Jezu wɛ nyí Ta nú agun Klisanwun tɔn. (Efɛzinu lɛ 5:23) Égbé ɔ, Jezu nɔ xlɛ́ ali ahwanvu tɔn lɛ gbɔn ‘deví gbejinɔtɔ́, ayiɖotenanɔ’ ɔ gblamɛ, sín jixwé. (Xà Matie 24:45.) Jezu Klisu ɖesu wɛ sɔ́ ‘deví’ enɛ, bo na ɛ acɛ b’ɛ na wá gbeta ɖé lɛ kɔn. É ɖò mɔ̌ có, deví enɛ ɖó na setónú nú Klisu bo wà sinsɛnzɔ́ nú nɔví Klisu tɔn lɛ. Mɛ̌ ka nyí deví enɛ? Nɛ̌ deví ɔ ka nɔ kpé nukún dó mǐ wu gbɔn?

1. Mɛ̌ ka nyí ‘deví gbejinɔtɔ́, ayiɖotenanɔ’ ɔ?

Jehovah ko nɔ zán sunnu ɖé, alǒ gbɛ̌ta kpɛví sunnu lɛ tɔn ɖé tɛgbɛ dó xlɛ́ ali togun tɔn. (Malacíi 2:7; Eblée lɛ 1:1) Ee Jezu kú gudo é ɔ, mɛsɛ́dó lɛ kpo mɛxo Jeluzalɛmu tɔn lɛ kpo nɔ nukɔn nú nǔ lɛ. (Mɛsɛ́dó 15:2) Mɔ̌ ɖokpo ɔ ɖò égbé ɔ, gbɛ̌ta kpɛví mɛxo lɛ tɔn ɖé nɔ nɔ nukɔn nú nǔ lɛ. Gbɛ̌ta enɛ wɛ è nɔ ylɔ́ ɖɔ Hagbɛ̌ Alixlɛ́mɛtɔ́ Kúnnuɖetɔ́ Jehovah tɔn lɛ tɔn. É nɔ sɔnǔ nú nǔɖuɖu gbigbɔ tɔn lɛ, bo nɔ lɛ́ kpé nukún dó wɛnɖagbejijlazɔ́ ɔ wu. Gbɛ̌ta enɛ wɛ nyí ‘deví gbejinɔtɔ́, ayiɖotenanɔ e Jezu sɔ́ é.’ (Matie 24:45a) Mɛ e ɖò Hagbɛ̌ Alixlɛ́mɛtɔ́ ɔ mɛ lɛ é bǐ wɛ nyí Klisanwun e gbigbɔ mímɛ́ ɖè lɛ é. Ye ɖò nukún ɖó wɛ bo na kpa acɛ xá Klisu ɖò Axɔ́suɖuto tɔn jixwé tɔn ɔ mɛ, hwenu e ye na fó gbɛzán yetɔn ayikúngban jí tɔn é.

2. Nǔɖuɖu gbigbɔ tɔn tɛ deví gbejinɔtɔ́ ayiɖotenanɔ ɔ ka nɔ sɔnǔ na?

Jezu ɖɔ ɖɔ deví gbejinɔtɔ́ ɔ na “nɔ na nǔɖuɖu [Klisanwun hatɔ́ tɔn lɛ] dó hwetɔnnu.” (Matie 24:45b) Lee nǔɖuɖu e mǐ nɔ ɖu lɛ é nɔ d’alɔ mǐ bɔ mǐ nɔ ɖó hlɔnhlɔn bo nɔ lɛ́ ɖò ganji ɖò agbaza mɛ gbɔn é ɔ, mɔ̌ ɖokpo ɔ wɛ nǔɖuɖu gbigbɔ tɔn, ee nyí alixlɛ́mɛ e jinjɔn Xó Mawu tɔn jí é, nɔ na hlɔnhlɔn e sín hudo mǐ ɖó bo na kpò ɖò gbeji nú Jehovah, lobo na lɛ́ wà azɔ̌ e Jezu sɔ́ dó así nú mǐ é gbɔn. (1 Timɔtée 4:6) Mǐ nɔ mɔ nǔɖuɖu gbigbɔ tɔn enɛ gbɔn kplé lɛ, kpléɖókpɔ́ lɛdo tɔn lɛ kpo kpléɖókpɔ́ ɖaxó lɛ kpo gblamɛ. Mǐ nɔ lɛ́ mɔ gbɔn wema jinjɔn Biblu jí lɛ kpo video lɛ kpo gblamɛ. Ye nɔ d’alɔ mǐ bɔ mǐ nɔ mɔ nukúnnú jɛ jlǒ Mawu tɔn wu, bo nɔ lɛ́ na hlɔnhlɔn kancica e mǐ ɖó xá ɛ é.

 BA DÒ NÚ NǓ D’EJI

3. Nǔ lɛ ɖó na nɔ tito jí ɖò togun Jehovah tɔn mɛ

Ðò alixlɛ́mɛ Jezu tɔn glɔ́ ɔ, Hagbɛ̌ Alixlɛ́mɛtɔ́ ɔ nɔ bló tito nú azɔ̌ Kúnnuɖetɔ́ Jehovah tɔn lɛ tɔn. Tito mɔ̌hun ko ɖè ɖò Klisanwun nukɔntɔn lɛ tɛntin. Xò VIDEO ɔ.

Xà 1 Kɔlɛntinu lɛ 14:33, 40, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Nɛ̌ wemafɔ enɛ lɛ ka xlɛ́ ɖɔ Jehovah ba ɖɔ Kúnnuɖetɔ́ emitɔn lɛ ni nɔ tito jí gbɔn?

4. Deví gbejinɔtɔ́ ɔ nɔ bló tito nú wɛnɖagbejijlazɔ́ mǐtɔn

Wɛnɖagbejijlazɔ́ ɔ wɛ nyí azɔ̌ taji hugǎn e Klisanwun nukɔntɔn lɛ wà é. Xà Mɛsɛ́dó 8:14, 25, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Mɛ̌ mɛ̌ e ka nɔ nukɔn nú wɛnɖagbejijlazɔ́ ɔ ɖò Klisanwun nukɔntɔn lɛ tɛntin?

• Nɛ̌ Piyɛ́ɛ kpo Jaan kpo ka xwedó alixlɛ́mɛ e mɛsɛ́dó gbɛ̌ yetɔn lɛ na é gbɔn?

Wɛnɖagbejijlazɔ́ ɔ wɛ nyí azɔ̌ taji hugǎn e sín tito Hagbɛ̌ Alixlɛ́mɛtɔ́ ɔ bló é. Xò VIDEO ɔ.

Jezu tɛɖɛ̌ lee wɛn ɔ jijla ɖò taji sɔ é jí. Xà Maki 13:10, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Etɛwu wɛnɖagbejijlazɔ́ ɔ ka ɖò taji nú Hagbɛ̌ Alixlɛ́mɛtɔ́ ɔ sɔmɔ̌?

• Etɛwu é ka byɔ ɖɔ ‘deví gbejinɔtɔ́, ayiɖotenanɔ’ ɔ ni bló tito nú azɔ̌ enɛ e wà wɛ mǐ ɖè gbɔn gbɛ̀ ɔ bǐ mɛ é?

 5. Deví gbejinɔtɔ́ ɔ nɔ na alixlɛ́mɛ lɛ

Hagbɛ̌ Alixlɛ́mɛtɔ́ ɔ nɔ na alixlɛ́mɛ lɛ Klisanwun e gbɔn gbɛ̀ ɔ bǐ mɛ lɛ é. Nɛ̌ é ka nɔ wá gbeta alixlɛ́mɛ e é na na é tɔn kɔn gbɔn? Kpɔ́n lee hagbɛ̌ alixlɛ́mɛtɔ́ Klisanwun nukɔntɔn lɛ tɔn wà mɔ̌ gbɔn é. Xà Mɛsɛ́dó 15:1, 2, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Xó tɛ ka dɔn gbemanɔkpɔ́ wá Klisanwun nukɔntɔn ɖé lɛ tɛntin?

• Mɛ̌ mɛ̌ e gɔ́n Pɔlu, Baanabasi kpo mɛ ɖevo lɛ kpo ka yì bonu è na ɖeɖɛ xó ɔ?

Xà Mɛsɛ́dó 15:12-18, 23-29, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Cobonu hagbɛ̌ alixlɛ́mɛtɔ́ xwè kanweko nukɔntɔn ɔ tɔn na wá gbeta ɖé kɔn ɔ, etɛ é ka wà hwenu e é ɖò alixlɛ́mɛ Mawu tɔn ba dó xó ɔ wu wɛ é?—Kpɔ́n wemafɔ 12, 15, kpo 28 kpo.

Xà Mɛsɛ́dó 15:30, 31 kpo 16:4, 5 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Nɛ̌ Klisanwun xwè kanweko nukɔntɔn ɔ tɔn lɛ ka wà nǔ gbɔn dó alixlɛ́mɛ e hagbɛ̌ alixlɛ́mɛtɔ́ ɔ na lɛ é wu?

• Nɛ̌ Jehovah ka kɔn nyɔna dó tónúsíse yetɔn jí gbɔn?

Xà 2 Timɔtée 3:16 kpo Jaki 1:5 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Fitɛ Hagbɛ̌ Alixlɛ́mɛtɔ́ ɔ ka nɔ ba alixlɛ́mɛ ɖè dó wá gbeta lɛ kɔn ɖò égbé?

 ETƐ LƐ A KA KPLƆ́N?

Hagbɛ̌ Alixlɛ́mɛtɔ́ ɔ wɛ nyí ‘deví gbejinɔtɔ́, ayiɖotenanɔ’ e Klisu sɔ́ é. É nɔ na alixlɛ́mɛ lɛ kpo nǔɖuɖu gbigbɔ tɔn kpo Klisanwun lɛ gbɔn gbɛ̀ ɔ bǐ mɛ.

Vɔ̌gbɔnji

• Mɛ̌ ka sɔ́ ‘deví gbejinɔtɔ́, ayiɖotenanɔ’ ɔ?

• Nɛ̌ Hagbɛ̌ Alixlɛ́mɛtɔ́ ɔ ka nɔ kpé nukún dó mǐ wu gbɔn?

• A ka kúdeji ɖɔ Hagbɛ̌ Alixlɛ́mɛtɔ́ ɔ wɛ nyí ‘deví gbejinɔtɔ́, ayiɖotenanɔ’ ɔ à?