HWƐ DIDÓ MƐÐÉE sixu nyí agban ɖé bo kpɛn mɛ. Axɔ́su Davidi wlan ɖɔ: “Hwɛ ce lɛ kplé kaka bo yì jǐ hú mì; hwɛ ce lɛ ɖò kpinkpɛn mì wɛ agban ɖɔhun.” (Ðɛhan 38:5) Klisanwun ɖé lɛ jɛ aluwɛ ɖaxó mɛ, bo kúdeji ɖɔ Jehovah kún sɔ́ sixu sɔ́ hwɛ kɛ emi gbeɖé ó. (2 Kɔlɛntinu lɛ 2:7) Xó jɔ xó jɛn ka wɛ à? É na bo tlɛ nyí ɖɔ hwɛ syɛnsyɛn lɛ wɛ a hu ɔ, a jɛ zɔ nú Jehovah sɔmɔ̌ bɔ é sɔ́ sixu sɔ́ kɛ we gbeɖé ǎ jɛn ko nɛ à? Eǒ, é nyí mɔ̌ ǎ!

Jehovah nɔ wɔn hwɛhutɔ́ e lɛkɔ sín hwɛ yetɔn lɛ gudo lɛ é ǎ. Nǔgbo ɔ, é nɔ ba ye mɔ! Ðò lǒ vǐ sunnu ɖuvanɔ ɔ tɔn mɛ ɔ, Jezu jlɛ́ Jehovah dó tɔ́ wanyiyinɔ e vǐ sunnu tɔn jó xwédo tɔn dó, bo yì zán gbɛ̀ bliblí é ɖé wu. Nukɔnmɛ ɔ, vǐ sunnu ɔ wá gbeta ɔ kɔn bo lɛkɔ wá xwégbe. “Hwenu e [vǐ sunnu ɔ] ɖò zɔ jawě ɔ, tɔ́ tɔn mɔ ɛ sɛ́dó, bɔ nǔ tɔn blawǔ n’i, bɔ é bɛ́ wezun, bo yì zunfan ɛ, bo kísi n’i.” (Luki 15:11-20) A jló na sɛkpɔ Jehovah bo ka nɔ lin ɖɔ emi kpó ɖò “zɔ” n’i wɛ à? Tɔ́ e xó è ɖɔ ɖò lǒ Jezu tɔn mɛ é ɖɔhun ɔ, Jehovah nɔ sè wuvɛ̌ xá we tawun. Enyi a lɛkɔ ɔ, é na yí we kpo alɔ we kpo.

Amɔ̌, a nɔ lin ɖɔ hwɛ towe lɛ syɛn dín alǒ su- kpɔ́ dín, bɔ Jehovah kún sɔ́ sixu sɔ́ ye kɛ we ó wɛ à? Kɛnklɛn kpɔ́n nǔ e Jehovah ɖɔ bɔ è wlan dó Ezayíi 1:18 mɛ é: Jehovah ɖɔ: “Mi wá nú mǐ na sè nǔ jɛ mǐɖée gbè mɛ. Enyi hwɛ mitɔn lɛ na bo mya cɛ́cɛ́ ɔ, ye na wé tété avɔkanfún ɖɔhun. Ye na bo mya kaka bo wi d’emɛ ɔ, ye na wé la ɖɔhun.” Ɛɛn, hwɛ ɖěɖee tlɛ cí ɖɔ ye mya cɛ́cɛ́ ɖò avɔ wěwe mɛ ɖɔhun lɛ é sísɔ́ kɛ mɛ gló Jehovah ǎ.

Jehovah ba ɖɔ a ni kpó ɖò wuvɛ̌ mɔ wɛ ɖó ayixa towe ɖò hwɛ dó we wɛ wu ǎ. É nyí mɔ̌ wɛ ɔ, nɛ̌ a ka sixu ɖu vivǐ hwɛsɔ́kɛmɛ Mawu tɔn tɔn, bo lɛ́ ɖó ayixa mímɛ́ ɖé gbɔn? Gbějé afɔ e Axɔ́su Davidi ɖè é we kpɔ́n. Nukɔntɔn ɔ, é ɖɔ: “Un na ɖɔ hwɛ ce lɛ [nú Jehovah].” (Ðɛhan 32:5) Flín ɖɔ Jehovah ko ylɔ́ we ɖɔ hwi ni xoɖɛ dó sɛkpɔ emi, bonu hwi kpo è kpo “na sè nǔ jɛ” miɖée gbè mɛ. Sɔ ylɔ̌ tɔn. Ðɔ hwɛ towe lɛ nú Jehovah bo ɖɔ lee nǔ cí nú we é n’i. Nǔ e Davidi mɔ kpɔ́n lɛ é zɔ́n bɔ é xoɖɛ kpo jiɖiɖe kpo bo ɖɔ: “Slá wǔ nú mì bonu hwɛ e un hu ɔ na gosin kɔ ce. . . . A nɔ gbɛ́ wǎn nú mɛ e hwɛ tɔn lɛ vɛ́ n’i tlílí ɖò ayixa mɛ bɔ wǔ kú ɔ ǎ.”—Ðɛhan 51:4, 19.

Wegɔ́ ɔ, afɔsɔ́ɖótetɔ́ Mawu tɔn gbeyiɖɔ Natáan d’alɔ Davidi. (2 Samuwɛli 12:13) Égbé ɔ, Jehovah sɔnǔ nú mɛxo agun tɔn e è ko kplɔ́n azɔ̌ lɛ é bɔ ye nɔ d’alɔ hwɛhutɔ́ ɖěɖee lɛkɔ sín hwɛ yetɔn gudo lɛ é, bonu ye na lɛ́ vɛ́ kpo Jehovah kpo. Enyi a yì mɛxo agun tɔn lɛ gɔ́n ɔ, ye na zán Biblu dó d’alɔ we, ye na xoɖɛ xá we bɔ agbɔ̌n  towe na jɛ dò, ye na ɖè linlin masɔgbe e a ɖó lɛ é kpò alǒ ɖè ye síìn, bo lɛ́ d’alɔ we bɔ a na jɛ ganji ɖò gbigbɔ lixo.—Jaki 5:14-16.

Nú è na ɖɔ xó jɔ xó ɔ, a sixu mɔ ɖɔ hwɛ towe lɛ ɖiɖɔ nú Jehovah Mawu kpo mɛxo agun tɔn lɛ gɔ́n yiyi kpo, ɖò nǔ ɖěɖee vɛwǔ hugǎn bɔ a sixu wà lɛ é mɛ. É ɖò wɛn ɖɔ Davidi lɔ ɖó linlin mɔhun. É “ɖɔ” hwɛ tɔn lɛ “ǎ” kaka nú táan ɖé. (Ðɛhan 32:3) Amɔ̌, hwenu e é ɖɔ hwɛ tɔn lɛ bo jla ninɔmɛ tɔn ɖó gudo é ɔ, é ɖu lè tɔn.

Lè ɖaxó ɖokpo wɛ nyí ɖɔ Davidi lɛ́vɔ ɖó awǎjijɛ. É wlan ɖɔ: “Nǔ nyɔ́ nú mɛ e Mawu ɖè agɔ e é jɛ ɔ sín kɔ na é; mɛ e Mawu sɔ́ nǔ e é wà nyi dò ɔ kɛ é.” (Ðɛhan 32:1) É lɛ́ xoɖɛ ɖɔ: “Aklunɔ, hun ɖɛ̌ nú mì, bonu ma sɔ́ nu ce dó kpa susu nú we.” (Ðɛhan 51:17) Kɔ e Davidi mɔ dó sà fún i ɖò hwɛ e dó éɖée wɛ é ɖè é sí é, kpo sù e hwɛ e Mawu sɔ́ kɛ ɛ é sù nukún tɔn mɛ é kpo sísɛ́ ɛ bɔ é ɖɔ xó dó Jehovah wu nú mɛ ɖevo lɛ.

Jehovah ba ɖɔ a ni ɖó ayixa mímɛ́. É lɛ́ ba ɖɔ a ni ɖɔ xó dó emi kpo linlin emitɔn lɛ kpo wu nú mɛ ɖevo lɛ. É ba ɖɔ a ni wà mɔ̌ kpo awǎjijɛ kpo, é na nyí kpo linlin hwɛ didó mɛɖée tɔn kpo ǎ. (Ðɛhan 65:2-5) Flín ɖɔ Jehovah ɖɔ nú we ɖɔ emi “na súnsún hwɛ [towe] lɛ,” bo na “sɛ́ fífá sín hwenu lɛ dó [we].”—Mɛsɛ́dó 3:19, 20.

Nǔ e jɛ dó Martha jí é nɛ. É ɖɔ: “Vǐ sunnu ce nɔ sɛ́ Atɔxwɛ kpo Réveillez-vous! kpo dó mì. Kpɛɖé kpɛɖé ɔ, un lɛ́ jɛ vivɛ̌ kpo Jehovah kpo jí. Nǔ e vɛwǔ nú mì hugǎn ɖò kɔlilɛ mɛ é wɛ nyí hwɛ tobutobu e un hu lɛ é sín sɔ́ kɛ byɔbyɔ. Amɔ̌, wǎgbɔ tɔn ɔ, un xoɖɛ sɛ́dó Jehovah bo byɔ ɛ ɖɔ é ni sɔ́ hwɛ kɛ mì. Enyi è ɖɔ xwè 40 na wá yì hwɛ̌ cobɔ na lɛkɔ wá Jehovah gɔ́n ɔ, na ɖi ǎ. Nǔ e gbò mì é xlɛ́ ɖɔ enyi mɛɖé na bo jó Jehovah dó nú xwè mɔkpan ɔ, ali sixu lɛ́ hun n’i bɔ é na sɛn Mawu bo lɛ́ ɖu wanyiyi tɔn sín vivǐ.”