1. Nɛ̌ mǐ ka wà gbɔn bo tuùn ɖɔ azɔ̌ gbɛhwlɛngán tɔn ɖé wɛ nǔ kplɔnkplɔn mɛ lɛ bonu ye na huzu ahwanvu sín azɔ̌ ɔ nyí?

AZƆ̌ gbɛhwlɛngán tɔn ɖé wɛ nǔkplɔnkplɔn mɛ lɛ bonu ye na huzu ahwanvu sín azɔ̌ ɔ nyí. Nɛ̌ mǐ ka wà gbɔn bo tuùn mɔ̌? Hwenu e Jezu ɖegbe e ɖò Matie 28:19, 20 mɛ é ɔ, é ɖɔ: ‘Mi yì bo kplɔ́n nǔ mɛ lɛ bǐ, bonu ye ni huzu ahwanvu ce, bo bló baptɛm nú ye.’ Nɛ̌ baptɛm blobló ka ɖò taji sɔ? Mɛ ɖěɖee ɖò hwlɛngán ba wɛ lɛ é ɖó na wà mɔ̌. Mɛ ɖěɖee jló na bló baptɛm lɛ é ɖó na ɖi nǔ ɖɔ nǔ ɖokpo e wu ye na gán é wɛ nyí kú e Jezu kú, bo fɔ́n é. Nǔ e wu mɛsɛ́dó Piyɛ́ɛ ɖɔ xó elɔ lɛ nú Klisanwun hatɔ́ tɔn lɛ é nɛ: ‘Baptɛm, ɖò mi lɔ hwlɛngán wɛ dìn gbɔn fínfɔ́n sín kú Jezu Klisu tɔn gblamɛ.’ (1 Pi. 3:21, nwt) Enɛ wu ɔ, nú mɛɖé bló baptɛm, bo huzu ahwanvu yɔyɔ̌ ɔ, é nɔ wlí hwlɛngánli ɔ.

2. Nǔkplɔnmɛtɔ́ alɔkpa tɛ 2 Timɔtée 4:1, 2 ka ɖɔ mǐ ɖó na nyí?

² Nú mǐ na kplɔ́n nǔ mɛ lɛ bonu ye na huzu ahwanvu ɔ, mǐ ɖó na bló bɔ “nǔwukpíkpé mɛkplɔnkplɔn tɔn” mǐtɔn na kpɔ́n te. (Xà 2 Timɔtée 4:1, 2, nwt.) Aniwu? Ðó Jezu ɖegbe ɖɔ: ‘Mi yì bo kplɔ́n nǔ mɛ lɛ bǐ, bonu ye ni huzu ahwanvu ce.’ Mɛsɛ́dó Pɔlu ɖɔ ɖɔ a ni “ɖǒkan dó” azɔ̌ enɛ wu, “ɖó nú a ɖò nǔ wà gbɔn mɔ̌ wɛ ɔ, a na hwlɛn hwiɖée gán, bo na hwlɛn mɛ e ɖò tó ɖó we wɛ lɛ bǐ gán.” Enɛ wu wɛ Pɔlu wá ɖɔ: “Hɛn ayixa dó . . . nǔ e kplɔ́n mɛ wɛ a ɖè ɔ wu.” (1 Tim. 4:16) Ðó mǐ ɖó na kplɔ́n nǔ mɛ lɛ hwɛ̌ cobɔ ye na huzu ahwanvu wutu ɔ, mǐ ɖó na kplɔ́n nǔ ye ɖò ali e nyɔ́ hugǎn é nu.

3. Etɛ jí mǐ ka na ɖɔ xó dó ɖò xóta elɔ mɛ?

³ Hwɛhwɛ wɛ mǐ nɔ kplɔ́n nǔgbo e ɖò Biblu mɛ lɛ é gbɛtɔ́ livi  mɔ̌kpan. Amɔ̌, lee mǐ ɖɔ gbɔn ɖò xóta e wá yì é mɛ é ɔ, mǐ ba na tuùn lee mǐ sixu d’alɔ ye mɛ gegě bɔ ye na bló baptɛm bo huzu ahwanvu Jezu Klisu tɔn gbɔn é. Ðò xóta elɔ mɛ ɔ, mǐ na gbéjé nǔ e nǔkplɔnmɛtɔ́ lɛ bǐ ɖó na wà, dó d’alɔ nǔkplɔntɔ́ ɖé bɔ é na yì nukɔn bo bló baptɛm é atɔ́ɔ́n kpɔ́n.

4. Etɛwu nǔkplɔnmɛtɔ́ ɖé ka ɖó na ɖu ɖò éɖée jí hwenu e é ɖò nǔ kplɔ́n mɛ wɛ é? (Lɛ̌ kpɔ́n tinmɛ e ɖò dò é.)

⁴ Mǐ yí wǎn nú nǔ e ɖò Mawuxówema ɔ mɛ bɔ mǐ nɔ kplɔ́n mɛ lɛ é. Enɛ wu ɔ, mǐ sixu ba na ɖɔ xó gegě dó nǔ enɛ lɛ wu. É ɖò mɔ̌ có, enyi mǐ ɖò nukún kpé dó Atɔxwɛ Kplɔnkplɔn alǒ Biblu Kplɔnkplɔn Agun tɔn ɖé wu wɛ, abǐ mǐ ɖò Biblu kplɔ́n xá mɛ lɛ wɛ ɔ, mǐ ɖó na nɔ ɖɔ xó dín ǎ. Bonu nǔkplɔnmɛtɔ́ ɖé na zán Biblu ganji ɖò nǔkplɔnkplɔn ɖé hwenu ɔ, é ɖó na ɖu ɖò éɖée jí, bo na tɛ́n kpɔ́n, bo na tinmɛ nǔ e é tuùn dó wemafɔ ɖé alǒ xóta ɖé wu é bǐ ǎ. * (Jaan 16:12) Nɔ jlɛ́ nukúnnúmɔjɛnǔmɛ e a ɖó dó Biblu wu hwenu a bló baptɛm é dó ee a ɖó dìn é wu. Bɔya, nǔkplɔnmɛ nukɔn nukɔntɔn lɛ kɛɖɛ wɛ a tuùn hwenu e a bló baptɛm é. (Ebl. 6:1) É byɔ xwè gegě ɖò así towe cobɔ a kplɔ́n nǔ e a tuùn dìn lɛ é, enɛ wu ɔ, ma tɛ́n kpɔ́n bo kplɔ́n nǔ lɛ bǐ zɛɛn nǔkplɔntɔ́ yɔyɔ̌ ɖé ó.

5. (a) Sɔgbe xá 1 Tɛsalonikinu lɛ 2:13 ɔ, etɛ mǐ ka ba ɖɔ nǔkplɔntɔ́ mǐtɔn ni tuùn dó nǔ e kplɔ́n wɛ é ɖè é wu? (b) Nɛ̌ mǐ ka sixu dó wusyɛn lanmɛ nú nǔkplɔntɔ́ ɖé bɔ é na nɔ ɖɔ xó dó nǔ e kplɔ́n wɛ é ɖè lɛ é wu gbɔn?

⁵ Mǐ ba ɖɔ nǔkplɔntɔ́ mǐtɔn ni mɔ nǔ jɛ wu ɖɔ Biblu mɛ wɛ nǔ e kplɔ́n wɛ é ɖè é gosin. (Xà 1 Tɛsalonikinu lɛ 2:13.) Nɛ̌ mǐ ka sixu wà mɔ̌ gbɔn? Dǒ wusyɛn lanmɛ nú nǔkplɔntɔ́ towe ɖɔ é ni nɔ ɖɔ xó dó nǔ e kplɔ́n wɛ é ɖè é wu. Ma nɔ tinmɛ wemafɔ lɛ n’i hwebǐnu ó, é nyɔ́ wà hǔn, nɔ byɔ ɛ ɖɔ é ni tinmɛ ɖé lɛ nú emi. D’alɔ ɛ bonu é ni tuùn lee Xó Mawu tɔn kan éɖesunɔ gbɔn é. Kan nǔ e na d’alɔ ɛ bɔ é na ɖɔ nǔ e é lin dó wemafɔ e é xà lɛ é wu é kpo lee nǔ cí n’i dó ye wu é kpo lɛ é byɔ ɛ. (Luk. 10:25-28) Ði kpɔ́ndéwú ɔ, a sixu kanbyɔ ɛ ɖɔ: “Nɛ̌ wemafɔ elɔ ka d’alɔ we bɔ a ɖ’ayi jijɔ Jehovah tɔn lɛ ɖokpo wu gbɔn?” “Nɛ̌ nǔgbo Biblu tɔn enɛ ka sixu hɛn lè wá nú we gbɔn?” “Nɛ̌ nǔ ka cí nú we dó nǔ e a kplɔ́n zaanɖé dìn é wu?” (Nǔx. 20:5) Nǔ taji ɔ wɛ nyí lě dò nǔkplɔntɔ́ ɔ tuùn nǔ sɔ é ǎ, loɔ, lě dò é yí wǎn nú nǔ e é tuùn lɛ é bo zán ye sɔ é wɛ ɖò taji.

6. Etɛwu é ka nyɔ́ ɖɔ mǐ ɖó na nɔ byɔ wɛnjlatɔ́ e nyɔ́ nǔ kplɔ́n mɛ ganji é ɖé ɖɔ é ni wá kplá mǐ yì Biblu kplɔnkplɔn ɖé domɛ?

⁶ A ka ko byɔ wɛnjlatɔ́ ɖěɖee nyɔ́ nǔ kplɔ́n mɛ ganji lɛ é ɖɔ ye ni kplá we yì Biblu  kplɔnkplɔn ɖé domɛ kpɔ́n à? Enyi a nɔ wà mɔ̌ ɔ, a sixu kan nǔ e wu ye ɖ’ayi ɖò lee a kpé nukún dó nǔkplɔnkplɔn ɔ wu gbɔn é kpo lee a zán Biblu ɖò nǔkplɔnkplɔn ɔ hwenu gbɔn é kpo mɛ é byɔ ye. Enyi a ba ɖɔ nǔwukpíkpé mɛkplɔnkplɔn tɔn towe ni kpɔ́n te d’eji ɔ, a ɖó na nɔ sɔ́ hwiɖée hwe. (Sɔ́ jlɛ́ dó Mɛsɛ́dó 18:24-26 wu.) Enɛ gudo hǔn, kanbyɔ wɛnjlatɔ́ ɖokpo ɔ ɖɔ é ka lin ɖɔ nǔkplɔntɔ́ ɔ mɔ nǔ jɛ nǔ e kplɔ́n wɛ é ɖè é mɛ à jí. Enyi é ján we, bɔ a ma sixu kplɔ́n Biblu xá nǔkplɔntɔ́ ɔ ǎ nú aklunɔzán gbla ɖokpo alǒ hú mɔ̌ ɔ, a sixu lɛ́ byɔ wɛnjlatɔ́ ɖokpo ɔ ɖɔ é ni kpé nukún dó nǔkplɔnkplɔn ɔ wu nú emi. Enɛ na zɔ́n bɔ nǔkplɔnkplɔn ɔ na nɔ sún aɖǔ ǎ, bo na lɛ́ xlɛ́ nǔkplɔntɔ́ ɔ lě dò nǔkplɔnkplɔn ɔ ɖò taji sɔ é. Ma lin gbeɖé ɖɔ Biblu kplɔnkplɔn “cɛ” wɛ, bɔ mɛ ɖevo ɖebǔ kún sixu kpé nukún d’ewu ó ó. È na ɖɔ ɔ, nǔ ɖagbe hugǎn ɔ ba nú nǔkplɔntɔ́ towe wɛ a ɖè, bonu é na sixu kpò ɖò nukɔn yì wɛ ɖò nǔgbo ɔ kplɔnkplɔn mɛ.

7. Etɛ ka sixu d’alɔ nǔkplɔntɔ́ ɖé, bɔ akpakpa na nɔ sɔ́ ɛ dó nǔ e kplɔ́n wɛ é ɖè é wu?

⁷ Nǔkplɔntɔ́ ɖé ɖó na ɖ’ayi lee akpakpa nɔ sɔ́ we dó nǔgbo e ɖò Biblu mɛ lɛ é wu gbɔn é kpo kú e a nɔ kú dó nǔgbo enɛ lɛ jí é kpo wu. (1 Tɛ. 1:5) Enɛ ɔ, akpakpa na ɖibla sɔ́ ɛ hugǎn dó nǔ e kplɔ́n wɛ é ɖè é wu. Enyi é nyɔ́ bló hǔn, ɖɔ lee gbɛzinzan sɔgbe xá nǔgbododó Biblu tɔn lɛ d’alɔ hwiɖesunɔ gbɔn é n’i. Mɔ̌ mɛ ɔ, é na mɔ ɖɔ Biblu sixu d’alɔ emi lɔ.

8. Nǔ ɖevo tɛ a ka sixu wà dó d’alɔ Biblu kplɔntɔ́ towe? Tɛwu a ka ɖó na wà mɔ̌?

⁸ Nú a ɖò nǔ kplɔ́n xá nǔkplɔntɔ́ towe wɛ hǔn, nɔ na kpɔ́ndéwú mɛ ɖěɖee mɔ wuvɛ̌ ɖokpo ɔ éɖɔhun, bo ka ɖu ɖ’eji lɛ é tɔn ɛ. A sixu ɖɔ nú mɛ e ɖò agun ɔ mɛ bɔ kpɔ́ndéwú tɔn sixu d’alɔ nǔkplɔntɔ́ ɔ é ɖé ɖɔ é ni gɔ́ nú we ɖò nǔkplɔnkplɔn ɔ hwenu. Alǒ, a sixu mɔ kpɔ́ndéwú e nɔ dó wusyɛn lanmɛ nú mɛ lɛ é ɖò xóta ɖebɔdoɖewu “Biblu Nɔ Huzu Gbɛzán Mɛtɔn” e ɖò jw.org jí é glɔ́. * Xóta enɛ lɛ kpo video enɛ lɛ kpo na d’alɔ nǔkplɔntɔ́ towe bɔ é na mɔ ɖɔ Biblu sixu d’alɔ emi bɔ emi na bló huzuhuzu lɛ ɖò gbɛzán emitɔn mɛ.

9. Nɛ̌ a ka sixu dó wusyɛn lanmɛ nú Biblu kplɔntɔ́ ɖé, b’ɛ na má nǔ e kplɔ́n wɛ é ɖè lɛ é xá xwédo tɔn kpo xɔ́ntɔn tɔn lɛ kpo gbɔn?

⁹ Enyi nǔkplɔntɔ́ ɔ d’asú alǒ d’asì wɛ nyí ɔ, mɛ e é da é lɔ ka ɖò nǔ kplɔ́n wɛ à? Enyi é ma ko ɖ’ewu ǎ hǔn, byɔ̌ ɛ ɖɔ é ni wá gɔ́ nú mi.  Dǒ wusyɛn lanmɛ nú nǔkplɔntɔ́ towe ɖɔ é ni má nǔ e kplɔ́n wɛ é ɖè lɛ é xá xwédo tɔn kpo xɔ́ntɔn tɔn lɛ kpo. (Jaan 1:40-45) Gbɔn nɛ̌ é? A sixu kanbyɔ ɛ kpowun ɖɔ: “Nɛ̌ a ka na tín nǔgbo enɛ mɛ nú xwédo towe gbɔn?” “Wemafɔ tɛ a ka na zán dó ɖè enɛ xlɛ́ xɔ́ntɔn towe?” Mɔ̌ mɛ ɔ, azɔ̌ kplɔ́n nǔkplɔntɔ́ towe wɛ a ɖè bɔ é na huzu nǔkplɔnmɛtɔ́ ɖé nɛ. Enɛ gudo ɔ, enyi é jɛxa ɔ, é sixu jɛ wɛn jlá jí xá agun ɔ. A sixu kanbyɔ nǔkplɔntɔ́ towe ɖɔ é ka tuùn mɛɖé b’ɛ jló na kplɔ́n Biblu à jí. Enyi é ɖɔ “ɛɛn” hǔn, yawǔ ylɔ́ mɛ ɔ, bo xwlé è Biblu kplɔnkplɔn ɖé. Xlɛ́ ɛ video Nɛ̌ Biblu Kpinkplɔn ɖé ka Nɔ Nyí Gbɔn? ɔ. *

10. Lee 1 Tɛsalonikinu lɛ 2:7, 8 ɖɔ gbɔn é ɔ, nɛ̌ nǔkplɔnmɛtɔ́ ɔ ka sixu nɔ wà nǔ mɛsɛ́dó Pɔlu ɖɔhun gbɔn?

¹⁰ Nǔkplɔnmɛtɔ́ lɛ ɖó na nɔ ɖexlɛ́ nǔkplɔntɔ́ yetɔn lɛ ɖɔ nǔ yetɔn nɔ ɖu ayi mɛ nú emi tawun. Ye ɖó na nɔ kpɔ́n ye dó mɔ nɔví gbigbɔ tɔn sɔ tɔn yetɔn lɛ. (Xà 1 Tɛsalonikinu lɛ 2:7, 8.) Xɔ́ntɔn e ye zun ɖò gbɛ̀ ɔ mɛ lɛ é jijodó kpo huzuhuzu e ɖò dandan lɛ é bǐ blobló bá dó sɛn Jehovah kpo nɔ bɔwǔ nú ye ǎ. Mǐ ɖó na d’alɔ ye bɔ ye na zun xɔ́ntɔn jɔ xɔ́ntɔn lɛ ɖò agun ɔ mɛ. Ma nɔ zán hwenu ɖó kpɔ́ xá nǔkplɔntɔ́ towe ɖò nǔkplɔnkplɔn ɔ hwenu kɛɖɛ ó, loɔ, nɔ lɛ́ zán hwenu xá ɛ ɖò ninɔmɛ ɖevo lɛ mɛ, enɛ ɔ, mi na vɛ́ hugǎn. Nɔ ylɔ́ ɛ ɖò alokan jí, nɔ wlán nǔ sɛ́dó è, alǒ nɔ yì ba ɛ kpɔ́n ɖò azǎn ɖevo lɛ jí bonu é ma nyí azǎn e gbè mi nɔ kplɔ́n nǔ lɛ é kɛɖɛ ó, enɛ ɔ, a na ɖexlɛ́ ɛ ɖɔ nǔ tɔn nɔ ɖu ayi mɛ nú we tawun.

11. Etɛ mǐ ka ba ɖɔ nǔkplɔntɔ́ mǐtɔn lɛ ni mɔ ɖò agun ɔ mɛ? Aniwu?

¹¹ Lǒ ɖé ɖɔ: “Tò wɛ nɔ kplɔ́n vǐ.” Mǐ sixu ɖɔ: “Agun ɖé blebu wɛ nɔ bló bɔ mɛɖé nɔ huzu ahwanvu.” Nǔ e wu mɛ ɖěɖee nyɔ́ nǔ kplɔ́n mɛ ganji lɛ é nɔ dó nǔkplɔntɔ́ yetɔn lɛ gesí nú mɛ ɖevo e ɖò agun ɔ mɛ, bo sixu d’alɔ ye bɔ ye na sɛkpɔ́ Jehovah lɛ é nɛ. Mɔ̌ mɛ ɔ, nǔkplɔntɔ́ lɛ sixu nɔ ɖu vivǐ gbɛ̌didó xá togun Mawu tɔn e sixu d’alɔ ye ɖò gbigbɔ kpo lee nǔ nɔ cí nú ye é kpo lixo é tɔn. Mǐ ba ɖɔ nǔkplɔntɔ́ ɖokpo ɖokpo ni mɔ ɖɔ emi ɖó tɛn ɖé ɖò agun ɔ mɛ, lobo ɖò xwédo gbigbɔ tɔn mǐtɔn mɛ. Mǐ ba ɖɔ wanyiyi e mɛ e ɖò xwédo gbigbɔ tɔn enɛ ɔ mɛ lɛ é nɔ ɖexlɛ́ é ni dɔn nǔkplɔntɔ́ ɖokpo ɖokpo. Enɛ ɔ, é na bɔwǔ nú ye bɔ ye na ɖó gbɛ̌didó xá mɛ ɖěɖee ma na d’alɔ ye bɔ ye na yí wǎn nú Jehovah ǎ lɛ é te. (Nǔx. 13:20) Enyi xɔ́ntɔn yetɔn xóxó lɛ jó ye dó ɔ, ye na tuùn ɖɔ emi sixu mɔ xɔ́ntɔn jɔ xɔ́ntɔn lɛ ɖò tutoblonunu Jehovah tɔn mɛ.—Mak. 10:29, 30; 1 Pi. 4:4.

12. Etɛwu mǐ ka ɖó na nɔ ɖɔ xó dó mɛɖée zízé jó nú Jehovah kpo baptɛm kpo jí nú nǔkplɔntɔ́ mǐtɔn?

¹² Nɔ ɖɔ xó dó mɛɖée zízé jó nú Jehovah kpo baptɛm kpo jí nyi wɛn. È na ɖɔ ɔ, nǔ e gbé nya wɛ mǐ ɖè bo nɔ ɖò nǔ kplɔ́n xá mɛɖé wɛ é wɛ nyí ɖɔ mǐ na d’alɔ mɛ ɔ, bɔ é na bló baptɛm bo huzu ahwanvu. Enyi è kplɔ́n Biblu xá mɛɖé ɖò gbesisɔmɛ nú sun yɔywɛ ɖé, bɔ ɖò taji ɔ, é jɛ kplé lɛ yì jí ɔ, mɛ ɔ ɖó na mɔ nǔ jɛ mɛ ɖɔ nǔ e wu è ɖò nǔ kplɔ́n ɛ wɛ é wɛ nyí ɖɔ è na d’alɔ ɛ bɔ é na jɛ Jehovah sɛn jí, bo huzu Kúnnuɖetɔ́ Tɔn.

13. Etɛ lɛ nǔkplɔntɔ́ ɖé ka ɖó na wà cobo na sixu kpéwú bo bló baptɛm?

¹³ Kpɛɖé kpɛɖé ɔ, nǔkplɔntɔ́ e wlíbo nú nǔkplɔnkplɔn ganji é sixu wá kpéwú bo bló baptɛm. Nukɔntɔn ɔ, nǔkplɔntɔ́ ɔ ɖó na tuùn Jehovah, yí wǎn n’i, lobo lɛ́ ɖi nǔ n’i. (Jaan 3:16; 17:3) Enɛ ɔ, nǔkplɔntɔ́ ɔ nɔ huzu xɔ́ntɔn Jehovah kpo mɛ e ɖò agun ɔ mɛ lɛ é kpo tɔn. (Ebl. 10:24, 25; Ja. 4:8) Wǎgbɔ tɔn ɔ, nǔkplɔntɔ́ ɔ nɔ jó nǔwalɔ tɔn nyanya lɛ dó, bo nɔ lɛkɔ sín hwɛ tɔn lɛ gudo. (Mɛ. 3:19) Hwenu ɖò yiyi wɛ ɔ, nǔɖiɖi tɔn nɔ wá sísɛ́ ɛ, bɔ é nɔ má nǔgbo ɔ xá mɛ ɖevo lɛ. (2 Kɔ. 4:13) Enɛ gudo ɔ, é nɔ zé éɖée jó nú Jehovah, bo nɔ bló baptɛm. (1 Pi. 3:21, nwt; 1 Pi. 4:2) Azǎn awǎjijɛ tɔn ɖé wɛ é nɔ nyí nú mɛ bǐ! Enyi nǔkplɔntɔ́ ɖé ɖò nǔ ɖěɖee é ɖó na wà cobo bló baptɛm lɛ é wà wɛ hǔn, nɔ kpa ɛ bo nɔ dó wusyɛn lanmɛ n’i ɖɔ é ni kpò ɖò nǔ enɛ lɛ wà wɛ.

14. Nɛ̌ nǔkplɔnmɛtɔ́ ɖé ka sixu da nukɔnyiyi nǔkplɔntɔ́ ɖé tɔn kpɔ́n gbɔn?

¹⁴ Mǐ ɖó na ɖó suúlu hwenu e mǐ ɖò alɔ dó nǔkplɔntɔ́ ɖé wɛ b’ɛ na yì nukɔn bo zé éɖée jó nú Jehovah bo bló baptɛm é. Amɔ̌, mǐ ɖó na lɛ́ tuùn nú é ba na sɛn Jehovah Mawu, alǒ gbɔ à jí. Nǔkplɔntɔ́ ɔ ka nɔ xlɛ́ ɖɔ emi ɖò tintɛnkpɔn wɛ bo nɔ setónú nú gbeɖiɖe Jezu tɔn lɛ à? Alǒ, é jló na kplɔ́n nǔgbo e ɖò Biblu mɛ lɛ é kpowun wɛ?

15. Etɛ lɛ ka na xlɛ́ nǔkplɔnmɛtɔ́ ɔ ɖɔ nǔkplɔntɔ́ ɔ ko ɖò gbesisɔmɛ bá bló baptɛm?

¹⁵ Nɔ da lee yì nukɔn gbɔn wɛ nǔkplɔntɔ́ ɖé ɖè é kpɔ́n hwɛhwɛ. Ði kpɔ́ndéwú ɔ, é ka nɔ ɖè lee nǔ cí n’i dó Jehovah wu é xlɛ́ à? É ka nɔ xoɖɛ sɛ́dó Jehovah à? (Ðɛh. 116:1, 2) É ka nɔ xà Biblu à? (Ðɛh. 119:97) É ka nɔ yì kplé lɛ hwɛhwɛ à? (Ðɛh. 22:23) É ka bló huzuhuzu e ɖò dandan lɛ é ɖò gbɛzán tɔn mɛ à? (Ðɛh. 119:112) É ka ko jɛ nǔ e kplɔ́n wɛ  é ɖè lɛ é má xá xwédo tɔn kpo xɔ́ntɔn tɔn lɛ kpo jí à? (Ðɛh. 9:2) Taji hú bǐ ɔ, é ka jló bo na huzu Kúnnuɖetɔ́ Jehovah tɔn à? (Ðɛh. 40:9) Enyi nǔkplɔntɔ́ ɔ ma ɖò nukɔn yì wɛ ɖò ali enɛ lɛ ɖebǔ nu ǎ ɔ, ɖ’ayi te bo ba dò nú nǔ e wu wɛ é, bo wá ɖɔ xó d’eji xá ɛ kpo xomɛnyínyɔ́ kpo, ma ka gbá nǔ n’i ó. *

16. Etɛ lɛ ka sixu xlɛ́ ɖɔ è ɖó na ɖó Biblu kplɔnkplɔn ɖé te?

¹⁶ Nɔ kanbyɔ hwiɖée hwɛhwɛ ɖɔ un ka ɖó na kpò ɖò nǔ kplɔ́n xá mɛ lě lě wɛ à jí. Kanbyɔ hwiɖée ɖɔ: ‘Nǔkplɔntɔ́ ɔ ka nɔ sɔnǔ nú nǔkplɔnkplɔn ɔ ǎ wɛ à? É nɔ jló na wá kplé lɛ ǎ wɛ à? Jijɔ nyanya lɛ lɛ́ kpò ɖò fɛn tɔn nu wɛ à? É lɛ́ kpò ɖò sinsɛn nǔvú mɛ wɛ à? Enyi ɛɛn wɛ nyí xósin lɛ ɔ, kan gbigbɛ́ dó nǔ kplɔnkplɔn xá mɛ mɔ̌hun nu na cí tintɛnkpɔn bo kplɔ́n lee è nɔ lin tɔ̀ gbɔn é mɛ e ma ba ǎ é ɖé ɖɔhun. Enyi nǔkplɔntɔ́ ɔ ma yí wǎn nú nǔ e kplɔ́n wɛ é ɖè lɛ é nǔgbo nǔgbo, bo ba na bló huzuhuzu lɛ ǎ ɔ, etɛwu è ka na kpò ɖò nǔ kplɔ́n xá ɛ wɛ?

17. Sɔgbe xá 1 Timɔtée 4:16 ɔ, etɛ nǔkplɔnmɛtɔ́ lɛ bǐ ka ɖó na wà?

¹⁷ Mǐ nɔ ylɔ́ nǔ kplɔnkplɔn mɛ lɛ bonu ye na huzu ahwanvu sín azɔ̌ ɔ ɖɔ nǔjɔnǔ, bo nɔ ba na d’alɔ nǔkplɔntɔ́ mǐtɔn lɛ bɔ ye na yì nukɔn bo bló baptɛm. Enɛ wu wɛ mǐ na nɔ zán Biblu dó kplɔ́n nǔ mɛ, bo na nɔ lɛ́ kplɔ́n nǔ mɛ kpo akpakpa sɔ́ mɛ kpo, lobo na nɔ kú dó nǔ jí. Mǐ na nɔ dó wusyɛn lanmɛ nú nǔkplɔntɔ́ ɔ ɖɔ é ni zun xɔ́ntɔn lɛ ɖò agun ɔ mɛ. Gɔ́ na ɔ, mǐ na nɔ ɖɔ xó dó mɛɖée zízé jó nú Jehovah kpo baptɛm kpo jí nú nǔkplɔntɔ́ ɔ, bo na nɔ lɛ́ da nukɔnyiyi tɔn kpɔ́n hwɛhwɛ. (Kpɔ́n gbǎví “ Nǔ E Nǔkplɔnmɛtɔ́ lɛ Ðó Na Wà Bo Na D’alɔ Nǔkplɔntɔ́ lɛ Bɔ Ye Na Yì Nukɔn Bo Bló Baptɛm lɛ É” ɖò wexwɛ 13gɔ́ ɔ jí.) É víví nú mǐ ɖɔ mǐ sixu ɖ’alɔ ɖò azɔ̌ gbɛhwlɛngán tɔn enɛ mɛ! Mi nú mǐ ni kánɖeji bá wà nǔ e wu mǐ kpé é bǐ dó d’alɔ Biblu kplɔntɔ́ mǐtɔn lɛ bonu ye na jɛxa bo na bló baptɛm.