1-4. Ninɔmɛ syɛ́nsyɛ́n tɛ́ ka xwetɔ́n ɖo Piyɛ́ɛ nukɔn? Nú hwi wɛ ɖo tɛn tɔn mɛ ɔ, nɛ̌ nǔ ka ná cí nú we?

 YĚ SÚ hɔntogbó gannɔ ɖaxó ɔ dó Piyɛ́ɛ bɔ é ɖɔ nǔ ɖaxó tɔn. É ɖo wlɔ mɛ ɖo sɔ́ja Hlɔ̌manu we tɛ́ntin bɔ è kplá ɛ yi xɔ e mɛ é ná sɛn gan ɖe é. Énɛ́ gúdo ɔ, é nɔ fínɛ́ nú ganxixo gěgé, bóyá nú azǎn nabí ɖé bo ɖo nukún ɖó nǔ e ná wa n’i wɛ è ɖe é wɛ. É sɔ́ nɔ mɔ nǔɖé zɛ gankpá ɔ sín dǒ lɛ́, gan tɔn lɛ́, wlɔ e è do è lɛ́ é kpó gantɔ́cɔ́tɔ́ e ɖo cícɔ́ ɛ wɛ lɛ́ é kpó wú ǎ.

² Wɛn ɖé wá n’i, wɛn nyanya ka wɛ. Axɔ́sú Elódu Aglípa I kán ɖ’é jí bo ná hu Piyɛ́ɛ. a É lin ná dɔn Piyɛ́ɛ wá togun ɔ nukɔn ɖo Dǐndínwáyixwe ɔ gúdo bo ná hu i, bónú xomɛ ná hun ahwan ɔ. Énɛ́ nyí numɛyózo nú é ɖe ǎ. Acɛkpatɔ́ ɖokpó énɛ́ ɔ ko hu mɛsɛ́dó hǎtɔ́ Piyɛ́ɛ tɔn Jaki zaanɖé wá yi.

³ Azǎn e gbe è ná hu Piyɛ́ɛ é kpo sɔ. Étɛ́ jí lin tamɛ dó wɛ Piyɛ́ɛ ka ná ko ɖe ɖo gankpá énɛ́ e d’ablu é mɛ? Ayi tɔn ka yi xó e Jezu ɖɔ n’i xwe ɖé lɛ́ ɖíe, ɖɔ gbe ɖokpó ná wá su bɔ è ná blá ɛ bo ná sɔ́ ɛ yi fí e é ma ba ǎ é, énɛ́ wɛ nyí kú alɔkpa e é ná kú é jí wɛ a? (Jaan 21:18, 19) Piyɛ́ɛ sixú ko ɖo kinkanbyɔ́ éɖée wɛ ɖɔ hwenu énɛ́ wɛ ka ko wá a jí.

⁴ Nú hwi wɛ ɖo Piyɛ́ɛ sín ninɔmɛ mɛ ɔ, nɛ̌ nǔ ka ná cí nú we? Mɛ gěgé ná flú bo ná lin ɖɔ xó bǐ ko fó. Amɔ̌, nú mɛ e nyí ahwanvú Jezu Klísu tɔn nǔgbó nǔgbó é ɖé ɔ, ninɔmɛ ɖě ɖe bɔ è ná ɖɔ ɖɔ nukúnɖíɖó ɖěbǔ kún sɔ́ ɖe ó nǔgbó nǔgbó a? Étɛ́ lěe Piyɛ́ɛ kpó klisánwun hǎtɔ́ tɔn lɛ́ kpó wa nǔ gbɔn, hwenu e yadónúmɛ ba jǒnɔ yě é ka sixú kplɔ́n mǐ? Mǐ ní kpɔ́n.

5, 6. (a) Étɛ́wú Axɔ́sú Elódu Aglípa I ka tɔ́n ahwan agun klisánwun tɔn? Gbɔn nɛ̌ é? (b) Étɛ́wú kú Jaki tɔn ka nyí mɛtɛ́nkpɔ́n nú agun ɔ?

⁵ Lěe mǐ ko mɔ gbɔn ɖo wěmata wěma élɔ́ tɔn e wá yi é mɛ é ɔ, klisánwun e Kosi e nɔ nyí Kɔnɛ́yi é kpó xwédo tɔn kpó húzú é nyí awǎjijɛ sín  nǔ tawun ɖé nú agun klisánwun tɔn. Amɔ̌, é ná ko sin xomɛ nú Jwifu e ma nyí klisánwun ǎ lɛ́ é tawun ɖɔ klisánwun Jwifu gěgé ɖo Mawu sɛn wɛ ɖo kpɔ́ xá mɛ e ma nyí Jwifu ǎ lɛ́ é wɛ din faa.

⁶ Elódu e nyí toxóɖɔtɔ́ bíbí é mɔ ɖɔ ali hun nú émí gbɔn fínɛ́ bɔ émí ná nyɔ́ ɖo Jwifu lɛ́ sí, énɛ́ wú ɔ, é jɛ ya dó nú klisánwun lɛ́ jí. É ná ko se ɖɔ mɛsɛ́dó Jaki sɛkpɔ́ Jezu Klísu tawun. Énɛ́ wú ɔ, Elódu “hu Jaki e nyí nɔví Jaan tɔn é ɖó hwǐ wú.” (Mɛ. 12:2) Mɛtɛ́nkpɔ́n ɖé wɛ énɛ́ nyí nú agun ɔ! Jaki ɖo mɛsɛ́dó atɔn ɖěɖěe mɔ bɔ Jezu húzú ninɔmɛ, bo lɛ́ mɔ bɔ é lɛ́ bló nǔjíwǔ ɖěvo e mɛsɛ́dó ɖěvo lɛ́ ma mɔ ǎ lɛ́ é mɛ. (Mat. 17:1, 2; Mak. 5:37-42) Jezu ylɔ́ Jaki kpó nɔví tɔn Jaan kpó ɖɔ “Xɛbyosoví lɛ́,” ɖó akpakpa e nɔ sɔ́ yě tawun é wútu. (Mak. 3:17) Hǔn, agun ɔ ba kúnnuɖetɔ́ adɔgbótɔ́, gbejínɔtɔ́ éé lɛ́ nyí mɛsɛ́dó vívɛ́ é ɖé kpo.

7, 8. Hwenu e Piyɛ́ɛ ɖo ganxó é ɔ, nɛ̌ agun ɔ ka wa nǔ gbɔn?

⁷ Hu e è hu Jaki é hun xomɛ nú Jwifu lɛ́; nǔ e ɖó nukún wɛ Aglípa ka ɖe é pɛ́ɛ́ nɛ́. Énɛ́ zɔ́n bɔ, é ɖó akɔ́nkpinkpan bo jɛ Piyɛ́ɛ gbé mɛ din. Lěe è ko ɖɔ wá yi gbɔn ɖo aga é ɔ, é ɖɔ bɔ è wlí Piyɛ́ɛ. Amɔ̌, Aglípa ná ko flín ɖɔ è ɖe mɛsɛ́dó lɛ́ nyi te sín gankpá mɛ ɖo nǔjíwǔ linu, lěe Wěmata 5gɔ́ wěma élɔ́ tɔn xlɛ́ gbɔn é. Bónú Elódu ma ná wá ɖo énɛ́ ɖɔ wɛ lobonú Piyɛ́ɛ ná sún gló è ǎ wútu ɔ, é ɖɔ bɔ è dó wlɔ ɛ dó sɔ́ja 2 tɛ́ntin, bɔ gantɔ́cɔ́tɔ́ 16 ɖěvo lɛ́ nɔ ɖo azɔ̌ wa wɛ mɛjíjɛmɛjíjɛ zǎn kéze bónú Piyɛ́ɛ ma hɔn yi ó. Ényí Piyɛ́ɛ hɔn yi céwún ɔ, nǔ e ja éyɛ́ gbo gbe é wɛ ná gbo yědɛɛ lɛ́. Ðo ninɔmɛ vɛ́ wǔ énɛ́ mɛ ɔ, étɛ́ klisánwun hǎtɔ́ Piyɛ́ɛ tɔn lɛ́ ka sixú wa?

⁸ Agun ɔ tuun nǔ e é ná wa é ganjí. Mɛsɛ́dó 12:5 ɖɔ: “Hwenu e Piyɛ́ɛ ɖo gan mɛ é ɔ, agun ɔ nɔ ɖo ɖɛ vívɛ́ xo sɛ́dó Mawu wɛ dó ta tɔn mɛ.” Nǔgbó ɔ, yě  sa vo kpó ayi yětɔn bǐ kpó dó nɔví vívɛ́ yětɔn tamɛ. Kú Jaki tɔn zɔ́n bónú yě ba nukúnɖíɖó kpo ǎ; mɔ̌ jɛ́n é ma ka lɛ́ zɔ́n bónú yě mɔ ɖɔ ɖɛ kún hwɛ́n nǔɖé ó ǎ é nɛ́. Nǔ tají tawun wɛ ɖɛ nyí ɖo Jexóva nukúnmɛ. Ényí ɖɛ e è xo lɛ́ é sɔgbe xá jlǒ tɔn ɔ, é nɔ se. (Ebl. 13:18, 19; Ja. 5:16) Nǔkplɔ́nmɛ tají ɖé wɛ nyí énɛ́ bɔ klisánwun lɛ́ ɖó ná hɛn dó ayi mɛ ɖo égbé.

9. Étɛ́ kpɔ́ndéwú e nǔɖitɔ́ hǎtɔ́ Piyɛ́ɛ tɔn lɛ́ sɔ́ ɖ’ayǐ ɖo ɖɛ xixo kpáxwé é ka sixú kplɔ́n mǐ?

⁹ A ka tuun nǔɖitɔ́ hǎtɔ́ ɖé lɛ́ bɔ yě ɖo wǔvɛ́ mɛ gbɔn wɛ a? Yě sixú ɖo didɛ ɖo yadónúmɛ, azɔ̌ mǐtɔn e acɛkpikpa lɛ́ nɔ gbɛ́ é alǒ adla j’ayǐ lɛ́ nu wɛ. É ná nyɔ́ ɖɔ a ní nɔ flín yě ɖo ɖɛ vívɛ́ e a nɔ xo lɛ́ é mɛ. A sixú lɛ́ tuun mɛ ɖěvo lɛ́ bɔ yě ɖo wǔvɛ́ e è ma nɔ yá wǔ ɖ’ayi wú ǎ lɛ́ é mɛ gbɔn wɛ, ɖi tagba xwédo tɔn lɛ́, awakanmɛ kú mɛ alǒ nǔ e nɔ tɛ́n nǔɖiɖi mɛtɔn kpɔ́n é ɖé lɛ́. Ényí a nɔ lin tamɛ kpɔ́n ganjí cóbó nɔ bɛ́ ɖɛ ɔ, a sixú flín mɛ nabí ɖé bo ná ylɔ́ nyǐkɔ yětɔn, hwenu e a ná ɖo xó ɖɔ nú Jexóva, ‘Mɛ e nɔ se ɖɛ é’ wɛ é. (Ðɛh. 65:3) È ná ɖɔ ɔ, hwi lɔ ɖó hudó nɔví súnnu towe lɛ́ kpó nɔví nyɔ̌nu towe lɛ́ kpó tɔn bónú yě ná wa nǔ ɖokpó ɔ nú we, hwenu e a ná ɖo ninɔmɛ vɛ́ wú lɛ́ mɛ é.

10, 11. Tínmɛ lěe wɛnsagun Jexóva tɔn ɖe Piyɛ́ɛ tɔ́n sín gankpá mɛ gbɔn é.

¹⁰ Xɛsi ɖi Piyɛ́ɛ, ɖó ninɔmɛ syɛ́nsyɛ́n e ba jǒnɔ ɛ é wú wɛ a? Mǐ sixú ɖɔ bo t’afɔ jí ǎ, amɔ̌, ɖo zǎn gǔdo tɔn énɛ́ e é nɔ gankpá mɛ ná é mɛ ɔ, é dɔ́ sɛnmlɔ ɖo sɔ́ja ayiɖotenánɔ we e ɖo cícɔ́ ɛ wɛ lɛ́ é tɛ́ntin. Nya nǔɖitɔ́ énɛ́ kú d’é jí ɖɔ, nǔ ɖěbǔ ná bo jɛ ayǐhɔ́ngbe tɔn ɔ, Jexóva kún ná wɔn émí ó. (Hlɔ̌. 14:7, 8) Ðěbǔ wɛ é ná bo nyí ɔ, Piyɛ́ɛ sixú lin nǔ yi jɛ nǔjíwǔ e ja jijɛ gbé lɛ́ é jí gbeɖé ǎ. Ajijimɛ ɔ, wěziza ɖé hɔ́n dó ganxɔ e mɛ é ɖe é mɛ. Wɛnsagun ɖé  xwetɔ́n, bɔ é ɖo wɛn ɖɔ sɔ́ja lɛ́ kún mɔ ɛ ó, bo fɔ́n Piyɛ́ɛ afɔjíafɔjí. Bɔ wlɔ e è dó alɔ n’i, bɔ é cí ɖɔ yě kún sixú wɛ́n gbeɖé ó lɛ́ é j’ayǐ kpowun!

¹¹ Wɛnsagun ɔ ɖe gbe e ɖo kléwún kléwún lɛ́ é nú Piyɛ́ɛ ɖɔ: “Yǎ wǔ sí te! . . . Sɔ́ nǔ, bo dó afɔkpa. . . . Dǒ awu towe aga tɔn ɔ.” Piyɛ́ɛ se tónú azɔn ɖokpó. Gǔdo mɛ ɔ, wɛnsagun ɔ ɖɔ: “Xwedó mì,” bɔ Piyɛ́ɛ jɛ gǔdo tɔn. Yě tɔ́n sín ganxɔ ɔ mɛ bo gbɔn sɔ́ja gɔnu e ɖo kɔ́xota lɛ́ é nukɔn dín, lobo tunta hɔntogbó gannɔ ɖaxó ɔ kɔn xwíí. Nɛ̌ yě ka ná wa gbɔn bo ná dín din? Ényí linlin mɔ̌hun ɖó wɛ Piyɛ́ɛ ko ɖe wɛ nyí ɔ, é blí bú cɛ́jú mɛ. Ée yě sɛkpɔ́ hɔntogbó ɔ é ɔ, é “nɔ mɔ̌ bo hun nú éɖée.” Cóbónú Piyɛ́ɛ ná wá mɔ nǔ jɛ nǔ e ɖo jijɛ wɛ é wú ɔ, yě ko gbɔn hɔntogbó ɔ nu bo ko wlí toxomɛli, bɔ énɛ́ gúdo ɔ, wɛnsagun ɔ gosín gɔ̌n tɔn. É wá kpo Piyɛ́ɛ ɖokpónɔ ɖo fínɛ́, bɔ é wá mɔ nǔ jɛ wú ɖɔ nǔ énɛ́ lɛ́ é jɛ lɛ́ é bǐ ɔ, ɖě kún nyí dlɔ̌ ó. É kún nyí nǔmimɔ ó. É ko jɛ te!—Mɛ. 12:7-11.

12. Étɛ́wú tamɛ linlin dó lěe Jexóva hwlɛ́n Piyɛ́ɛ gán gbɔn é jí ka sixú dó gbɔ nú mǐ?

¹² Tamɛ linlin dó hlɔ̌nhlɔ́n ma ɖó dogbó e Jexóva ɖó bo ná hwlɛ́n mɛsɛntɔ́ tɔn lɛ́ é jí dó gbɔ nú mɛ ǎ cé? Axɔ́sú e acɛkpikpa e ɖó agbɔ̌n hú gǎn, bɔ è ma ko mɔ kpɔ́n ɖo gbɛ ɔ mɛ hwe ɔ nu ǎ é ɖo gǔdo ná é wɛ hɛn Piyɛ́ɛ dó hɛn gantɔ́. É ɖo mɔ̌ có, Piyɛ́ɛ tɔ́n sín gankpá mɛ ma xo su! È ná ɖɔ ɔ, Jexóva nɔ bló nǔjíwǔ mɔ̌hun lɛ́ nú mɛsɛntɔ́ tɔn lɛ́ bǐ ǎ. É bló nú Jaki ǎ; mɔ̌ jɛ́n é ma ka lɛ́ bló nú Piyɛ́ɛ ɖo nukɔnmɛ, hwenu e xó e Jezu ɖɔ dó mɛsɛ́dó énɛ́ wú é wá jɛnu é ǎ é nɛ́. Égbé ɔ, klisánwun lɛ́ nɔ ɖó nukún ɖɔ Jexóva ná hwlɛ́n émí ɖo nǔjíwǔ linu ǎ. É ɖo mɔ̌ có, mǐ nɔ hɛn dó ayi mɛ ɖɔ Jexóva kún húzú ó. (Mal. 3:6) Gɔ́ ná ɔ, é ná gbɔn Vǐ tɔn jí zaanɖé din dó ɖe gbɛtɔ́ lǐvi mɔ̌kpán e ɖo gankpá e ɖo súsú jí pánwúnpánwún hú gǎn ɖo gankpá lɛ́ mɛ é nyi te, é wɛ nyí kú. (Jaan 5:28, 29) Akpá énɛ́ lɛ́ sixú d’alɔ mǐ bɔ mǐ ná kpankɔ́n ganjí, hwenu e mǐ ná ɖo wǔvɛ́ lɛ́ mɛ gbɔn wɛ ɖo égbé é.

13-15. (a) Nɛ̌ hǎgbɛ́ agun ɔ tɔn e kplé ɖo Mali xwégbe lɛ́ é ka wa nǔ gbɔn, hwenu e Piyɛ́ɛ wá é? (b) Étɛ́ jí wěma Mɛsɛ́dó tɔn ka jɛ xó ɖɔ dó jí din? Étɛ́ Piyɛ́ɛ ka kpo ɖo wiwa nú nɔví súnnu kpó nɔví nyɔ̌nu kpó tɔn gbigbɔ tɔn lɛ́ wɛ?

¹³ Piyɛ́ɛ cí te ɖo ali e dó ablu é jí, bo ɖo fí e é ná zun dó é sín tamɛ gba wɛ. Énɛ́ gúdo ɔ, é wá gbeta ɖé kɔn. Nyɔ̌nu klisánwun e nɔ nyí Mali é ɖo malínmálín dó fínɛ́. É cí ɖɔ asúkúsi e alɔnu kpɔ́n te ná kpɛɖé é ɖé wɛ Mali nyí; é ɖó xwé ɖé bɔ xwé ɔ d’agba sɔmɔ̌ bɔ agun ɖokpó nɔ bló kplé ɖo fínɛ́. Jaan Maki e wú wěma Mɛsɛ́dó tɔn kɛ nu dó azɔn nukɔntɔn ɔ ɖo fí, bɔ é wá cí vǐ ɖɔhun nú Piyɛ́ɛ ɖo nukɔnmɛ é sín nɔ wɛ. (1 Pi. 5:13) Ðo zǎn énɛ́ mɛ ɔ, ganmɛ ko yi có, mɛ e ɖo agun énɛ́ mɛ é gěgé ɖo Mali xwégbe bo ɖo ɖɛ xo wɛ vívɛ́ vívɛ́. É ɖo wɛn ɖɔ te jijɛ Piyɛ́ɛ tɔn tamɛ xo ɖɛ dó wɛ yě ɖe, amɔ̌, yě ɖó nukún tɔn ɖɔ Jexóva ná se ɖɛ ɔ gbɔn mɔ̌ ǎ!

¹⁴ Piyɛ́ɛ xúxú hɔntogbó e tɔ́n dó xwé ɔ sín kɔ́xota é. Mɛsɛntɔ́ nyɔ̌nu e nɔ nyí Hlǒdu é (nyǐkɔ kpaa ɖé wɛ ɖo Glɛ̌kigbe mɛ bɔ tínmɛ tɔn nyí “Rose”) wá hɔn ɔ ta. Ée é se Piyɛ́ɛ sín gbe é ɔ, é ɖi ǎ! É hun hɔntogbó ɔ ǎ, é nyɔ́ wá ɔ, awǎjijɛ tɔn  túnflá sɔmɔ̌ bɔ é jó Piyɛ́ɛ dó nyi te ɖo hɔn ɔ to, bo kán wezun lɛ́ kɔ yi xɔ ɔ mɛ, lobo tɛ́n kpɔ́n bá bló nú agun ɔ ná kú d’é jí ɖɔ Piyɛ́ɛ wɛ ɖo hɔntogbó ɔ ta. Yě ɖɔ ɖɔ taɖu wɛ é hun, amɔ̌, é cí xwíí ɖó mɔ̌ nu ǎ. É kpo ɖo ɖiɖɔ nú yě wɛ ɖɔ émí se gbe tɔn dódódó. Yě mɛ ɖé lɛ́ gbɔ bo ɖɔ ɖɔ é sixú nyí wɛnsagun ɖé wɛ bo sɔ́ afɔ Piyɛ́ɛ tɔn ɖó te. (Mɛ. 12:12-15) Piyɛ́ɛ kpo ɖo hɔn ɔ xúxú wɛ sín hwenɛ́nu, bɔ wǎgbɔ tɔn ɔ, yě wá hun hɔntogbó ɔ.

¹⁵ Ée yě wá hɔntogbó ɔ ta é ɔ, “yě mɔ ɛ, bɔ é kpácá yě tawun”! (Mɛ. 12:16) Wǔ ɖo yě yá wɛ sɔmɔ̌, bɔ Piyɛ́ɛ gbɔ bo ɖɔ nú yě ɖɔ yě ní cí xwíí bónú émí ná ɖɔ nǔ é jɛ dó émí jí é nú yě. É lɛ́ ɖɔ nú yě ɖɔ yě ní tín nǔ e jɛ é mɛ nú ahwanvú Jaki kpó nɔví lɛ́ kpó, bɔ énɛ́ gúdo ɔ, é gosín fínɛ́ bónú sɔ́ja Elódu tɔn lɛ́ ní ma wá sɔgba ɛ ó. Piyɛ́ɛ yi fí ɖěvo bo gbɛ kan dó sinsɛnzɔ́ e wa wɛ é ɖe kpó gbejíninɔ kpó é nu, ɖo fí e ɖo ayijayǐ mɛ é ɖé. Gbɔn vo nú alɔ e é dó bɔ è ɖe ɖɛ adagbigboxó e è ɖɔ ɖo Mɛsɛ́dó wěmata 15​gɔ́ ɔ mɛ é ɔ, è sɔ́ se xó dó wǔ tɔn ɖě ɖo tan ɔ mɛ ǎ. Azɔ̌ e mɛsɛ́dó Pɔ́lu wa lɛ́ é kpó tomɛyiyi tɔn lɛ́ kpó wú wɛ wěma Mɛsɛ́dó tɔn jɛ xó ɖɔ dó jí bɔ d’é wú. Amɔ̌, mǐ sixú gán jɛ wú ɖɔ Piyɛ́ɛ bló bɔ nǔɖiɖi nɔví súnnu tɔn lɛ́ kpó nɔví nyɔ̌nu tɔn lɛ́ kpó tɔn lí dǒ ɖo fí ɖěbǔ e é yi é. Ée é jó gbɛ̌ta nɔví lɛ́ tɔn énɛ́ dó ɖo Mali xwégbe é ɔ, é ɖo wɛn ɖɔ yě ɖó awǎjijɛ tawun.

16. Étɛ́wú mǐ ka hɛn ɔ, mǐ ná gán jɛ wú ɖɔ mǐ ná ɖu nǔ ɖagbe gěgé sín vǐví ɖo sɔgúdo?

¹⁶ Hweɖélɛ́nu ɔ, Jexóva nɔ ná nǔ mɛsɛntɔ́ tɔn lɛ́ hú nǔ e yě sixú ɖó nukún é, bɔ énɛ́ nɔ zɔ́n bɔ awǎjijɛ yětɔn nɔ túnflá. Lěe nǔ cí nú nɔví súnnu kpó nɔví nyɔ̌nu kpó gbigbɔ tɔn Piyɛ́ɛ tɔn lɛ́ ɖo zǎn énɛ́ mɛ é pɛ́ɛ́ nɛ́. Ényí Jexóva kɔn nyɔ̌ná dó mǐ jí bónú é túnflá ɔ, lěe nǔ sixú cí nú mǐ lɔmɔ̌ hweɖélɛ́nu ɖo égbé é nɛ́. (Nǔx. 10:22) Ðo sɔgúdo ɔ, mǐ ná mɔ bɔ akpá Jexóva tɔn lɛ́ bǐ ná jɛnu ɖo ayǐkúngban ɔ bǐ jí. É ɖo wɛn ɖɔ nyɔ̌ná jí wǔ e mǐ ná mɔ lɛ́ é ná zɛ nǔ ɖěbǔ e mɛ mǐ sixú dó nukún kpɔ́n ɖo égbé é wú. Énɛ́ wú ɔ, nú mǐ kpo ɖo gbejí jɛ́n wɛ ɔ, mǐ hɛn ɔ, mǐ ná gán jɛ wú ɖɔ mǐ ná wá ɖu nǔ ɖagbe gěgé sín vǐví.

17, 18. Étɛ́ ka zɔ́n bɔ ahwan ɔ jɛ Elódu sɔ́ su zɛ xwé wú jí?

¹⁷ Tɔ́n e Piyɛ́ɛ tɔ́n sín gankpá mɛ é kpácá Elódu lɔ, amɔ̌, é ka nyí xomɛhunhun sín nǔ nú éyɛ́ ǎ. Elódu yá wǔ ɖe gbe ɖɔ è ní xwe sɔ bo ba Piyɛ́ɛ, énɛ́ gúdo ɔ, é zɔ́n ɖɔ è ní kan nǔ byɔ́ gantɔ́cɔ́tɔ́ e cɔ́ Piyɛ́ɛ lɛ́ é. È “dɔn tó nú” yě, é sixú ko nyí hu wɛ è hu yě. (Mɛ. 12:19) Elódu Aglípa nɔ se wǔvɛ́ xá mɛ alǒ kú nǔbláwǔ nú mɛ ǎ. È ka wá dɔn tó nú nya acɛgbatɔ́ énɛ́ a?

¹⁸ Winnyá ná ko hu Aglípa ɖó kpé e é ma kpé wú bo hu Piyɛ́ɛ ǎ é wú, amɔ̌ zaan ɔ, nǔ e ná zɔ́n bɔ é ná mɔ éɖée mɛ kpɛɖé é sín ali hun n’i. É sín dó ninɔmɛ ɖé wú bɔ kɛntɔ́ tɔn ɖé lɛ́ wá fífá kan xo gbé ɖo gɔ̌n tɔn, bɔ é ɖo wɛn ɖɔ akpakpa ɖo sísɔ́ ɛ wɛ bónú é ná xwlé xóɖiɖɔ ɖé mɛ wɔ̌búwɔ́bú. Luki wlán ɖɔ cóbónú Elódu ná bɛ́ xóɖiɖɔ tɔn ɔ, é “ɖo axɔ́súwu tɔn mɛ.” Hwenuxówlántɔ́ Jwifu Josèphe wlán ɖɔ è hɛn kpatágan gbɔn axɔ́sú Elódu sín awu mɛ,  bónú wěziza jɛ jǐ tɔn ɔ, é ná nɔ kɔ́n lobonú mɛ lɛ́ ná nɔ mɔ ɖɔ é cí nǔmɛsɛn ɖɔhun. Énɛ́ gúdo ɔ, toxóɖɔtɔ́ goyítɔ́ énɛ́ bɛ́ xóɖiɖɔ. Ahwan e ɖo sísɔ́ ɛ su wɛ zɛ xwé wú é sú xó ɖɔ: “Nǔmɛsɛn ɖé sín gbe ɖíe, é nyí gbɛtɔ́ sín gbe ǎ!”—Mɛ. 12:20-22.

19, 20. (a) Étɛ́wú Jexóva ka dɔn tó nú Elódu? (b) Gbɔ tɛ́ tan e ɖɔ xó dó kú e Elódu kú ajijimɛ é wú é ka sixú dó nú mǐ?

¹⁹ Mawu wɛ susu mɔ̌hun jɛxá, bɔ é ka ɖo nǔ e ɖo jijɛ wɛ é bǐ mɔ wɛ fɛɛ! Hwenu kpo nú Elódu bónú é ná nyi alɔ nú awě. É hɛn ɔ, é ná gbɛ́ nǔ nú ahwan ɔ, alǒ é hwe bǐ ɔ, é ná ɖɔ nú yě ɖɔ émí kún ba mɔ̌ ó. É ka wa mɔ̌ ǎ, é nyɔ́ wa ɔ, xó élɔ́ e nǔnywɛ́xó ɖɔ é ɖi wǔ tɔn: “Mɛɖé ja cu kpé gbé ɔ, goyíyí wɛ é nɔ bɛ́.” (Nǔx. 16:18) “Tlóló tɛn tɔn mɛ ɔ, wɛnsagun Jexóva tɔn sín alɔ jɛ wǔ tɔn,” b’ɛ zɔ́n bɔ nya énɛ́ e nɔ ɖe nyi wɛ sɔ lě sín afɔ bo nɔ lɛ́ yí go é kú kú baɖabaɖa. “Wě ɖu i káká bɔ é kú.” (Mɛ. 12:23) Josèphe lɔ tɛ ɖɛ̌ jí ɖɔ alɔ jɛ Aglípa wú ajijimɛ, bo ɖɔ gɔ́ ná ɖɔ axɔ́sú ɔ wá mɔ nǔ jɛ wú ɖɔ gbe e émí yí bɔ ahwan ɔ xɔ súsú nú émí zɛ xwé wú é wɛ zɔ́n bɔ émí ɖo kúdonu. Josèphe wlán ɖɔ Aglípa se wǔvɛ́ nú azǎn atɔ́ɔ́n hwɛ̌ cóbó bɔnu. b

²⁰ Nǔnyanyawatɔ́ lɛ́ nɔ wa nǔ nyanya alɔkpa e jló yě lɛ́ é bǐ, bɔ hweɖélɛ́nu ɔ, é sixú cí ɖɔ yě wa bɔ é dɔn wɛ ɖɔhun. Énɛ́ ɖó ná kpácá mǐ ǎ, ɖó “gbɛ ɔ bǐ ɖo mɛ nyanya ɔ sín acɛ mɛ.” (1 Jaan 5:19) É ɖo mɔ̌ có, akpɔ nɔ ɖó mɛsɛntɔ́ Mawu tɔn gbejínɔtɔ́ lɛ́ hweɖélɛ́nu, nú é cí ɖɔ nǔnyanyawatɔ́ lɛ́ kún se xɔxɔ nǔ nyanya e yě wa lɛ́ é tɔn ó ɔ nɛ́. Nǔ e wú tan lěhun lɛ́ nɔ dó gbɔ nú mɛ é ɖokpó nɛ́. Nǔgbó ɔ, mǐ mɔ ɖɔ Jexóva d’afɔ xó ɔ mɛ, bo ɖo flínflín mɛsɛntɔ́ tɔn lɛ́ bǐ wɛ ɖɔ émí yí wǎn nú hwɛjijɔ. (Ðɛh. 33:5) É lín oo, é yá oo, é ná dá hwɛ jlɔ́jlɔ́.

21. Nǔkplɔ́nmɛ tají tɛ́ ka ɖo Mɛsɛ́dó wěmata 12​gɔ́ ɔ mɛ? Étɛ́wú é ka sixú dó gbɔ nú mǐ ɖo égbé?

²¹ Tan élɔ́ fó kpó nǔkplɔ́nmɛ e dó wǔsyɛ́n lanmɛ nú mɛ tawun é ɖé kpó: “Xó Jexóva tɔn ɖo gbigba kpé wɛ.” (Mɛ. 12:24) Gbe énɛ́ e è ɖó dó wɛnjíjlázɔ́ ɔ éé ɖo kan vun wɛ é wú é sixú flín mǐ lěe Jexóva ɖo nyɔ̌ná kɔn dó azɔ̌ ɖokpó ɔ jí wɛ ɖo égbé gbɔn é. É ɖo wɛn ɖɔ é kún nyí kú mɛsɛ́dó ɖokpó tɔn, alǒ tɔ́n e mɛsɛ́dó ɖěvo tɔ́n sín gankpá mɛ é wɛ nyí nǔ tají e ɖo Mɛsɛ́dó wěmata 12​gɔ́ ɔ mɛ é ó. Nǔ tají ɔ wɛ nyí ɖɔ é kplɔ́n nǔ mǐ dó Jexóva kpó nǔ e é wa dó gbo kpo nyi ali jí nú gǎn e dó wɛ Satáan ɖe bo ná sú kún dó nú agun klisánwun tɔn, lobo ná lɛ́ ɖó wɛnjíjlázɔ́ e wa wɛ agun ɔ ɖe kpó kanɖódónǔwú kpó é te é wú. Ahwantɔ́nmɛ Satáan tɔn énɛ́ lɛ́ nu ami; lěe tuto mɔ̌hun ɖěvo lɛ́ bǐ ka ná lɛ́ nu ami gbɔn é nɛ́. (Eza. 54:17) Ðo alɔ ɖěvo mɛ ɔ, mɛ ɖěɖěe ɖo Jexóva kpó Jezu Klísu kpó sín ahwan mɛ lɛ́ é ɖo alɔ ɖó ɖo azɔ̌ e ma ná cifo gbeɖé ǎ é mɛ wɛ. É dó wǔsyɛ́n lanmɛ nú mɛ tawun ǎ cé? Wǔjɔmɛ ɖé wɛ é nyí nú mǐ ɖɔ mǐ ní d’alɔ bónú “xó Jexóva tɔn” ní gba kpé ɖo égbé!