛ* ɖěbǔ e ma ná ɖótó gbeyíɖɔ énɛ́ ǎ é ɔ, è ná sú kún dó n’i bǐ mlɛ́mlɛ́ sín togun ɔ mɛ.’
24 Gbeyíɖɔ lɛ́ bǐ, bɛ́sín Samuwɛ́li jí, káká jɛ mɛ e bɔ dó wǔ tɔn lɛ́ é jí, ɛɛn, yě mɛ tobutóbú e ɖɔ nǔ ɖ’ayǐ lɛ́ é lɔmɔ̌ ɖɔ azǎn élɔ́ lɛ́ sín xó nyi wɛn.
25 Gbeyíɖɔ lɛ́ sín vǐ wɛ mi nyí, bo lɛ́ ɖu akɔ e Mawu jɛ xá tɔ́gbó mitɔn lɛ́ é sín gǔ. É ɖɔ nú Ablaxámu ɖɔ: ‘Bɔ hɛ̌nnu e ɖo ayǐkúngban jí lɛ́ é bǐ ná mɔ nyɔ̌ná gbɔn kúnkan* towe gblamɛ.’
26 Ée Mawu sɔ́ mɛsɛntɔ́ tɔn gúdo é ɔ, é sɛ́ ɛ dó midɛɛ lɛ́ jɛ nukɔn, bónú é ná kɔn nyɔ̌ná dó mi jí, gbɔn alɔ dídó mi mɛ ɖokpó ɖokpó, bónú mi ná lɛ́ kɔ sín nǔnyanyawiwa gúdo gblamɛ.”
Tínmɛ e ɖo do lɛ́ é
^ Blǔju tɔn, “ɖo ganxixo tɛ́nnɛgɔ́ ɔ mɛ.”
^ Kpɔ́n Xógbe ɖé lɛ́ sín tínmɛ: “Hwɛvɛ́númɛ.”
^ Alǒ “Lǐndɔ̌n.”
^ Blǔju tɔn, “kún.”
