Mǐ nɔ zán hlɔ̌nhlɔ́n mǐtɔn kpó nǔnywɛ́ kpó hwenu e mǐ nɔ nya nǔɖé lɛ́ gbé ɖo sinsɛnzɔ́ Jehovah tɔn mɛ é. (1Kɔ 9:26) Nǔɖé lɛ́ gbé nyinya nɔ d’alɔ mǐ bɔ mǐ nɔ zán hwenu e kpo nú mǐ cóbɔ gbɛ élɔ́ ná wá vivɔnu é ganjí. (Efɛ́ 5:15, 16) Xwe sinsɛnzɔ́ tɔn ɖokpó ɖokpó, éé nɔ bɛ́sín 1^er septembre jɛ 31 août xwe mɛ xwe mɛ é, nyí ali ɖagbe ɖé bɔ è ná nya nǔ yɔ̌yɔ́ lɛ́ gbé. Ðo sinsɛn-bíbló xwédo tɔn hwenu ɔ, étɛ́wú mi ma ka ná bló tuto bó ná nya nǔɖé lɛ́ gbé ɖo xwe sinsɛnzɔ́ tɔn e ja é mɛ ǎ? Bó ná dó d’alɔ mi ɔ, xóta ɖé lɛ́ ɖo kplé sín azɔ̌wéma élɔ́ mɛ bó ɖɔ xó dó nǔ e gbé mi sixú nya é gěgé wú, bɔ mi ná lin tamɛ dó yě jí, bó lɛ́ xo ɖɛ dó yě tamɛ.—Ja 1:5.

Ði kpɔ́ndéwú ɔ, xwédo ɔ bǐ ka sixú w’azɔ̌ ɖó kpɔ́ bɔ é hwe bǐ ɔ, mɛ ɖokpó vɔ́vɔ́ ná nyí gběxosín-alijítɔ́ hwebǐnu tɔn a? Ényí a ma gán jɛ wú ɖɔ émí ná sixú mɔ ganmɛ e è byɔ́ é ǎ ɔ, ɖɔ xó xá gběxosín-alijítɔ́ éé ɖo ninɔmɛ towe ɖɔhun mɛ lɛ́ é. (Nǔx 15:22) Bóyá a tlɛ sixú kan nǔ byɔ́ gběxosín-alijítɔ́ ɖé ɖo sinsɛn-bíbló xwédo tɔn mitɔn hwenu. Énɛ́ gúdo hǔn, wlǎn tuto e a sixú xwedó lɛ́ é ɖ’ayǐ. Ényí a ko nyí gběxosín- alijítɔ́ wá yi kpɔ́n hǔn, kpɔ́n ɖɔ ninɔmɛ e mɛ a ɖe din é ka sixú zɔ́n bɔ é ná lɛ́ kpa we a jí.

Mɛ e ɖo xwédo towe mɛ lɛ́ é ɖě ka sixú nyí gběxosín-alijítɔ́ alɔgɔ́tɔ́ nú sun ɖokpó alǒ hú mɔ̌ a? Ényí a ma ɖó hlɔ̌nhlɔ́n sukpɔ́ ǎ ɔ, a sixú nyí gběxosín-alijítɔ́ alɔgɔ́tɔ́ bó ná nɔ zán hwenu kléwún ɖé ɖo sinsɛnzɔ́ ɔ mɛ ɖo azǎn ɖokpó ɖokpó jí. Ényí a ma ɖó táan sukpɔ́ bó ná wa sinsɛnzɔ́ ɔ ɖo aklúnɔzángbla tɛ́ntin ǎ, ɖó a nɔ w’azɔ̌ hwebǐnu alǒ a nɔ yi wěmaxɔmɛ wútu ɔ, vlafo a sixú sɔ́ sun e mɛ gbɔjɛyíyí ɖe é ɖé alǒ sun e mɛ aklúnɔzángbla fífó atɔ́ɔ́n ɖe é ɖé. Wlǎn hwenu e a jló ná húzú gběxosín-alijítɔ́ alɔgɔ́tɔ́ é ɖ’ayǐ dó nǔɖé jí, bó lɛ́ wlán tuto e a jló ná xwedó é lɔ ɖ’ayǐ.—Nǔx 21:5.

KPƆ́N VIDEO KPANKƆ́N . . . GBĚXOSÍN-ALIJÍTƆ́ Ɔ, ÉNƐ́ GÚDO HǓN, NǍ XÓSIN NÚ NǓKANBYƆ́ ÉLƆ́:

• Nɛ̌ Jehovah ka kpé nukún dó nɔví nyɔ̌nu Aamand wú gbɔn? Étɛ́ énɛ́ ka kplɔ́n mǐ?