Jezu tɛnkpɔn bo hwla dó Pilatu ɖɔ emi kún nyí axɔsu ó ǎ. É ɖò mɔ̌ có, Axɔsuɖuto tɔn nyí awovinú nú Hlɔma ǎ. Jezu ɖɔ: “Axɔsuɖuɖu ce nyí gbɛmɛ fí tɔn ǎ; enyi gbɛmɛ fí tɔn wɛ é ko nyí ɔ, ahwanvu ce lɛ na ko fun ahwan, nú è ma jó mì nú Jwifugán lɛ ó; axɔsuɖuɖu ce ka nyí gbɛmɛ fí tɔn ǎ.” (Jaan 18:36) Nugbǒ ɔ, Jezu ɖó Axɔsuɖuto ɖé, amɔ̌, é ka nyí gbɛmɛ fí tɔn ǎ.

Pilatu jó xó ɔ dó nyì mɔ̌ kpowun ǎ. É kanbyɔ ɖɔ: “Hǔn axɔsu wɛ a nyí nɛ hǔn?” Jezu tinmɛ nú Pilatu ɖɔ éɖesu ko wá gbeta e sɔgbe é kɔn, bo yí gbè n’i ɖɔ: “Hwi wɛ ɖɔ un nyí axɔsu. È jì mì, bɔ un wá gbɛ̀ ɔ mɛ, bo na ɖekúnnu nú nugbǒ ɔ. Mɛ e nɔ xwedó nugbǒ ɔ bǐ wɛ nɔ ɖótó xó ce.”​—Jaan 18:37.

Jezu ko ɖɔ nú Tɔmáa ɖ’ayǐ ɖɔ: “Nyɛ wɛ nyí ali ɔ, bo nyí nugbǒ ɔ, bo ka lɛ́ nyí gbɛ̀ ɔ.” Dìn ɔ, Pilatu lɔ sè ɖɔ nǔ e wu è sɛ́ Jezu dó ayikúngban jí é wɛ nyí ɖɔ é na ɖekúnnu nú “nugbǒ ɔ,” ɖò taji ɔ, nú nugbǒ e kúnkplá Axɔsuɖuto tɔn é. Jezu kudeji bo na nɔ gbeji nú nugbǒ enɛ, enyi enɛ tlɛ byɔ ɖɔ é na kú ɔ nɛ. Pilatu kanbyɔ ɖɔ: “Ani ka nyí nugbǒ ɔ?” Amɔ̌, é sɔ́ nɔte bo ɖótó mɔjɛmɛ ɖevo lɛ d’eji ǎ. É lin ɖɔ nǔ e emi ko sè lɛ é ko kpé bɔ emi na dá hwɛ nú dawe enɛ.​—Jaan 14:6; 18:38.

Pilatu lɛkɔ wá ahwan e ɖò te ɖò hɔnmɛ ɔ sín nukɔn é gɔ́n. Jezu na ko ɖò akpá tɔn hwenu e é ɖɔ xó elɔ nú vɔsanúxwlémawutɔ́gán lɛ kpo mɛ e ɖò kpɔ́ xá ye lɛ é kpo é: “Un mɔ hwɛ ɖě ɖò kɔ nú nya elɔ ǎ.” Gbeta enɛ e kɔn é wá é sìn xomɛ nú ahwan ɔ, bɔ ye zyan vǎ d’eji ɖɔ: “Nǔ e kplɔ́n mɛ wɛ é ɖè ɔ ɖò Judée tò ɔ bǐ dán wɛ; Galilée yikúngban jí wɛ é bɛ́sín, kaka wá jɛ fí.”​—Luki 23:4, 5.

Kanɖodonǔwu agɔ Jwifu lɛ tɔn enɛ e ma ɖó donu ɖé ǎ é na ko kpaca Pilatu. Hwenu e vɔsanúxwlémawutɔ́gán lɛ kpo tomɛxo lɛ kpo kpó ɖò xó sú wɛ é ɔ, Pilatu kanbyɔ Jezu ɖɔ: “A sè hwɛ tobutobu e dó we wɛ ye ɖè ɔ à ce? Etɛ a mɔ d’ewu?” (Matie 27:13) Jezu tlɛ kɛnu d’emɛ n’i ǎ. Hwɛ baɖabaɖa enɛ lɛ e è dó è cobɔ é ka cí xwii é kpaca Pilatu.

Jwifu lɛ ɖɔ ɖɔ “Galilée yikúngban jí wɛ é bɛ́sín.” Pilatu jɛ xó enɛ gudo, bo wá mɔ ɖɔ Galiléenu wɛ nú Jezu. Enɛ hun ali nú Pilatu bɔ é mɔ lee é na bló gbɔn, b’ɛ ma na nyí ɖɔ é wɛ dá hwɛ nú Jezu ǎ é. Elodu Antipasi (ee nyí Elodu Ðaxó ɔ sín vǐ é) wɛ kpacɛ nú Galilée hwenɛnu, lobɔ é ɖò Jeluzalɛmu ɖò Dindinwayixwe sín táan enɛ mɛ. Enɛ wu ɔ, Pilatu sɛ́ Jezu dó Elodu gɔ́n. Elodu Antipasi wɛ ɖɔ bɔ è gbò ta Jaan Baptɛmublonumɛtɔ́ ɔ. Ee é wá sè ɖò nukɔnmɛ ɖɔ Jezu ɖò nùjiwǔ gègě bló wɛ é ɔ, ado hu i, ɖó é lin ɖɔ Jaan wɛ sixu ko fɔ́n sín kú bo nyí Jezu.​—Luki 9:7-9.

Dìn e Elodu sè ɖɔ emi na mɔ Jezu é ɔ, é víví n’i. É ka nyí ɖɔ é ba bo na d’alɔ Jezu alǒ jló na tɛnkpɔn bo kpɔ́n ɖɔ hwɛ e è dó è lɛ é ka sɔgbe à jí wɛ ǎ. Nǔ dò ba wɛ Elodu ɖè kpowun, bo “ɖò nukún ɖó wɛ ɖɔ é na jlɛ́ nǔ bɔ emi na kpɔ́n.” (Luki 23:8) Loɔ, Jezu na nǔdobiba tɔn sín nu i ǎ. Nugbǒ ɔ, hwenu e Elodu ɖò xò kanbyɔ Jezu wɛ é ɔ, é tlɛ kɛnu d’emɛ n’i ǎ. É sìn xomɛ nú Elodu kpo sɔja tɔn lɛ kpo bɔ ye wà “wangbɛnumɛ sín nǔ” xá Jezu. (Luki 23:11) Ye dó awu ɖagbeɖagbe ɖé n’i bo ko è. Enɛ gudo ɔ, Elodu lɛkɔ nú Jezu sɛ́dó Pilatu. Kɛntɔ́ wɛ Elodu kpo Pilatu kpo nyí ɖ’ayǐ, amɔ̌ dìn ɔ, ye huzu xɔ́ntɔn.

Hwenu e Jezu lɛkɔ wá é ɔ, Pilatu ylɔ vɔsanúxwlémawutɔ́gán lɛ, Jwifugán lɛ kpo togun ɔ kpo kplé bo ɖɔ: “Nya elɔ e mi kplá wá nú mì, bo ɖɔ é ɖò tò ɔ dɔn bú wɛ ɔ ɖíe un kàn nǔ byɔ ɖò mi bǐ nukɔn è; un ka mɔ nǔ e é wà nyì dó é ǎ. Elodu lɔ ka mɔ nùɖé ǎ; enɛ ɔ wutu wɛ é lɛ́ nyì i sɛ́dó mì; mi ma mɔ dìn ɖɔ nya elɔ kún wà nùɖé nú è na sixu ɖó kúhwɛ́ n’i ó à? Hǔn, un na xò è, bo na jó è dó.”—Luki 23:14-16.

 Akpàkpà ɖò Pilatu sɔ́ wɛ bonu é na ɖè Jezu nyite, ɖó é mɔ ɖɔ mɛnúvɛ́mɛwu sín nǔ wà xá ɛ wɛ vɔsanúxwlémawutɔ́ lɛ ɖè. Ee Pilatu ɖò tintɛnkpɔn wɛ bo na ɖè Jezu nyite é ɔ, é lɛ́vɔ mɔ hwɛjijɔ ɖevo e na sísɛ́ ɛ b’ɛ na bló mɔ̌ é. Hwenu e é ɖò hwɛ ɔ ɖɔ wɛ é ɔ, asì tɔn sɛ́ wɛn elɔ dó è: “Nùɖé ni ma kàn we ɖò nya enɛ ɔ sín xó mɛ ó, xomɛvɔnɔ wɛ. Ðò zǎn elɔ mɛ ɔ, un kú dlɔ̌ baɖabaɖa ɖé [Mawu wɛ na ko xò dlɔ̌ enɛ ɛ] dó wǔ tɔn, bo mɔ wuvɛ̌ ɖesu ɖò amlɔ mɛ.”​—Matie 27:19.

Nɛ̌ Pilatu ka na ɖè nya xomɛvɔnɔ enɛ sɔ́ nyite, lee é ɖó na bló gbɔn é gbɔn?