NǓKANBYƆ́ 2
Nɛ̌ a ka sixú kplɔ́n nǔ dó Mawu wú gbɔn?
“Ma nɔ gɔn sɛ́nwéma élɔ́ xa gbeɖé ó. Nɔ lin tamɛ d’é wú zǎn kpó kéze kpó, bo nɔ bló nǔ e è ɖɔ d’é mɛ ɔ bǐ ɖ’é jí. Énɛ́ ɔ, a sɔ́ nǔɖé bo ná wa ɔ, a ná mɔ nu tɔn. Lěe nǔ ná nyɔ́ nú we gbɔn ɔ nɛ́.”
Jozuwée 1:8
“Yě nɔ hun ɖɛ̌ bo nɔ xa Mawusɛ́n ɔ céɖécéɖé, bo nɔ tínmɛ, bónú mɛ ɖokpó ɖokpó ná mɔ nǔ jɛ nǔ e è xa é mɛ.”
Nɛɛmíi 8:8
‘Nǔ nyɔ́ nú gbɛtɔ́ e ma nɔ xwedó nǔkplɔ́nmɛ mɛdídá lɛ́ tɔn ǎ é. Loɔ, nǔ e é nɔ yí wǎn ná ɔ wɛ nyí kplɔ́n Jexóva tɔn, bo nɔ ɖo tamɛ lin d’é wú wɛ zǎn kéze. Nǔ e é nɔ wa ɔ bǐ nɔ nyɔ́ n’i.’
Ðɛhan 1:1-3
“Filípu kán wezun, bo sɛkpɔ́ kɛkɛ́ví ɔ, bo se bɔ agooɖojǐe ɔ ɖo gbeyíɖɔ Ezayíi sín wěma xa dó aga wɛ. Bɔ Filípu ɖɔ: ‘A ka mɔ nukúnnú jɛ nǔ e xa wɛ a ɖe é mɛ a?’ É ɖɔ: ‘Ényí mɛɖé ma d’alɔ mì ǎ ɔ, nɛ̌ un ka sixú mɔ nukúnnú jɛ mɛ gbɔn?’”
“È nɔ mɔ jijɔ tɔn e gbɛtɔ́ ma sixú mɔ ǎ lɛ́ é gannaganna sín hwenu e é dá gbɛ ɔ é, ɖó yě jɛ wě ɖo nǔ e é bló lɛ́ é mɛ; è tlɛ nɔ mɔ hlɔ̌nhlɔ́n tɔn mavɔmavɔ ɔ kpó Mawu e é nyí é kpó; énɛ́ wú ɔ, yě sɔ́ sixú ba hwɛjijɔ ǎ.”
“Nɔ lin tamɛ dó nǔ énɛ́ lɛ́ jí; sɔ́ hwiɖée bǐ jó ná, bónú mɛ bǐ ní dó sixú mɔ nǔ jɛ nukɔnyiyi towe wú bǐ mlɛ́mlɛ́.”
“Mi nú nǔ mǐɖée lɛ́ tɔn ní nɔ ɖu ayi mɛ nú mǐ, bónú mǐ ná dó flɔ́ wǎnyíyí kpó azɔ̌ ɖagbe wiwa kpó sín zo dó lanmɛ nú mǐɖée lɛ́. Mǐ ní ma nɔ gɔn kplé mǐtɔn lɛ́ . . . ó.”
“Ényí nǔnywɛ́ hwedó mɛɖé ɖo mi mɛ hǔn, ní fɔ́n bo ɖo byɔ̌byɔ́ Mawu wɛ, ɖó é nɔ hun alɔ dó ná nǔ mɛ bǐ, é ka nɔ dó hwɛ mɛ ǎ; énɛ́ ɔ, Mawu ná ná ɛ.”
