1-2. (a) Nɛ̌ wɛn e ɖò Ezayíi 41:10 mɛ é ka wà ɖagbe nú nɔví nyɔnu Yoshiko gbɔn? (b) Lè mɛ̌ mɛ̌ e tɔn wu Jehovah ka bló bɔ wɛn enɛ nɔ ayǐ kaka jɛ égbé?

È DÓ wɛn nyanya ɖé Yoshiko ee nyí nɔví nyɔnu gbejinɔtɔ́ ɖé é. Dotóo tɔn ɖɔ n’i ɖɔ sun yɔywɛ ɖé jɛn kpò bɔ é na nɔ gbɛ̀ na. Nɛ̌ Yoshiko ka wà nǔ gbɔn? É flín wemafɔ Biblu tɔn e é yí wǎn na é ɖé, é wɛ nyí Ezayíi 41:10. (Xà.) Enɛ gudo ɔ, é ɖɔ nú dotóo tɔn kpo gbè fífá ɖé kpo ɖɔ emi kún ɖi xɛsi ó, ɖó Jehovah hɛn alɔ emitɔn. * Wɛn gbɔdónúmɛ tɔn e ɖò wemafɔ enɛ mɛ é d’alɔ nɔví nyɔnu vívɛ́ mǐtɔn, bɔ é ɖeji dó Jehovah wu bǐ mlɛ́mlɛ́. Wemafɔ ɖokpo enɛ sixu d’alɔ mǐ bɔ mǐ na yì agbɔ̌n jí, hwenu e mǐ na ɖò xwi ɖí xá mɛtɛnkpɔn syɛnsyɛn lɛ wɛ é. Bo na dó mɔ nǔ jɛ lee wemafɔ enɛ sixu wà mɔ̌ gbɔn é mɛ ɔ, mi nú mǐ ni gbéjé nǔ e wu Mawu dó wɛn enɛ Ezayíi é kpɔ́n hwɛ̌.

² Jɛ nukɔn hwɛ̌ ɔ, Jehovah ɖɔ nú Ezayíi ɖɔ é ni wlan xó enɛ lɛ bá dó dó gbɔ nú Jwifu ɖěɖee è na wá kplá yì kannumɔgbenu ɖò Babilɔnu lɛ é. Amɔ̌, enyi lè Jwifu e yì kannumɔgbenu lɛ é tɔn kɛɖɛ wu wɛ Jehovah bló bɔ wɛn tɔn enɛ nɔ ayǐ ǎ, loɔ nú ɖagbe togun tɔn e ɖò gbɛ̀ kaka jɛ égbé é blebu tɔn wɛ. (Eza. 40:8; Hlɔ. 15:4) Égbé ɔ, mǐ ɖò gbɛ̀ nɔ wɛ ɖò “hwenu vɛwǔ lɛ” mɛ, bɔ mǐ ɖó wusyɛn dó lanmɛ nú mɛ e mǐ mɔ ɖò wema Ezayíi tɔn mɛ é sín hudo hú ɖ’ayǐ tɔn lɛ bǐ.—2 Tim. 3:1.

3. (a) Akpá tɛ lɛ ka ɖò Ezayíi 41:10, ee è sɔ́ b’ɛ nyí xóta xwè 2019 tɔn tɔn é mɛ? (b) Etɛwu mǐ ka ɖó hudo ganjɛwu e akpá enɛ lɛ na mǐ é tɔn?

³ Ðò xóta elɔ mɛ ɔ, mǐ na sɔ́ ayi ɖó akpá Jehovah tɔn e ɖò Ezayíi 41:10 mɛ, bo na hlɔnhlɔn nǔɖiɖi mǐtɔn é atɔn jí: (1) Jehovah na nɔ kpɔ́ xá mǐ, (2) é nyí Mawu mǐtɔn, (3) é na  gɔ́ alɔ nú mǐ. Mǐ ɖó ganjɛwu * enɛ lɛ sín hudo, ɖó Yoshiko ɖɔhun ɔ, mɛtɛnkpɔn lɛ nɔ kpannukɔn mǐ. Mǐ nɔ lɛ́ mɔ tagba ɖé lɛ ɖó nǔ nyanya e ɖò jijɛ wɛ ɖò gbɛ̀ ɔ mɛ lɛ é wutu. Mɛɖé lɛ ɖò mǐ mɛ bo tlɛ ɖò didɛ wɛ ɖò yadonúmɛ acɛkpikpa hlɔnhlɔnnɔ lɛ tɔn nu. Mi nú mǐ ni gbéjé ganjɛwu atɔn lɛ ɖokpo ɖokpo kpɔ́n.

4. (a) Ganjɛwu na mɛ nukɔntɔn tɛ wu mǐ ka na ɖɔ xó dó? (Lɛ̌ kpɔ́n tinmɛ e ɖò dò é.) (b) Ali tɛ lɛ nu Jehovah ka ɖè wanyiyi tɔn xlɛ́ mǐ ɖè? (c) Nɛ̌ xó Mawu tɔn enɛ lɛ ka wà ɖagbe nú we gbɔn?

⁴ Jehovah tò na mǐ ganjɛwu hwɛ̌ kpo xógbe elɔ lɛ kpo: “Ma ɖi xɛsi ó, ɖó un ɖò kpɔ́ xá we.” * Jehovah nɔ xlɛ́ ɖɔ emi ɖò kpɔ́ xá mǐ gbɔn ayi sísɔ́ ɖó mǐ jí bǐ mlɛ́mlɛ́, kpo wanyiyi e gɔ́ngɔ́n bɔ é ɖó nú mǐ é kpo gblamɛ. Ð’ayi lee é ɖè wanyiyi tɔn e syɛn bo gɔ́ngɔ́n é xlɛ́ mǐ gbɔn é wu. Jehovah ɖɔ: “A xɔ akwɛ nukún ce mɛ, a ɖò ayi ce mɛ, un yí wǎn nú we.” (Eza. 43:4) Hlɔnhlɔn ɖě ɖò wɛkɛ ɔ mɛ bo sixu bló bɔ Jehovah na gɔn wanyiyi tɔn ɖexlɛ́ mɛ ɖěɖee nɔ sɛn ɛ lɛ é ǎ; gbeji e é nɔ nɔ nú mǐ é nɔ sɛ̀ dò ǎ. (Eza. 54:10) Wanyiyi tɔn kpodo xɔ́ntɔn e é zun xá mǐ é kpo nɔ na mǐ akɔ́nkpinkpan tawun. É na cyɔn alɔ mǐ jí égbé lee é cyɔn alɔ Ablamu (Ablaxamu) xɔ́ntɔn tɔn ɔ jí gbɔn é. Jehovah ɖɔ n’i ɖɔ: “Ablamu! Ma ɖi xɛsi ó; nyɛ wɛ nyí gǎglónú towe.”—Bǐb. 15:1.

5-6. (a) Nɛ̌ mǐ ka wà gbɔn bo tuùn ɖɔ Jehovah jló na d’alɔ mǐ ɖò mɛtɛnkpɔn mǐɖesunɔ tɔn lɛ mɛ? (b) Etɛ kpɔ́ndéwú Yoshiko tɔn ka sixu kplɔ́n mǐ?

⁵ Mǐ tuùn ɖɔ Jehovah jló na d’alɔ mǐ ɖò mɛtɛnkpɔn mǐtɔn lɛ mɛ, ɖó é d’akpa nú togun tɔn ɖɔ: “A ɖò tɔ̀ mɛ gbɔn wɛ ɔ, un na ɖò kpɔ́ xá we; a ɖò tɔ̀ gbò wɛ ɔ, a na kú tɔ̀ ǎ. A ɖò zɔnlin ɖi gbɔn myɔ mɛ wɛ ɔ, a na jì myɔ ǎ, myɔ na wà nǔɖe nú we ǎ.” (Eza. 43:2) Etɛ ka nyí tinmɛ xógbe enɛ lɛ tɔn?

⁶ Jehovah d’akpá ɖɔ emi na ɖè wuvɛ̌ ɖěɖee nɔ zɔ́n bɔ gbɛ̀ nɔ vɛwǔ lɛ é síìn ǎ, loɔ é na na tɛn tagba e nɔ sà wá mǐ gɔ́n “tɔ̀” ɖɔhun lɛ é bonu ye na ɖí bú mǐ, alǒ mɛtɛnkpɔn ee nɔ cí “myɔ” ɖɔhun lɛ é bonu ye na hɛn nǔ gblé dó mǐ wu kaka sɔyi ǎ. É na mǐ ganjɛwu ɖɔ emi na ɖò kpɔ́ xá mǐ, bo  na d’alɔ mǐ bɔ mǐ na “gbɔn” tagba enɛ lɛ mɛ dín. Etɛ Jehovah ka na wà? É na d’alɔ mǐ bɔ mǐ sɔ́ na ɖi xɛsi dín ǎ, bɔ mɔ̌ mɛ ɔ, mǐ sixu kpó ɖò gbeji nɔ n’i wɛ, enyi mǐ tlɛ kpannukɔn kú ɔ nɛ. (Eza. 41:13) Yoshiko e xó mǐ ɖɔ ɖò bǐbɛ̌mɛ é mɔ ɖɔ xó enɛ nyí nǔgbo. Vǐ nyɔnu tɔn ɖɔ: “Lee Mamáa nɔ fífá mɛ sɔ é jiwǔ nú mǐ tawun. Mǐ mɔ céɖécéɖé ɖɔ Jehovah na ɛ fífá ayi mɛ tɔn. Kaka jɛ hwenu e Mamáa kú é ɔ, é nɔ ɖɔ xó nú dotóo lɛ kpo azinzɔnnɔ lɛ kpo dó Jehovah kpo akpá tɔn lɛ kpo wu.” Etɛ kpɔ́ndéwú Yoshiko tɔn ka kplɔ́n mǐ? Enyi mǐ ɖeji dó akpá Mawu tɔn e ɖɔ “Un ɖò kpɔ́ xá we” é wu ɔ, mǐ lɔ na kpankɔ́n bo ɖó hlɔnhlɔn hwenu e mǐ na ɖò didɛ ɖò mɛtɛnkpɔn lɛ nu wɛ é.

7-8. (a) Ganjɛwuxó wegɔ́ tɛ mǐ na gbéjé kpɔ́n? Etɛ ka nyí tinmɛ tɔn? (b) Etɛwu Jehovah ka ɖɔ nú Jwifu e ɖò kannumɔgbenu lɛ é ɖɔ: “[Mi] ma ɖò nukún dó gbɛmɛ kpɔ́n wɛ ó”? (c) Xógbe tɛ lɛ ka ɖò Ezayíi 46:3, 4 mɛ, bo sixu ko xò hwihwɛ́ ayi togun Mawu tɔn tɔn?

⁷ Ðǒ ayi ganjɛwuxó wegɔ́ elɔ e Ezayíi wlan é wu: “Ma ɖò nukún dó gbɛmɛ kpɔ́n wɛ ó, ɖó nyi wɛ nyí Mawu towe.” Etɛ ka nyí tinmɛ nukún didó gbɛmɛ kpɔ́n tɔn? Ðò wemafɔ enɛ mɛ ɔ, xógbe e è zán ɖò gbè dodó ɔ mɛ nú “nukún dó gbɛmɛ kpɔ́n” é ɔ, tinmɛ tɔn wɛ nyí, “è ni ɖò gudo kpɔ́n wɛ magbokɔ ɖó xɛsiɖiɖi ɖɔ nǔɖe alǒ mɛɖé na wà nǔ nyanya nú mɛ wutu,” alǒ “ado ni hu mɛ lee é nɔ nyí gbɔn nú mɛ e ɖò ninɔmɛ nyanya ɖé mɛ é ɖɔhun.”

⁸ Etɛwu Jehovah ka ɖɔ nú Jwifu e na yì kannumɔgbenu ɖò Babilɔnu lɛ é ɖɔ ye ni “ma ɖò nukún dó gbɛmɛ kpɔ́n wɛ ó”? Ðó é tuùn ɖɔ xɛsi na wá ɖi mɛ ɖěɖee ɖò tò ɔ mɛ lɛ é. Etɛ ka na dó xɛsi ye? Ðibla yì vivɔnu xwè 70 e Jwifu lɛ na nɔ kannumɔgbenu na é tɔn ɔ, ahwankpá hlɔnhlɔnnɔ Mɛdinu lɛ kpo Pɛsinu lɛ kpo tɔn na tɔ́n ahwan Babilɔnu. Jehovah na zán ahwankpá enɛ bo na ɖè togun tɔn sín kannumɔgbenu ɖò Babilɔnu. (Eza. 41:2-4) Hwenu e Babilɔnunu lɛ kpo akɔta ɖevo mɛ nu e ɖò tò ɔ mɛ hwenɛnu lɛ é kpo tuùn ɖɔ kɛntɔ́ yetɔn lɛ ɖò sisɛkpɔ wɛ é ɔ, ye tɛ́n kpɔ́n bo na kpó ɖò akɔ́nkpinkpan ɖó wɛ bo nɔ ɖɔ nú yeɖée ɖɔ: “É yá [alǒ ‘Dǒ hlɔnhlɔn,’ nwt].” Ye lɛ́ bló vodun gegě ɖó ye ɖó nukún ɖɔ vodun enɛ lɛ na cyɔn alɔ emi jí. (Eza. 41:5-7) Ðò hwe ɔ nu ɔ, xó Jehovah tɔn e Ezayíi wlan ɖ’ayǐ é xò hwihwɛ́ Jwifu e ɖò kannumɔgbenu lɛ é sín ayi. Jehovah ɖɔ: “[A cí nɔzo towe lɛ ɖɔhun ǎ] mɛsɛntɔ́ ce Izlayɛli, . . . ma ɖò nukún dó gbɛmɛ kpɔ́n wɛ ó, ɖó nyi wɛ nyí Mawu towe.” (Eza. 41:8-10) Ðǒ ayi wu ɖɔ Jehovah ɖɔ: “Nyi wɛ nyí Mawu towe.” Kpo xógbe enɛ lɛ kpo ɔ, Jehovah vɔ́ jiɖe na mɛsɛntɔ́ tɔn gbejinɔtɔ́ lɛ ɖɔ emi kún wɔn ye ó, lé emi kpó ɖò Mawu yetɔn nyí wɛ bɔ ye kpó ɖò togun emitɔn nyí wɛ. É ɖɔ nú ye ɖɔ: “Un na hɛn mi . . . bo na hwlɛn mi gán.” É ɖò wɛn ɖɔ xógbe enɛ lɛ e vɔ́ ganjɛwu na mɛ é na ko dó wusyɛn lanmɛ nú Jwifu enɛ lɛ e ɖò kannumɔgbenu é tawun.—Xà Ezayíi 46:3, 4.

9-10. Etɛwu é ma ka byɔ ɖɔ xɛsi ni ɖi mǐ ǎ? Jlɛ̌ dó nǔɖe wu.

⁹ Mɛ e lɛlɛ̌ dó mǐ lɛ é ɖò adohu adohu jí, ɖó ninɔmɛ gbɛ̀ ɔ tɔn e fɔ́n bo ɖò nylanylá wɛ é wu dìn hú ɖ’ayǐ tɔn. É ɖò wɛn ɖɔ tagba ɖokpo ɔ lɛ nɔ wà nǔ dó mǐ lɔ wu. Amɔ̌, é byɔ ɖebǔ ɖɔ xɛsi ni ɖi mǐ ǎ. Jehovah ɖɔ nú mǐ ɖɔ: “Nyi wɛ nyí Mawu towe.” Etɛwu xó enɛ ka nyí hwɛjijɔ agbɔ̌nnɔ e wu mǐ na yì agbɔ̌n jí é ɖé?

¹⁰ Ðǒ ayi nǔjlɛdonǔwu elɔ wu: Jim kpo Ben kpo ɖò jɔmɛhun e jɔhɔn syɛnsyɛn ɖò ya dó na wɛ é ɖé mɛ. Ðó jɔmɛhun ɔ ɖò xixo wɛ tawun, bo nɔ yì jǐ, bo nɔ wá dò wutu ɔ, jɔmɛhunkuntɔ́ ɔ ɖɔ sɛ́dó mɛ e ɖò jɔmɛhun ɔ mɛ lɛ é bǐ ɖɔ: “Mi sin gǒjiblanú ayijayǐ tɔn mitɔn lɛ. Mǐ na gbɔn jɔhɔn syɛnsyɛn mɛ nú  táan ɖé.” Ado jɛ Jim hu jí tawun. Amɔ̌ jɔmɛhunkuntɔ́ ɔ ɖɔ gɔ́ na ɖɔ: “Ado ma hu mi ó. Jɔmɛhunkuntɔ́ mitɔn wɛ ɖò xó ɖɔ wɛ.” Ðò hwenɛnu ɔ, Jim hunhún ta bo ɖɔ, “Ganjɛwu nahun ka nyí enɛ?” Nǔ ɖò mɔ̌ có, é ɖ’ayi wu ɖɔ ado kwín ɖokpo kún hu Ben ó. Jim kanbyɔ ɛ ɖɔ: “Etɛwu ado ɖě ma ka ɖò hwɛ hu wɛ ǎ?” Ben ko nǔ yɛ́ɛ bo yí gbè n’i ɖɔ: “Un tuùn jɔmɛhunkuntɔ́ ɔ ganji wu wɛ. Tɔ́ ce wɛ!” Enɛ gudo ɔ, Ben ɖɔ: “Gbɔ nú má ɖɔ xó nú we dó tɔ́ ce wu. Un ganjɛwu ɖɔ enyi a tuùn i, bo tuùn lee jɔmɛhun kunkun bí alɔ n’i sɔ́ é ɔ, ado kún na hu hwi lɔ ó.”

11. Etɛ nǔjlɛdonǔwu e kúnkplá jɔmɛhundótɔ́ we lɛ é ka sixu kplɔ́n mǐ?

¹¹ Etɛ nǔjlɛdonǔwu enɛ ka sixu kplɔ́n mǐ? Ben ɖɔhun ɔ, ado nɔ hu mǐ ǎ ɖó mǐ tuùn Tɔ́ mǐtɔn jixwé tɔn, Jehovah ganji. Mǐ tuùn ɖɔ é na xlɛ́ ali mǐ, bɔ mǐ na gbɔn tagba e nɔ cí jɔhɔn syɛnsyɛn lɛ ɖɔhun, bɔ mǐ nɔ mɔ ɖò azǎn gudogudo tɔn elɔ lɛ mɛ lɛ é mɛ dín wuyɛyɛ́-afɔyɛyɛ́. (Eza. 35:4) Mǐ ɖeji dó Jehovah wu, enɛ wu ɔ, mǐ sixu yì agbɔ̌n jí hwenu e xɛsi na ko ɖi bú mɛ e ɖò gbɛ̀ ɔ mɛ lɛ é bǐ é. (Eza. 30:15) Mǐ nɔ lɛ́ wà nǔ Ben ɖɔhun hwenu e mǐ nɔ má hwɛjijɔ ɖěɖee wu mǐ ɖeji dó Mawu wu lɛ é xá nɔzo mǐtɔn lɛ é. Enɛ gudo ɔ, ye lɔ sixu kúdeji ɖɔ tagba ɖebǔ na bo kpannukɔn ye ɔ, Jehovah na nɔ gudo nú ye.

12. (a) Ganjɛwuxó atɔngɔ́ tɛ mǐ ka na gbéjé kpɔ́n? (b) Nǔgbo tɛ ɖɔ e è ɖɔ ɖɔ Jehovah nyí Axɔsu hlɔnhlɔnnɔ ɖé é ka flín mǐ?

¹² Mǐ ni gbéjé ganjɛwuxó atɔngɔ́ e Ezayíi wlan é kpɔ́n: “Un na na akɔ́nkpinkpan we; un na gɔ́ alɔ nú we.” Ezayíi ko tinmɛ lee Jehovah na akɔ́nkpinkpan togun tɔn, alǒ na hlɔnhlɔn ɛ gbɔn é bo ɖɔ: ‘Jehovah jawě kpo hlɔnhlɔn kpo, é ɖó hlɔnhlɔn e ɖu axɔsu é.’ (Eza. 40:10) Nukɛgbe enɛ flín mǐ ɖɔ Jehovah nyí Axɔsu hlɔnhlɔnnɔ ɖé. É zán  hlɔnhlɔn tɔn e ma kpé we ǎ é dó nɔ gudo nú mɛsɛntɔ́ tɔn lɛ ɖò hwexónu lobo lɛ́ jɛhun dó ye jí; é kpó ɖò hlɔnhlɔn na mɛ ɖěɖee nɔ ɖeji dó wǔ tɔn ɖò égbé lɛ é wɛ, bo lɛ́ kpó ɖò xɛ nya ɖò ye jí wɛ.—Sɛ́n. 1:30, 31; Eza. 43:10.

13. (a) Hwetɛnu Jehovah ka nɔ ɖè akpá e é dó bo ɖɔ emi na na hlɔnhlɔn mǐ é dó tawun? (b) Ganjɛwu tɛ ka nɔ zɔ́n bɔ hlɔnhlɔn kpo jiɖe mǐtɔn kpo nɔ túnflá?

¹³ Ðò taji ɔ, enyi kɛntɔ́ lɛ ɖò ya dó nú mǐ wɛ ɔ, Jehovah nɔ ɖè akpá tɔn elɔ: “Un na na akɔ́nkpinkpan we.” Ðò akpáxwé gbɛ̀ ɔ tɔn ɖé lɛ ɖò égbé ɔ, kɛntɔ́ mǐtɔn lɛ nɔ dó gǎn e wu ye kpé é bǐ bo na ɖó nǔ nu nú wɛnjijlazɔ́ mǐtɔn, alǒ gbɛ́ tutoblonunu mǐtɔn. Nǔ tlɛ cí mɔ̌ ɔ, mɛgbenyinya enɛ lɛ nɔ ɖó adohu adohu nú mǐ zɛ xwé wu ǎ. Jehovah na mǐ ganjɛwu e nɔ zɔ́n bɔ mǐ nɔ ɖó hlɔnhlɔn bo nɔ lɛ́ ɖeji é. É d’akpá nú mǐ ɖɔ: “Alyannú e è na tun bo na sɔ́ dó jǐ we ɔ ɖě na wà nǔtí nú we ǎ.” (Eza. 54:17) Xó enɛ flín mǐ nǔgbo titewungbe atɔn.

14. Etɛwu é ma ka nɔ kpaca mǐ ɖɔ kɛntɔ́ Mawu tɔn lɛ nɔ tɔ́n ahwan mǐ ǎ?

¹⁴ Nukɔntɔn ɔ, ɖó mǐ nyí ahwanvu Klisu tɔn wu ɔ, mǐ nɔ ɖó nukún ɖɔ è na gbɛ́ wǎn nú mǐ. (Mat. 10:22) Jezu ɖɔ ɖ’ayǐ ɖɔ è na dóya nú ahwanvu emitɔn lɛ syɛnsyɛn ɖò azǎn gudogudo tɔn lɛ mɛ. (Mat. 24:9; Jaan 15:20) Wegɔ́ ɔ, nǔɖɔɖ’ayǐ Ezayíi tɔn ɔ gb’akpá nú mǐ ɖɔ é kún nyí wǎn kɛɖɛ wɛ kɛntɔ́ mǐtɔn lɛ na gbɛ́ nú mǐ ó, loɔ ye na lɛ́ zán alyannú vovo lɛ dó mǐ wu. Mɛblɛblɛ́xó lɛ, adingban gannaganna ɖiɖó dó mɛ nu kpo yadonúmɛ syɛnsyɛn kpo nyí ɖé lɛ ɖò alyannú ɖěɖee ye nɔ zán lɛ é mɛ. (Mat. 5:11) Jehovah na sú ali dó kɛntɔ́ mǐtɔn lɛ bonu ye na gɔn alyannú enɛ lɛ zán dó fun ahwan xá mǐ ǎ. (Efɛ. 6:12; Nǔɖe. 12:17) Amɔ̌, ado ka ɖó na hu mǐ ǎ. Etɛwu?

15-16. (a) Nǔgbo atɔngɔ́ tɛ mǐ ka ɖó na flín? Nɛ̌ Ezayíi 25:4, 5 ka nɔ gudo nú enɛ gbɔn? (b) Nɛ̌ Ezayíi 41:11, 12 ka tinmɛ nǔ e ɖò te kpɔ́n mɛ ɖěɖee ɖò ahwan fun xá mǐ wɛ lɛ é gbɔn?

¹⁵ Ð’ayi nǔ atɔngɔ́ e mǐ ɖó na flín é wu. Jehovah ɖɔ “alyannú” e è na zán dó tɔ́n  ahwan mǐ é ‘ɖě kún na wà nǔtí nú mǐ ó.’ Lee dǒ ɖé nɔ nya xɛ ɖò mǐ jí ɖò jǐ ɖaxó nǔhɛngblétɔ́ ɖé hwenu gbɔn é ɔ, mɔ̌ jɛn Jehovah nɔ nya xɛ ɖò mǐ jí ɖò “adǎn e jí acɛgannaganna-kpanúmɛtɔ́ lɛ nɔ ɖè” é hwenu gbɔn é nɛ. (Xà Ezayíi 25:4, 5.) Kɛntɔ́ mǐtɔn lɛ na kpéwú gbeɖé bo hɛn nǔ gblé dó mǐ wu kaka sɔyi ǎ.—Eza. 65:17.

¹⁶ Jehovah lɛ́ tinmɛ nǔ e ɖò te kpɔ́n “mɛ e ɖò gbě [mǐtɔn] nya wɛ lɛ” é nú mǐ hlɛ́nhlɛ́n, bo gbɔn mɔ̌ mɛ na hlɔnhlɔn jiɖe e mǐ ɖó dó wǔ tɔn é. (Xà Ezayíi 41:11, 12.) Ahwan e fun xá mǐ wɛ kɛntɔ́ mǐtɔn lɛ ɖè é na bo syɛn gbɔn ɖebǔ, alǒ na bo wá syɛn gbɔn ɖebǔ ɔ, nǔ ɖokpo ɔ mɛ jɛn é na tɔ́n kɔ dó: Kɛntɔ́ togun Mawu tɔn tɔn lɛ bǐ “sɔ́ na nyí nǔɖe ǎ, kún yetɔn na sú dó.”

17-18. (a) Nɛ̌ Biblu xixa ka nɔ zɔ́n bɔ jiɖe e mǐ ɖó dó Mawu wu é nɔ syɛn gbɔn? Nǎ kpɔ́ndéwú ɖé. (b) Nɛ̌ tamɛ linlin dó xóta xwè 2019 tɔn tɔn jí ka sixu d’alɔ mǐ gbɔn?

¹⁷ Mǐ nɔ bló bɔ jì e mǐ ɖè dó Jehovah wu é nɔ syɛn gbɔn tintɛnkpɔn bo tuùn i ganji gblamɛ. Bɔ ali ɖokpo e nu mǐ sixu tuùn Mawu ɖè ganji é wɛ nyí gbɔn Biblu xixa kpo sɔxwixwe kpo, gɔ́ nú tamɛ linlin dó nǔ e mǐ xà é jí gblamɛ. Tan ɖejid’ewu ɖěɖee xlɛ́ lee Jehovah nya xɛ ɖò togun tɔn jí gbɔn ɖò hwexónu lɛ é ɖò Biblu mɛ. Tan enɛ lɛ na mǐ jiɖe ɖɔ é na kpé nukún mǐ wǔ ɖò égbé.

¹⁸ Mǐ ni kpɔ́n xógbe nǔjlɛdonǔwu tɔn ɖagbeɖagbe e Ezayíi zán dó ɖè lee Jehovah nɔ nya xɛ ɖò mǐ jí gbɔn é xlɛ́ é. É ylɔ́ Jehovah ɖɔ lɛngbɔ̌nyitɔ́, bɔ mɛsɛntɔ́ Mawu tɔn lɛ nyí lɛngbɔ̌ lɛ. Ezayíi ɖɔ dó Jehovah wu ɖɔ: “É bló alɔ nú ye bo kplé ye; é bɛ́ lɛngbɔ̌ví lɛ dó awa mɛ, bo ɖò nukún kpé dó lɛngbɔ̌ vǐnɔ lɛ wu wɛ.” (Eza. 40:11) Nú mǐ mɔ ɖɔ alɔ hlɔnhlɔnnɔ Jehovah tɔn lɛ lɛlɛ̌ dó mǐ ɔ, mǐ nɔ mɔ ɖɔ mǐ ɖò ayijayǐ mɛ bɔ ado nɔ hu mǐ ǎ. Deví gbejinɔtɔ́ ɔ jló na d’alɔ mǐ bonu ado ni ma hu mǐ hwenu e wuvɛ̌ lɛ kpannukɔn mǐ é ó. Enɛ wu ɔ, é sɔ́ Ezayíi 41:10 bɔ é nyí xóta xwè 2019 tɔn tɔn, “Ma ɖò nukún dó gbɛmɛ kpɔ́n wɛ ó, ɖó nyi wɛ nyí Mawu towe.” Lin tamɛ dó xógbe enɛ lɛ e vɔ́ jiɖe na mɛ é wu. Ye na na hlɔnhlɔn we hwenu e a na kpannukɔn wuvɛ̌ e ɖò nukɔn ja lɛ é é.