Ee mǐ na ɖò didɛ ɖò “azǎn gudogudo tɔn lɛ” e ko vɔ bǐ é nu wɛ é ɔ, mǐ na ɖó nukún ɖɔ tagba lɛ na fɔ́n bo ɖò jijɛji wɛ. (2Ti 3:1; Mt 24:8) Jɛ nukɔn nú adla j’ayǐ ɔ, hwɛhwɛ ɔ, togun Jehovah tɔn nɔ mɔ alixlɛ́mɛ e wá dó ganmɛ bo sixu lɛ́ hwlɛn gbɛ̀ gan lɛ é. Enyi mǐ na gán ɖò hwenɛnu ɔ, tónúsíse bo sɔnǔ ɖ’ayǐ dìn, ɖò gbigbɔ lixo kpo agbaza lixo kpo wu wɛ é na sín.—Lk 16:10.

• Sɔnǔ ɖ’ayǐ ɖò gbigbɔ lixo: Sɔnǔ nú aca gbigbɔ tɔn ɖagbe ɖé. Tɛ́n kpɔ́n bo tuùn akpáxwé sinsɛnzɔ́ ɔ tɔn vovo e tíìn lɛ é. Enyi é sín adla j’ayǐ ɔ wu bonu a ma sɔ́ ɖò kpɔ́ xá mɛ ɖevo lɛ ɖò agun ɔ mɛ ǎ nú táan klewun ɖé hǔn, ma nú ado hu we ó. (Eza 30:15) A ɖò zɔ nú Jehovah kpo Jezu kpo gbeɖé ǎ.—od 176 akpá. 15-17

• Sɔnǔ ɖ’ayǐ ɖò agbaza lixo: Ðó é sixu byɔ ɖɔ è ni nɔ fí ɖokpo ɔ nú táan gegě wutu ɔ, xwédo ɖokpo ɖokpo ɖó na sɔnǔ nú sáki ajijimɛnú lɛ tɔn ɖé, nǔɖuɖu, sin, amasin, gɔ́ nú nǔ mɔ̌hun ɖevo e ɖò dandan bo ɖò jlɛ̌ jí lɛ é.—Nǔx 22:3; g17.5 4, 6

KPƆ́N VIDEO A KA KO SƆNǓ Ð’AYǏ NÚ ADLA J’AYǏ À? Ɔ, ENƐ GUDO HǓN, NǍ XÓSIN NÚ NǓKANBYƆ ELƆ LƐ:

• Nɛ̌ mǐ ka sixu sɔnǔ ɖ’ayǐ ɖò gbigbɔ lixo nú adla j’ayǐ lɛ gbɔn?

• Etɛwu mǐ ka ɖó na . . .

  • kpò ɖò xó ɖɔ ɖó kpɔ́ xá mɛxo agun tɔn lɛ wɛ ganji?

  • sɔnǔ nú sáki ajijimɛnú lɛ tɔn ɖé?

  • gbéjé adla j’ayǐ vovo e sixu gbà nǔ lɛ é kpɔ́n bo lɛ́ lin tamɛ dó nǔ e mǐ sixu wà ɖò ninɔmɛ ɖokpo ɖokpo mɛ lɛ é jí?

• Ali atɔn tɛ lɛ nu mǐ ka sixu d’alɔ mɛ ɖěɖee adla j’ayǐ ɖé dɔn wuvɛ̌ wá na lɛ é ɖè?

KANBYƆ HWIÐÉE ÐƆ: ‘Etɛ lɛ jɛmɛji COVID-19 ɔ ka sixu kplɔ́n mì dó nǔsisɔ ɖ’ayǐ wu?’