Samuwɛli nɔ goxɔ Mawu tɔn mɛ bo nɔ w’azɔ̌ ɖò finɛ sín kpɛví tɔn. Finɛ wɛ mɛ lɛ nɔ wá sɛn Jehovah ɖè. A ka tuùn lee Samuwɛli wá goxɔ Mawu tɔn mɛ gbɔn é à? Nǔ mǐ ni kplɔ́n nú dó Samuwɛli sín nɔ Ana wu jɛ nukɔn.

Ana ba vǐ na jì nú xwè gegě, amɔ̌, é mɔ ɖokpo vɔ́vɔ́ jì ǎ. Enɛ wu ɔ, é xoɖɛ bo savo nú Jehovah ɖɔ é ni d’alɔ emi. É d’akpá ɖɔ enyi emi jì vǐ sunnu ɖé ɔ, emi na sɛ́ ɛ dó goxɔ Mawu tɔn mɛ bɔ é na w’azɔ̌ ɖò finɛ. Jehovah sè ɖɛ tɔn bɔ é jì vǐ sunnu ɖé, bo sun nyǐ i ɖɔ Samuwɛli. Hwenu e Samuwɛli ɖó xwè atɔn alǒ ɛnɛ é ɔ, Ana sɔ́ ɛ jó ɖò goxɔ Mawu tɔn mɛ bonu é na sɛn ɛ ɖò finɛ, lee é ko d’akpá tɔn gbɔn é.

Eli wɛ nyí vɔsanúxwlémawutɔ́ ɖaxó ɔ ɖò goxɔ Mawu tɔn mɛ. Vǐ sunnu tɔn we lɛ lɔmɔ̌ nɔ w’azɔ̌ ɖò finɛ. Flín ɖɔ goxɔ ɔ mɛ wɛ è nɔ sɛn Mawu ɖè, bɔ è ɖó na nɔ wà nǔ ɖagbe ɖò finɛ. Amɔ̌, nǔ nyanya kɛɖɛ wɛ Eli sín vǐ lɛ nɔ wà. Samuwɛli nɔ mɔ nǔ e wà wɛ ye ɖè é. Samuwɛli lɔ ka nɔ wà nǔ nyanya Eli sín vǐ lɛ ɖɔhun wɛ à?— Eǒ, é nɔ ɖò nǔ e sɔgbe é wà wɛ, lee mɛjitɔ́ tɔn lɛ kplɔ́n ɛ gbɔn é.

Etɛ a ka lin ɖɔ Eli ɖó na ko wà nú vǐ sunnu tɔn we lɛ?— É ɖó na ko dɔn tó nú ye. É sɔ́ ɖó na lɔn nú ye na w’azɔ̌ ɖò xwé Mawu tɔn gbè ɖě ǎ. Eli ka wà mɔ̌ ǎ. Enɛ wu ɔ, Jehovah sin xomɛ dó é kpo vǐ sunnu tɔn we lɛ kpo, bo ɖɔ emi na dɔn tó nú ye.

Samuwɛli ɖò amlɔ dɔ wɛ ɖò zǎnmɛ gbè ɖokpo, bo sè bɔ mɛɖé jɛ yiylɔ́ ɛ jí: ‘Samuwɛli!’ É bɛ́ wezun yì Eli gɔ́n, amɔ̌, Eli ɖɔ: ‘Un ylɔ́ we ǎ.’ Nǔ enɛ jɛ azɔn we gɔ́ na. Ðò azɔn atɔngɔ́ ɔ gudo ɔ, Eli ɖɔ nú Samuwɛli ɖɔ enyi é sɔ́ sè gbè ɔ ɖě hǔn, é ni ɖɔ: ‘Kɛnklɛn Jehovah, ɖɔ xó; un ɖò tó ɖó we wɛ.’ Nǔ e Samuwɛli wà é nɛ. Enɛ gudo ɔ, Jehovah ɖɔ nú Samuwɛli ɖɔ: ‘Ðɔ nú Eli ɖɔ un na dɔn tó nú xwédo tɔn, ɖó nǔ nyanya e ye wà lɛ é wu.’ A ka lin ɖɔ é bɔwǔ nú Samuwɛli bonu é na dó wɛn enɛ Eli à?— Eǒ, é bɔwǔ ǎ. Xɛsi ɖi Samuwɛli có, é ka dó wɛn Jehovah tɔn.  Nǔ e Jehovah ɖɔ é jɛ nǔgbo. È hu Eli sín vǐ sunnu we lɛ, bɔ Eli lɔ kú.

Kpɔ́ndéwú ɖagbe ɖé wɛ Samuwɛli nyí nú mǐ. É ɖò nǔ nyanya e wà wɛ mɛ lɛ ɖè é mɔ wɛ có, é ka wà nǔ e sɔgbe é. Hwɛ ka lo? A ka na cí Samuwɛli ɖɔhun, bo na nɔ ɖò nǔ e sɔgbe é wà wɛ à? Enyi a wà mɔ̌ ɔ, a na hɛn xomɛ Jehovah kpo mɛjitɔ́ towe lɛ kpo tɔn hun.