NǓ E WU É ÐÒ TAJI É: Ali taji ɖé wɛ kúnnuɖiɖe kpo alokan kpo nyí bɔ è na dó “jlá wɛnɖagbe” ɔ bǐ mlɛ́mlɛ́. (Mɛ 20:24) * É nɔ hun ali nú mǐ bɔ mǐ nɔ ɖekúnnu nú mɛɖé hwenu e ninɔmɛ lɛ zɔ́n bɔ mǐ ma sixu mɔ éɖesunɔ ǎ é.

LEE È SIXU BLÓ GBƆN É:

• Sɔnǔ ɖ’ayǐ. Sɔ́ xóta e jɛxa é ɖé. Enɛ gudo hǔn, wlǎn nǔ e a jló na ɖɔ é dó nǔɖe jí. Enyi è jinjɔn tavo ɖé tó, bɔ nǔ e è wlán ɖ’ayǐ lɛ é ɖò akpá mɛtɔn, lobɔ azɔ̌wanú e sín hudo è na ɖó lɛ é ɖò mɛ sí, ɖi alokan alǒ tablɛti e è sixu zán dó yì JW Library^® abǐ jw.org^® jí é ɔ, é nɔ d’alɔ mɛ

• Vo bo ɖɔ xó. Ðɔ xó lee a nɔ ɖɔ xó gbɔn ayǐvɔ̌gbe é. Ko nǔ bo lɛ́ d’alɔ xó mɛ cí nǔ ɖɔ mɛ ɔ sín nukɔn wɛ a ɖè ɖɔhun. Nyi alɔ nú agbɔ̌n jí yíyí e ma ɖò dandan ǎ lɛ é. Enyi è w’azɔ̌ xá mɛ ɖevo lɛ ɔ, é nɔ d’alɔ. Enyi xwétɔ́ ɖé kan nǔɖe byɔ hǔn, vɔ̌ nǔ e é kanbyɔ é ɖɔ dó jǐ; mɔ̌ mɛ ɔ, mɛ e kpo hwi kpo ɖò kúnnu ɖè wɛ ɔ sixu d’alɔ we bɔ a na mɔ xósin ɔ

• Sɔ́ mɛbakpɔ́n sín nu ɖó te. Enyi mɛ ɔ ɖè jlǒ xlɛ́ ɔ, a sixu sɔ́ nǔkanbyɔ ɖé nyi atɛ jí bɔ a na na xósin na hweɖevonu e a na ylɔ́ ɛ kpo alokan kpo é. A sixu ɖɔ ni ɖɔ nú é ba ɔ, emi na wlán nǔ sɛ́dó è gbɔn Ɛntɛnɛti jí, alǒ emiɖesunɔ na wá, kabǐ emi na sɛ́ wema ɖé lě tawun dó è gbɔn Ɛntɛnɛti jí. Alǒ a sixu ɖɔ n’i ɖɔ emi ba bo na sɛ́ video abǐ xóta mǐtɔn lɛ ɖé dó è gbɔn Ɛntɛnɛti alǒ alokan jí. Ðɔ xó dó xóta ɖevo e ɖò tɛn Ɛntɛnɛti tɔn mǐtɔn jí lɛ é wu xá ɛ hwenu e é na nyɔ́ bló dó é