Zaanɖé din ɔ, suúlu e Jexóva ɖo ɖǐɖó dó gbɛ élɔ́ wú wɛ é ná wá vivɔnu. È ná sú kún dó nú sinsɛn nǔvú, kplékplé akɔta lɛ́ tɔn ɖé ná tɔ́n ahwan togun Mawu tɔn, bɔ Jexóva ná sú mɛ nyanya lɛ́ sín kún dó ɖo Aamagedɔ́ni. Klisánwun lɛ́ ɖo nǔ manáwɔn énɛ́ e ná jɛ lɛ́ é ɖó nukún wɛ.

É ɖo wɛn ɖɔ mǐ kún tuun gǒflɛ́mɛ lɛ́ bǐ dó ya ɖaxó ɔ wú ó. Ði kpɔ́ndéwú ɔ, mǐ tuun hwenu e é ná bɛ́ dó é pɛ́pɛ́pɛ́ ǎ. Mǐ tuun hwɛjijɔ e wú acɛkpikpa lɛ́ ná zɔn dó bo ná tɔ́n ahwan sinsɛn lɛ́ é ǎ. Mǐ tuun hwenu nabí e ahwan e akɔta lɛ́ ná tɔ́n togun Mawu tɔn é ná ɖu é ǎ, mǐ ka lɛ́ tuun nǔ e ná ɖo ahwantɔ́nmɛ énɛ́ mɛ lɛ́ é ǎ. Mǐ lɛ́ tuun wlɛnwín e jɛ́n Jexóva ná zán dó sú kún dó nú mɛ nyanya lɛ́ ɖo Aamagedɔ́ni hwenu lɛ́ é ǎ.

É ɖo mɔ̌ có, Biblu ɖɔ nǔ e sín hudó mǐ ɖó bo ná ɖeji lobo lɛ́ kpankɔ́n, bónú nǔ e ná wa jɛ ɖo sɔgúdo lɛ́ é ma dó xɛsi mǐ ó lɛ́ é bǐ nú mǐ. Ði kpɔ́ndéwú ɔ, mǐ tuun ɖɔ mǐ ɖo gbɛ nɔ wɛ ɖo “azǎn gǔdo gúdo tɔn lɛ́ mɛ.” (2Ti 3:1) Mǐ tuun ɖɔ è ná “ɖe” ahwan e è ná tɔ́n sinsɛn lɛ́ é “sín azǎn kpo” bónú è ma sú kún dó nú sinsɛn nǔgbó ɔ ó. (Mt 24:22) Mǐ tuun ɖɔ Jexóva ná hwlɛ́n togun tɔn. (2Pi 2:9) Bɔ mǐ lɛ́ tuun ɖɔ Mɛ e Jexóva sɔ́ bɔ é ná sú kún dó nú mɛ nyanya lɛ́, bo nya xɛ ɖo mɛ wɔ̌búwɔ́bú ɔ jí ɖo Aamagedɔ́ni hwenu é nyí gbejínɔtɔ́, bo lɛ́ ɖó hlɔ̌nhlɔ́n.—Nǔ 19:11, 15, 16.

É ɖo wɛn ɖɔ ényí gbɛtɔ́ lɛ́ mɔ nǔ e ná jɛ ɖo sɔgúdo lɛ́ é ɔ, “xɛsi ná ɖi yě, bɔ yě ná kú dó te.” É ɖo mɔ̌ có, ényí mǐ nɔ xa nǔ dó hwlɛngán sín nǔwiwa Jexóva tɔn e wá yi lɛ́ é kpó nǔ e é ɖe xlɛ́ mǐ dó sɔgúdo wú lɛ́ é kpó wú, bo nɔ lin tamɛ dó yě jí ɔ, mǐ sixú “jlɔ́, bo kpɔ́n jǐ,” lobo ɖeji ɖɔ hwenu e Mawu ná hwlɛ́n mǐ é ko sɛ yá.—Lk 21:26, 28.