Cyan nǔjlɛdonǔwu ɖěɖee bɔkun lɛ é. Jezu ɖɔhun ɔ, zǎn nǔ kpɛɖé dó tinmɛ nǔ ɖaxó, bo lɛ́ zán nǔ e bɔkun lɛ é dó tinmɛ nǔ e vɛwǔ lɛ é. Ma gɔ́ gǒflɛ́mɛ ɖěɖee ma ɖò dandan ǎ lɛ é na bonu nǔjlɛdonǔwu ɔ ni gɛ́dɛ́ ó. Mɔ nǔ jɛ wu ɖɔ nǔ ɖěɖee xó nǔjlɛdonǔwu towe ɖɔ lɛ é sɔgbe xá nǔ e kplɔ́n mɛ wɛ a ɖè é, bonu gǒflɛ́mɛ ɖěɖee ma nyɔ́ zán ǎ alǒ ma nyita fí ɖé ǎ lɛ é ni ma wá wlú tamɛ nú tóɖówetɔ́ lɛ ó.

Hɛn tóɖówetɔ́ lɛ dó ayi mɛ. Cyan nǔjlɛdonǔwu ɖěɖee kúnkplá azɔ̌ e tóɖówetɔ́ lɛ nɔ wà lɛ é kpo nǔ e nɔ jló ye lɛ é kpo lɛ é. Nɔ acéjí bonu nǔjlɛdonǔwu towe lɛ ni ma dó winnya ye alǒ dó xomɛsin xomɛ nú ye ó.

Kplɔ́n nǔ taji ɔ mɛ. Nǔ taji lɛ wɛ a ni jlɛ́ dó nǔ wu, ma sɔ́ ayi ɖó gǒflɛ́mɛ klewun klewun lɛ jí dín ó. Blǒ bonu mɛ e ɖótó we é ni ma wá flín nǔjlɛdonǔwu ɔ kpowun ó, loɔ, é ni lɛ́ flín nǔ e nǔjlɛdonǔwu ɔ kplɔ́n ɛ lɛ é.