1. Etɛwu Jehovah ka jɛxa bɔ mǐ na zé mǐɖée jó n’i bǐ mlɛ́mlɛ́?

JEHOVAH jɛxa bɔ mǐ na zé mǐɖée jó n’i bǐ mlɛ́mlɛ́, ɖó é wɛ nyí Gbɛɖotɔ́ mǐtɔn kpo Gbɛnamɛtɔ́ mǐtɔn kpo. (Nǔɖe. 4:11) Amɔ̌, mǐ nɔ mɔ wuvɛ̌ ɖé. Mǐ yí wǎn nú Jehovah bo nɔ lɛ́ ɖó sísí n’i có, nǔɖe lɛ sixu zɔ́n bɔ mǐ na gɔn mǐɖée zé jó n’i bǐ mlɛ́mlɛ́ lee é jɛxa gbɔn é. É byɔ ɖɔ mǐ ni mɔ nǔ jɛ lee nǔ sixu nyí mɔ̌ gbɔn é mɛ. Amɔ̌, mǐ ni tó ɖɔ xó dó nǔ e è ni zé mɛɖée jó nú Jehovah bǐ mlɛ́mlɛ́ nyí é wu hwɛ̌.

2. Sɔgbe xá Tíntɔ́n 34:14 ɔ, nú mǐ zé mǐɖée jó nú Jehovah bǐ mlɛ́mlɛ́ ɔ, etɛ mǐ ka ɖó na wà?

² Nú è ɖɔ è zé mɛɖée jó nú Mawu ɖò Biblu mɛ ɔ, tinmɛ tɔn wɛ nyí ɖɔ è ni ɖó wanyiyi e syɛn é n’i. Nú mǐ zé mǐɖée jó nú Jehovah bǐ mlɛ́mlɛ́ ɔ, mǐ na sɛn éɖokponɔ géé. Mǐ na lɔn nú mɛɖebǔ alǒ nǔ ɖebǔ na yí tɛn tɔn ɖò ayi mǐtɔn mɛ ǎ.—Xà Tíntɔ́n 34:14.

3. Aniwu è ma ka sixu ɖɔ ɖɔ vi mɛ wɛ mǐ ɖè bo zé mǐɖée jó nú Jehovah ǎ?

³ Mǐ nɔ vi mɛ kpowun bo zé mǐɖée jó nú Jehovah ǎ. Etɛwu? Nǔ e mǐ kplɔ́n dó wǔtu tɔn lɛ é jí wɛ mǐ zɔn dó bo wà mɔ̌. Jijɔ tɔn ɖagbeɖagbe lɛ wá dɔn mǐ. Mǐ tuùn nǔ e é yí wǎn na lɛ é kpo nǔ e é gbɛ́ wǎn na lɛ é kpo bo yí gbè na. Mǐ mɔ nǔ jɛ linlin e é ɖó nú gbɛtɔ́ lɛ é mɛ, bo nɔ nɔ gudo na. Gbè e é yí bɔ mǐ nyí xɔ́ntɔn tɔn é nɔ sù nukún mǐtɔn mɛ. (Ðɛh. 25:14) Nǔ ɖebǔ e mǐ kplɔ́n dó Gbɛɖotɔ́ mǐtɔn wu é nɔ zɔ́n bɔ mǐ nɔ sɛkpɔ ɛ d’eji.—Ja. 4:8.

4. (a) Etɛ lɛ Satáan ka nɔ zán dó vɔ́da nú zě e mǐ zé mǐɖée jó nú Jehovah é? (b) Etɛ jí mǐ ka na ɖɔ xó dó ɖò xóta elɔ mɛ?

 ⁴ Awoví sín acɛ mɛ wɛ gbɛ̀ elɔ ɖè, bɔ é nɔ zán dó bló bɔ é nɔ vɛwǔ bɔ mǐ na ɖu ɖò jlǒ jɔwamɔ tɔn mǐtɔn lɛ kpo gǎnmaɖó mǐtɔn lɛ kpo jí. (Efɛ. 2:1-3; 1 Jaan 5:19) Linlin tɔn wɛ nyí ɖɔ wanyiyi mǐtɔn ni vɔ́da, mɔ̌ mɛ ɔ, mǐ sɔ́ na zé mǐɖée jó nú Jehovah bǐ mlɛ́mlɛ́ ǎ. Mǐ ni ɖɔ xó dó ali e nu é sixu kpa ɛ ɖó bǎ ɖé mɛ ɖè é we jí. Nukɔntɔn ɔ, é nɔ tɛ́n kpɔ́n bonu mǐ na nya dɔkun gbé. Wegɔ́ ɔ, é nɔ tɛ́n kpɔ́n bo na dó jɔ nú mǐ bonu mǐ na wá gbeta nyanya kɔn ɖò ayiɖeɖayǐ linu.

5. Etɛwu mǐ ka ɖó na cɔ́ mǐɖée dó wǎn yí nú akwɛ wu?

⁵ Mǐ bǐ wɛ nɔ ba na ɖó nǔɖuɖu gegě, avɔ ɖagbe lɛ kpo fí ɖagbe e mǐ na nɔ é ɖé kpo. Amɔ̌, mǐ ɖó na cɔ́ mǐɖée dó wǎn yí nú akwɛ wu. Mɛ e ɖò gbɛ̀ Satáan tɔn mɛ lɛ é gegě wɛ “yí wǎn nú akwɛ” kpo nǔ e akwɛ sixu xɔ lɛ é kpo. (2 Tim. 3:2) Jezu tuùn ɖɔ ahwanvu emitɔn lɛ lɔ sixu ba na yí wǎn nú akwɛ. Enɛ wu ɔ, é ɖɔ: “Mɛɖé sixu sɛn gǎn we ǎ; ɖó é na gbɛ́ wǎn nú mɛ ɖě, bo na yí wǎn nú mɛ ɖě; abǐ é na setónú nú mɛ ɖě, bo na vɛtoli nú mɛ ɖě. Mi sixu sɛn Mawu bo lɛ́ sɛn dɔkun ǎ.” (Mat. 6:24) Nú mɛɖé ɖò Jehovah sɛn wɛ bo ka lɛ́ ɖò hwenu kpo hlɔnhlɔn kpo zán zɛ xwé wu wɛ bo na dó jɛ dɔkun ɔ, ali ɖé nu ɔ, é ɖò tintɛnkpɔn wɛ bo na sɛn gǎn we nɛ. Mɛ enɛ ɖò éɖée bǐ zé jó nú Jehovah wɛ ǎ.

6. Etɛ xó e Jezu ɖɔ nú agun Lawodisée tɔn é ka sixu kplɔ́n mǐ?

⁶ Ðò ɖibla yì vivɔnu xwè kanweko nukɔntɔn ɔ tɔn ɔ, agun e ɖò toxo Lawodisée tɔn mɛ é sín hagbɛ̌ lɛ nɔ yí nugo ɖɔ: “Un jɛ dɔkun, un mɔ akwɛ, nǔɖe hwedó mì ǎ.” Amɔ̌, ɖò Jehovah kpo Jezu  kpo nukúnmɛ ɔ, ‘gbɛ̌dónanɔ wɛ ye nyí, lobo nyí lelenɔ. Wamamɔnɔ wɛ ye nyí; nukúntíntɔ́nnɔ wɛ nú ye; mɛ̌ wɛ ye ɖè.’ É nyí dɔkun e ye jɛ é wutu wɛ Jezu ɖè wě xá ye ǎ, loɔ, dɔkun e ye yí wǎn na b’ɛ ɖò kancica e ye ɖó xá Jehovah é hɛn gblé wɛ é wu wɛ é ɖè wě xá ye. (Nǔɖe. 3:14-17) Nú mǐ ɖ’ayi wu ɖɔ jlǒ dɔkun gbé nyinya tɔn ɖò susu wɛ ɖò ayi mǐtɔn mɛ ɔ, mǐ ɖó na yawǔ jla linlin mǐtɔn ɖó. (1 Tim. 6:7, 8) Mǐ ma wà mɔ̌ ǎ ɔ, ayi mǐtɔn na má bɔ Jehovah na yí gbè nú sinsɛn-biblo mǐtɔn ǎ. É “nɔ ba gbeɖé ɖɔ è ni sɛn nǔ ɖevo zɛ éyɛ wu ǎ.” (Sɛ́n. 4:24) Nɛ̌ mǐ ka sixu wá gɔn jlɛ̌ jí nɔ ɖò linlin e mǐ nɔ ɖó dó akwɛ wu é mɛ gbɔn?

7-9. Etɛ nǔ e jɛ dó mɛxo e nɔ nyí David é wu é, ka kplɔ́n we?

⁷ Mǐ ni kpɔ́n kpɔ́ndéwú David tɔn, mɛxo agun tɔn azɔ̌syɛnsyɛnwatɔ́ ɖé wɛ bo nɔ nɔ États-Unis. É tinmɛ ɖɔ emi nɔ w’azɔ̌ syɛnsyɛn ɖò azɔ̌ emitɔn mɛ. È d’ajɔ ɛ ɖò azɔ̌xwé tɔn bɔ tò ɔ tlɛ lɛ́ tuùn i ɖi mɛ ɖagbe ɖé ɖò azɔ̌ tɔn sín akpáxwé. David ɖɔ: “Un lin hwe ɔ nu ɖɔ nyɔna Jehovah tɔn sín kúnnuɖenú wɛ ajɔ enɛ lɛ nyí.” Amɔ̌, nǔgbo jɛn ka wɛ à?

⁸ Kpɛɖé kpɛɖé ɔ, David jɛ mimɔ jí ɖɔ azɔ̌ emitɔn ɖò nǔ wà dó kancica emi kpo Jehovah kpo tɔn wu wɛ. É ɖɔ: “Un nɔ ɖò tamɛ lin dó tagba azɔ̌mɛ tɔn lɛ jí wɛ ɖò kplé lɛ jí, bo tlɛ nɔ lɛ́ ɖò mɔ̌ wà wɛ ɖò sinsɛnzɔ́ ɔ mɛ. Un nɔ ɖu akwɛ gegě, amɔ̌, linkpɔ́n ce lɛ fɔ́n bo ɖò jijɛji wɛ, bɔ alɔwliwli ce lɔ byɔ wuvɛ̌ mɛ.”

⁹ David mɔ ɖɔ emi ɖó na vɔ́ nǔ e nyí nǔjɔnǔ hugǎn nú emi lɛ é gbéjé kpɔ́n. É ɖɔ: “Un wá gbeta e jí un kú dó é ɖé kɔn bá jla ninɔmɛ ce ɖó.” David jló na ɖyɔ azɔ̌ tɔn sín ganmɛ lɛ, bo sɔ́ tuto tɔn xwlé gǎn  tɔn. Etɛ mɛ é ka tɔ́n kɔ dó? Azɔ̌ gblé dó David. Nɛ̌ é ka wà nǔ gbɔn? É ɖɔ: “Ayihɔngbe tɔn ɔ, un d’alɔ wema mɛ bo na nyí gbexosin-alijitɔ́ alɔgɔtɔ́ bo sɔ́ na ɖó te ǎ.” Bonu David kpo asì tɔn kpo na dó kpé nukún dó yeɖée wu ɔ, ye jɛ ayǐjlajlaɖózɔ́ wà jí. É na nɔ zaan é ɔ, é bɛ́ gbexosin-alijitɔ́ hwebǐnu tɔn sín azɔ̌, bɔ asì tɔn wá gɔ́ n’i ɖò gbexosin-alijitɔ́zɔ́ ɔ mɛ ɖò nukɔnmɛ. Asú kpo asì kpo enɛ nɔ wà agbazazɔ́ e mɛ gegě ma nɔ kéya na é, amɔ̌, agbazazɔ́ alɔkpa e wà wɛ ye ɖè é wɛ nyí nǔ taji hugǎn ɔ nú ye ǎ. Akwɛ e ye nɔ mɔ ɖ’ayǐ é sín maɖówǒ wɛ ye nɔ mɔ dìn có, sun ɖokpo ɖokpo mɛ ɔ, ye ka nɔ mɔ nǔ e na sú akwɛzinzan yetɔn lɛ sín dò é pɛ́ɛ. Ye jló na sɔ́ Jehovah ɖó nukɔn, bo ka mɔ tlɔlɔ ɖɔ é nɔ kpé nukún dó mɛ ɖěɖee nɔ sɔ́ Axɔ́suɖuto ɔ sín nǔ lɛ ɖó tɛn nukɔntɔn mɛ lɛ é wu.—Mat. 6:31-33.

10. Nɛ̌ mǐ ka sixu cɔ́ ayi mǐtɔn gbɔn?

¹⁰ Enyi mǐ na bo ɖó akwɛ kpɛɖé alǒ gegě ɔ, mǐ ɖó na hɛn ayi mǐtɔn. Gbɔn nɛ̌ é? Ma yí wǎn nú dɔkun ó. Ma ka lɛ́ lɔn nú agbazazɔ́ towe jɛ nukɔn nú sinsɛnzɔ́ e wà nú Jehovah wɛ a ɖè é ó. Nɛ̌ a ka sixu tuùn ɖɔ nǔ ɖò mɔ̌ nyí wɛ ɖò gbɛzán towe mɛ gbɔn? Nǔ ɖé lɛ ɖíe bɔ a sixu kanbyɔ hwiɖée: Enyi un ɖò kplé lɛ jí alǒ sinsɛnzɔ́ ɔ mɛ ɔ, un ka nɔ lin tamɛ hwɛhwɛ dó agbazazɔ́ ce jí wɛ à? Ado nɔ hu mì hwɛhwɛ ɖɔ sɔgudo ɔ, un ka na ɖó akwɛ e na kpé mì é à jí wɛ à? Akwɛ kpo nǔɖokan lɛ kpo wɛ nɔ dɔn tagba wá nyi kpo asì ce kpo tɛntin à? Un ka na ɖò gbesisɔmɛ bo na wà agbazazɔ́ e mɛ ɖevo lɛ ma nɔ kéya na ǎ é, bɔ é na zɔ́n bɔ un na zán hwenu gegě bo wà sinsɛnzɔ́ nú Jehovah à?’ (1 Tim. 6:9-12) Hwenu e mǐ na ɖò tamɛ lin dó nǔkanbyɔ enɛ lɛ jí wɛ é ɔ, mi nú mǐ ni flín ɖɔ Jehovah yí wǎn nú mǐ, bo d’a-kpá elɔ lɛ nú mɛ ɖěɖee zé yeɖée jó n’i lɛ é: “Un na jó we dó gbeɖé ǎ; un na ɖè alɔ sín kan towe mɛ gbeɖé ǎ.” Enɛ wu wɛ mɛsɛ́dó Pɔlu wlan ɖɔ: “Mi ma jó miɖée dó nú wǎn yíyí nú akwɛ ɖu ɖò mi jí ó.”—Ebl. 13:5, 6.

11. Etɛ ayiɖeɖayǐ ka sixu wà nú mɛ?

¹¹ Jehovah ba ɖɔ mǐ ni ɖu gbɛ̀ víví; ayiɖeɖayǐ lɛ ka sixu d’alɔ mǐ bɔ mǐ wà mɔ̌. Nǔgbo ɔ, Mawuxó ɔ ɖɔ ɖɔ “nǔɖe sɔ́ nyɔ́ nú gbɛtɔ́ ɖò gbɛmɛ zɛ é na ɖu nǔ, bo nu ahan, bo ɖu azɔ̌ e é wà ɔ sín gbɛ̀ wu ǎ.” (Nǔt. 2:24) Amɔ̌, ayiɖeɖayǐ gbɛ̀ ɔ tɔn lɛ gegě sixu hɛn nǔ gblé dó mǐ wu. Ye nɔ hɛn nǔgbododó walɔ ɖagbe tɔn gbɛtɔ́  tɔn lɛ gblé, bo nɔ dó wusyɛn lanmɛ nú mɛ ɖɔ è ni yí gbè alǒ tlɛ yí wǎn nú nǔ e Xó Mawu tɔn gbɛ́ lɛ é.

12. Sɔgbe xá 1 Kɔlɛntinu lɛ 10:21, 22 ɔ, etɛwu mǐ ka ɖó na xwè sɔ bo cyan ayiɖeɖayǐ mǐtɔn lɛ?

¹² Mǐ ba na zé mǐɖée jó nú Jehovah bǐ mlɛ́mlɛ́, enɛ wu ɔ, mǐ sixu “ɖu Aklunɔ sín nǔɖuɖu” bo lɛ́ ɖu “yɛ nyanya lɛ sín nǔɖuɖu ǎ.” (Xà 1 Kɔlɛntinu lɛ 10:21, 22.) Hwɛhwɛ wɛ nǔ ɖuɖu xá mɛɖé nɔ xlɛ́ ɖɔ è vɛ́ kpo mɛ ɔ kpo. Nú mǐ nɔ cyan ayiɖeɖayǐ e nɔ sɔ́ dakaxixo, awovínúwiwa, nǔbliblíwiwa, alǒ jlǒ kpo linlin agbaza tɔn ɖevo lɛ kpo sù é ɔ, nǔɖuɖu e kɛntɔ́ Mawu tɔn ɖa é ɖu wɛ mǐ ɖè ɖò ali ɖé nu nɛ. Wǎgbɔ tɔn ɔ, enyi mǐɖokponɔ wu wɛ mǐ nɔ wà nǔ dó ǎ, loɔ, mǐ nɔ lɛ́ hɛn kancica e ɖò mǐ kpo Jehovah kpo tɛntin é gblé.

13-14. Sɔgbe xá Jaki 1:14, 15 ɔ, etɛwu mǐ ka ɖó na nɔ cyan ayiɖeɖayǐ mǐtɔn lɛ kpo sɔxwixwe kpo? Jlɛ̌ dó nǔɖe wu.

¹³ Mǐ ni kpɔ́n ali tawun tawun e nu ayiɖeɖayǐ cí nǔɖuɖu ɖɔhun ɖè é ɖé lɛ. Nú mǐ jló na ɖu nǔ ɔ, mǐ sixu cyan nǔ e na byɔ nu mǐtɔn mɛ lɛ é. Amɔ̌, nú mǐ ɖu nǔ ɔ gudo ɔ, mǐ sɔ́ nɔ tuùn lee é na kúnkplá agbaza mǐtɔn gbɔn é ǎ. Nǔɖuɖu ɖagbe ɖé sixu zɔ́n bɔ mǐ ɖò ganji; nǔɖuɖu nyanya ka na d’azɔn mǐ. Mǐ sixu gɔn nǔ e mɛ é na tɔ́n kɔ dó é mɔ tlolo, amɔ̌ ayǐ ɖò hinhɔ́n wɛ ɔ, é na wá tɔ́n.

¹⁴ Ali ɖokpo ɔ nu ɔ, enyi mǐ ɖò ayiɖeɖayǐ mǐtɔn lɛ cyan wɛ ɔ, mǐ sixu ɖɔ nǔ e mǐ na sɔ́ dó ayi mǐtɔn mɛ é. Enɛ gudo ɔ, ayiɖeɖayǐ e mǐ sɔ́ é na kúnkplá linlin mǐtɔn kpo lee nǔ nɔ cí nú mǐ é kpo. Ayiɖeɖayǐ ɖagbe sixu wà ɖagbe nú mǐ, ayiɖeɖayǐ nyanya ka na hɛn nǔ gblé dó mǐ wu. (Xà Jaki 1:14, 15.) Mǐ sixu nɔ ma ɖó ayi lee ayiɖeɖayǐ nyanya ɖò nǔ hɛn gblé dó mǐ wu wɛ gbɔn é wu tlolo, amɔ̌, é na wá tɔ́n ɖò nukɔnmɛ. Nǔ e wu Biblu gb’akpá elɔ nú mǐ é nɛ: “Mi ma blɛ́ miɖée ó, mɛɖé nɔ wà yɛ nú Mawu ǎ. Nǔ e è dó ɔ wɛ è nɔ ya. Mɛɖé wà jlǒ nyanya gbɛtɔ́ tɔn ɔ, jlǒ nyanya gbɛtɔ́ tɔn na dɔn kú wá n’i.” (Ga. 6:7, 8) Kpɔ́n lee é ɖò taji nú mǐ ɖɔ mǐ ni nyi alɔ nú ayiɖeɖayǐ e nɔ sɔ́ nǔ ɖěɖee Jehovah gbɛ́ wǎn na lɛ é sù sɔ́ é é! —Ðɛh. 97:10.

15. Nǔnina tɛ Jehovah ka na mǐ bɔ mǐ na ɖu vivǐ tɔn?

¹⁵ Gegě mɛ e ɖò togun Jehovah tɔn mɛ lɛ é tɔn nɔ ɖu vivǐ Televiziɔn JW tɔn^® mǐtɔn kpinkpɔn tɔn; televiziɔn Ɛntɛnɛti jí tɔn ɖé wɛ bɔ nǔ ɖagbe lɛ ɖ’eji. Nɔví ɖé nɔ nyí Marilyn bo ɖɔ: “Televiziɔn JW tɔn ko d’alɔ mì bɔ un ɖó awǎjijɛ hugǎn, é byɔ ɖɔ má cyan nǔ e un nɔ kpɔ́n ɖ’eji lɛ é ǎ. Nú un ɖò nyiɖokponɔ alǒ awakanmɛ kú mì ɔ, un nɔ mɔ xóɖiɖɔ wusyɛn dó lanmɛ nú mɛ tɔn alǒ Sinsɛn-Biblo Zǎnzǎn tɔn ɖé ɖ’eji bo nɔ ɖu vivǐ tɔn. Enɛ zɔ́n bɔ un sɛkpɔ Jehovah kpo tutoblonunu tɔn kpo hugǎn. Televiziɔn JW tɔn huzu gbɛzán ce bǐ.” A ka ɖò nǔnina Jehovah tɔn enɛ sín lè ɖu wɛ à? Gbɔn vo nú tuto sunmɛ sunmɛ tɔn yɔyɔ̌ ɖé ɔ, xóyidókanji kpo video kpo gegě gɔ́ nú han e nǔkplɔnmɛ kpé lɛ é nɔ ɖ’eji.

16-17. Etɛwu mǐ ka ɖó na nɔ ɖó dogbó nú táan nabi e mǐ nɔ zán dó ɖè ayi ɖ’ayǐ é? Nɛ̌ mǐ ka sixu wà mɔ̌ gbɔn?

¹⁶ É nyí ayiɖeɖayǐ alɔkpa e sín vivǐ mǐ nɔ ɖu lɛ é kɛɖɛ wu wɛ ayi mǐtɔn ɖó na ɖò te dó ǎ, mǐ ɖó na lɛ́ ɖ’ayi te dó táan nabi e mǐ nɔ zán ɖ’ékɔn é wu. Mǐ ma wà mɔ̌ ǎ ɔ, mǐ sixu zán hwenu gegě ɖò ayiɖeɖayǐ kɔn hú ee mǐ nɔ zán dó sɛn Jehovah é. É nɔ vɛwǔ nú mɛ gegě bɔ ye na ɖ’ayi te dó táan nabi e ye nɔ zán ɖò ayiɖeɖayǐ kɔn é  wu. Nɔví nyɔnu Abigail e ɖó xwè 18 é ɖɔ: “Telée kpinkpɔn nɔ d’alɔ mì bɔ un nɔ ɖè ayi ɖ’ayǐ ɖò azɔ̌zán e ján tawun é ɖé gudo. Amɔ̌, nú un ma cɔ́ nyiɖée ǎ ɔ, un sixu zán ganxixo gegě ɖ’ékɔn.” Nɔví sunnu dɔnkpɛvu ɖé nɔ nyí Samuel bo ɖɔ: “Hweɖelɛnu ɔ, un nɔ kpɔ́n video klewun klewun gegě ɖò Ɛntɛnɛti jí. Ðokpo jɛn un nɔ bɛ́ kpinkpɔn, bɔ có nú un na wá ɖ’ayi wu ɔ, ganxixo atɔn alǒ ɛnɛ ko nɔ wá yì.”

¹⁷ Nɛ̌ a ka sixu ɖó dogbó nú táan e a nɔ zán dó ɖè ayi ɖ’ayǐ na é gbɔn? Afɔ nukɔntɔn ɔ wɛ nyí ɖɔ a ni tuùn táan nabi e a nɔ zán dó ɖè ayi ɖ’ayǐ na dìn é. Sɔ́ kɛ́n táan nabi e a nɔ zán ɖò aklunɔzán gbla ɖokpo mɛ é tɔn. Wlǎn ganxixo nabi e a nɔ zán dó kpɔ́n telée, yì Ɛntɛnɛti jí, d’ayihun ɖò alokan alǒ tablɛti towe jí é dó sunzánwema ɖé mɛ. Enyi a mɔ ɖɔ emi nɔ zán hwenu zɛ xwé wu hǔn, tɛ́n kpɔ́n bo bló tuto ɖé. Ba hwenu nú nǔjɔnǔ hugǎn lɛ hwɛ̌, enɛ gudo hǔn, ba nú ayiɖeɖayǐ. Byɔ Jehovah ɖɔ é ni d’alɔ we bonu a na xwedó tito e a bló é. Mɔ̌ mɛ ɔ, a na mɔ hwenu kpo hlɔnhlɔn kpo e sín hudo a ɖó bo na nɔ kplɔ́n Biblu hwiɖesunɔ, bló sinsɛn-biblo xwédo tɔn, yì kplé agun tɔn lɛ lobo sɛn Jehovah ɖò Mawuxóɖiɖɔ kpo mɛkplɔnkplɔn kpo sín azɔ̌ ɔ mɛ é. A sɔ́ na nɔ lɛ́ dóhwɛ hwiɖée sɔmɔ̌ nú táan nabi e a nɔ zán dó ɖè ayi ɖ’ayǐ é wu ǎ.

18-19. Nɛ̌ mǐ ka sixu xlɛ́ ɖɔ mǐ zé mǐɖée jó nú Jehovah bǐ mlɛ́mlɛ́ gbɔn?

¹⁸ Hwenu e mɛsɛ́dó Piyɛ́ɛ wlan nǔ dó vivɔnu gbɛ̀ Satáan tɔn tɔn kpo gbɛ̀ yɔyɔ̌ e ja é kpo wu gudo é ɔ, é ɖɔ: “Nɔví ce vívɛ́ná lɛ mi, ee mi ɖò te kpɔ́n nǔ enɛ lɛ sín jijɛ ɔ, mi bo ɖò nǔ e wu mi kpé ɔ bǐ wà wɛ, bo na dó nyí mɛ mímɛ́ maɖóblɔ̌ ɖò wǔ ɖò Mawu nukɔn, bo na dó nɔ fífá mɛ kpo Mawu kpo.” (2 Pi. 3:14) Nú mǐ nɔ setónú nú wěɖexámɛ enɛ, bo nɔ wà nǔ e wu mǐ kpé é bǐ bo na nɔ mimɛ̌ jí ɖò walɔ kpo gbigbɔ kpo lixo ɔ, xíxlɛ́ wɛ mǐ ɖè ɖɔ mǐ zé mǐɖée bǐ jó nú Jehovah mlɛ́mlɛ́ nɛ.

¹⁹ Satáan kpo gbɛ̀ tɔn kpo na kpó ɖò tintɛnkpɔn wɛ bɔ nǔ ɖevo lɛ na mya nukún nú mǐ hugǎn. (Luk. 4:13) Amɔ̌, mǐ na lɔn nú mɛɖebǔ alǒ nǔ ɖebǔ na yí Jehovah sín tɛn ɖò ayi mǐtɔn mɛ ǎ. Mǐ kánɖeji bo na na Jehovah nǔ e éɖokponɔ jɛxa é, é wɛ nyí ɖɔ mǐ na zé mǐɖée jó n’i bǐ mlɛ́mlɛ́.