Xɔ́ntɔn ɖé ɔ, mɛ e kpo mɛ kpo vɛ́ tawun bɔ è nɔ lɛ́ ɖó sísí n’i é ɖé wɛ. Ði kpɔ́ndéwú ɔ, hwenu e Davidi hu Goliyati gudo é ɔ, kancica xɔ́ntɔn zunzun tɔn syɛnsyɛn ɖé jɛ tíntíìn ɖò é kpo Jonatáan kpo tɛntin jí. (1Sa 18:1) Ye mɛ ɖokpo ɖokpo ɖè jijɔ e na dɔn mɛ ɖě ɔ b’ɛ na ba na zun xɔ́ntɔn xá ɛ lɛ é xlɛ́. Enɛ wu ɔ, nukúnnúmɔjɛnǔmɛ e sɔgbe é jí wɛ xɔ́ntɔn vívɛ́ zunzun nɔ jinjɔn. Ðò kpaa mɛ ɔ, é nɔ byɔ hwenu kpo gǎndidó kpo cobɔ è na kpéwú bo tuùn mɛ ɖevo. É ɖò mɔ̌ có, ɖò tɛn Ɛntɛnɛti tɔn e jí è nɔ zun xɔ́ntɔn ɖè lɛ é ɔ, mɛ lɛ sixu huzu xɔ́ntɔn enyíì ɖò cɛju mɛ. É nɔ byɔ ɖɔ è ni zín wuntun xɔ́ntɔn zunzun tɔn ɔ kpowun wɛ. Ðò Ɛntɛnɛti jí ɔ, ɖó mɛ lɛ sixu bló tuto bo tuùn nǔ e ye na ɖɔ é pɛ́ɛ, bo lɛ́ ɖó acɛ dó lee ye ba ɖɔ mɛ ɖevo lɛ ni mɔ ye gbɔn é jí dó bǎ ɖé mɛ wutu ɔ, é sixu bɔwǔ nú ye bɔ ye na sɔ́ mɛ alɔkpa e ye nyí nǔgbo nǔgbo é hwlá. Enɛ wu ɔ, é na nyɔ́ ɖɔ a ni lin tamɛ dó mɛ alɔkpa ɖěɖee a na yí gbè na bɔ ye na nyí xɔ́ntɔn towe ɖò Ɛntɛnɛti jí lɛ é jí ganji. Enyi mɛ e a ma tuùn ganji ǎ é ɖé jló na huzu xɔ́ntɔn towe ɖò Ɛntɛnɛti jí ɔ, ma lin ɖɔ nú a ma kpɔ́n finɛ n’i ǎ alǒ gbɛ́ ɔ, é na cí ɖě n’i ó, ado ma hu we dó enɛ wu ó. Ðó tɛn Ɛntɛnɛti tɔn e jí è nɔ zun xɔ́ntɔn ɖè lɛ é sixu ɖó awovínú lɛ wutu ɔ, mɛɖé lɛ wá gbeta ɔ kɔn bo na nɔ zán ɖebǔ ǎ. É ɖò mɔ̌ có, enyi a ba na zán tɛn mɔ̌hun ɖé ɔ, etɛ a ka ɖó na hɛn dó ayi mɛ?

KPƆ́N VIDEO ZUN XƆ́NTƆN ÐÒ ƐNTƐNƐTI JÍ KPO NǓNYWƐ KPO Ɔ, ENƐ GUDO HǓN, NǍ XÓSIN NÚ NǓKANBYƆ ELƆ LƐ:

• Cobonu a na wlán nǔɖe alǒ sɔ́ fɔtóo dó tɛn Ɛntɛnɛti tɔn e jí è nɔ zun xɔ́ntɔn ɖè lɛ é jí ɔ, etɛ jí a ka ɖó na lin tamɛ dó?

• Etɛwu a ka ɖó na ɖò acéjí tawun cobo cyan xɔ́ntɔn towe lɛ ɖò Ɛntɛnɛti jí?

• Etɛwu a ka ɖó na ɖó dogbó nú táan nabi e a na nɔ zán ɖò tɛn Ɛntɛnɛti tɔn e jí è nɔ zun xɔ́ntɔn ɖè lɛ é jí é?—Efɛ 5:15, 16