Wɛn ɖagbe Luki tɔn 15:1-32

Nǔjlɛ́dónǔwú dó lɛ̌ngbɔ́ e bú é wú (1-7)
Nǔjlɛ́dónǔwú dó gankwɛ́ e bú é wú (8-10)
Nǔjlɛ́dónǔwú dó vǐ súnnu e bú é wú (11-32)

15 Din ɔ, tokwɛ́yítɔ́ lɛ́ kpó hwɛhutɔ́ lɛ́ kpó nɔ xo yěɖée kplé lɛ́ lɛ̌ dó è bo ná ɖótó è. ² Bɔ Falizyɛn lɛ́ kpó sɛ́nkplɔ́nmɛtɔ́ lɛ́ kpó nɔ ɖo nǔ húnhún ɖɔ wɛ, bo nɔ ɖɔ: “Nya élɔ́ nɔ yí hwɛhutɔ́ lɛ́ bo nɔ ɖu nǔ xá yě.” ³ Énɛ́ wú ɔ, é ná nǔjlɛ́dónǔwú élɔ́ yě: ⁴ “Mɛ̌ ka ɖo mi mɛ bo ná ɖó lɛ̌ngbɔ́ 100, bɔ ényí é hɛn ɖokpó bú ɔ, é ma ná jó 99 e kpo lɛ́ é dó nyi amagbo* mɛ, bo ná yi ba ɖokpó e bú é káká bo ná mɔ ɛ ǎ? ⁵ Ée é mɔ ɛ é ɔ, é sɔ́ ɛ dó kɔlivla mɛ bo j’awǎ. ⁶ Bɔ hwenu e é wá xwégbe é ɔ, é ylɔ́ xɔ́ntɔn tɔn lɛ́ kpó nɔzo tɔn lɛ́ kpó kplé bo ɖɔ nú yě ɖɔ: ‘Mi j’awǎ xá mì, ɖó un ko mɔ lɛ̌ngbɔ́ ce e bú é.’ ⁷ Má ɖɔ nú mi, ɖo ali ɖokpó ɔ nu ɔ, awǎ e è ná jɛ ɖo jǐxwé dó hwɛhutɔ́ ɖokpó e hwɛ tɔn lɛ́ vɛ́ ná* é tamɛ é, ná hú ée è ná jɛ dó nǔjlɔ́jlɔ́watɔ́ 99 e ma ɖó hudó hwɛvɛ́númɛ* tɔn ǎ lɛ́ é tamɛ é. ⁸ “Alǒ nyɔ̌nu tɛ́ ka ná ɖó dlǎkumu* wǒ, bɔ ényí é hɛn dlǎkumu* lɛ́ ɖokpó bú ɔ, é ma ná tá zogbɛ́n bo za xwé tɔn gbe, lobo ba kpó sɔxwixwe kpó káká bo ná mɔ ǎ? ⁹ Ée é mɔ é ɔ, é ylɔ́ xɔ́ntɔn tɔn lɛ́* kpó nɔzo tɔn lɛ́ kpó kplé bo ɖɔ: ‘Mi j’awǎ xá mì, ɖó un ko mɔ dlǎkumu* e un hɛn bú é.’ ¹⁰ Má ɖɔ nú mi, ɖo ali ɖokpó ɔ nu ɔ, wɛnsagun Mawu tɔn lɛ́ nɔ j’awǎ dó hwɛhutɔ́ ɖokpó, ée hwɛ tɔn lɛ́ vɛ́ ná* é tamɛ.” ¹¹ Énɛ́ gúdo ɔ, é ɖɔ: “Nya ɖé ɖó vǐ súnnu we. ¹² Mɛ kpɛví ɔ ɖɔ nú tɔ́ tɔn ɖɔ: ‘Tɔ́ ce, nǎ gǔ e ɖó ná nyí ce é mì.’ Énɛ́ ɔ, é má nǔɖókan tɔn lɛ́ nú yě. ¹³ Azǎn yɔywɛ ɖé gúdo ɔ, mɛ kpɛví ɔ xo nǔ e nyí étɔn lɛ́ é bǐ kplé bo yi to línlín ɖé mɛ. Ðo fínɛ́ ɔ, é zán gǔ tɔn dó akpa mɛ, gbɔn gbɛ hannyahannya zínzán gblamɛ. ¹⁴ Ée é ko zán nǔ lɛ́ bǐ gúdo é ɔ, adɔ ɖaxó ɖé tɔ́n gbɔn to ɔ bǐ mɛ, bɔ é sɔ́ ɖó nǔtí ǎ. ¹⁵ É tlɛ yi jɛ kɔ nú toví to ɔ tɔn lɛ́ ɖokpó, bɔ é sɛ́ ɛ dó gle tɔn mɛ bónú é ná nyi aglǔza n’i. ¹⁶ É nɔ jló tawun bo ná ɖu nǔ e aglǔza lɛ́ nɔ ɖu é, amɔ̌, mɛ ɖěbǔ nɔ ná ɛ nǔɖé ǎ. ¹⁷ “Hwenu e é byɔ́ éɖée mɛ é ɔ, é ɖɔ: ‘Azɔ̌watɔ́ tɔ́ ce tɔn lɛ́ ɖó nǔɖuɖu kɔn nyi kpɔ́, bɔ nyɛ ka ɖo fí bo ɖo adɔ kú wɛ. ¹⁸ Un ná sí te bo yi tɔ́ ce gɔ́n lobo ɖɔ n’i ɖɔ: “Tɔ́ ce, un hu hwɛ dó Mawu e ɖo jǐxwé é, bo hu hwɛ dó we. ¹⁹ Un sɔ́ jɛxá bónú è ná ylɔ́ mì ɖɔ vǐ* towe ǎ. Sɔ́ mì dó ɖó azɔ̌watɔ́ towe.”’ ²⁰ Énɛ́ wú ɔ, é sí te bo yi tɔ́ tɔn gɔ́n. Hwenu e é kpo ɖo zɔ dó xwé ɔ é ɔ, tɔ́ tɔn mɔ ɛ sɛ́dó, bɔ nǔ tɔn blá wǔ n’i. É kán wezun bo yi kpl’así kɔ n’i, lobo kí si n’i kpó wǎnyíyí kpó. ²¹ Énɛ́ gúdo ɔ, vǐ ɔ ɖɔ n’i ɖɔ: ‘Tɔ́ ce, un hu hwɛ dó Mawu e ɖo jǐxwé é, bo hu hwɛ dó we. Un sɔ́ jɛxá bónú è ná ylɔ́ mì ɖɔ vǐ towe ǎ.’ ²² Amɔ̌, tɔ́ ɔ ɖɔ nú mɛsɛntɔ́ tɔn lɛ́ ɖɔ: ‘Mi yá wǔ sɔ́ awu gaga e nyɔ́ hú gǎn é bo dó n’i, mi dó alɔkɛ́ n’i, bo dó afɔkpa n’i. ²³ Gɔ́ ná ɔ, mi yi sɔ́ nyibúsú wínnyáwínnyá e dó jǒ é wá bo hu, lobonú mǐ ní ɖu nǔ bo j’awǎ, ²⁴ ɖó vǐ súnnu ce élɔ́ ko kú, amɔ̌, é lɛ́ wá gbɛ; é ko bú bɔ è ko lɛ́ mɔ ɛ.’ Énɛ́ ɔ, yě jɛ awǎ jɛ jí. ²⁵ “Hwenɛ́nu ɔ, vǐ súnnu mɛxó ɔ ɖo gle mɛ, bɔ ée é lɛ́ kɔ bo sɛkpɔ́ xwé ɔ é ɔ, é se bɔ è ɖo nǔ xo wɛ bo ɖo we ɖú wɛ. ²⁶ Énɛ́ wú ɔ, é ylɔ́ mɛsɛntɔ́ lɛ́ ɖokpó bo kan nǔ e ɖo jijɛ wɛ é byɔ́ ɛ. ²⁷ Mɛsɛntɔ́ ɔ ɖɔ n’i ɖɔ: ‘Nɔví towe wɛ lɛ́ kɔ wá, bɔ tɔ́ towe hu nyibúsú wínnyáwínnyá e dó jǒ é, ɖó é mɔ ɛ ɖo ganjí ɖo agbaza mɛ* wútu.’ ²⁸ Amɔ̌, xomɛ sin i bɔ é gbɛ́ ɖɔ émí kún ná byɔ́ xwégbe ó. Énɛ́ wú ɔ, tɔ́ tɔn tɔ́n bo jɛ vo sa n’i jí. ²⁹ É yí gbe nú tɔ́ tɔn ɖɔ: ‘Un ko sɛn we nú xwe mɔ̌kpán, bo ka tlí tó nú we kpɔ́n gbeɖé ǎ, loɔ, a ka ná mì gbɔ̌ ɖokpó kpɔ́n gbeɖé, bónú nyi kpó xɔ́ntɔn ce lɛ́ kpó ná ɖu dó j’awǎ ǎ. ³⁰ Amɔ̌, tlóló e vǐ súnnu towe énɛ́, éé zán nǔɖókan towe lɛ́ dó akpa mɛ xá tonyatɔ́ lɛ́ é wá é ɔ, a hu nyibúsú wínnyáwínnyá e dó jǒ é dó ta tɔn mɛ.’ ³¹ Tɔ́ ɔ ka ɖɔ n’i ɖɔ: ‘Vǐ súnnu ce, a ɖo kpɔ́ xá mì hwebǐnu, bɔ nǔ e nyí ce lɛ́ é bǐ wɛ nyí towe. ³² Amɔ̌, é ɖo dandan ɖɔ mǐ ní ɖu agɔ̌ bo j’awǎ, ɖó nɔví súnnu towe ko kú, é ka lɛ́ wá gbɛ; é ko bú bɔ è ko lɛ́ mɔ ɛ.’”