AKPÁXWÉ 1
Sinsɛn lɛ Bǐ ka Nɔ Kplɔ́n Nǔgbo ɔ Mɛ À?
1. Sinsɛn tɛ lɛ mɔ̌ mɛ lɛ ka nɔ yì ɖò Aflika?
ÐIBLA nyí mɛ e ɖò Aflika gbéjí lɛ é bǐ wɛ nɔ yí gbè ɖɔ é ɖò taji ɖɔ è ni sɛn Mawu. Amɔ̌, gbè ɖò kpɔ́ dó lee è na sɛn ɛ gbɔn é wu ǎ. Mɛɖé lɛ nɔ sɛn ɛ ɖò sɛ́kpétɛn lɛ, bɔ mɛɖé lɛ nɔ sɛn ɛ ɖò vɔsakpe lɛ kɔn. É ɖò mɔ̌ có, mɛ ɖevo lɛ nɔ yì amǐsa. Amɔ̌, è sixu ɖɔ ɖɔ sinsɛn atɔn géé jɛn ɖò Aflika ǎ. Ðò Malɛnu lɛ gɔ́n ɔ, sɛ́n kpo nǔ e ye ɖi nǔ na lɛ é kpo nɔ gbɔn vovo. Vodunsinsɛn nɔ nyí nǔ ɖokpo ɔ ɖò fí lɛ bǐ ǎ. Ðò Klisanwun-Nyijɛtɔ́ lɛ gɔ́n ɔ, gbemanɔkpɔ́ ɔ lɛ́ syɛn tawun. Gbɔn vo nú sinsɛn Klisanwun-Nyijɛtɔ́ lɛ tɔn nukúnɖeji lɛ ɔ, sinsɛn e ɖò yeɖée kannu lɛ é afatɔ́n mɔkpan wɛ gbɔn Aflika gbé ɔ bǐ jí.
Sinsɛn E Mǐ Nɔ Yì É Ðó Na Jinjɔn Nǔgbo ɔ Jí
2. (a) Ðò kpaa mɛ ɔ, etɛ ka nɔ zɔ́n bɔ mɛ lɛ nɔ yì sinsɛn ɖé? (b) Etɛ ma ka nɔ xlɛ́ ɖɔ sinsɛn e mǐ nɔ yí é nyɔ́ Mawu nukúnmɛ ǎ?
2 Aniwu mɛ lɛ ka nɔ sɛn Mawu lee ye ɖ’ewu gbɔn dìn é? Mɛ gegě nɔ yì sinsɛn e mɛ mɛjitɔ́ yetɔn lɛ ɖè é. Nǔ xóxó e ko jɛ wá yì lɛ é lɔmɔ̌ nɔ zɔ́n bɔ mɛ lɛ nɔ yì sinsɛn e mɛ ye ɖè dìn é. Wema Africains : un héritage triple (Glɛnsigbe) ɖɔ: “Sinsɛn Malɛnu lɛ tɔn gbakpé totaligbé Sahara tɔn ɖó ɖu e Malɛnu lɛ ɖu ɖò jǐ yetɔn é wu, . . . Ali ɖokpo ɔ nu wɛ sinsɛn Klisanwun tɔn lɔ gbakpé tofɔligbé Sahara tɔn ɖè. Malɛnu lɛ zán hwǐ dó hɛn mɛ e ɖò totaligbé Sahara tɔn lɛ é gannugánnú
bɔ ye huzu Malɛnu, bɔ Klisanwun lɛ zán tú dó hɛn mɛ e ɖò tofɔligbé Sahara tɔn lɛ é gannugánnú bɔ ye huzu Klisanwun.” É ɖò mɔ̌ có, gegě mǐtɔn nɔ lin ɖɔ sinsɛn mǐtɔn nɔ nyɔ́ Mawu nukúnmɛ. Amɔ̌, mɛjitɔ́ mǐtɔn lɛ nɔ yì sinsɛn ɖé, alǒ tò ɖevo mɛ nu lɛ wɛ hɛn tɔ́gbó mǐtɔn lɛ gannugánnú bɔ ye yì sinsɛn ɖé kpowun wɛ zɔ́n bɔ é nyí sinsɛn nǔgbo ɔ ǎ.3-5. Nǔjlɛdonǔwu tɛ ka d’alɔ mǐ bɔ mǐ mɔ nǔ jɛ wu ɖɔ é kún nyí sinsɛn lɛ bǐ wɛ nɔ kplɔ́n nǔgbo ɔ mɛ ó?
3 Sinsɛn lɛ bǐ wɛ nɔ ɖɔ ɖɔ emi ɖò lee è na sɛn Mawu gbɔn bɔ é na nyɔ́ é sín ali xlɛ́ mɛ wɛ có, linlin yetɔn lɛ ka nɔ gbɔn vo. Ye nɔ kplɔ́n nǔ vovo gegě mɛ dó mɛ alɔkpa e Mawu nyí é, kpo nǔ e é nɔ ɖó nukún ɖò mǐ sí é kpo wu. Lin tamɛ dó nǔ elɔ jí: Mǐ ni ɖɔ ɖɔ a mɔ azɔ̌ dó azɔ̌xwé ɖaxó ɖé. Azɔn nukɔntɔn e a yì azɔ̌ ɔ mɛ é ɔ, è ɖɔ nú we ɖɔ gǎn ɔ yí gbɔjɛ. Enɛ wu ɔ, a kan nǔ e a ɖó na wá é byɔ azɔ̌watɔ́ atɔn. Mɛ nukɔntɔn ɔ ɖɔ nú we ɖɔ gǎn ɔ jló ɖɔ hwi ni za nǔ. Mɛ wegɔ́ ɔ ɖɔ nú we ɖɔ hwi ɖó na sá nǔ dó dǒ lɛ. Bɔ mɛ atɔngɔ́ ɔ ɖɔ nú we ɖɔ hwi ni má wema-sɛ́dó-mɛ lɛ.
4 Enɛ gudo ɔ, a kan mɛ alɔkpa e gǎn ɔ nyí é byɔ azɔ̌watɔ́ lɛ. Mɛ nukɔntɔn ɔ ɖɔ ɖɔ gǎn ɔ, mɛ gaga wɛ, nyí dɔnkpɛvu, bo lɛ́ nylahun. Mɛ wegɔ́ ɔ ɖɔ ɖɔ gǎn ɔ hwegli, nyí mɛxo, bo nɔ lɛ́ nyɔ́ xomɛ. Bɔ mɛ atɔngɔ́ ɔ ɖɔ nú we ɖɔ gǎn ɔ kún nyí sunnu lɔ vɔ́vɔ́ ó, lé nyɔnu wɛ. É ɖò gaan ɖɔ a na wá gbeta ɔ kɔ́n ɖɔ azɔ̌watɔ́ atɔn lɛ ɖě kún ɖò nǔgbo ɖɔ wɛ ó. Enyi a jló na w’azɔ̌ towe yɔyɔ̌ enɛ ɔ, é ɖò wɛn ɖɔ a na ba dò nú nǔ dó mɛ alɔkpa e gǎn ɔ nyí tawun é, kpo nǔ e é ba ɖɔ a ni wá é kpo wu.
5 Nǔ ɖokpo ɔ wɛ é nyí ɖò sinsɛn linu. Ðó nǔkplɔnmɛ gegě wɛ tíìn dó mɛ alɔkpa e Mawu nyí é, kpo nǔ e ɖó nukún wɛ é ɖè ɖò mǐ sí é kpo wu wutu ɔ, é ɖò dandan ɖɔ mǐ ni kúdeji ɖɔ ali e nu mǐ nɔ sɛn ɛ ɖè é sɔgbe xá nǔgbo ɔ. Amɔ̌, nɛ̌ mǐ ka sixu tuùn nǔgbo ɔ dó Mawu wu gbɔn?