NINƆMƐ-AYǏMƐTƆNÐƆTƆ́ ɖé gbéjé nǔ e nǔmɔsɛ́dózɔ sín mɔ ɖé mɔ b’ɛ ɖò ada gbló wɛ é kpɔ́n. É mɔ jɔhɔn ɖaxó ɖé b’ɛ ɖò nyi-nyi wɛ wunnawúnná xwè xá e mɛ gbɛtɔ́ sukpɔ́ ɖè tawun é ɖé. Ðó ganjininɔ mɛ lɛ tɔn ɖu ayi mɛ n’i tawun wutu ɔ, é ɖò akpá gbà nú ye wɛ magbokɔ cobonu ɖěwagbɛn ni hán.

Mɔ̌ ɖokpo ɔ, Jehovah ɖò akpá gbà nú mɛ e ɖò ayikúngban ɔ jí lɛ é wɛ dìn, dó “jɔhɔn ɖaxó” e na vívá nǔ hú ee ye nɔ sè ɖò gbeɖiɖó e nɔ ɖɔ xó dó ninɔmɛ ayǐ mɛ tɔn jí lɛ é mɛ é wu. Nɛ̌ é ka ɖò mɔ̌ wà wɛ gbɔn? Etɛwu mǐ ka sixu kúdeji ɖɔ é ɖò hwenu e kpé é na mɛ lɛ wɛ bonu ye na huzu? Bo na dó mɔ xósin ɔ ɔ, mi nú mǐ ni gbéjé akpá e Jehovah ko gbà nú mɛ ɖò hwexónu é ɖé lɛ kpɔ́n.

Ðò Biblu sín táan mɛ ɔ, Jehovah gb’akpá nú mɛ dó “jɔhɔn ɖaxó,” alǒ hwɛɖónúmɛ e na sú kún dó nú mɛ ɖěɖee nɔ sɔ́ jlǒ dó tlitó nú gbeɖiɖe tɔn lɛ é é gegě wu. (Nǔx. 10:25; Jel. 30:23) Ðò ninɔmɛ ɖokpo ɖokpo mɛ ɔ, é gb’akpá nú mɛ e nǔ ɔ kan lɛ é táan gegě jɛ nukɔn, bo nɔ ɖɔ huzuhuzu e ye ɖó na bló sɔgbe xá jlǒ tɔn lɛ é nú ye. (2 Axɔ́. 17:12-15; Nɛɛ. 9:29, 30) Bonu mɛ lɛ na dó bló huzuhuzu e jɛxa lɛ é ɔ, é nɔ zán mɛsɛntɔ́ tɔn gbejinɔtɔ́ e ɖò ayikúngban jí lɛ é hwɛhwɛ, bɔ ye nɔ jla hwɛɖónúmɛ tɔn lɛ, bo nɔ xlɛ́ mɛ lɛ ɖɔ è kún ɖó na dán lɛjɛlɛjɛ ó.—Amɔ. 3:7.

Mɛsɛntɔ́ gbejinɔtɔ́ e Mawu zán lɛ é ɖokpo wɛ nyí Nɔwée. Nú xwè mɔkpan ɔ, é ɖi xɛsi ǎ bo gb’akpá nú gbɛtɔ́ nǔbliblíwatɔ́ kpo dakaxotɔ́ kpo hwetɔnnu tɔn lɛ dó Sinvɔgbɛ ɔ wu. (Bǐb. 6:9-13, 17) É lɛ́ ɖɔ nǔ e ye ɖó na bló bo na gán é nú ye; é jla sɔmɔ̌ bɔ è wá ylɔ́ ɛ ɖò nukɔnmɛ ɖɔ “Mawuxóɖɔtɔ́ nǔjlɔjlɔwiwa tɔn ɖé.”—2 Pi. 2:5, nwt.

Nɔwée dó gǎn lɛ bǐ có, gbɛtɔ́ e nɔ gbɛ̀ jɛ nukɔn nú Sinvɔgbɛ ɔ lɛ é ɖè kɔ dó wɛn Mawu tɔn ɔ. Ye xlɛ́ ɖɔ emi kún ɖó nǔɖiɖi ɖebǔ ó. Wǎgbɔ tɔn ɔ, ye kú hwenu Sinvɔgbɛ ɔ “wá bɛ́ ye bǐ” é. (Mat. 24:39; Ebl. 11:7) Hwenu e ye mɔ kú yetɔn sɛ́dó é ɔ, ye sixu ɖɔ gbeɖé ɖɔ Mawu kún gb’akpá nú emi ó ǎ.

Hweɖevolɛnu ɔ, Jehovah gb’akpá nú gbɛtɔ́ lɛ hwenu kpɛɖé jɛ nukɔn cobɔ “jɔhɔn ɖaxó” hwɛɖónúmɛ tɔn tɔn bɛ́. Nǔ na bo nyí mɔ̌ ɔ, é nɔ kúdeji ɖɔ mɛ e nǔ ɔ kan lɛ é ɖó hwenu e kpé é bo na huzu. Ði kpɔ́ndéwú ɔ, é gb’akpá nú mɛ lɛ jɛ nukɔn hwenu e Awě Wǒ xò Ejipu hwexónu tɔn é. Kpɔ́ndéwú tɔn ɖokpo ɖíe: Jehovah sɛ́ Mɔyizi kpo Aalɔ́ɔn kpo dó bonu ye na yì gb’akpá nú Falawɔ́ɔn kpo mɛsɛntɔ́ tɔn lɛ kpo dó awě tɛnwegɔ́ ɔ e nyí kɛ́njí bo hɛn nǔ gblé tawun é wu. Ðó é kpò sɔ bɔ kɛ́njí ɔ na ja wu ɔ, Mawu ka na ye hwenu e kpé é bonu ye na mɔ xɔ lobo gán à? Biblu ɖɔ: ‘Ye mɛ e ɖò gǎnhɔnyitɔ́ axɔ́su ɔ tɔn lɛ mɛ, bo mɔ Jehovah xó ɔ dó mɔ nǔjɔnǔ lɛ kplá mɛsɛntɔ́ yetɔn lɛ kpo kanlin yetɔn lɛ kpo dó xɔ mɛ. Loɔ, ye mɛ e ma kéya nú Jehovah xó ɔ ǎ lɛ jó mɛsɛntɔ́ yetɔn lɛ kpo kanlin yetɔn lɛ kpo dó nyi gle mɛ.’ (Tín. 9:18-21) É ɖò wɛn ɖɔ, Jehovah gb’akpá nú ye ganji bɔ mɛ ɖěɖee yawǔ wà nǔ lɛ é gán ɖò awě baɖabaɖa enɛ hwenu.

È lɛ́ gb’akpá nú Falawɔ́ɔn kpo mɛsɛntɔ́ tɔn lɛ kpo jɛ nukɔn nú awě wǒgɔ́ ɔ. Amɔ̌, ye wà xlonɔnú bo kéya nú akpágbánúmɛ ɔ ǎ. (Tín. 4:22, 23) Wǎgbɔ tɔn ɔ, ye mɔ bɔ nukɔngbeví yetɔn sunnu lɛ kú. É blawǔ tawun! (Tín. 11:4-10; 12:29) Ye ka sixu ko ɖótó akpágbánúmɛ ɔ dó mɛhwenu à? Ganji! Mɔyizi yawǔ gb’akpá nú Izlayɛli-ví lɛ dó awě wǒgɔ́ ɔ e ja é wu, bo lɛ́ xlɛ́ ali ye dó lee ye na hwlɛn xwédo yetɔn lɛ gbɔn é wu. (Tín. 12:21-28) Mɛ nabi wɛ setónú nú akpágbánúmɛ ɔ? Sɔgbe xá  nǔlinlɛn ɖé lɛ ɔ, mɛ livi atɔn wɛ gán ɖò hwɛɖónúmɛ Mawu tɔn mɛ bo tɔ́n sín Ejipu; Izlayɛli-ví lɛ, “akɔta tɛnmɛ tɛnmɛ” mɛ nu lɛ kpo Ejipunu lɛ kpo bǐ wɛ ɖò kɛ́n enɛ mɛ.—Tín. 12:38.

Lee kpɔ́ndéwú enɛ lɛ xlɛ́ gbɔn é ɔ, Jehovah nɔ kúdeji hwebǐnu ɖɔ gbɛtɔ́ lɛ ɖó hwenu e kpé é bo na wà nǔ sɔgbe xá akpágbánúmɛ tɔn lɛ. (Sɛ́n. 32:4) Etɛ ka nɔ sísɛ́ Mawu bɔ é nɔ wà mɔ̌? Mɛsɛ́dó Piyɛ́ɛ tinmɛ ɖɔ Jehovah “jló ɖɔ mɛɖebǔ ni dɔn ǎ; é nyɔ́ wà ɔ, é jló ɖɔ mɛ bǐ ni mɔ ali, bo lɛkɔ sín nǔnyanyawiwa gudo.” (2 Pi. 3:9) Ɛɛn, nǔ gbɛtɔ́ lɛ tɔn nɔ ɖu ayi mɛ nú Mawu. É jló ɖɔ ye ni lɛkɔ sín hwɛ yetɔn lɛ gudo, bo bló huzuhuzu e jɛxa lɛ é cobonu hwɛɖónúmɛ tɔn ni wá.—Eza. 48:17, 18; Hlɔ. 2:4.

Égbé ɖesu ɔ, mɛ lɛ bǐ ɖó na setónú nú akpá titewungbe e gbà nú mɛ bǐ wɛ è ɖè gbɔn ayikúngban ɔ bǐ jí é. Hwenu e Jezu ɖò ayikúngban jí é ɔ, é gb’akpá nú mɛ ɖɔ è na sú kún dó nú gbɛ̀ elɔ ɖò ya ɖaxó ɔ hwenu. (Mat. 24:21) Hwɛɖónúmɛ sɔgudo tɔn enɛ zɔ́n bɔ é ɖɔ xó ɖé ɖ’ayǐ, b’ɛ tinmɛ nǔ e ahwanvu tɔn lɛ sixu ɖó nukún na mɔ lɛ é, kpo nǔ e ye na ɖí xwi xá hwenu e táan enɛ na sɛkpɔ lɛ é kpo hlɛ́nhlɛ́n. Jezu lɛ́ tinmɛ nǔ titewungbe e na jɛ gbɔn gbɛ̀ ɔ bǐ mɛ bɔ mǐ ɖò mimɔ wɛ égbé lɛ é.—Mat. 24:3-12; Luk. 21:10-13.

Sɔgbe xá nǔɖɔɖ’ayǐ enɛ ɔ, Jehovah ɖò wusyɛn dó lanmɛ nú mɛ lɛ bǐ wɛ dìn ɖɔ ye ni nɔ acɛkpikpa Emitɔn wanyiyinɔ ɔ glɔ́. É jló ɖɔ gbɛtɔ́ tónúsétɔ́ lɛ ni ɖu vivǐ gbɛzán ɖagbe ɖé tɔn égbé, bo lɛ́ ɖu nyɔna sɔgudo tɔn lɛ sín lè ɖò gbɛ̀ tɔn yɔyɔ̌ e mɛ hwɛjijɔ na tíìn ɖè é. (2 Pi. 3:13) Jehovah jló na d’alɔ gbɛtɔ́ lɛ bonu ye na ɖi nǔ nú akpá tɔn lɛ, enɛ wu ɔ, é sɔnǔ nú wɛn gbɛhwlɛngán tɔn e nyí “axɔ́suɖuɖu Mawu tɔn sín wɛnɖagbe” ɔ é, bɔ Jezu ɖɔ ɖ’ayǐ ɖɔ ɖɔ “è na jla . . . gbɔn gbɛ̀ ɔ bǐ mɛ, bonu é na nyí kúnnuɖiɖe nú gbɛtɔ́ lɛ bǐ.” (Mat. 24:14) Mawu bló tuto nú mɛsɛntɔ́ tɔn nǔgbo lɛ bonu ye na ‘ɖekúnnu’ enɛ, alǒ jla wɛn enɛ ɖò tò 240 mɔ̌ mɛ. Jehovah jló ɖɔ gbɛtɔ́ gegě ni sè wɛn akpágbánúmɛ tɔn enɛ lee é nyɔ́ bló gbɔn é, bo gán ɖò “jɔhɔn ɖaxó” hwɛɖónúmɛ jlɔjlɔ tɔn tɔn e ja é hwenu.—Sof. 1:14, 15; 2:2, 3.

Jehovah ka na na hwenu e kpé é mɛ lɛ bɔ ye na wà nǔ sɔgbe xá akpágbánúmɛ tɔn lɛ à? Nǔ taji e è na kanbyɔ dìn é nɛ ǎ. Nǔ gegě xlɛ́ ɖɔ Jehovah nɔ wà mɔ̌ ɛgbɛ. Nǔkanbyɔ taji ɔ wɛ nyí ɖɔ: Mɛ lɛ ka na sè akpágbánúmɛ Mawu tɔn dìn e hwenu kpò bɔ ye na wà mɔ̌ é à? Mi nú mǐ mɛ mɛsɛ́dó Mawu tɔn lɛ ni kpó ɖò alɔ dó mɛ gegě wɛ lee mǐ kpéwú gbɔn é, bonu ye na dó gán ɖò gbɛ̀ elɔ sín vivɔnu.