Sín 2018 ɔ, xóta ɖokpo jɛn xójlawema mɛ bǐ tɔn mǐtɔn lɛ ɖokpo ɖokpo nɔ gbajɛ̌mɛ na. Xójlawema enɛ lɛ bǐ wɛ ɖò Azɔ̌wanúgbá Mɛkplɔnkplɔn tɔn mǐtɔn mɛ. Enɛ wu ɔ, mǐ sixu zán ye ɖò kúnnuɖegbé. Enyi mǐ ɖò tomɛ yì wɛ, alǒ xwè axi xwlé gbé mɔ̌ ɔ, mǐ sixu lɛ́ hɛn xójlawema kpɛɖé. È sɔnǔ nú xójlawema lɛ nú è na zán ye dó kplɔ́n Biblu xá mɛ ǎ, amɔ̌, ye sixu bló bɔ mɛɖé na jló na kplɔ́n nǔ dó Mawu wu d’eji.

Nú a jɛ xó ɖɔ xá mɛ ɔ jí gudo hǔn, mǎ wemafɔ ɖokpo xá mɛ ɔ, bo ɖɔ xó dó xójlawema e sixu dɔn ɛ é ɖé wu xá ɛ. Ði kpɔ́ndéwú ɔ, enyi nǔ e kan xwédo lɛ é wu wɛ é ɖɔ xó dó, alǒ xwi ɖí xá wuvɛ̌, abǐ tagba ɖé wɛ é ɖè ɔ, a sixu ɖɔ: “Un xà xóta ɖagbe ɖé agaɖanu dìn, b’ɛ ɖɔ xó d’ewu. Un sixu xlɛ́ we à?” Nú mɛ ɔ ɖè jlǒ xlɛ́ ɔ, é na bo tlɛ nyí azɔn nukɔntɔn ɖɔ xó wɛ mi ɖè ɔ, a sixu sɔ́ xójlawema e è zín é ɖokpo n’i, alǒ sɛ́dó è gbɔn alokan jí. Nǔgbo wɛ ɖɔ xójlawema lɛ mímá wu wɛ mǐ nɔ yì kúnnuɖegbé ǎ, amɔ̌, ye sixu d’alɔ mǐ bɔ mǐ na tuùn mɛ ɖěɖee ɖò gbesisɔmɛ bo na wà nǔ sɔgbe xá nǔ e ye kplɔ́n lɛ é é.—Mɛ 13:48, nwt.