É cí ɖɔ é kún nyí mɔ̌ ó. Awoví ɖɔ nú Ɛvu ɖɔ enyi é ɖu atín sínsɛ́n e Mawu gbɛ́ é ɔ, agbaza tɔn kɛɖɛ na kú bɔ akpáxwé tɔn e nukún ma nɔ mɔ ǎ é (nǔ e mɛɖé lɛ nɔ ylɔ́ ɖò égbé ɖɔ lindɔ̌n jɔmakú é) na kpó ɖò gbɛ̀ ɖò fí ɖevo ǎ. Satáan gbɔn dan ɖé jí bo ɖɔ ɖɔ enyi Ɛvu ɖu sínsɛ́n atín enɛ tɔn ɔ, lé é kún ‘na kú ɖě gbeɖé ó.’ É lɛ́vɔ ɖexlɛ́ ɖɔ Ɛvu na kpó ɖò gbɛ̀, bo na ɖu vivǐ gbɛ̀ ɖagbe hugǎn ee mɛ Mawu ma na kp’acɛ n’i ɖè ǎ é ɖé tɔn ɖò ayikúngban jí.—Bǐb. 2:17; 3:3-5.

Enyi adingban-núkplɔnmɛ lindɔ̌n jɔmakú tɔn e è nɔ kplɔ́n mɛ égbé é ma bɛ́ ɖò Edɛni ǎ ɔ, hwetɛnu é ka bɛ́ lo? Mǐ sixu ɖɔ tawun ǎ. Mǐ tuùn ɖɔ è sú kún dó nú sinsɛn nǔvú lɛ bǐ ɖò Sinvɔgbɛ Nɔwée hwenu tɔn ɔ hwenu. Sinsɛn nǔvú ɖebǔ xò Sinvɔgbɛ ɔ zlɛ́ ǎ, ɖó Nɔwée kpo xwédo tɔn kpo, enɛ wɛ nyí Mawu sɛntɔ́ nǔgbo lɛ kɛɖɛ wɛ gán ɖ’emɛ.

Enɛ wu ɔ, adingban-núkplɔnmɛ lindɔ̌n jɔmakú tɔn ɔ na ko bɛ́ ɖò Sinvɔgbɛ ɔ gudo. Hwenu e Mawu wlú gbè lɛ ɖò Babɛli bo gbà gbɛtɔ́ lɛ dó bɔ ye “gbakpé ayikúngban ɔ bǐ jí” é ɔ, é ɖò wɛn ɖɔ ye hɛn linlin gbɛtɔ́ ɖó lindɔ̌n jɔmakú tɔn ɔ yì fí e ye yì lɛ é. (Bǐb. 11:8, 9) Linlin enɛ na bo bɛ́sín fí ɖebǔ ɔ, mǐ sixu kúdeji ɖɔ Satáan Awoví e nyí “adingbannɔ lɛ sín tɔ́” é nɔ gudo na, bɔ lee é gbakpé fí bǐ gbɔn é nɔ lɛ́ víví n’i.—Jaan 8:44.