Jezu gosin Pelée bo wá dogbó Betaníi tɔn lɛ jí, gletoxo ɖé wɛ bo ɖó kilomɛtlu atɔn mɔ̌ dó Jeluzalɛmu ɖò zǎnzǎnhweji. Mali kpo Mata kpo e nyí nɔví nyɔnu Lazáa tɔn lɛ é ɖò kú tɔn ví yá wɛ. Mɛ gègě wá bo na dó nǔwamɛgbe ye.

Loɔ, mɛɖé wá ɖɔ nú Mata ɖɔ Jezu jǎwe, bɔ é yawu bo yì kpé è ɖò alixo. Mata ɖɔ nǔ e é kpo nɔví tɔn nyɔnu ɔ kpo na ko ɖò linlin wɛ sín azǎn ɛnɛ ɖíe é nú Jezu, bo ɖɔ: “Aklunɔ, enyi fí wɛ a ko ɖè ɔ, nɔví ce na kú ǎ.” É ɖò mɔ̌ có, é nyí ɖɔ é ba nukúnɖiɖo kpò wu wɛ ǎ. “Có dìn ɖesu ɔ, un tuùn ɖɔ a byɔ nǔ ɖebǔ Mawu ɔ, é na na bǐ we,” wɛ Mata ɖɔ. (Jaan 11:21, 22) É mɔ ɖɔ Jezu hɛn ɔ, é na lɛ́ d’alɔ nɔví emitɔn.

Jezu yí gbè n’i ɖɔ: “Nɔví towe na fɔ́n.” Mata vɛdo fínfɔ́n sín kú dó ayikúngban jí sɔgudo tɔn, ee Ablaxamu kpo mɛ ɖevo lɛ kpo ɖò te kpɔ́n é xó ɖɔ wɛ Jezu ɖè sín. Lobo ɖexlɛ́ ɖɔ emi ɖi nǔ ɖɔ nǔ na wá nyí mɔ̌ dandan, bo ɖɔ: “Un tuùn ɖɔ é na fɔ́n ɖò fínfɔ́n sín kú mɛkúkú lɛ tɔn hwenu, ɖò azǎn gudogudo tɔn ɔ gbè.”​—Jaan 11:23, 24.

É ɖò mɔ̌ có, Jezu ka sixu kpéwú bo bló bɔ è mɔ kɔ dó sà fún i tlolo ɖò ninɔmɛ enɛ mɛ à? É flín Mata ɖɔ Mawu na emi hlɔnhlɔn dó kú jí, bo ɖɔ: “Mɛɖebǔ ɖi nǔ nú mì ɔ, é na bo kú ɔ, é na nɔ gbɛ̀. Mɛ e ka ɖò gbɛ̀ bo ɖi nǔ nú mì ɔ na kú gbeɖé ǎ.”​—Jaan 11:25, 26.

Ðiɖɔ wɛ Jezu ɖè ɖɔ ahwanvu emitɔn e ɖò gbɛ̀ hwenɛnu lɛ é kún na kú gbeɖé ó ǎ. Éyɛ ɖesu ɔ tlɛ ɖó na kú, lee é ko ɖɔ gbɔn nú mɛsɛ́dó tɔn lɛ é. (Matie 16:21; 17:22, 23) Nùɖiɖi ɖiɖó nú éyɛ sixu zɔ́n bɔ è mɔ gbɛ̀ mavɔmavɔ jí tɛɖɛ̌ wɛ é ɖè. Mɛ gègě na mɔ gbɛ̀ mɔhun gbɔn fínfɔ́n sín kú gblamɛ. É ɖò mɔ̌ có, gbejinɔtɔ́ ɖěɖee na ɖò gbɛ̀ ɖò vivɔnu gbɛ̀ elɔ tɔn lɛ é sixu nɔ ma kú kpɔ́n. É na bo nyí ɖebǔ wɛ é nyí ɔ, mɛɖebǔ e na ɖi nǔ n’i é sixu ganjɛwu ɖɔ emi kún na kú kú mavɔmavɔ gbeɖé ó.

Amɔ̌, Jezu e ɖɔ tlolo ɖɔ: “Nyɛ wɛ nyí fínfɔ́n sín kú, bo lɛ́ nyí gbɛ̀” é ka sixu d’alɔ Lazáa e ko kú sín azǎn nabi ɖé ɖíe é dìn à? Jezu kanbyɔ Mata ɖɔ: “A ɖi nǔ ɖɔ nǔ na nyí mɔ̌ à?” É yí gbè n’i ɖɔ: “Ɛɛn Aklunɔ, un ɖi nǔ ɖɔ hwi wɛ nyí Klisu Mawu ví e ɖó na wá gbɛ̀ ɔ mɛ é.” Ðó Mata ɖi nǔ ɖɔ Jezu sixu wà nùɖé gbè nɛ gbè wutu ɔ, é yawu yì xwégbe bo ɖekpá nɔví nyɔnu tɔn, bo ɖɔ: “Mɛ̌si wá bo ɖò ylɔylɔ we wɛ.” (Jaan 11:25-28) Ee Mali sè mɔ̌ é ɔ, é site vawun sín xwé ɔ gbè, bɔ zaan ɔ, mɛ ɖevo lɛ xwedó è, ɖó ye vɛdo ɖɔ yɔ Lazáa tɔn kɔn wɛ é xwè sín.

Loɔ, Jezu gɔ́n wɛ Mali yì, bo jɛkpo ɖò nukɔn tɔn kpo avǐ kpo, lobo vɔ́ linlin e nɔví nyɔnu tɔn ɖó bo ɖɔ ɖ’ayǐ é ɖɔ, bo ɖɔ: “Aklunɔ, enyi a ko ɖò fí wɛ ɔ, nɔví ce na kú ǎ.” Ee Jezu mɔ ɖɔ Mali kpo ahwan e xwedó è lɛ é kpo ɖò avǐ ya wɛ é ɔ, lanmɛ tɔn slɔ́ fún, ayi tɔn bǐ gbado, kaka bɔ é tlɛ lɛ́ y’avǐ. Nǔ enɛ ɔ byɔ lanmɛ nú nǔkpɔ́ntɔ́ lɛ tawun. Amɔ̌, ye mɛ ɖé lɛ kanbyɔ ɖɔ: “Éyɛ mɛ e hun nukún nú nukúntíntɔ́nnɔ ɔ, é sixu bló bonu nya enɛ gɔn kúkú à cé?”​—Jaan 11:32, 37.