1. Nɛ̌ 2 Kɔlɛntinu lɛ 3:1-3 ka d’alɔ mǐ bɔ wǔ e è jɔ mǐ bɔ mǐ na kplɔ́n Biblu xá mɛɖé bonu é na bló baptɛm é na sù nukún mǐtɔn mɛ gbɔn? (Kpɔ́n ɖiɖe e ɖò akpa ɔ jí é.)

ENYI a mɔ Biblu kplɔntɔ́ e ɖò fí e agun towe nɔ ɖekúnnu ɖè lɛ é ɖé bló baptɛm ɔ, nɛ̌ é ka nɔ cí nú we? É ɖò wɛn ɖɔ é nɔ víví nú we tawun. (Mat. 28:19) Enyi hwi wɛ kplɔ́n nǔ xá ɛ bɔ é bló baptɛm ɔ, akpakpa na sɔ́ we tawun, b’ɛ na lɛ́ víví nú we ɖesu. (1 Tɛ. 2:19, 20) Mɛ e bló baptɛm bo huzu ahwanvu yɔyɔ̌ lɛ é nyí “wema e ɖexlɛ́ ɖɔ [ye] nyí azɔ̌ mɔ̌hunkɔtɔn wà tɔ́ é” titewungbe ɖé nú mɛ e kplɔ́n nǔ xá ye lɛ é kpo agun ɔ bǐ kpo.—Xà 2 Kɔlɛntinu lɛ 3:1-3.

2. (a) Nǔkanbyɔ taji tɛ jí mǐ ka ɖó na lin tamɛ dó? Etɛwu? (b) Etɛ ka nyí Biblu kplɔnkplɔn xá mɛ? (Kpɔ́n tinmɛ e ɖò dò é.)

² Nǔ ɖagbe tawun wɛ é nyí ɖɔ ɖò xwè ɛnɛ e wá yì lɛ é mɛ ɔ, mɛ 10 000 000 mɔ̌ wɛ è nɔ kplɔ́n Biblu xá * sunmɛ sunmɛ gbɔn gbɛ̀ ɔ bǐ mɛ. Ðò xwè ɛnɛ enɛ lɛ mɛ ɔ, mɛ 280 000 mɔ̌ wɛ nɔ bló baptɛm xwè ɖokpo ɖokpo mɛ. Nɛ̌ mǐ ka sixu d’alɔ gbɛtɔ́ livi mɔ̌kpan enɛ lɛ e kplɔ́n Biblu xá wɛ è ɖè lɛ é hugǎn bɔ ye na bló baptɛm gbɔn? Jehovah kpò ɖò ali hun nú mɛ lɛ wɛ bonu ye na huzu Kúnnuɖetɔ́ tɔn lɛ. Enɛ wu wɛ mǐ ɖó na wà nǔ e wu mǐ kpé é bǐ bo d’alɔ ye bɔ ye na yì nukɔn bo bló baptɛm dó mɛhwenu lee é nyɔ́ bló gbɔn é. É sɔ́ kpò táan kaka ɖé ǎ!—1 Kɔ. 7:29a; 1 Pi. 4:7.

3. Etɛ jí mǐ ka na ɖɔ xó dó ɖò xóta elɔ mɛ, b’ɛ kúnkplá Biblu kplɔnkplɔn xá mɛ?

 ³ Ðó nǔ kplɔnkplɔn mɛ lɛ bonu ye na huzu ahwanvu ɖò taji tawun dìn wutu ɔ, Hagbɛ̌ Alixlɛ́mɛtɔ́ ɔ kan nǔ e mǐ sixu wà bɔ Biblu kplɔntɔ́ mǐtɔn lɛ gegě na yì nukɔn bo bló baptɛm é byɔ alaxɔ lɛ. Enɛ wu ɔ, ɖò xóta elɔ kpo ee bɔ d’ewu é kpo mɛ ɔ, mǐ na ɖɔ xó dó nǔ e gbexosin-alijitɔ́ lɛ, mɛsɛ́dó lɛ, kpo nukúnkpénuwutɔ́ lɛdo tɔn lɛ kpo e ɖò tò vovo mɛ lɛ é mɔ kpɔ́n lɛ é sixu kplɔ́n mǐ lɛ é jí. * (Nǔx. 11:14; 15:22) Ye tinmɛ nǔ e Biblu kplɔnmɛtɔ́ lɛ kpo Biblu kplɔntɔ́ yetɔn lɛ kpo sixu wà bɔ Biblu kplɔnkplɔn ɖé na hɛn lè wá hugǎn é. Ðò xóta elɔ mɛ ɔ, mǐ na gbéjé nǔ e Biblu kplɔntɔ́ ɖokpo ɖokpo ɖó na wà, bo na yì nukɔn bo bló baptɛm é atɔ́ɔ́n kpɔ́n.

4. Etɛ mǐ ka ɖó na tuùn dó Biblu kplɔnkplɔn xá mɛ ɖò hɔn linu wu?

⁴ Nɔví mǐtɔn lɛ gegě nɔ kplɔ́n Biblu xá mɛ lɛ ɖò hɔn yetɔn lɛ linu. Nǔgbo wɛ ɖɔ afɔɖiɖe enɛ ɖò taji bo na dó fɔ́n jlǒ mɛ ɔ tɔn nyite dó Biblu wu, amɔ̌, hwɛhwɛ ɔ, xóɖɔɖókpɔ́ enɛ lɛ nɔ hwegli bɔ mɛ ɔ sixu nɔ ma mɔ tɛn d’ewu ɖò aklunɔzán gbla lɛ bǐ mɛ. Bonu mɛ ɔ na dó kpò ɖò jlǒ ɖó wɛ ɔ, nɔví ɖé lɛ nɔ byɔ animɛlóo mɛ ɔ tɔn bo nɔ wá ylɔ́ ɛ alǒ wlán nǔ sɛ́dó è bo nɔ má nǔɖe xá ɛ dó Biblu jí. Ye sixu ko nɔ ɖɔ xó xá mɛ ɔ klewun klewun nú sun gegě. Enyi nǔkplɔntɔ́ ɔ ma ka zán hwenu gegě, bo lɛ́ dó gǎn dó kplɔ́n Mawuxó ɔ ǎ ɔ, é ka sixu yì nukɔn dóo bo zé éɖée jó bo bló baptɛm à? Nǔ sixu nyí mɔ̌ ǎ.

5. Etɛ Jezu ka ɖɔ ɖò Luki 14:28-33 mɛ, bɔ mǐ sixu zán dó d’alɔ mɛ e mǐ nɔ kplɔ́n Biblu xá lɛ é?

⁵ Ðò ninɔmɛ ɖé mɛ ɔ, Jezu jlɛ́ nǔ e ahwanvu tɔn nyínyí nɔ byɔ é dó nǔɖe wu. É ɖɔ xó dó mɛ e jló na gbá xɔ é ɖé wu, bo lɛ́ ɖɔ xó dó axɔ́su e jló na yì fun ahwan é ɖé wu. Jezu ɖɔ ɖɔ mɛ e jló na gbá xɔ é ɔ, “ayǐ wɛ é na tó jinjɔn, bo na lɛ́n akwɛ nabi e é na zán” dó fó xɔ ɔ gbigbá é. Axɔ́su ɔ lɔ ɖó na “tó jinjɔn ayǐ hwɛ̌, bo na lin tamɛ kpɔ́n” ɖɔ ahwankpá emitɔn ka sixu kpé ahwan ɔ wu à jí. (Xà Luki 14:28-33.) Mɔ̌ ɖokpo ɔ, Jezu tuùn ɖɔ mɛ e jló na huzu ahwanvu emitɔn é ɖó na gbéjé nǔ e ahwanvu emitɔn nyínyí byɔ é kpɔ́n ganji. Ðó hwɛjijɔ enɛ wu ɔ, mǐ ɖó na dó wusyɛn lanmɛ nú ahwanvu sɔ tɔn lɛ ɖɔ ye ni nɔ kplɔ́n Biblu xá mǐ ɖò aklunɔzán gbla lɛ bǐ mɛ. Nɛ̌ mǐ ka sixu wà mɔ̌ gbɔn?

6. Etɛ lɛ mǐ ka sixu tɛ́n kpɔ́n bo wà, bonu nǔkplɔntɔ́ mǐtɔn lɛ na yì nukɔn?

 ⁶ Bɛ̌ gbɔn nǔ kplɔnkplɔn xá mɛ gegě ɖò hɔn linu gblamɛ. Bɔya a sixu nɔ ɖɔ xó dó wemafɔ Biblu tɔn ɖevo lɛ jí xá ye, ɖò hweɖebǔnu e a yì ba ye kpɔ́n é. Enyi xwétɔ́ ɔ yí gbè bɔ a nɔ zán hwenu gegě ɖó kpɔ́ xá ɛ hǔn, kanbyɔ ɛ ɖɔ fí ɖé ka ɖè bɔ mi sixu nɔ jinjɔn bo gbɛkan dó xóɖɔɖókpɔ́ ɔ nu à jí. Xósin e xwétɔ́ ɔ na na é na xlɛ́ lě dò é ɖó jlǒ sɔ bo na kplɔ́n nǔ dó Biblu jí é. Nukɔnmɛ ɔ, bo na dó d’alɔ nǔkplɔntɔ́ ɔ bonu é na yì nukɔn ɔ, a tlɛ sixu kanbyɔ ɛ ɖɔ é jló ɖɔ mi na nɔ kplɔ́n nǔ azɔn we ɖò aklunɔzán gbla ɖokpo mɛ à jí. Amɔ̌, é nɔ byɔ nǔ hú nǔ kplɔnkplɔn azɔn ɖokpo alǒ we ɖò aklunɔzán gbla lɛ bǐ mɛ.

7. Nɛ̌ nǔkplɔnmɛtɔ́ ɔ ka sixu sɔnǔ ganji nú nǔkplɔnkplɔn ɖokpo ɖokpo gbɔn?

⁷ Ðó hwi wɛ nyí nǔkplɔnmɛtɔ́ ɔ wu ɔ, a ɖó na nɔ sɔnǔ ganji nú nǔkplɔnkplɔn ɖokpo ɖokpo. Bo na dó bɛ́ ɔ, a sixu xà nǔ e na kplɔ́n ɖó kpɔ́ wɛ mi ɖè é, enɛ gudo hǔn, gbějé wemafɔ lɛ kpɔ́n. Nǔ nǔ taji lɛ ni zawě ganji ɖò ayi towe mɛ. Lin tamɛ dó xóta nǔkplɔnkplɔn tɔn ɔ, xótalá lɛ, nǔkanbyɔ lɛ, wemafɔ ɖěɖee è wlán “xà” dó akpá yetɔn lɛ é, ɖiɖe lɛ, kpo video ɖebǔ e sixu d’alɔ bɔ a na tinmɛ xóta ɔ ganji lɛ é kpo jí. Enɛ gudo hǔn, hɛn nǔkplɔntɔ́ towe ayi mɛ, bo lin tamɛ dó lee a sixu xwlé è wɛn ɔ ɖò ali e bɔkun é nu b’ɛ na lɛ́ zawě ganji gbɔn é jí, enɛ ɔ, nǔkplɔntɔ́ towe sixu yawǔ mɔ nǔ jɛ mɛ, bo zán.—Nɛɛ. 8:8; Nǔx. 15:28a.

8. Etɛ xó e mɛsɛ́dó Pɔlu ɖɔ ɖò Kolosinu lɛ 1:9, 10 mɛ é ka kplɔ́n mǐ dó ɖɛxixo dó Biblu kplɔntɔ́ mǐtɔn lɛ sín takúnmɛ wu?

⁸ Ðò nǔsisɔ nú nǔkplɔnkplɔn ɔ hwenu hǔn, xoɖɛ sɛ́dó Jehovah dó nǔkplɔntɔ́ ɔ kpo hudo tɔn lɛ kpo sín takúnmɛ. Byɔ̌ Jehovah ɖɔ é ni d’alɔ we bonu a na zán Biblu dó kplɔ́n nǔ mɛ ɔ, bonu nǔkplɔnmɛ ɔ na byɔ ayi tɔn mɛ. (Xà Kolosinu lɛ 1:9, 10.) Tɛ́n kpɔ́n bo dó nukún nǔ ɖebǔ e sixu vɛwǔ nú nǔkplɔntɔ́ ɔ bonu é na mɔ nǔ jɛ mɛ alǒ yí gbè na é mɛ kpɔ́n. Hɛn d’ayi mɛ ɖɔ nǔ e gbé nya wɛ a ɖè é wɛ nyí ɖɔ a na d’alɔ ɛ b’ɛ na yì nukɔn bo bló baptɛm.

9. Nɛ̌ nǔkplɔnmɛtɔ́ ɔ ka sixu d’alɔ nǔkplɔntɔ́ ɔ bɔ é na sɔnǔ nú nǔkplɔnkplɔn tɔn gbɔn? Tinmɛ.

⁹ Mǐ nɔ ɖó nukún ɖɔ Biblu kplɔnkplɔn e ɖò yiyi wɛ ɖò gbesisɔmɛ é ɖé na d’alɔ nǔkplɔntɔ́ ɔ, bɔ nǔ e Jehovah kpo Jezu kpo wà lɛ é bǐ na sù nukún tɔn mɛ, bɔ é na ba na lɛ́ kplɔ́n nǔ d’eji. (Mat. 5:3, 6, nwt) Bonu  nǔkplɔntɔ́ ɔ na dó ɖu lè nǔkplɔnkplɔn ɔ tɔn mlɛ́mlɛ́ ɔ, é ɖó na zé ayi ɖó nǔ e kplɔ́n wɛ é ɖè ɔ jí. Bonu é na dó kpé enɛ wu ɔ, tinmɛ lee é ɖò taji sɔ ɖɔ é ni nɔ sɔnǔ nú nǔkplɔnkplɔn ɖokpo ɖokpo, gbɔn akpáxwé ɔ xixa jɛ nukɔn kpo tamɛ linlin dó lee é kan ɛ gbɔn é kpo jí é n’i. Nɛ̌ nǔkplɔnmɛtɔ́ ɔ ka sixu d’alɔ ɛ gbɔn? Sɔnǔ nú nǔkplɔnkplɔn ɖé ɖó kpɔ́ xá nǔkplɔntɔ́ ɔ dó xlɛ́ ɛ lee è nɔ wà mɔ̌ gbɔn é. * Xlɛ́ ɛ lee é na ba xósin lɛ nú nǔkanbyɔ lɛ, bo ɖó wuntun xógbe klewun klewun e na d’alɔ ɛ bɔ é na flín xósin lɛ é gbɔn é. Enɛ gudo hǔn, byɔ̌ ɛ ɖɔ é ni na xósin dó xógbe éɖesunɔ tɔn mɛ. Enyi é wà mɔ̌ ɔ, a na kpéwú bo tuùn bǎ e mɛ é mɔ nǔ jɛ nǔkplɔnkplɔn ɔ mɛ yì ɖó é. Amɔ̌, é kpò nǔ ɖevo bɔ a sixu dó wusyɛn lanmɛ nú nǔkplɔntɔ́ towe ɖɔ é ni bló.

10. Etɛwu Biblu xixa ayihɔngbe ayihɔngbe ka ɖò taji? Etɛ sín hudo è ka ɖó bo na dó ɖu lè Biblu xixa tɔn ganji?

¹⁰ Gbɔn vo nú nǔ e nǔkplɔnmɛtɔ́ ɔ nɔ kplɔ́n xá nǔkplɔntɔ́ tɔn ɖò aklunɔzán gbla lɛ bǐ mɛ é ɔ, nǔkplɔntɔ́ ɔ ɖó na nɔ wà nǔ ɖevo lɛ éɖesunɔ gbè bǐ gbè. É ɖó na nɔ ɖɔ xó ɖó kpɔ́ xá Jehovah. Gbɔn nɛ̌ é? Gbɔn tó ɖiɖó Jehovah kpo xó ɖiɖɔ n’i kpo gblamɛ. É sixu ɖótó Mawu gbɔn Biblu xixa ayihɔngbe ayihɔngbe gblamɛ. (Joz. 1:8; Ðɛh. 1:1-3) Xlɛ́ ɛ lee é sixu zán “Tuto Biblu Xixa Tɔn” e ɖò jw.org jí é gbɔn é. * Bo na dó d’alɔ ɛ bonu é na ɖu lè Biblu xixa tɔn tɔn ganji hǔn, dǒ wusyɛn lanmɛ n’i bonu é ni lin tamɛ dó nǔ e Biblu ɖò kplɔnkplɔn ɛ wɛ dó Jehovah wu é kpo lee é sixu zán nǔ e kplɔ́n wɛ é ɖè lɛ é ɖò gbɛzán tɔn mɛ gbɔn é kpo jí.—Mɛ. 17:11; Ja. 1:25.

11. Nɛ̌ nǔkplɔntɔ́ ɖé ka sixu kplɔ́n bo na nɔ xoɖɛ ganji gbɔn? Etɛwu é ka ɖò taji ɖɔ é ni nɔ xoɖɛ sɛ́dó Jehovah hwɛhwɛ?

¹¹ Dǒ wusyɛn lanmɛ nú nǔkplɔntɔ́ towe bonu é ni nɔ ɖɔ xó xá Jehovah gbɔn ɖɛxixo sɛ́dó è ayihɔngbe ayihɔngbe gblamɛ. Ðò bǐbɛ̌mɛ kpo vivɔnu nǔkplɔnkplɔn ɖokpo ɖokpo tɔn kpo hǔn, nɔ xoɖɛ ɖó kpɔ́ xá nǔkplɔntɔ́ towe kpo ayi bǐ kpo bo nɔ lɛ́ xoɖɛ dó takún tɔn mɛ. Ee é na ɖò ɖɛ towe lɛ ɖótó wɛ é ɔ, é na kplɔ́n lee è nɔ xoɖɛ sín ayi mɛ dó nǔjɔnǔ mɛ sɛ́dó Jehovah Mawu ɖò nyikɔ Jezu Klisu tɔn mɛ gbɔn é. (Mat. 6:9; Jaan 15:16) Dǒ nukún lee Biblu xixa ayihɔngbe ayihɔngbe (tó ɖiɖó Jehovah) gɔ́ nú ɖɛxixo (xó ɖiɖɔ nú Jehovah) na d’alɔ nǔkplɔntɔ́ towe, bɔ é na lɛ́ vɛ́  kpo Mawu kpo tawun gbɔn é mɛ kpɔ́n! (Ja. 4:8) Nǔsisɔ nú aca mɔ̌hun lɛ na d’alɔ nǔkplɔntɔ́ ɔ b’ɛ na sɔnǔ nú aca ɖevo e sixu sísɛ́ ɛ b’ɛ na zé éɖée jó nú Mawu bo bló baptɛm é.

12. Nɛ̌ nǔkplɔnmɛtɔ́ ɖé ka sixu d’alɔ Biblu kplɔntɔ́ ɖé bɔ é na ɖó kancica ɖé xá Jehovah gbɔn?

¹² Biblu kplɔntɔ́ ɖé ɖó na ɖó mɔjɛmɛ nǔ e kplɔ́n wɛ é ɖè lɛ é tɔn kɛɖɛ ǎ, loɔ, ye ɖó na lɛ́ byɔ ayi tɔn mɛ. Etɛwu? Ayi mǐtɔn ee mɛ jlǒ mǐtɔn, linlin mǐtɔn, kpo lee nǔ nɔ cí nú mǐ é kpo ɖè é wɛ nɔ sísɛ́ mǐ bɔ mǐ nɔ wà nǔ. Jezu kplɔ́n nǔ gegě mɛ lɛ, bɔ ye yí wǎn nú nǔ kplɔnkplɔn ɖò gɔ̌n tɔn. Amɔ̌, mɛ lɛ xwedó è, ɖó nǔkplɔnmɛ tɔn lɛ lɔ nɔ byɔ ayi yetɔn mɛ. (Luk. 24:15, 27, 32) Nǔkplɔntɔ́ towe ɖó na tuùn ɖɔ Jehovah tíìn nǔgbo, bɔ é sixu ɖó kancica ɖé xá ɛ lobo na lɛ́ kpɔ́n ɛ dó mɔ Tɔ́ tɔn, Mawu tɔn, kpo Xɔ́ntɔn tɔn kpo. (Ðɛh. 25:4, 5) Ðò nǔkplɔnkplɔn lɛ hwenu hǔn, nɔ dɔn ayi nǔkplɔntɔ́ ɔ tɔn wá jijɔ ɖaaɖagbe Mawu mǐtɔn tɔn lɛ jí. (Tín. 34:5, 6; 1 Pi. 5:6, 7) Mi na bo tlɛ ɖò xó ɖɔ wɛ dó xóta ɖebǔ jí hǔn, zě ayi ɖó Mɛ alɔkpa e Jehovah nyí é jí. D’alɔ nǔkplɔntɔ́ ɔ bonu jujɔ ɖaaɖagbe Jehovah tɔn lɛ ni nɔ sù nukún tɔn mɛ, ɖi wanyiyi tɔn, xomɛnyínyɔ́ tɔn, kpo wuvɛ̌sexámɛ tɔn kpo. Jezu ɖɔ ɖɔ “sɛ́n ɖaxó e jɛ nukɔn nú sɛ́n lɛ bǐ ɔ” wɛ nyí: “[Yǐ] wǎn nú Aklunɔ Mawu towe.” (Mat. 22:37, 38) Tɛ́n kpɔ́n bo d’alɔ nǔkplɔntɔ́ ɔ bonu é ni yí wǎn nú Jehovah.

13. Nǎ kpɔ́ndéwú lee è sixu d’alɔ nǔkplɔntɔ́ ɖé b’ɛ na kplɔ́n nǔ dó jijɔ Jehovah tɔn lɛ wu gbɔn é tɔn.

¹³ Enyi a ɖò xó ɖɔ ɖó kpɔ́ xá nǔkplɔntɔ́ towe wɛ hǔn, ɖè lee nǔ cí nú we tawun dó Jehovah wu é xlɛ́ ɛ. Enɛ sixu d’alɔ nǔkplɔntɔ́ towe b’ɛ na mɔ ɖɔ emi lɔ ɖó na huzu xɔ́ntɔn Jehovah tɔn bo kplɔ́n bo yí wǎn n’i. (Ðɛh. 73:28) Ði kpɔ́ndéwú ɔ, a ka mɔ nukɛgbe ɖé ɖò wema nǔkplɔnkplɔn tɔn ɔ, alǒ ɖò wemafɔ ɖé mɛ, b’ɛ xlɛ́ nǔɖe dó wanyiyi Jehovah tɔn, nǔnywɛ tɔn, hwɛjijɔ tɔn, alǒ hlɔnhlɔn tɔn wu, bo dɔn we à? Ðɔ nǔ mɔ̌hun nú nǔkplɔntɔ́ towe, bo bló bonu é ni tuùn ɖɔ nǔ enɛ nyí ɖokpo ɖò hwɛjijɔ tootobu e wu a yí wǎn nú Tɔ́ mǐtɔn jixwé tɔn ɔ é mɛ. Nǔ ɖevo tíìn bɔ Biblu kplɔntɔ́ lɛ bǐ ɖó na wà bo na dó yì nukɔn bo bló baptɛm.

14. Etɛ Eblée lɛ 10:24, 25 ka ɖɔ dó kplé agun tɔn lɛ wu, b’ɛ sixu d’alɔ nǔkplɔntɔ́ ɖé b’ɛ na yì nukɔn?

¹⁴ Mǐ mɛ bǐ wɛ nɔ jló ɖɔ nǔkplɔntɔ́ mǐtɔn lɛ ni yì nukɔn bo bló baptɛm. Ali taji e nu mǐ sixu d’alɔ ye ɖè é ɖokpo wɛ nyí gbɔn  wusyɛn didó lanmɛ nú ye ɖɔ ye ni nɔ wá kplé agun tɔn lɛ gblamɛ. Nǔkplɔnmɛtɔ́ e ko mɔ nǔ kpɔ́n lɛ é ɖɔ ɖɔ nǔkplɔntɔ́ e nɔ yawǔ jɛ kplé lɛ wá jí é nɔ yawǔ yì nukɔn. (Ðɛh. 111:1) Nǔkplɔnmɛtɔ́ ɖé lɛ tinmɛ nú nǔkplɔntɔ́ yetɔn lɛ ɖɔ nǔ gegě tíìn bɔ ye na kplɔ́n ɖò kplé lɛ jí bɔ ye kún ka na kplɔ́n ɖò nǔkplɔnkplɔn yetɔn hwenu ó. Xà Eblée lɛ 10:24, 25 xá nǔkplɔntɔ́ towe, bo tinmɛ nǔ e wu é nyɔ́ ɖɔ é ni nɔ wá kplé lɛ é n’i. Xò video Nɛ̌ Nǔ lɛ ka Nɔ Yì Gbɔn Ðò Kpléxɔ Axɔ́suɖuto ɔ Tɔn ɖé Mɛ? ɔ n’i. * D’alɔ nǔkplɔntɔ́ towe bonu é ni kánɖeji bo na nɔ yì kplé lɛ bǐ.

15. Etɛ mǐ ka sixu wà dó dó wusyɛn lanmɛ nú nǔkplɔntɔ́ ɖé b’ɛ na nɔ yì kplé lɛ ɖò gbesisɔmɛ?

¹⁵ Enyi nǔkplɔntɔ́ towe ma ko wá kplé kpɔ́n ǎ, alǒ ma nɔ wá ɖò gbesisɔmɛ ǎ ɔ, etɛ a ka sixu wà? Mǎ nǔ e a kplɔ́n ɖò kplé agaɖanu tɔn ɖé jí é xá ɛ kpo akpakpa sɔ́ mɛ kpo. Enyi é mɔ lee nǔ cí nú we dó kplé ɔ wu é ɔ, é sixu jló na wá. Nǎ ɛ Atɔxwɛ alǒ Kplé Gbɛzán kpo Sinsɛnzɔ́ kpo Tɔn Sín Azɔ̌wema ee zán wɛ è ɖè ɖò alɔnu dìn ɖò kplé jí é. Xlɛ́ ɛ nǔ e jí na ɖɔ xó dó wɛ è ɖè ɖò kplé e na bɔ d’ewu é jí lɛ é, bo kan akpáxwé e dɔn ɛ hugǎn ɖ’emɛ é byɔ ɛ. Nǔ e nǔkplɔntɔ́ towe mɔ bo sè ɖò kplé nukɔntɔn e é wá é jí é na sɔ́ akpakpa ɛ tawun hugǎn nǔ ɖebǔ e é ko mɔ kpɔ́n ɖò sinsɛn sín kplé ɖevo lɛ jí é. (1 Kɔ. 14:24, 25) É na xò gò mɛ ɖevo ɖěɖee ɖó kpɔ́ndéwú ɖagbe b’ɛ sixu xwedó, b’ɛ na d’alɔ ɛ b’ɛ na yì nukɔn bo na bló baptɛm lɛ é.

16. Etɛ è ka ɖó na wà dó d’alɔ nǔkplɔntɔ́ lɛ bɔ ye na yì nukɔn bo bló baptɛm? Etɛ mǐ ka na kplɔ́n ɖò xóta e bɔ d’ewu é mɛ?

¹⁶ Nɛ̌ mǐ ka sixu d’alɔ Biblu kplɔntɔ́ lɛ bɔ ye na yì nukɔn bo bló baptɛm gbɔn? Gbɔn wusyɛn didó lanmɛ nú nǔkplɔntɔ́ lɛ bonu ye na nɔ kplɔ́n nǔ ɖò aklunɔzán gbla lɛ bǐ mɛ, lobo lɛ́ sɔnǔ nú nǔkplɔnkplɔn ɖokpo ɖokpo gblamɛ ɔ, mǐ sixu d’alɔ nǔkplɔntɔ́ ɖokpo ɖokpo bɔ é na nɔ wlíbo nú nǔkplɔnkplɔn ɔ. Mǐ lɛ́ jló na dó wusyɛn lanmɛ n’i bonu é na nɔ ɖɔ xó ɖó kpɔ́ xá Jehovah gbè bǐ gbè, lobo lɛ́ sɔnǔ nú kancica mɛɖesunɔ tɔn ɖé xá ɛ. Mǐ jló na bló bɔ akpakpa na nɔ sɔ́ nǔkplɔntɔ́ ɔ dó kplé lɛ yiyi wu. (Kpɔ́n gbǎví “ Nǔ E Nǔkplɔntɔ́ ɖé Ðó Na Bló Bo Na Yì Nukɔn Bo Na Bló Baptɛm lɛ É” ɖò wexwɛ 12gɔ́ ɔ jí.) Amɔ̌, lee xóta e bɔ d’ewu é na tinmɛ gbɔn é ɔ, nǔ atɔ́ɔ́n ɖevo lɛ́ tíìn bɔ Biblu kplɔnmɛtɔ́ lɛ sixu bló dó d’alɔ nǔkplɔntɔ́ lɛ bɔ ye na yì nukɔn bo bló baptɛm.