È jɔwǔ bǔnɔ ɖé Kúnnuɖetɔ́ Jehovah tɔn lɛ. Ðó mǐ nyí Klisanwun e zé mǐɖée jó, bo bló baptɛm lɛ é wutu ɔ, mǐ ɖó na kpò ɖò nǔ sɔ́ nú kancica mɛɖesunɔ tɔn e gɔ́ngɔ́n é ɖé xá Aklunɔ Nǔbǐwukpétɔ́ ɔ Jehovah wɛ. É gbɔn Vǐ tɔn jí bo dɔn mǐ sɛkpɔ́ éɖée. (Jn 6:44) É nɔ ɖótó ɖɛ mǐtɔn lɛ.—Ðɛ 34:16.

Nɛ̌ mǐ ka sixu cyɔn alɔ kancica xɔ akwɛ e mǐ ɖó xá Mawu é jí gbɔn? Lee mǐ sixu wà mɔ̌ gbɔn é ɖokpo wɛ nyí ɖɔ mǐ ɖó na wà nǔ nyanya Izlayɛli-ví lɛ ɖɔhun ǎ. Ee ye jɛ akɔ xá Jehovah é ɔ, é lín ǎ, bɔ ye bló siká nyibuví bo sɛn. (Tí 32:7, 8; 1Kɔ 10:7, 11, 14) Mǐ sixu kanbyɔ mǐɖée ɖɔ: ‘Enyi nǔnyanyawiwa sín jlǒ wá ayi mɛ nú mì ɔ, nɛ̌ un ka nɔ wà nǔ gbɔn? Nǔwiwa ce lɛ ka nɔ xlɛ́ ɖɔ un nɔ wlíbo nú kancica e un ɖó xá Jehovah é à? Wanyiyi ɖaxó ɖiɖó nú Tɔ́ mǐtɔn jixwé tɔn ɔ na d’alɔ mǐ, bɔ mǐ na hɔn nú nǔ e é gbɛ́ wǎn na lɛ é.—Ðɛ 97:10.

KPƆ́N VIDEO NYA XƐ ÐÒ KANCICA E ÐÒ HWI KPO JEHOVAH KPO TƐNTIN É JÍ Ɔ (KOLO 3:5), ENƐ GUDO HǓN, NǍ XÓSIN NÚ NǓKANBYƆ ELƆ LƐ:

• Etɛ ka nyí nukúnkɛ́ndidó?

• Etɛwu mǐ ka ɖó na nyi alɔ nú nukúnkɛ́ndidó kpo vodunsinsɛn kpo?

• Nɛ̌ afɔdógbě alǒ mɛsibiba kpo vodunsinsɛn kpo ka cá kan xá yeɖée gbɔn?

• Etɛwu, ɖò taji ɔ, mɛ ɖěɖee ɖó wǔjɔmɛzɔ́ ɖò agun mɛ lɛ é ka ɖó na nɔ mɔ nǔ jɛ wu ɖɔ ye nɔ sú hudo mɛ e ye da é tɔn lɛ sín dò?