Mɛtɛnkpɔn lɛ sixu dó kpò awa mɛ nú mǐ blewun, ɖò taji ɔ, hwenu e ye gbɛ́ gbigbɔ é. Davidi tuùn ɖɔ tagba e ɖò emi kpo Axɔ́su Sawulu kpo tɛntin é na wá nɔte gbè ɖokpo, bɔ emi na wá huzu axɔ́su lee Jehovah d’akpá tɔn gbɔn é. (1Sa 16:13) Nǔɖiɖi Davidi tɔn d’alɔ ɛ b’ɛ nɔte kpɔ́n Jehovah.

Enyi mǐ ɖò tɛnkpɔn mɛ ɔ, ali sixu hun nú mǐ bɔ mǐ na zán bibǐ, nǔtuùntuùn, alǒ nǔwukpíkpé tamɛ linlin tɔn mǐtɔn dó huzu ninɔmɛ mǐtɔn. (1Sa 21:13-15; Nǔx 1:4) É ɖò mɔ̌ có, enyi mǐ na bo tlɛ wà nǔ e wu mǐ kpé é bǐ sɔgbe xá nǔgbododó Biblu tɔn lɛ ɔ, wuvɛ̌ ɖé lɛ sixu gbɛ́ gbigbɔ. Ðò ninɔmɛ mɔ̌hun lɛ mɛ ɔ, mǐ ɖó na ɖó suúlu, bo nɔte kpɔ́n Jehovah. Zaanɖé dìn ɔ, é na ɖó nǔ wuvɛ̌ mǐtɔn lɛ bǐ nu, bo na “súnsún ɖasin bǐ” sín nukún mǐtɔn lɛ mɛ. (Nǔ 21:4) Enyi Jehovah wɛ wà nǔɖe dó gɔ́ alɔ nú mǐ alǒ nǔ ɖevo ɖebǔ wɛ ɔ, mǐ ɖeji dó nǔ ɖokpo wu: Mɛtɛnkpɔn lɛ bǐ na wá nɔte gbè ɖokpo. Enɛ tuùntuùn sixu dó gbɔ nú mǐ ɖò ali ɖé nu.

KPƆ́N VIDEO TOGUN E ÐÒ BǓ É ÐÉ ÐÒ GBƐ̀ E KLÁN É ÐÉ MƐ Ɔ, ENƐ GUDO HǓN, NǍ XOSIN NÚ NǓKANBYƆ ELƆ LƐ:

• Mɛtɛnkpɔn tɛ lɛ Klisanwun ɖé lɛ ka mɔ ɖò tofɔligbé États-Unis tɔn?

• Nɛ̌ ye ka ɖè suúlu kpo wanyiyi kpo xlɛ́ gbɔn?

• Nɛ̌ ye ka kpò ɖò ayi sɔ́ ɖó “nǔ e nyí nǔjɔnǔ hugǎn lɛ é” jí wɛ gbɔn?—Fili 1:10, nwt