1. Gbeta ɖagbe hugǎn tɛ kɔn mɛɖé ka sixu wá?

HWƐHWƐ ɔ, gbeta e kɔn mɛjitɔ́ lɛ nɔ wá lɛ é nɔ kúnkplá gbɛzán vǐ yetɔn lɛ tɔn nú hwenu línlín. Nú mɛjitɔ́ lɛ wá gbeta e nǔnywɛ ma kpé ǎ lɛ é kɔn ɔ, ye sixu dɔn tagba wá nú vǐ yetɔn lɛ. Amɔ̌, nú ye wá gbeta e nǔnywɛ kpé lɛ é kɔn ɔ, ye nɔ bló bɔ vǐ yetɔn lɛ nɔ ɖó awǎjijɛ kpo gbɛzán e ɖó nu é kpo. É ɖò mɔ̌ có, vǐ lɛ lɔ ɖó na wá gbeta ɖagbe lɛ kɔn. Gbeta ɖagbe hugǎn e kɔn mɛɖé sixu wá é wɛ nyí ɖɔ é ni sɛn Tɔ́ mǐtɔn jixwé tɔn wanyiyinɔ ɔ, Jehovah.—Ðɛh. 73:28.

2. Gbeta ɖagbe tɛ lɛ kɔn Jezu kpo mɛjitɔ́ tɔn lɛ kpo ka wá?

² Mɛjitɔ́ Jezu tɔn lɛ kánɖeji bo na d’alɔ vǐ yetɔn lɛ bɔ ye na sɛn Jehovah, bɔ gbeta e kɔn ye wá lɛ é xlɛ́ ɖɔ Jehovah sinsɛn wɛ ɖò taji hugǎn ɖò gbɛzán yetɔn mɛ. (Luk. 2:40, 41, 52) Jezu lɔ wá gbeta ɖagbe lɛ kɔn, b’ɛ d’alɔ ɛ bɔ é wà nǔ e Jehovah ba ɖɔ é ni wá é. (Mat. 4:1-10) Jezu wá huzu nya xomɛnyɔtɔ́, gbejinɔtɔ́ kpo akɔ́nkpantɔ́ ɖé kpo. Enyi mɛjitɔ́ e yí wǎn nú Jehovah lɛ é ɖó vǐ Jezu ɖɔhun ɖé ɔ, ye bǐ wɛ na gó bo na lɛ́ ɖó awǎjijɛ ɖó enɛ wu.

3. Nǔkanbyɔ tɛ lɛ sín xósin mǐ ka na mɔ ɖò xóta elɔ mɛ?

³ Ðò xóta elɔ mɛ ɔ, mǐ na gbéjé nǔkanbyɔ elɔ lɛ kpɔ́n: Gbeta ɖagbe tɛ lɛ kɔn Jehovah ka wá dó Jezu wu? Etɛ gbeta e kɔn Jozɛfu kpo Mali kpo wá lɛ é ka sixu kplɔ́n mɛjitɔ́ Klisanwun lɛ? Etɛ gbeta e kɔn Jezu wá lɛ é ka sixu kplɔ́n Klisanwun winnyawinnya lɛ?

4. Gbeta taji tɛ kɔn Jehovah ka wá b’ɛ kúnkplá Vǐ tɔn?

⁴ Jehovah na mɛjitɔ́ ɖagbe lɛ Jezu. (Mat. 1:18-23; Luk. 1:26-38) Nǔ e Mali ɖɔ kpo ayi tɔn bǐ kpo bɔ è wlán dó Biblu mɛ  lɛ é xlɛ́ ɖɔ é ɖó wanyiyi e gɔ́ngɔ́n é nú Jehovah kpo Xó tɔn kpo. (Luk. 1:46-55) Gɔ́ na ɔ, ali e nu Jozɛfu xwedó alixlɛ́mɛ Jehovah tɔn ɖè é xlɛ́ ɖɔ é ɖó sísí nú Mawu bo jló na nyɔ́ nukún tɔn mɛ.—Mat. 1:24.

5-6. Etɛ lɛ mɛ Jehovah ka tin bɔ Vǐ tɔn gbɔn?

⁵ D’ayi wu ɖɔ Jehovah kún sɔ́ dɔkunnɔ lɛ bonu ye nyí mɛjitɔ́ nú Jezu ó. Vɔ̌ e Jozɛfu kpo Mali kpo sá hwenu e ye jì Jezu gudo é xlɛ́ ɖɔ ye nyí wamamɔnɔ. (Luk. 2:24) Jozɛfu sixu ko ɖó xwlɛkpatɔ́zɔ́watɛn kpɛví ɖé ɖò xwé tɔn kpá ɖò Nazalɛti. Ye na ko zán gbɛ̀ e bɔkun é, taji ɔ, hwenu e xwédo yetɔn jɛ agba dó jí, bɔ é hwe bǐ ɔ, ye ɖó vǐ tɛnwe é.—Mat. 13:55, 56.

⁶ Jehovah nya xɛ ɖò Jezu jí sín awovínú ɖé lɛ mɛ, amɔ̌, É nya xɛ ɖò jǐ tɔn sín wuvɛ̌ lɛ bǐ mɛ ǎ. (Mat. 2:13-15) Ði kpɔ́ndéwú ɔ, Jezu ɖó hɛ̌nnumɔ e ma ɖi nǔ n’i ǎ lɛ é. Dǒ nukún lee akpɔ na ko ɖó Jezu sɔ, hwenu e mɛ e ɖò xwédo e mɛ é ɖè é lɛ é ma ɖi ɖò bǐbɛ̌mɛ ɖɔ é nyí Mɛsiya ɔ ǎ é mɛ kpɔ́n. (Mak. 3:21; Jaan 7:5) É cí ɖɔ Jezu lɛ́ sè wuvɛ̌, hwenu e tɔ́ ɖò tɔ́ domɛ tɔn Jozɛfu kú é. Kú Jozɛfu tɔn sixu byɔ ɖò Jezu e nyí vǐsunnuɖaxó ɔ é sí ɖɔ é ni yí ajɔ̌ xwédo ɔ tɔn ɖó akɔ́n. (Mak. 6:3) Ee Jezu ɖò susu wɛ é ɔ, é kplɔ́n lee é na kpé nukún dó xwédo e mɛ é ɖè é wu gbɔn é. É cí ɖɔ é ɖó na w’azɔ̌ syɛnsyɛn dó kpé nukún dó ye wu. Enɛ wu ɔ, nú è w’azɔ̌ gudo ɖò kéze ɖokpo ɖokpo mɛ ɔ, lee nǔ nɔ cikɔ nú mɛ gbɔn é ɔ, é tuùn.

7. (a) Nǔkanbyɔ tɛ lɛ ka na d’alɔ asú kpo asì kpo lɛ ɖò mɛjitɔ́zɔ́ yetɔn kɔn? (b) Nɛ̌ Nǔnywɛxó 2:1-6 ka sixu d’alɔ mɛjitɔ́ lɛ bɔ ye na kplɔ́n vǐ yetɔn lɛ gbɔn?

⁷ Nú asú kpo asì kpo wɛ mi nyí bo jló na jì vǐ hǔn, mi kanbyɔ miɖée ɖɔ: ‘Mǐ ka nyí mɛɖéesɔ́hwetɔ́, bo yí wǎn nú Jehovah kpo Xó tɔn kpo à? Jehovah ka na sɔ́ mǐ bɔ mǐ na kpé nukún dó vǐ yɛyɛ̌ e xɔ akwɛ é ɖé wu à?’ (Ðɛh. 127:3, 4) Nú mɛjitɔ́ ɖé wɛ a ko nyí hǔn, kanbyɔ hwiɖée ɖɔ: ‘Un ka nɔ kplɔ́n vǐ ce lɛ ɖɔ nǔ ɖagbe wɛ azɔ̌syɛnsyɛnwiwa nyí à?’ (Nǔt. 3:12, 13) ‘Un ka nɔ wà nǔ e wu un kpé é bǐ dó cyɔn alɔ vǐ ce lɛ jí sín awovínú e ɖò gbɛ̀ Satáan tɔn mɛ lɛ é sí à?’ (Nǔx. 22:3) A sixu cyɔn alɔ vǐ towe lɛ jí sín wuvɛ̌ ɖěɖee ye sixu mɔ lɛ é bǐ sí ǎ. A sixu kpé enɛ wu ǎ. Amɔ̌, kpɛɖé kpɛɖé ɔ, a sixu sɔnǔ nú ye kpo wanyiyi kpo bonu ye na ɖí xwi xá gbɛ̀ mɛ tagba lɛ gbɔn lee ye na nɔ ba wěɖexámɛ lɛ ɖò Xó Mawu tɔn mɛ gbɔn é  kpinkplɔn ye gblamɛ. (Xà Nǔnywɛxó 2:1-6.) Ði kpɔ́ndéwú ɔ, enyi hɛ̌nnumɔ ɖé wá gbeta ɔ kɔn bo jó Jehovah sinsɛn dó hǔn, d’alɔ vǐ towe lɛ bonu ye ni kplɔ́n nǔ e wu é ɖò taji ɖɔ è ni nɔ gbeji nú Jehovah é ɖò Xó Mawu tɔn mɛ. (Ðɛh. 31:24) Alǒ, enyi mɛvívɛ́ ɖé wɛ kú nú mi hǔn, xlɛ́ vǐ towe lɛ lee è nɔ zán Xó Mawu tɔn dó ɖí xwi xá aluwɛ bo nɔ lɛ́ mɔ fífá gbɔn é.—2 Kɔ. 1:3, 4; 2 Tim. 3:16.

8. Sɔgbe xá Sɛ́nflínmɛ 6:6, 7 ɔ, etɛ Jozɛfu kpo Mali kpo ka ɖó na wà?

⁸ Jozɛfu kpo Mali kpo kpéwú bo d’alɔ Jezu bɔ é sù, lobɔ nǔ tɔn nyɔ́ Mawu nukúnmɛ, ɖó ye xwedó alixlɛ́mɛ Jehovah tɔn lɛ. (Xà Sɛ́nflínmɛ 6:6, 7.) Jozɛfu kpo Mali kpo ɖó wanyiyi e gɔ́ngɔ́n é nú Jehovah, bɔ nǔ e gbé ye nya hugǎn é wɛ nyí wusyɛn didó lanmɛ nú vǐ yetɔn lɛ bonu ye lɔ ni sɔnǔ nú wanyiyi mɔ̌hun.

9. Gbeta taji tɛ lɛ kɔn Jozɛfu kpo Mali kpo ka wá?

⁹ Jozɛfu kpo Mali kpo wá gbeta ɔ kɔn, bo na ɖó aca gbigbɔ tɔn ɖagbe ɖé ɖò xwédo mɛ. É ɖò wɛn ɖɔ, ye nɔ yì kplé aklunɔzán gblamɛ tɔn lɛ ɖò kplɔ́ngbasá ɖò Nazalɛti, kaka jɛ Dindinwayixwe xwewu xwewu tɔn ɔ jí ɖò Jeluzalɛmu. (Luk. 2:41; 4:16) Ye sixu ko nɔ gbɔn kpɔ́ e ye nɔ zɔn yì Jeluzalɛmu ɖò xwédo mɛ é sín yɛkan mɛ, bo nɔ kplɔ́n nǔ Jezu kpo nɔví tɔn lɛ kpo dó tan togun Jehovah tɔn tɔn wu, vlafo, bo nɔ ɖò fí ɖěɖee xó è ɖɔ ɖò Mawuxówema ɔ mɛ lɛ é gbɔn wɛ. Ee xwédo Jozɛfu kpo Mali kpo tɔn ɖò agba dó wɛ é ɔ, é sixu nɔ ma bɔwǔ nú ye bonu ye na tɛ́dó aca gbigbɔ tɔn ɖagbe ɖé wu. Amɔ̌, mɔ̌ wiwa hɛn lè wá nú ye! Ðó ye sɔ́ Jehovah sinsɛn ɖó tɛn nukɔntɔn ɔ mɛ wutu ɔ, xwédo yetɔn nɔ ganji ɖò gbigbɔ lixo.

10. Etɛ lɛ kpɔ́ndéwú Jozɛfu kpo Mali kpo tɔn ka sixu kplɔ́n mɛjitɔ́ Klisanwun lɛ?

¹⁰ Etɛ lɛ kpɔ́ndéwú Jozɛfu kpo Mali kpo tɔn ka sixu kplɔ́n mɛjitɔ́ e nɔ ɖó sísí nú Mawu lɛ é? Taji bǐ ɔ, nǔ xó towe lɛ kpo nǔwiwa towe lɛ kpo ni nɔ kplɔ́n vǐ towe lɛ ɖɔ a yí wǎn nú Jehovah tawun. Tuùn ɖɔ nǔ ɖaxó hugǎn e a sixu na ye é wɛ nyí ɖɔ a ni d’alɔ ye bonu ye ni yí wǎn nú Jehovah. Gɔ́ na ɔ, nǔ xɔ akwɛ ɖěɖee a sixu kplɔ́n ye lɛ é ɖokpo wɛ nyí lee ye na nɔ kplɔ́n Biblu,  xoɖɛ, yì kplé lɛ, bo lɛ́ ɖ’alɔ ɖò sinsɛnzɔ́ ɔ mɛ ɖò gbesisɔmɛ gbɔn é. (1 Tim. 6:6) Nǔgbo ɔ, a ɖó na sú nǔ ɖěɖee sín hudo vǐ towe lɛ ɖó ɖò agbaza lixo lɛ é sín dò. (1 Tim. 5:8) Amɔ̌, flín ɖɔ kancica syɛnsyɛn e vǐ towe lɛ ɖó xá Jehovah é wɛ na d’alɔ ye, bɔ ye na xò vivɔnu gbɛ̀ xóxó elɔ tɔn zlɛ́ bo na byɔ gbɛ̀ yɔyɔ̌ Mawu tɔn mɛ, é kún nyí nǔɖokan yetɔn lɛ wɛ ó. *—Ezek. 7:19; 1 Tim. 4:8.

11. (a) Nɛ̌ wěɖexámɛ e ɖò 1 Timɔtée 6:17-19 mɛ é ka na d’alɔ mɛjitɔ́ lɛ bɔ ye na wá gbeta ɖagbe lɛ kɔn hwenu e ye ɖò vǐ yetɔn lɛ kplɔ́n wɛ é gbɔn? (b) Etɛ lɛ gbé xwédo towe ka sixu nya? Lè tɛ lɛ é ka sixu hɛn wá? (Kpɔ́n gbǎví “ Etɛ lɛ Gbé A ka Na Nya?”)

¹¹ Mɔ e mɔ wɛ è ɖè bɔ mɛjitɔ́ Klisanwun gegě ɖò gbeta ɖagbe lɛ kɔn wá wɛ bo na d’alɔ vǐ yetɔn lɛ, bɔ ye na vɛ́ kpo Jehovah kpo é nɔ dó wusyɛn lanmɛ nú mɛ tawun! Ye nɔ sɛn Jehovah ɖó kpɔ́ ɖò gbesisɔmɛ. Ye nɔ yì kplé agun tɔn lɛ bo nɔ lɛ́ yì kpléɖókpɔ́ lɛ. Gɔ́ na ɔ, ye nɔ jlá wɛnɖagbe ɔ. Xwédo ɖé lɛ tlɛ nɔ kpéwú bo nɔ ɖekúnnu ɖò fí e è ma nɔ ɖekúnnu ɖè gbɔn mɔ̌ ǎ é. Ye mɛ ɖevo lɛ nɔ ɖisa yì Betɛli, alǒ nɔ nɔ gudo nú yɛhwexɔ́suɖuto ɔ sín xɔ lɛ gbigbá. É nɔ byɔ akwɛzinzan ɖò xwédo e nɔ wà azɔ̌ enɛ lɛ é sí. É sixu nɔ lɛ́ vɛwǔ nú ye. Amɔ̌, è na ɖɔ ɔ, lè ɖěɖee é nɔ hɛn wá nú ye lɛ é nɔ dó dɔkun nú ye ɖò gbigbɔ lixo. (Xà 1 Timɔtée 6:17-19.) Hwɛhwɛ ɔ, vǐ ɖěɖee sù ɖò xwédo mɔ̌hun mɛ lɛ é nɔ ɖókan dó aca ɖagbe e è kplɔ́n ye lɛ é wu, bɔ é ka nɔ vɛ́ nú ye kpɔ́n ǎ! *—Nǔx. 10:22.

12. Ee Jezu ɖò susu wɛ é ɔ, etɛ é ka ɖó na wà?

¹² Tɔ́ Jezu tɔn jixwé tɔn ɔ nɔ wá gbeta ɖagbe lɛ kɔn tɛgbɛ, bɔ mɛjitɔ́ tɔn ayikúngban jí tɔn lɛ lɔ wá gbeta e nǔnywɛ kpé lɛ é kɔn. É ɖò mɔ̌ có, ee Jezu ɖò susu wɛ é ɔ, é ɖó na wá gbeta lɛ kɔn nú éɖée. (Ga. 6:5) É ɖó mɛɖesúsíninɔ mǐ bǐ ɖɔhun. É hɛn ɔ, é na ko nya nǔ éɖesunɔ tɔn lɛ gbé jɛ nukɔn. Loɔ, é wá gbeta ɔ kɔn bo tɛ́dó kancica ɖagbe e ɖò é kpo Jehovah kpo tɛntin é wu. (Jaan 8:29) Nɛ̌ kpɔ́ndéwú tɔn ka sixu d’alɔ mɛ winnyawinnya lɛ ɖò égbé gbɔn?

13. Gbeta taji tɛ kɔn Jezu ka wá hwenu e é kpò ɖò vǔ é?

¹³ Hwenu e Jezu ɖò vǔ é ɔ, é wá gbeta ɔ kɔn bo na setónú nú mɛjitɔ́ tɔn lɛ. É xò alixlɛ́mɛ mɛjitɔ́ tɔn lɛ tɔn nyi kɛ́n gbeɖé bo lin ɖɔ emi tuùn nǔ hú ye ǎ. É nyɔ́ wà ɔ, “é nɔ sè tónú nú ye.” (Luk. 2:51) É ɖò wɛn ɖɔ, ɖó Jezu wɛ nyí vǐsunnuɖaxó ɔ wutu ɔ, é kpé nukún dó azɔ̌ tɔn wu ganji. É dó gǎn bo kplɔ́n azɔ̌ ɖé ɖò tɔ́ ɖò tɔ́ domɛ tɔn gɔ́n, bo na dó d’alɔ xwédo e mɛ é ɖè é.

14. Nɛ̌ mǐ ka wà gbɔn bo tuùn ɖɔ Jezu nyí Mawuxó kplɔntɔ́ ɖagbe ɖé?

¹⁴ Mɛjitɔ́ Jezu tɔn lɛ na ko ɖɔ xó n’i dó lee  è jì i ɖò nǔjiwǔ linu gbɔn é kpo wɛn e wɛnsagun Mawu tɔn lɛ dó dó wǔtu tɔn é kpo wu. (Luk. 2:8-19, 25-38) Nǔ e è ɖɔ nú Jezu é kɛɖɛ ko kpé è ǎ; éɖesu lɛ́ kplɔ́n Mawuxówema ɔ. Nɛ̌ mǐ ka wà gbɔn bo tuùn ɖɔ Jezu nyí Mawuxó kplɔntɔ́ ɖagbe ɖé? Ðó hwenu e é kpò ɖò vǔ é ɔ, “nǔnywɛ tɔn kpodo xósin e na wɛ é ɖè lɛ kpan nɔ kpaca” nǔkplɔnmɛtɔ́ Jeluzalɛmu tɔn lɛ. (Luk. 2:46, 47) Hwenu e Jezu ɖò xwè 12 kpowun ɖó wɛ é ɔ, éɖesu kúdeji ɖɔ Jehovah wɛ nyí Tɔ́ emitɔn.—Luk. 2:42, 43, 49.

15. Nɛ̌ Jezu ka xlɛ́ ɖɔ emi wá gbeta ɔ kɔn bo na wà jlǒ Jehovah tɔn gbɔn?

¹⁵ Ee Jezu ɖò nǔ kplɔ́n dó nǔ e é na wà bɔ linlin Jehovah tɔn na jɛnu é wu wɛ é ɔ, é wá gbeta ɔ kɔn bo yí gbè nú azɔ̌ e É zɔ́n ɛ é. (Jaan 6:38) É tuùn ɖɔ mɛ gegě na gbɛ́ wǎn nú emi, bɔ enɛ ɖó na zɔ́n tamɛ lin i. É ɖò mɔ̌ có, é wá gbeta ɔ kɔn bo hwíhwɛ́ éɖée dó Jehovah glɔ́. Hwenu e Jezu bló baptɛm ɖò 29 H.M. tɔn é ɔ, nǔ e jí é sɔ́ ayi ɖó hugǎn ɖò gbɛzán tɔn mɛ é wɛ nyí ɖɔ é na wà nǔ e Jehovah ba ɖò así tɔn é. (Ebl. 10:5-7) Hwenu e Jezu tlɛ ɖò kúkú wɛ ɖò yatín ɖé jí é ɔ, é gbɔ jlǒ Tɔ́ tɔn tɔn wà ǎ.—Jaan 19:30.

16. Nǔkplɔnmɛ tɛ vǐ lɛ ka sixu sɔ́ ɖò kpɔ́ndéwú Jezu tɔn mɛ?

¹⁶ Setónú nú mɛjitɔ́ towe lɛ. Jozɛfu kpo Mali kpo ɖɔhun ɔ, hwɛhutɔ́ wɛ mɛjitɔ́ towe lɛ lɔ nyí. É ɖò mɔ̌ có, Jehovah sɔ́ azɔ̌ d’así nú mɛjitɔ́ towe lɛ ɖɔ ye ni nya xɛ ɖò jǐ towe, kplɔ́n nǔ we lobo xlɛ́ ali we. Nú a nɔ kéya nú wěɖexámɛ yetɔn lɛ bo nɔ ɖó sísí nú acɛ yetɔn ɔ, “gbɛ̀ na nyɔ́ nú we.”—Efɛ. 6:1-4.

17. Sɔgbe xá Jozuwée 24:15 ɔ, gbeta tɛ kɔn mɛ winnyawinnya lɛ ka ɖó na wá nú yeɖée?

¹⁷ Sɔ́ mɛ e a na sɛn é. Hwiɖesunɔ ɖó na tuùn mɛ alɔkpa e Jehovah nyí é, nǔ e jlǒ tɔn nyí é kpo lee a sixu wà jlǒ tɔn ɖò gbɛzán towe mɛ gbɔn é kpo ganji. (Hlɔ. 12:2) Enɛ gudo ɔ, a na kpéwú bo na wá gbeta taji hugǎn ɔ kɔn ɖò gbɛzán towe mɛ, é wɛ nyí a na sɛn Jehovah. (Xà Jozuwée 24:15; Nǔt. 12:1) Enyi a tɛ́dó tuto Biblu xixa kpo Biblu kplɔnkplɔn kpo tɔn gbesisɔ tɔn ɖé wu ɔ, wǎn e a yí nú Jehovah é na ɖò jijɛji wɛ, bɔ nǔɖiɖi e a ɖó n’i é na ɖò dǒ lí wɛ.

18. Gbeta tɛ kɔn mɛ winnyawinnya lɛ ka ɖó na wá? Etɛ mɛ é ka na tɔ́n kɔ dó?

¹⁸ Sɔ́ jlǒ Jehovah tɔn wiwa ɖó tɛn nukɔntɔn ɔ mɛ ɖò gbɛzán towe mɛ. Gbɛ̀ Satáan  tɔn d’akpá ɖɔ, nú a zán nǔwukpíkpé towe lɛ nú ɖagbe towe ɖesunɔ ɔ, hwi na ɖó awǎjijɛ. Nǔgbo ɔ wɛ ka nyí ɖɔ, mɛ ɖěɖee nɔ sɔ́ ayi ɖó nǔ agbaza tɔn lɛ gbé nyinya jí lɛ é nɔ “dɔn nǔgbomɛ gegě dó kɔ.” (1 Tim. 6:9, 10) Ðò alɔ ɖevo mɛ ɔ, nú a nɔ ɖótó Jehovah bo wá gbeta ɔ kɔn bá sɔ́ jlǒ tɔn wiwa ɖó tɛn nukɔntɔn ɔ mɛ ɖò gbɛzán towe mɛ ɔ, gbɛ̀ towe na ɖó nu, bɔ “a na wà nǔnywɛnú.”—Joz. 1:8, nwt.

19. Etɛ mɛjitɔ́ lɛ ka ɖó na flín?

¹⁹ Mɛjitɔ́ lɛ mi, mi wà nǔ e wu mi kpé é bǐ, bo d’alɔ xwédo mitɔn nú é ni sɛn Jehovah. Mi ganjɛ wǔ tɔn, enɛ ɔ, é na d’alɔ mi bɔ mi na wá gbeta e nǔnywɛ kpé lɛ é kɔn. (Nǔx. 3:5, 6) Mi flín ɖɔ nǔ e mi nɔ wà lɛ é nɔ cí ayi mɛ nú vǐ mitɔn lɛ hugǎn nǔ e mi nɔ ɖɔ lɛ é. Enɛ wu ɔ, mi nɔ wá gbeta e na d’alɔ vǐ mitɔn lɛ bɔ nǔ yetɔn na nyɔ́ Jehovah nukúnmɛ lɛ é kɔn.

20. Nú mɛ winnyawinnya lɛ wá gbeta ɔ kɔn bá sɛn Jehovah ɔ, nyɔna tɛ lɛ ye ka na mɔ?

²⁰ Mɛ winnyawinnya lɛ mi, mɛjitɔ́ mitɔn lɛ sixu d’alɔ mi bɔ mi na wá gbeta e nǔnywɛ kpé lɛ é kɔn ɖò gbɛzán mitɔn mɛ. Amɔ̌, mi ɖó na wá gbeta ɖagbe lɛ kɔn bonu nǔ mitɔn na nyɔ́ Mawu nukúnmɛ. Enɛ wu ɔ, mi xwedó kpɔ́ndéwú Jezu tɔn bo wá gbeta ɔ kɔn bá sɛn Tɔ́ mitɔn jixwé tɔn wanyiyinɔ ɔ. Nú mi wà mɔ̌ ɔ, mi na ɖó gbɛzán e na jɛmɛ nú mi, bo ɖó nu lobo lɛ́ ɖó awǎjijɛ é dìn. (1 Tim. 4:16) Bɔ ɖò sɔgudo ɔ, mi na ɖu vivǐ gbɛzán e ɖó awǎjijɛ hugǎn bɔ è ma sixu jlɛ́ ǎ é tɔn!