Tagba gbè bǐ gbè tɔn tɛ lɛ ɖí xwi xá wɛ a ka ɖè? Tatɔ́ xwédo tɔn e ɖò tintɛnkpɔn bá kpé nukún dó azɔ̌ gegě wu é ɖé wɛ nú we à? Mɛjitɔ́ goɖokponɔ e ɖò tintɛnkpɔn bá kpé nukún dó xwédo tɔn wu é ɖé wɛ nú we à? Mɛ winnyawinnya e gbɛ̌ tɔn lɛ ɖò kɔ gbidí na ɖò wemaxɔmɛ é ɖé wɛ nú we à? Lanmɛ ma ɖò ganji alǒ mɛxoxwe ɖò tagba dó nú we wɛ à? Mɛ bǐ wɛ nɔ ɖí xwi xá wuvɛ̌ ɖé. Klisanwun gegě nɔ ɖí xwi xá wuvɛ̌ gegě hwe ɖokpo ɔ nu. É ɖò mɔ̌ có, mǐ tuùn ɖɔ zaanɖé dìn ɔ, Jehovah na ɖè wuvɛ̌ enɛ lɛ bǐ síìn nú mǐ.—2Kɔ 4:16-18.

Kaka jɛ hwenɛnu ɔ, tuùn e mǐ tuùn ɖɔ Jehovah nɔ mɔ nǔ jɛ tagba e ɖí xwi xá wɛ mǐ ɖè lɛ é mɛ, ɖɔ gbejininɔ mǐtɔn kpo didɛ mǐtɔn kpo nɔ sù nukún tɔn mɛ, bɔ é lɛ́ ɖó nyɔna lɛ ɖò sɛxwetɛn nú mǐ é sixu dó gbɔ nú mǐ. (Jel 29:11, 12) Nǔ mǐtɔn nɔ ɖu ayi mɛ nú Jezu lɔ tawun. Ee mǐ na ɖò Klisanwun sín azɔ̌ mǐtɔn lɛ wà wɛ é ɔ, mǐ sixu ɖeji dó xó tɔn elɔ wu: “Un ɖò kpɔ́ xá mi.” (Mt 28:20) Enyi mǐ nɔ yì agbɔ̌n jí bo nɔ lin tamɛ dó mɛɖéesijijɛ sɔgudo tɔn e mǐ na ɖó ɖò Axɔ́suɖuto Mawu tɔn glɔ́ é jí ɔ, enɛ nɔ na hlɔnhlɔn nukúnɖiɖó mǐtɔn kpo kán e mǐ kánɖeji bo na dɛ ɖò tagba dìn tɔn lɛ nu é kpo.—Hlɔ 8:19-21.

KPƆ́N VIDEO ÐÓ JƆHƆN ÐAXÓ Ɔ ÐÒ SISƐKPƆ́ WƐ WUTU Ɔ, SƆ́ AYI TOWE BǏ ÐÓ JEZU JÍ!: NYƆNA AXƆ́SUÐUTO Ɔ TƆN E JA LƐ É Ɔ, ENƐ GUDO HǓN, NǍ XÓSIN NÚ NǓKANBYƆ ELƆ LƐ:

• Nɛ̌ gbɛtɔ́ lɛ ka jɛ zɔ nú Mawu gbɔn? Etɛ mɛ enɛ ka tɔ́n kɔ dó?

• Sɔgudo tɛ ka ɖò te kpɔ́n mɛ ɖěɖee nɔ nɔ gbeji nú Jehovah lɛ é?

• Etɛ ka zɔ́n bɔ sɔgudo ɖaaɖagbe enɛ dó sixu nyɔ́ bló?

• Gbɛ̀ yɔyɔ̌ e sín akpá è dó é sín nyɔna tɛ lɛ ɖó nukún wɛ a ka ɖè kpo akpakpa sɔ́ mɛ kpo?