SPINOZA, éé nyí tamɛ-núkplɔ́nmɛtɔ́ Pays-Bas tɔn ɖé é wlán nǔ élɔ́: “Un dó gǎn bo cá nǔwiwa gbɛtɔ́ lɛ́ tɔn lɛ́ ko ǎ, un ka sa gbɛvo ɖó yě wú ǎ, mɔ̌ jɛ́n un ma ka lɛ́ gbɛ́ wǎn nú yě ǎ é nɛ́, é nyɔ́ wa ɔ, un dó gǎn bo ná mɔ nukúnnú jɛ yě mɛ.” Ðó a nyí mɛ̌si ɖé wútu ɔ, é nɔ bɔ wǔ ɖěbǔ bónú a ná mɔ nukúnnú jɛ wěmaxɔmɛví e hɛn wɛ a ɖe lɛ́ é sín linlin lɛ́, ninɔmɛ e mɛ yě gosín lɛ́ é kpó nǔ e yě ɖi nǔ ná lɛ́ é kpó mɛ ǎ, Kúnnuɖetɔ́ Jexóva tɔn lɛ́ sín vǐ lɛ́ lɔ ɖo yě mɛ. Hweɖélɛ́nu ɔ, wěmaxɔmɛví mɔ̌hun lɛ́ sixú wá gbeta e é cí ɖɔ mɛ gěgé kún yí gbe ná ó é kɔn dó xó ɖé lɛ́ wú. Amɔ̌, ényí é za wě ɖɔ sinsɛn wěmaxɔmɛví lɛ́ tɔn kpó nǔ e yě ɖi nǔ ná lɛ́ é kpó wú wɛ nǔwiwa mɔ̌hun lɛ́ sín hǔn, é ɖo tají ɖɔ a ní ké ya ná. Watch Tower Bible and Tract Society (tutomɛ Kúnnuɖetɔ́ Jexóva tɔn lɛ́ tɔn e sɛ́n tuun b’ɛ nɔ ɖe nǔ tɔ́n é) wɛ sɔ́ nǔ nú alɔnuwéma élɔ́; è sɔ́ nǔ ná bónú é ná d’alɔ we bɔ a ná ɖó nukúnnúmɔjɛnǔmɛ dó wěmaxɔmɛví Kúnnuɖetɔ́ lɛ́ wú hú gǎn. Mǐ ɖó nukún ɖɔ a ná ba hwenu dó xa kpó sɔxwixwe kpó.

Nukúnnú mimɔ jɛ nǔ e mɛ ɖěvo ɖi nǔ ná ɖo sinsɛn kpáxwé lɛ́ é mɛ byɔ́ ɖɔ è ní yí gbe ná, alǒ xwedó ǎ; mɔ̌ jɛ́n xó ɖɔ d’é wú ma ka lɛ́ nyí mɛ dindɔn dó sinsɛn mɛ xó ǎ é nɛ́. Ðo alɔnuwéma élɔ́ mɛ ɔ, biba wɛ è ɖe bo ná hɛn hwi alǒ wěmaxɔmɛví towe lɛ́ gǎnnugǎnnu bónú mi ná ɖó linlin sinsɛn tɔn Kúnnuɖetɔ́ lɛ́ tɔn lɛ́ ǎ. Jlǒ mǐtɔn kpowun wɛ nyí ɖɔ mǐ ná ná we mɔjɛmɛ lɛ́ dó nǔgbódodó e wěmaxɔmɛví towe ɖé lɛ́ sín mɛjitɔ́ lɛ́ nɔ kplɔ́n yě lɛ́ é kpó nǔ e yě nɔ kplɔ́n yě bɔ yě ɖi nǔ ná lɛ́ é kpó wú; mɔ̌ mɛ ɔ, é ná bɔ wǔ nú we bɔ a ná mɔ nukúnnú jɛ vǐ Kúnnuɖetɔ́ lɛ́ tɔn lɛ́ sín nǔwiwa lɛ́ mɛ, bo lɛ́ wa nǔ ɖó kpɔ́ xá yě. É ɖo wɛn ɖɔ nǔ e è nɔ kplɔ́n vǐ lɛ́ é kpó nǔ e yě nɔ wa lɛ́ é kpó sixú nɔ ma xo nǔ dó akpa ɖokpó ɔ mɛ hwebǐnu, ɖó kpɛɖé kpɛɖé wɛ vǐ ɖokpó ɖokpó nɔ kplɔ́n ayixa éɖésúnɔ tɔn.

Gěgé mɛjitɔ́ lɛ́ tɔn ɖɔhun ɔ, Kúnnuɖetɔ́ Jexóva tɔn lɛ́ nɔ ba ɖɔ vǐ yětɔn lɛ́ ní ɖu wěmaxɔmɛ yiyi yětɔn sín le bǐ mlɛ́mlɛ́. Énɛ́ wú ɔ, yě nɔ kplɔ́n vǐ yětɔn lɛ́ ɖɔ yě ní nɔ wa nǔ ɖó kpɔ́ xá mɛ̌si yětɔn lɛ́. Wǎgbɔ tɔn ɔ, ényí mɛ̌si lɛ́ wa nǔ xá mɛjitɔ́ Kúnnuɖetɔ́ lɛ́ gɔ́ nú vǐ yětɔn lɛ́ kpó nukúnnúmɔjɛnǔmɛ kpó, kpódó sísí kpán ɔ, é nɔ su nukún yětɔn mɛ.

Klisánwun wɛ Kúnnuɖetɔ́ Jexóva tɔn lɛ́ nyí bɔ è tuun yě gbɔn gbɛ ɔ bǐ mɛ. É ɖo mɔ̌ có, hweɖélɛ́nu ɔ, è nɔ mɔ nukúnnú jɛ nǔwiwa yětɔn lɛ́ mɛ ɖó agɔ. Énɛ́ wú ɔ, mǐ ɖo nukún ɖó wɛ ɖɔ alɔnuwéma élɔ́ ná d’alɔ we, bɔ a ná mɔ nukúnnú jɛ vǐ Kúnnuɖetɔ́ e wú kpé nukún dó wɛ a ɖe lɛ́ é sín nǔwiwa lɛ́ mɛ hú gǎn. Tají ɔ, mǐ ɖo nukún ɖó wɛ ɖɔ a ná mɔ nǔ e wú, ɖo ninɔmɛ tawun tawun ɖé lɛ́ mɛ ɔ, yě sixú jɛ hun dó acɛ e yě ɖó bo ná gbɔn vo é jí é.