Wěmafɔ lɛ́ nú klisánwun gbɛ zínzán ná bló bɔ é ná bɔ wǔ nú we, bɔ a ná mɔ wěmafɔ Biblu tɔn kpó tan Biblu tɔn kpó ɖěɖěe sixú d’alɔ we bɔ a ná ɖí xwi xá tagba towe lɛ́ é. É ná lɛ́ d’alɔ we bɔ a ná mɔ wěmafɔ Biblu tɔn e sɔgbe, bɔ a ná zán dó dó wǔsyɛ́n lanmɛ nú mɛ ɖěvo lɛ́, lobo lɛ́ zán dó d’alɔ yě bɔ yě ná wá gbeta e nɔ kpa susu nú Jexóva lɛ́ é kɔn lɛ́ é. Sɔ́ xóta e jló we é. Nǔkanbyɔ́ e nɔ d’alɔ mɛ lɛ́ é kpó tan Biblu tɔn e è tínmɛ ɖo kléwún mɛ lɛ́ é kpó ɖo xóta ɖokpó ɖokpó glɔ́. (Kpɔ́n gbǎví “ Lěe a sixú zán wěma élɔ́ gbɔn é.”) Tlóló jɛ́n a ná mɔ wěɖexámɛ e nyɔ́ zán lɛ́ é kpó gbɔdónúmɛ kpó ɖo Xó Mawu tɔn mɛ. A ná lɛ́ mɔ nǔ xɔ akwɛ́ e a ná má xá mɛ ɖěvo lɛ́ é, énɛ́ wɛ nyí, wěmafɔ Biblu tɔn e ná ná kanmɛsyɛ́n yě, d’alɔ yě bɔ yě ná ɖí xwi xá tagba yětɔn lɛ́, ɖe wě xá yě, bo lɛ́ dó wǔsyɛ́n lanmɛ nú yě lɛ́ é.

Wěma élɔ́ nɔ slɛ́ wěmafɔ e kunkplá xóta ɖokpó ɖokpó lɛ́ é bǐ ǎ. Amɔ̌, wěma ɖagbe ɖé wɛ bɔ a sixú zán dó jɛ do ba nú nǔ jí. (Nǔx 2:1-6) Nú a ná ba do nú nǔ d’é jí hǔn, zǎn Nǔwlánwlán mímɛ́ lɛ́. Biblu gbɛ yɔ̌yɔ́ ɔ tɔn sín alɔdlɛ́ndónǔ tɛ́ntínmɛ tɔn lɛ́ kpó tínmɛ ɖěvo lɛ́ kpó, ényí yě tíin ɖo gbe ɖěvo e a se é mɛ ɔ nɛ́. Zǎn Alixlɛ́mɛwéma dobanúnǔ tɔn nú Kúnnuɖetɔ́ Jexóva tɔn lɛ́ alǒ Index des publications des Témoins de Jéhovah dó kplɔ́n nǔ dó tínmɛ wěmafɔ ɖé tɔn alǒ lěe è sixú zán gbɔn é wú bǐ mlɛ́mlɛ́. Gbějé nǔ agaɖanu tɔn e ɖ’é mɛ lɛ́ é kpɔ́n bá dó kú d’é jí ɖɔ nukúnnúmɔjɛnǔmɛ e kunkplá nǔgbó Biblu tɔn lɛ́ é yaɖéyaɖé ɔ wɛ a ɖó.

Wěmafɔ lɛ́ nú klisánwun gbɛ zínzán ɔ ní bo d’alɔ we bónú nǔnywɛ́, nǔtuuntuun kpó nukúnnúmɔjɛnǔmɛ kpó e ɖo Nǔwlánwlán mímɛ́ lɛ́ mɛ é ní towe. Ée a ná ɖo wěma élɔ́ zán wɛ é ɔ, a ná kú d’é jí hú gǎn ɖɔ “xó Mawu tɔn ɖo gbɛ, bo ɖó hlɔ̌nhlɔ́n.”—Eb 4:12.