1-2. (a) Etɛ Jehovah ka nɔ mɔ hwenu e gbɛtɔ́ livi mɔkpan kplé ɖò Aklunɔ Sín Nǔɖuɖu ɔ domɛ é? (Kpɔ́n fɔtóo e ɖò akpa ɔ jí é.) (b) Etɛ jí mǐ ka na ɖɔ xó dó ɖò xóta elɔ mɛ?

DǑ NUKÚN mɛ bo kpɔ́n nǔ e Jehovah nɔ mɔ, hwenu e gbɛtɔ́ livi mɔkpan nɔ kplé lɛlɛ̌ dó gbɛ̀ ɔ nú Aklunɔ Sín Nǔɖuɖu ɔ é. É nɔ mɔ nǔ zɛ gbɛtɔ́ tobutobu e kplé é wu; mɛ e wá tɛn enɛ mɛ lɛ é ɖokpo ɖokpo wu wɛ é nɔ ɖó ayi. Ði kpɔ́ndéwú ɔ, é nɔ mɔ mɛ ɖěɖee nɔ wá xwewu xwewu tɛgbɛ lɛ é. Ðé lɛ ɖò ye mɛ ɖò xwi ɖí xá yadonúmɛ syɛnsyɛn wɛ có, ye ka nɔ wá. Mɛ ɖevo lɛ nɔ wá kplé mǐtɔn ɖevo lɛ hwɛhwɛ ǎ có, ye ka nɔ kpɔ́n Flǐn ɔ domɛ wiwá dó mɔ dandannú ɖé. Jehovah nɔ lɛ́ ɖó ayi mɛ ɖěɖee sixu wá Flǐn ɔ azɔn nukɔntɔn ɔ, boya bo na ba dò nú nǔ lɛ é wu.

² É ɖò wɛn ɖɔ nú Jehovah mɔ gbɛtɔ́ tobutobu mɔhun ɖò Flǐn ɔ domɛ ɔ, é nɔ víví n’i. (Luk. 22:19) É ɖò mɔ̌ có, kɛ́n mɛ e wá lɛ é tɔn wɛ nɔ nyí nǔ e nɔ ɖu ayi mɛ nú Jehovah jɛ nukɔn é ǎ. Hwɛjijɔ e wu ye wá é wɛ nɔ ɖu ayi mɛ nú Jehovah hugǎn; enɛ wɛ nyí nǔ taji n’i. Ðò xóta elɔ mɛ ɔ, mǐ na ɖɔ xó dó nǔkanbyɔ e ɖò taji tawun é ɖé wu: Etɛwu mǐ ma ka nɔ yì Flǐn e nyí nǔwiwa xwewu xwewu tɔn ɔ é kɛɖɛ tɛnmɛ ǎ, bo nɔ lɛ́ yì kplé aklunɔzán gbla ɔ mɛ tɔn ɖěɖee Jehovah sɔnǔ na nú mɛ ɖěɖee yí wǎn n’i lɛ é é?

3-4. (a) Etɛwu mǐ ka nɔ yì kplé lɛ? (b) Etɛ kplé lɛ yiyi ka nɔ xlɛ́ dó mǐ wu? (c) Sɔgbe xá nǔ e 1 Kɔlɛntinu lɛ 11:23-26 ɖɔ é ɔ, etɛwu mǐ ma ka ɖó na nɔ gɔn Flǐn ɔ ǎ?

³ Nǔ nukɔntɔn e wu mǐ nɔ yì kplé agun tɔn mǐtɔn lɛ é wɛ nyí ɖɔ ye nyí akpáxwé sinsɛn-biblo mǐtɔn tɔn. Mǐ nɔ lɛ́ yì kplé lɛ ɖó Jehovah nɔ kplɔ́n nǔ mǐ ɖò finɛ. Gbɛtɔ́ goyitɔ́ lɛ nɔ ɖi ɖɔ é kún ɖò dandan ɖɔ è ni kplɔ́n nǔɖe emi ó. (3 Jaan 9)  Mǐdɛɛ lɛ gbɔn vo, ɖó akpakpa nɔ sɔ́ mǐ bonu Jehovah kpo tutoblonunu e zán wɛ é ɖè é kpo ni kplɔ́n nǔ mǐ.—Eza. 30:20; Jaan 6:45.

⁴ Kplé lɛ yiyi nɔ xlɛ́ ɖɔ mǐ nɔ sɔ́ mǐɖée hwe, é wɛ nyí ɖɔ mǐ ɖò gbesisɔmɛ, bo lɛ́ jló ɖɔ è ni kplɔ́n nǔ mǐ. Ðò zǎn e mɛ è nɔ bló Flǐn kú Klisu tɔn tɔn é ɔ, mǐ nɔ yì dò tɔn mɛ ɖó é ɖò dandan ɖɔ mǐ ni yì. Mɔ̌ wiwa nɔ lɛ́ xlɛ́ ɖɔ mǐ ɖò tónú sè nú gbeɖiɖe Jezu tɔn elɔ wɛ kpo mɛɖéesɔ́hwe kpo: “Mi na nɔ bló gbɔn lě dó flín mì na.” (Xà 1 Kɔlɛntinu lɛ 11:23-26.) Kplé enɛ nɔ na hlɔnhlɔn nukúnɖiɖó sɔgudo tɔn mǐtɔn, bo nɔ lɛ́ flín mǐ lě dò Jehovah yí wǎn nú mǐ sɔ́ é. É ɖò mɔ̌ có, Jehovah tuùn ɖɔ é byɔ ɖɔ è ni dó wusyɛn lanmɛ nú mǐ bo lɛ́ vɔ́ jiɖe na mǐ hugǎn azɔn ɖokpo kpowun ɖò xwè ɔ mɛ. Enɛ wu ɔ, é sɔnǔ nú kplé lɛ nú mǐ ɖò aklunɔzán gbla ɖokpo ɖokpo mɛ bo byɔ mǐ ɖɔ mǐ ni nɔ yì ye. Mɛɖéesɔ́hwe nɔ sísɛ́ mǐ bɔ mǐ nɔ setónú. Mǐ nɔ zán ganxixo ɖé lɛ ɖò aklunɔzán gbla ɖokpo ɖokpo mɛ, bo nɔ sɔnǔ nú kplé enɛ lɛ bo nɔ lɛ́ yì ye.

5. Etɛwu mɛɖéesɔ́hwetɔ́ lɛ ka nɔ yí gbè nú ylɔ̌ e Jehovah ylɔ́ ye é?

⁵ Xwewu xwewu tɛgbɛ ɔ, mɛɖéesɔ́hwetɔ́ mɔkpan nɔ yí gbè nú ylɔ̌ e Jehovah ylɔ́ ye bo na kplɔ́n nǔ ye é. (Eza. 50:4) Flǐn ɔ domɛ wiwá nɔ víví nú ye bɔ ye nɔ jɛ kplé ɖevo lɛ wá jí. (Zak. 8:20-23) É nɔ víví nú mǐ bǐ ɖɔ Jehovah e “nyí alɔdómɛtɔ́ [mǐtɔn], bo nyí mɛhwlɛngántɔ́ [mǐtɔn]” é ni kplɔ́n nǔ mǐ bo lɛ́ xlɛ́ ali mǐ. (Ðɛh. 40:18) Nǔgbo ɔ, etɛ ka sixu dó awǎjijɛ nú mɛ hugǎn, alǒ ɖò taji hugǎn ɖɔ è ni yí gbè nú ylɔ̌ e è ylɔ́ mǐ bonu Jehovah kpo Vǐ tɔn Jezu e é yí wǎn na tawun é kpo na kplɔ́n nǔ mǐ é?—Mat. 17:5; 18:20; 28:20.

6. Nɛ̌ mɛɖéesɔ́hwe ka d’alɔ nya ɖé, b’ɛ wá Flǐn ɔ domɛ gbɔn?

⁶ Xwewu xwewu tɛgbɛ ɔ, mǐ nɔ dó gǎn bo nɔ ylɔ́ mɛ gegě wá Flǐn kú Jezu tɔn tɔn tɛnmɛ lee mǐ kpéwú gbɔn é. Mɛɖéesɔ́hwetɔ́ gegě ɖu lè tɔn gbɔn gbeyiyi nú mɛylɔylɔ́ ɔ gblamɛ. Mǐ ni kpɔ́n kpɔ́ndéwú ɖé. Xwè mɔkpan ɖíe ɔ, nya ɖé yí mɛylɔwema Flǐn tɔn ɔ ɖokpo, amɔ̌, é ɖɔ nú nɔví sunnu e sɔ́ n’i é ɖɔ emi kún na sixu wá ó. É ɖò mɔ̌ có, é kpaca nɔví sunnu ɔ hwenu e é mɔ nya enɛ b’ɛ byɔ Kpléxɔ Axɔsuɖuto ɔ tɔn mɛ ɖò gbadanu e è bló Flǐn ɔ é é. Lee nɔví lɛ dó gbè nú nya ɔ kpo akpakpa sɔ́ mɛ kpo gbɔn é jiwǔ n’i sɔmɔ̌, bɔ é jɛ kplé aklunɔzán gblamɛ tɔn mǐtɔn lɛ wá jí. Nǔgbo ɔ, ɖò xwè ɖokpo blebu mɛ ɔ, azɔn atɔn géé wɛ nya ɔ gɔn kplé. Etɛ ka d’alɔ ɛ bɔ é jɛ kplé lɛ bǐ wá jí? É nɔ sɔ́ éɖée hwe sɔmɔ̌ bo huzu linlin tɔn. Nɔví e ylɔ́ ɛ é wá ɖɔ ɖò nukɔnmɛ ɖɔ: “Nya mɛɖéesɔ́hwetɔ́ tawun ɖé wɛ é nyí.” É ɖò wɛn ɖɔ Jehovah wɛ dɔn nya enɛ bonu é na sɛn ɛ, bɔ dìn ɔ, é nyí nɔví sunnu e ko bló baptɛm é ɖé.—2 Sam. 22:28; Jaan 6:44.

7. Nɛ̌ nǔ e mǐ nɔ kplɔ́n ɖò kplé lɛ jí é kpo nǔ e mǐ nɔ xà ɖò Biblu mɛ lɛ é kpo ka sixu d’alɔ mǐ, bɔ mǐ na nɔ sɔ́ mǐɖée hwe gbɔn?

⁷ Nǔ e mǐ nɔ kplɔ́n ɖò kplé lɛ jí é kpo nǔ e mǐ nɔ xà ɖò Biblu mɛ lɛ é kpo sixu d’alɔ mǐ bɔ mǐ na nɔ sɔ́ mǐɖée hwe. Ðò aklunɔzán gbla e jɛ nukɔn nú Flǐn ɔ lɛ é mɛ ɔ, hwɛhwɛ wɛ kplé mǐtɔn lɛ nɔ tɛɖɛ̌ kpɔ́ndéwú Jezu tɔn kpo mɛɖéesɔ́hwe e é ɖexlɛ́ bo sɔ́ gbɛ̀ tɔn jó dó xɔ gbɛ̀ nú mǐ é jí. Ðò azǎn ɖěɖee jɛ nukɔn nú Flǐn ɔ lɛ é jí ɔ, è dó wusyɛn lanmɛ nú mǐ ɖɔ mǐ ni xà tan Biblu tɔn e kúnkplá nǔ ɖěɖee jɛ lɛlɛ̌ dó kú Jezu tɔn kpo fínfɔ́n sín kú tɔn kpo lɛ é. Nǔ e mǐ nɔ kplɔ́n ɖò kplé enɛ lɛ jí é kpo nǔ e mǐ nɔ xà ɖò tan Biblu tɔn enɛ lɛ mɛ é kpo nɔ bló bɔ lee vɔ̌ e Jezu sá dó ta mǐtɔn mɛ é sù nukún mǐtɔn mɛ gbɔn é nɔ syɛn d’eji. É nɔ sísɛ́ mǐ bɔ mǐ nɔ sɔ́ mǐɖée hwe éɖɔhun, bo nɔ wà jlǒ Jehovah tɔn hwenu e é na bo tlɛ vɛwǔ nú mǐ é.—Luk. 22:41, 42.

8. Nɛ̌ Jezu ka ɖè akɔ́nkpinkpan xlɛ́ gbɔn?

⁸ Mǐ nɔ lɛ́ tɛ́n kpɔ́n bo nɔ kpankɔ́n Jezu ɖɔhun. Lin tamɛ dó akɔ́nkpinkpan e é ɖexlɛ́ ɖò azǎn e jɛ nukɔn nú kú tɔn lɛ é jí é wu. É tuùn ganji ɖɔ zaanɖé dìn ɔ, kɛntɔ́ tɔn lɛ na dó winnya ɛ, xò è, bo hu i. (Mat. 20:17-19) É ɖò mɔ̌ có, é sɔ́ jlǒ dó kpannukɔn kú. Hwenu e gan ɔ xò é ɔ, é ɖɔ nú mɛsɛ́dó tɔn gbejinɔtɔ́ ee kpo é kpo ɖò Jɛtisemaníi lɛ é ɖɔ: “Mi bo site nú mǐ na yì. Mi kpɔ́n! Mɛ e ɖò sísɔ́ mì jó wɛ ɔ ɖíe ko sɛya è.” (Mat. 26:36, 46) Bɔ hwenu e mɛ e sɔ́ ahwannú bo jló na wlí i lɛ é wá é ɔ, é sɛyi nukɔn bo ɖè éɖée xlɛ́ bo ɖɔ nú sɔja lɛ ɖɔ ye ni jó mɛsɛ́dó emitɔn lɛ dó nú ye ni yì. (Jaan 18:3-8) Akɔ́nkpinkpan nukúnɖeji tɛ ɖíe Jezu ka ɖexlɛ́ è! Égbé ɔ, Klisanwun yí ami dó ɖè lɛ kpo lɛngbɔ̌ ɖevo lɛ kpo nɔ tɛ́n kpɔ́n bo nɔ kpankɔ́n Jezu ɖɔhun. Gbɔn nɛ é?

9. (a) Etɛwu mǐ ka sixu ɖó hudo akɔ́nkpinkpan tɔn cobo yì kplé lɛ ɖò gbesisɔmɛ? (b) Nɛ̌ kpɔ́ndéwú mǐtɔn ka sixu wà ɖagbe nú nɔví mǐtɔn ɖěɖee ɖò ganmɛ ɖó nǔɖiɖi yetɔn wu lɛ é gbɔn?

⁹ Bo na dó nɔ yì kplé lɛ hwɛhwɛ ɔ, é sixu byɔ ɖɔ mǐ ni ɖè akɔ́nkpinkpan xlɛ́ ɖò ninɔmɛ syɛnsyɛn lɛ nukɔn. Nɔví sunnu kpo nɔví nyɔnu kpo mǐtɔn ɖé lɛ tíìn bo ɖò wuvɛ̌ sè wɛ, alǒ awakanmɛ kú ye, kabǐ ye ɖò azɔn jɛ wɛ cobɔ ye ka nɔ wá kplé lɛ. Mɛ ɖevo lɛ tíìn bɔ hagbɛ̌ xwédo yetɔn tɔn lɛ, alǒ acɛkpikpa e ɖò tò nu lɛ é ɖò gbè klán xá ye wɛ syɛnsyɛn cobɔ ye ka nɔ kpankɔ́n bo nɔ wá kplé lɛ. Lin tamɛ kpɛɖé dó lee kpɔ́ndéwú mǐtɔn nɔ wà ɖagbe nú nɔví mǐtɔn ɖěɖee è wlí dó ganmɛ ɖó nǔɖiɖi yetɔn wu lɛ é gbɔn é jí. (Ebl. 13:3) Enyi ye sè ɖɔ mɛtɛnkpɔn lɛ ɖò finɛ có, mǐ ka ɖò Jehovah sɛn wɛ ɔ, é nɔ na hlɔnhlɔn ye bɔ ye nɔ hɛn nǔɖiɖi, akɔ́nkpinkpan kpo gbejininɔ yetɔn kpo wu. Nǔ ko cí mɔ̌ nú mɛsɛ́dó Pɔlu kpɔ́n. Hwenu e é ɖò gankpá mɛ ɖò Hlɔma é ɔ, é nɔ víví n’i hweɖebǔnu e é sè ɖɔ nɔví tɔn lɛ ɖò Mawu sɛn wɛ kpo gbejininɔ kpo é. (Fili. 1:3-5, 12-14) Táan kpɛɖé jɛ nukɔn nú hwenu e Pɔlu na tɔ́n sín ganmɛ é, alǒ hwenu e é tɔ́n sín ganmɛ gudo tlolo é ɔ, é wlan wema sɛ́dó Eblée lɛ. Ðò wema enɛ mɛ ɔ, é byɔ Klisanwun gbejinɔtɔ́ enɛ lɛ ɖɔ ‘wǎn e yí nú yeɖée wɛ ye ɖè nɔví nɔví ɖɔhun ɔ, ye ni ma jó dó ó,’ ye ni ma ka nɔ lɛ́ gɔn kplé lɛ gbeɖé ó.—Ebl. 10:24, 25; 13:1.

10-11. (a) Mɛ̌ mɛ̌ e mǐ ka ɖó na ylɔ́ wá Flǐn ɔ domɛ? (b) Hwɛjijɔ e wu mǐ na wà mɔ̌ é tɛ ka ɖò Efɛzinu lɛ 1:7 mɛ?

¹⁰ Mǐ nɔ ɖè akɔ́nkpinkpan xlɛ́ hwenu e mǐ ylɔ́ hɛnnumɔ, azɔ̌gbɛ́, kpo nɔzo mǐtɔn lɛ kpo wá Flǐn ɔ é. Etɛwu mǐ ka nɔ ylɔ́ mɛ enɛ lɛ? Nǔ e Jehovah kpo Jezu kpo wà nú mǐ é sù nukún mǐtɔn mɛ tawun bɔ mǐ sixu gɔn mɛ ɖevo lɛ ylɔ́ wá Flǐn ɔ domɛ ǎ. Mǐ jló ɖɔ ye ni kplɔ́n lee ye lɔ sixu ɖu “xomɛnyínyɔ́ [alǒ fɛ́nú] tɔn ma ɖó jlɛ̌ ɔ” sín lè, gbɔn gbɛxixɔ ɔ gblamɛ gbɔn é.—Xà Efɛzinu lɛ 1:7; Nǔɖe. 22:17.

¹¹ Nú mǐ ɖè akɔ́nkpinkpan xlɛ́ bo kplé ɖó kpɔ́ ɔ, mǐ nɔ lɛ́ ɖè jijɔ xɔ akwɛ ɖevo xlɛ́, jijɔ ɖé wɛ bɔ Mawu kpo Vǐ tɔn kpo bǐ nɔ ɖexlɛ́ ɖò ali nukúnɖeji lɛ nu.

12. (a) Nɛ̌ kplé mǐtɔn lɛ ka nɔ zɔ́n bɔ wǎn e mǐ yí nú Jehovah kpo Jezu kpo é nɔ gɔ́ngɔ́n gbɔn? (b) Etɛ 2 Kɔlɛntinu lɛ 5:14, 15 ka dó wusyɛn lanmɛ nú mǐ ɖɔ mǐ ni wà Jezu ɖɔhun?

¹² Wanyiyi e mǐ ɖó nú Jehovah kpo Jezu kpo é nɔ sísɛ́ mǐ bɔ mǐ nɔ yì kplé lɛ. Enɛ gudo ɔ, nǔ e mǐ kplɔ́n ɖò kplé lɛ jí é nɔ zɔ́n bɔ wanyiyi e mǐ ɖó nú Jehovah kpo Vǐ tɔn kpo é nɔ gɔ́ngɔ́n. Kplé lɛ nɔ flín mǐ nǔ e ye wà nú mǐ é hwɛhwɛ. (Hlɔ. 5:8) Ðò taji ɔ, Flǐn ɔ nɔ flín mǐ lee wanyiyi e ye ɖó nú mǐ é gɔ́ngɔ́n sɔ́ é, bo tlɛ nɔ flín enɛ mɛ ɖěɖee ma tuùn lee gbɛxixɔ ɔ xɔ akwɛ sɔ́ é ǎ lɛ é lɔ. Kpo nǔsumɛnukúnmɛ kpo wɛ mǐ nɔ tɛ́n kpɔ́n bo na wà nǔ Jezu ɖɔhun ɖò gbɛzán mǐtɔn mɛ hwebǐnu. (Xà 2 Kɔlɛntinu lɛ 5:14, 15.) Gɔ́ na ɔ, ayixa mǐtɔn nɔ sísɛ́ mǐ bɔ mǐ nɔ kpa susu nú Jehovah ɖó gbɛxixɔ e é sɔnǔ na é wu. Ali e nu mǐ sixu kpa susu n’i ɖè é ɖokpo wɛ nyí gbɔn xósin nina kpo ayi bǐ kpo ɖò kplé mǐtɔn lɛ jí gblamɛ.

13. Nɛ̌ mǐ ka sixu ɖè lee wanyiyi e mǐ ɖó nú Jehovah kpo Vǐ tɔn kpo é gɔ́ngɔ́n sɔ́ é xlɛ́ gbɔn? Tinmɛ.

¹³ Mǐ sixu ɖè lee wanyiyi e mǐ ɖó nú Jehovah kpo Vǐ tɔn kpo é gɔ́ngɔ́n sɔ́ é xlɛ́, gbɔn jlǒ sísɔ́ dó savɔ̌ dó ye tamɛ gblamɛ. Hwɛhwɛ ɔ, mǐ ɖó na savɔ̌ vovo lɛ bá mɔ tɛn dó wá kplé mǐtɔn lɛ. Agun gegě tíìn bo nɔ bló kplé ɖò azɔ̌zángbe gbadanu hwenu e nǔ ko nɔ cikɔ nú mɛ gegě é. È nɔ bló kplé ɖevo ɖò aklunɔzán gblamɛ fifó hwenu e mɛ ɖevo lɛ nɔ ɖò gbigbɔjɛ wɛ é. Jehovah ka nɔ ɖ’ayi wu ɖɔ nú nǔ na bo tlɛ cikɔ nú mǐ ɔ, mǐ nɔ yì kplé mǐtɔn lɛ à? Ganji! Nǔgbo ɔ, lee gǎn e dó wɛ mǐ ɖè lɛ é sukpɔ́ sɔ́ é ɔ, mɔ̌ jɛn wanyiyi e mǐ ɖexlɛ́ Jehovah é nɔ sù nukún tɔn mɛ sɔ.—Mak. 12:41-44.

14. Nɛ̌ Jezu ka sɔ́ kpɔ́ndéwú ɖ’ayǐ nú mǐ ɖò wanyiyi mɛɖée sísɔ́ dó savɔ̌ tɔn ɖiɖexlɛ́ linu gbɔn?

¹⁴ Jezu zé kpɔ́ndéwú ɔ ɖ’ayǐ nú mǐ bo ɖè wanyiyi mɛɖée sísɔ́ dó savɔ̌ tɔn xlɛ́. É sɔ́ jlǒ dó kú dó ahwanvu tɔn lɛ sín tamɛ; bɔ gbɛzán tɔn gbè bǐ gbè tɔn lɛ́ xlɛ́ ɖɔ é sɔ́ nǔ e na nyí ɖagbe nú ye é dó nukɔn nú éɖesunɔ tɔn. Ði kpɔ́ndéwú ɔ, é nɔ kpɔ́ xá ahwanvu tɔn lɛ hwenu e nǔ tlɛ cikɔ n’i ɖò agbaza lixo, alǒ hwenu e é ɖò wuvɛ̌ sè wɛ ɖò ayi mɛ é. (Luk. 22:39-46) É nɔ sɔ́ ayi dó nǔ e é sixu wà nú mɛ ɖevo lɛ é jí, é nyí dó nǔ e é sixu mɔ sín ye gɔ́n é jí ǎ. (Mat. 20:28) Nú wanyiyi e mǐ ɖó nú Jehovah kpo nɔví mǐtɔn lɛ kpo é syɛn ɔ, mǐ na wà nǔ e wu mǐ kpé é bǐ bo na wá Aklunɔ Sín  Nǔɖuɖu ɔ kpo kplé agun tɔn ɖevo lɛ bǐ kpo tɛnmɛ.

15. Mɛ ɖětɛ lɛ mǐ ka nɔ jló na d’alɔ hugǎn?

¹⁵ Kplékplé nɔví lɛ tɔn nǔgbo ɖokpo géé ɔ mɛ wɛ mǐ ɖè, bɔ é nɔ víví nú mǐ ɖɔ mǐ ni zán hwenu gegě lee é nyɔ́ bló gbɔn é dó ylɔ́ mɛ yɔyɔ̌ lɛ bonu ye ni wá gɔ́ nú mǐ. É ɖò mɔ̌ có, alɔdidó “nɔví ɖò nǔɖiɖi mɛ” e awakanmɛ ko gbɔjɔ na lɛ é wɛ nɔ ɖu ayi mɛ nú mǐ hugǎn. (Ga. 6:10) Mǐ nɔ ɖè wanyiyi mǐtɔn xlɛ́ gbɔn wusyɛn didó lanmɛ nú ye ɖɔ ye ni wá kplé mǐtɔn lɛ, ɖò taji ɔ Flǐn ɔ tɛnmɛ gblamɛ. Jehovah kpo Jezu kpo ɖɔhun ɔ, é nɔ víví nú mǐ tawun hwenu e mɛ e awakanmɛ ko gbɔjɔ na é ɖé lɛkɔ wá Jehovah Tɔ́ wanyiyinɔ mǐtɔn kpo Lɛngbɔ̌nyitɔ́ mǐtɔn kpo gɔ́n é.—Mat. 18:14.

16. (a) Nɛ̌ mǐ ka sixu dó wusyɛn lanmɛ nú mǐɖée gbɔn? Ðagbe tɛ kplé mǐtɔn lɛ ka nɔ wà nú mǐ? (b) Etɛwu dìn wɛ nyí táan ɖagbe xwè ɔ tɔn e mɛ è na flín xó Jezu tɔn e ɖò Jaan 3:16 mɛ é é?

¹⁶ Ðò aklunɔzán gbla e jawě lɛ é mɛ ɔ, ylɔ̌ mɛ gegě wá Flǐn e è na bló ɖò vendredi 19 avril 2019 é tɛnmɛ lee é nyɔ́ bló gbɔn é. (Kpɔ́n gbǎví “ A ka Na Ylɔ́ Ye À?”) Mi nú mǐ ni nɔ dó wusyɛn lanmɛ nú mǐɖée hwebǐnu, gbɔn kplé e Jehovah sɔnǔ na nú mǐ lɛ é bǐ yiyi ɖò gbesisɔmɛ gblamɛ. Ee vivɔnu gbɛ̀ elɔ tɔn ɖò sisɛkpɔ wɛ é ɔ, mǐ ɖó hudo kplé mǐtɔn lɛ tɔn, bonu ye na nɔ d’alɔ mǐ nú mǐ na nɔ sɔ́ mǐɖée hwe, kpankɔ́n bo lɛ́ ɖó wanyiyi. (1 Tɛ. 5:8-11) Mi nú mǐ ni ɖè lee nǔ cí nú mǐ dó Jehovah kpo Vǐ tɔn kpo wu, ɖó wanyiyi ɖaxó e ye ɖó nú mǐ é wu é xlɛ́ kpodo ayi mǐtɔn bǐ kpan!—Xà Jaan 3:16.