NǓ E WU É ÐÒ TAJI É: Xó Mawu tɔn kplɔnkplɔn mǐɖesunɔ nɔ d’alɔ mǐ bɔ mǐ nɔ “mɔ nukúnnú jɛ” lee nǔgbo ɔ “gbló sɔ́ é, lee é ɖiga sɔ é, lee é yì jǐ sɔ́ é, kpodo lee é gɔ́ngɔ́n sɔ́ é kpo” wu bǐ mlɛ́mlɛ́. (Efɛ 3:18) É nɔ lɛ́ d’alɔ mǐ bɔ mǐ nɔ kpó ɖò mimɛ̌ jí, bɔ è nɔ mɔ blɔ̌ ɖebǔ ɖò mǐ wu ɖò gbɛ̀ nyanya elɔ mɛ ǎ, lobo nɔ lɛ́ zɔ́n bɔ mǐ “nɔ tɛ́dó xó e nɔ na gbɛ̀ mɛ é wu majomajo.” (Fili. 2:15, 16, nwt) Xó Mawu tɔn kplɔnkplɔn mǐɖesunɔ nɔ hun ali nú mǐ bɔ mǐ nɔ cyan azɔ̌wanú e sín hudo mǐ ɖó lɛ é. Etɛ mǐ ka sixu wà bɔ Biblu xixa kpo kplɔnkplɔn tɔn kpo na hɛn lè gegě wá nú mǐ?

LEE È SIXU BLÓ GBƆN É:

• Ðǒ wuntun wemafɔ lɛ ɖò Biblu nǔkplɔnkplɔn tɔn towe mɛ, é sixu nyí wemanɔ, alokan jí tɔn, alǒ tablɛti jí tɔn, lobo lɛ́ wlan nǔ klewun klewun lɛ d’emɛ

• Kan nǔ elɔ lɛ byɔ hwiɖée hwenu e a ɖò Xó Mawu tɔn xà wɛ é: ‘Mɛ̌? Etɛ? Hwetɛnu? Fitɛ? Etɛwu? Nɛ̌?’

• Ba dò nú nǔ e jɛ lɛ é. Zǎn azɔ̌wanú dobanúnǔ tɔn e ɖè lɛ é dó ba dò nú nǔ sɔgbe xá xóta lɛ alǒ wemafɔ Biblu tɔn lɛ

• Lin tamɛ dó nǔ e a xà é jí bo mɔ nǔ jɛ lee é kan we gbɔn é wu

• Zǎn nǔ e a kplɔ́n é ɖò gbɛzinzan ayihɔngbe ayihɔngbe tɔn towe mɛ.—Lk 6:47, 48

KPƆ́N VIDEO GBǏ DƆN GBƆN NǓKPLƆNKPLƆN MƐÐESUNƆ TƆN ÐAGBE ÐÉ GBLAMƐ Ɔ, ENƐ GUDO HǓN, NǍ XÓSIN NÚ NǓKANBYƆ ELƆ LƐ:

• Etɛ nǔkplɔnkplɔn mɛɖesunɔ tɔn ka nyí bɔ mɛɖé lɛ ɖɔ?

• Etɛwu mǐ ka ɖó na nɔ xoɖɛ cobo bɛ́ nǔkplɔnkplɔn mɛɖesunɔ tɔn mǐtɔn?

• Etɛ ka sixu d’alɔ mǐ bɔ mǐ na mɔ nǔ jɛ akpáxwé Biblu tɔn ɖé mɛ ganji?

• Sinmɛ alɔkpa tɛ lɛ mǐ ka sixu zán dó ɖó wuntun nǔ ɖò Biblu nǔkplɔnkplɔn tɔn mǐtɔn mɛ?

• Etɛwu tamɛ linlin ka ɖò taji tawun hwenu e mǐ ɖò Xó Mawu tɔn kplɔ́n wɛ é?

• Etɛ mǐ ka ɖó na sɔ́ nǔ e mǐ kplɔ́n lɛ é dó wà na?