Mɛ e ɖó walɔ mímɛ́ lɛ é kɛɖɛ jɛn sixu ɖu vivǐ kancica syɛnsyɛn ɖé tɔn xá Jehovah. (1Pi 1:14-16) Ee Biblu kplɔntɔ́ towe lɛ na ɖò ɖuɖu ɖò walɔ blíblí yetɔn lɛ jí wɛ é ɔ, ye sixu lɛ́ ɖu vivǐ gbɛzán xwédo tɔn awǎjijɛnɔ ɖé tɔn, lanmɛ yetɔn na ɖò ganji, bɔ ye na lɛ́ nyɔ́ akwɛ yetɔn zán.

Nɔ tinmɛ nǔgbododó Jehovah tɔn lɛ nyi wɛn nú ye; nǔ ye ni nɔ mɔ nǔ jɛ hwɛjijɔ e wu Jehovah nɔ lin nǔ gbɔn mɔ̌ é wu, bo nɔ ɖɔ xó dó lè ɖěɖee alixlɛ́mɛ tɔn lɛ xwixwedó na hɛn wá nú ye lɛ é jí. Sɔ́ ayi ɖó lee a na d’alɔ nǔkplɔntɔ́ towe lɛ bɔ ye na huzu lee ye nɔ lin nǔ gbɔn é jí, enɛ ɔ, ye na kpéwú bo wà nǔ e Jehovah jló é. (Efɛ 4:22-24) Nǎ ganjɛwu ye ɖɔ kpo alɔdó Jehovah tɔn kpo ɔ, ye sixu ɖu ɖò nǔwalɔ masɔgbe e ko dó ɖɔ̀ dò ɖò ayi yetɔn mɛ é ɖé jí. (Fili 4:13) Nɔ kplɔ́n ye ɖɔ ye ni nɔ savo nú Jehovah hwenu e ye ɖó jlǒ syɛnsyɛn bo na hu hwɛ é. Nɔ d’alɔ ye nú ye ni tuùn ninɔmɛ e mɛ nǔɖagbewiwa na vɛwǔ nú ye ɖè lɛ é, bo nɔ nyi alɔ nú ye. Nɔ dó wusyɛn lanmɛ nú ye ɖɔ ye ni nɔ wà nǔ ɖagbe lɛ ɖó nǔbliblí lɛ tɛnmɛ. Enyi a mɔ bonu Jehovah ɖò alɔdó Biblu kplɔntɔ́ towe lɛ bɔ huzuhuzu e bló wɛ ye ɖè lɛ é ɖò ye kpa wɛ ɔ, a na ɖó awǎjijɛ.

KPƆ́N VIDEO D’ALƆ BIBLU KPLƆNTƆ́ TOWE LƐ BONU YE NI NƆ ÐU ÐÒ WALƆ KWIJIKWIJI LƐ JÍ Ɔ, ENƐ GUDO HǓN, NǍ XÓSIN NÚ NǓKANBYƆ ELƆ LƐ:

• Nɛ̌ mɛxo agun tɔn lɛ kpo Ana kpo ka xlɛ́ ɖɔ ye ɖeji dó Jaké wu gbɔn?

• Nǔ ɖevo tɛ Ana ka wà dó d’alɔ Jaké?

• Nɛ̌ Jaké ka ba alɔdó Jehovah tɔn gbɔn?