Adla j’ayǐ lɛ́ fɔ́n bo ɖo jijɛjí wɛ ɖo égbé. Ényí adla j’ayǐ ɔ, è ɖó ná bló tuto nú sɔhɛnmɛzɔ́ lɛ́ ganjí, bo ná lɛ́ kpé nukún dó yě wú ganjí. Énɛ́ wú ɔ, Hǎgbɛ́ alixlɛ́mɛtɔ́ ɔ bló tuto bɔ è ɖó azɔ̌xɔsá sɔhɛnmɛ tɔn ayǐ ɖo alaxɔ lɛ́ ɖokpó ɖokpó mɛ.

Ényí nɔví e nɔ w’azɔ̌ ɖo azɔ̌xɔsá énɛ́ lɛ́ é se ɖɔ adla j’ayǐ ɖo xá ɖé mɛ ɔ, yě nɔ yá wǔ ylɔ́ mɛxó agun tɔn e ɖo fínɛ́ lɛ́ é bá dó tuun nǔ e sín hudó wɛnjlátɔ́ lɛ́ ná ɖó é. Ényí nǔ e adla j’ayǐ ɔ hɛn gblé lɛ́ é sukpɔ́ dín bɔ wɛnjlátɔ́ e ɖo xá ɔ mɛ lɛ́ é ma sixú ɖe ɖɛ yě yěɖóɖó ǎ ɔ, alaxɔ ná sɛ́ nɔví e jɛxá lɛ́ é dó bɔ yě ná kpé nukún dó sɔhɛnmɛzɔ́ ɔ wú. Nɔví énɛ́ lɛ́ sixú byɔ́ jlǒɖótɔ́ lɛ́ ɖɔ yě ní wá d’alɔ émí alǒ byɔ́ ɖɔ è ní ná nǔ tawun tawun ɖé lɛ́, abǐ, sixú xɔ nǔ e sín hudó è ɖó lɛ́ é ɖo xá ɔ mɛ bo lɛ́ má.

Ényí è ɖe ɖɛ nǔ lɛ́ gbɔn mɔ̌ ɔ, é nɔ hɛn nyɔ̌ná gěgé wá. Énɛ́ nɔ ɖe azɔ̌ kpo, nɔ zɔ́n bɔ è nɔ bú ɖo azɔ̌ ɔ mɛ ǎ, bɔ è nɔ lɛ́ hɛn akwɛ́ kpó azɔ̌wanú kpó gú ǎ. Ényí mɛ ɖokpó ɖokpó ka sí te bo wa nǔ éɖésúnɔ ɔ, nǔ énɛ́ lɛ́ sixú jɛ.

Nɔví e alaxɔ sɔ́ lɛ́ é sixú gbéjé akwɛ́ kpó jlǒɖótɔ́ kpó nabí e sín hudó è ná ɖó nú sɔhɛnmɛzɔ́ ɔ é kpɔ́n. Yě sixú lɛ́ ɖɔ xó xá gǎn ayǐ ɔ jí tɔn lɛ́; hwɛhwɛ ɔ, yě nɔ d’alɔ mǐ bɔ mǐ nɔ wa sɔhɛnmɛzɔ́ mǐtɔn. Énɛ́ wú ɔ, mɛ ɖěbǔ ɖó ná sɔ́ jlǒ bo xo akwɛ́ kplé bo sɛ́dó fí e nǔ ɔ jɛ ɖe é, sɛ́ nǔ e è ná dó hɛn sɔ mɛ ná lɛ́ é dó, alǒ yi dɔ̌n ǎ, afi nú è byɔ́ yě ɖɔ yě ní wa mɔ̌ ɔ nɛ́.

É ɖo mɔ̌ có, nú adla j’ayǐ ɔ, mǐ nɔ ba ná d’alɔ. (Eb 13:16) Mǐ yí wǎn nú nɔví mǐtɔn lɛ́! Étɛ́ mǐ ka sixú wa? Nǔ e ɖo tají hú gǎn é wɛ nyí ɖɔ mǐ ní xo ɖɛ dó nɔví e wú adla j’ayǐ ɔ wa nǔ dó lɛ́ é kpó mɛ e ɖo sɔ hɛn yě wɛ lɛ́ é kpó tamɛ. Mǐ sixú lɛ́ ná nǔníná dó azɔ̌ e wa wɛ è ɖe gbɔn gbɛ ɔ bǐ mɛ é takúnmɛ. Hǎgbɛ́ alixlɛ́mɛtɔ́ ɔ ná xlɛ́ ali alaxɔ lɛ́ bɔ yě ná tuun fí e è ná zán nǔníná énɛ́ lɛ́ ɖe bɔ é ná wa ɖagbe hú gǎn lɛ́ é. Nú mǐ ka jló ná ɖ’alɔ ɖo sɔhɛnmɛzɔ́ ɔ mɛ tlɔlɔ ɔ, mǐ sixú d’alɔ wěma Demande d’admission comme volontaire local développement-construction (DC-50) mɛ dó ɖe xlɛ́ ɖɔ mǐ ɖo gbesisɔmɛ ná.

KPƆ́N VIDEO SIN HƐN NǓ GBLÉ TAWUN ÐO BRÉSIL Ɔ, ÉNƐ́ GÚDO HǓN, NǍ XÓSIN NÚ NǓKANBYƆ́ ÉLƆ́:

Étɛ́ ka jí wǔ nú we ɖo sɔhɛnmɛzɔ́ e Kúnnuɖetɔ́ Jexóva tɔn lɛ́ wa hwenu e sin gba nǔ ɖo Brésil ɖo 2020 é mɛ?