Jezu ko ɖɔ bɔ Piyɛ́ɛ kpo Jaan kpo ko wá Jeluzalɛmu bo na sɔnǔ nú Dindinwayixwe ɔ. Gudo mɛ ɔ, Jezu kpo mɛsɛ́dó wǒ ɖě lɛ kpo wlí dɔ̌n li. Hwenu e Jezu kpo ahwanvu tɔn lɛ kpo jɛte sín Olivutínsó ɔ jí é ɔ, hwe ko lɛkɔ bo ɖò xɔ yì wɛ dó gbadahweji. Jɛ nukɔn nú fínfɔ́n sín kú Jezu tɔn ɔ, azɔn gudo tɔn e é ɖò só enɛ jí bo mɔ toxo ɔ sɛ́dó ɖò kéze é nɛ.

Zaan ɔ, Jezu kpo ahwanvu tɔn lɛ kpo jɛ toxo ɔ mɛ bo yì xwé e gbè ye na ɖu Dindinwayixwe ɔ ɖè é. Ye fán kpokán lɛ bo yì xɔ ɖaxó e ɖò aga é mɛ. Finɛ ɔ, ye mɔ ɖɔ è ko sɔnǔ bǐ ɖ’ayǐ bonu ye na ɖu nǔ ɔ yeɖokponɔ. Jezu ko ɖò nukún ɖó hwe enɛ nu wɛ, ɖó é ɖɔ: “Un ko jló tlala ɖɔ ma ɖu Dindinwayixwe sín nùɖuɖu elɔ xá mi, cobo na jɛ ya jì jí.”​—Luki 22:15.

Xwè mɔkpan jɛ nukɔn ɔ, aca ɖé byɔ Dindinwayixwe ɔ ɖuɖu mɛ, é wɛ nyí ɖɔ è na hɛn kɔfu e mɛ vɛɛn ɖè é nabi ɖé gbɔn mɛ e wá xwè ɔ tɛnmɛ lɛ é jí. Dìn ɔ, ee Jezu yí kɔfu lɛ ɖokpo gudo é ɔ, é dokú nú Mawu bo ɖɔ: “Mi yí, bo má nu, ɖó ma ɖɔ nú mi, bɛ́sín dìn ɔ, vɛɛn ɖě sɔ́ ɖò nu ce na jɛ wɛ kaka yì jɛ hwenu e axɔsuɖuɖu Mawu tɔn na wá dó é ǎ.” (Luki 22:17, 18) É ɖó na ɖò wɛn ɖɔ kú tɔn ko sɛkpɔ.

É jɛ hweɖenu ɖò Dindinwayixwe sín nùɖuɖu ɔ hwenu é ɔ, nǔ e ma nɔ jɛ ǎ é ɖé jɛ. Jezu site, é ɖè awu tɔn aga tɔn lɛ, bo sɔ́ avɔ ɖé sìn dó alin. Enɛ gudo ɔ, é wún sìn dó gannu e sɛkpɔ finɛ é ɖé mɛ. Ðò kpaà mɛ ɔ, xwétɔ́ ɖé nɔ ɖɔ, vlafo nú mɛsɛntɔ́ ɖé, bɔ è nɔ klɔ́ afɔ nú jonɔ tɔn lɛ. (Luki 7:44) Ðò ninɔmɛ elɔ mɛ ɔ, xwétɔ́ ɖé ɖò finɛ ǎ, enɛ wu ɔ, Jezu ɖesunɔ wà azɔ̌ enɛ. Mɛsɛ́dó lɛ ɖebǔ hɛn ɔ, é na ko ɖè afɔ enɛ, amɔ̌, ye mɛɖebǔ wà mɔ̌ ǎ. Kwinkwin ɖé wɛ ka kpó ɖò tɛntin yetɔn wutu wɛ à? Ðebǔ wɛ é na bo nyí gbɔn ɔ, winnya hu ye ɖɔ Jezu ni klɔ́ afɔ nú ye.

Ee Jezu jɛ Piyɛ́ɛ jí é ɔ, é gbɛ́ bo ɖɔ: “A na klɔ́ afɔ nú mì gbeɖé ǎ!” Jezu yí gbè n’i ɖɔ: “Enyi un ma klɔ́ afɔ nú we ǎ ɔ, hǔn a sɔ́ nyí ahwanvu ce ǎ.” Piyɛ́ɛ ka yí gbè bo ɖɔ: “Nú enyi mɔ̌ wɛ hǔn Aklunɔ, é ni ma nyí ɖɔ afɔ ce lɛ kɛɖɛ wɛ a na klɔ́ ó; klɔ́ alɔ ce lɛ, bo klɔ́ ta ce lɔmɔ̌ d’eji.” É na ko kpaca ɛ tawun hwenu e Jezu na ɛ sìnkɔn elɔ é: “Mɛ e ko lɛwu ɔ, afɔ kɛɖɛ jɛn kpó n’i bɔ é na klɔ́, bo na mɛ́; ɖó mimɛ̌ jí wɛ mi ko ɖè; amɔ̌ mi bǐ ka wɛ ǎ.”​—Jaan 13:8-10.

Jezu klɔ́ afɔ ye mɛ 12 lɛ bǐ tɔn, kaka jɛ Judasi Isikaliɔti tɔn jí. Ee Jezu dó awu tɔn aga tɔn lɛ bo lɛ́ wá jinjɔn tavo ɔ tó é ɔ, é kanbyɔ ɖɔ: “Mi ka mɔ nǔ jɛ nǔ e un bló nú mi dìn ɔ mɛ à? Mi nɔ ylɔ  mì ɖɔ ‘Mɛ̌si’, bo nɔ ylɔ mì ɖɔ ‘Aklunɔ’; hwɛ mitɔn jɔ, ɖó nǔ e un nyí ɔ nɛ. Hǔn, enyi nyɛ mɛ e nyí Aklunɔ mitɔn, bo nyí Mɛ̌si mitɔn ɔ ka klɔ́ afɔ nú mi ɔ, é jɛxa ɖɔ mi na nɔ klɔ́ afɔ nú miɖée. Ðó kpɔ́ndéwú ɖé wɛ é nyí, bɔ un na mi, bonu mi lɔmɔ̌ na nɔ bló lee un bló gbɔn nú mi é. Ma ɖɔ nugbǒ nú mi: mɛsɛntɔ́ nɔ hugǎn gǎn tɔn ǎ; mɔ̌ ɖokpo ɔ, wɛnsagun nɔ hugǎn mɛ e sɛ́ ɛ dó ɔ ǎ. Nǔ lɛ bǐ mɛ nɛ mi mɔ nukúnnú jɛ nɛ; enyi mi bló ɖ’eji ɔ, é na nyɔ́ nú mi.”​—Jaan 13:12-17.

Nùkplɔnmɛ ɖagbeɖagbe ɖé wɛ nyí enɛ dó mɛɖesɔhwe jí à cé? Ahwanvu Jezu tɔn lɛ ɖó na nɔ ba tɛnmɛ nukɔntɔn lɛ, bo na nɔ lin ɖɔ emi nyí nùjɔnǔ bɔ è ɖó na wà devizɔ́ nú emi ǎ. É nyɔ́ wà ɔ, ye ɖó na xwedó kpɔ́ndéwú Jezu tɔn, é nyí bo na nɔ klɔ́ afɔ nú mɛ wɛ ǎ, loɔ, bo na nɔ sɔ́ jlǒ dó wà mɛsɛntɔ́zɔ́ kpo mɛɖesɔhwe kpo, bo ka na nɔ ɖè mɛɖé ɖó vo ɖò mɛɖé mɛ ǎ.