1-2. Kancica tɛ ka ɖò Nǔnywɛtɔ́xó 11:6 kpo wɛnɖagbejijlazɔ́ ɔ kpo tɛntin?

ÐÒ TÒ ɖé lɛ mɛ ɔ, nú è jlá wɛnɖagbe ɔ mɛɖé lɛ ɔ, ye nɔ yí kpo akpakpa sɔ́ mɛ kpo. Nǔ e ɖó nukún wɛ ye ɖè é pɛ́ɛ nɛ. Ðò fí ɖevo lɛ ɔ, mɛ lɛ nɔ ɖó kɔ kaka ɖé Mawu alǒ Biblu wu ǎ. Nɛ̌ mɛ lɛ ka nɔ wà nǔ gbɔn kpaa ɖò xá e mɛ a ɖè é? Ðebǔ wɛ é na bo nyí ɔ, Jehovah nɔ ɖó nukún ɖɔ mǐ ni kpò ɖò wɛn ɔ jlá wɛ kaka jɛ hwenu e emi na ɖɔ é kpé dó é.

² Wɛnjijlazɔ́ ɔ na wá vivɔnu ɖò hwenu e Jehovah ɖó dó é, bɔ “gbɛ̀ ɔ na vɔ.” (Mat. 24:14, 36) Dìn hwɛ̌ ɔ, nɛ̌ mǐ ka sixu setónú nú xógbe “ma gɔn azɔ̌ wà ó” ɔ gbɔn? *—Xà Nǔnywɛtɔ́xó 11:6.

3. Etɛ mǐ ka na gbéjé kpɔ́n ɖò xóta elɔ mɛ?

³ Xóta e wá yì é ɖɔ xó dó nǔ e mǐ na wà, bɔ ‘gbɛtɔ́ lɛ dindɔn hweví ɖɔhun’ na bí alɔ nú mǐ é ɛnɛ jí. (Mat. 4:19) Xóta elɔ na ɖɔ xó dó lee mǐ sixu na hlɔnhlɔn kán e mǐ kánɖeji bo na jlá wɛn ɔ, ɖò ninɔmɛ ɖebǔ e sixu kpannukɔn mǐ é mɛ gbɔn é jí, ɖò ali atɔn nu. Mǐ na mɔ nǔ e wu é ɖò taji ɖɔ mǐ ni (1) sɔ́ ayi ɖó azɔ̌ ɔ jí é, (2) nɔ ɖó suúlu é, (3) ɖó nǔɖiɖi e lidǒ é é.

4. Etɛwu mǐ ka ɖó na sɔ́ ayi ɖó azɔ̌ e Jehovah zɔ́n mǐ é jí?

⁴ Jezu ɖɔ nǔ e na jɛ lɛ é gɔ́ nú ninɔmɛ e na xlɛ́ ɖɔ mǐ ɖò azǎn gudogudo tɔn lɛ mɛ lɛ é ɖ’ayǐ, bo tuùn ɖɔ nǔ enɛ lɛ sixu fɛ́ ayi ahwanvu emitɔn lɛ tɔn sín wɛnjijlazɔ́ ɔ wu.  É gb’akpá nú ahwanvu tɔn lɛ ɖɔ ye ni “nɔ acéjí.” (Mat. 24:42) Nǔ ɖěɖee fɛ́ ayi mɛ e nɔ gbɛ̀ ɖò Nɔwée hwenu lɛ é tɔn bɔ ye ma sɔ́ ayi ɖó akpágbánúmɛ tɔn jí ǎ lɛ é ɖɔhun sixu fɛ́ ayi mǐ lɔ tɔn égbé. (Mat. 24:37-39; 2 Pi. 2:5) Enɛ wu ɔ, mǐ jló na sɔ́ ayi ɖó azɔ̌ e Jehovah zɔ́n mǐ é jí.

5. Nɛ̌ Mɛsɛ́dó 1:6-8 ka jlɛ́ bǎ e mɛ è na wà wɛnjijlazɔ́ ɔ yì ɖó é gbɔn?

⁵ É byɔ ɖɔ mǐ ni sɔ́ ayi ɖó Axɔ́suɖuto jijla sín azɔ̌ ɔ jí ganji. Jezu ɖɔ ɖ’ayǐ ɖɔ ɖò kú emitɔn gudo ɔ, azɔ̌ ɔ na gbló ada, bɔ è na lɛ́ wà nú táan gegě. (Jaan 14:12) Ðò kú Jezu tɔn gudo ɔ, ahwanvu tɔn ɖé lɛ lɛ́ lɛkɔ yì hwehuhuzɔ́ yetɔn kɔn. Ðò fínfɔ́n sín kú tɔn gudo ɔ, é bló nǔjiwǔ bɔ ahwanvu tɔn ɖé lɛ wlí hweví gegě. É zán ninɔmɛ enɛ dó dó zǒgbe jí nú ye ɖɔ azɔ̌ e ye ɖó bo na dɔn gbɛtɔ́ lɛ hweví ɖɔhun é ɖò taji hú azɔ̌ ɖevo ɖebǔ. (Jaan 21:15-17, nwt.) Cobonu Jezu na yì jixwé ɔ, é ɖɔ nú ahwanvu tɔn lɛ ɖɔ kúnnuɖiɖezɔ́ e emi bɛ́ é na gbló ada zɛ dogbó Izlayɛli tɔn lɛ wu. (Xà Mɛsɛ́dó 1:6-8.) Ðò xwè mɔ̌kpan gudo ɔ, Jezu wá xlɛ́ nǔ e na jɛ ɖò ‘Aklunɔ sín azǎn gbè’ * é mɛsɛ́dó Jaan ɖò nǔmimɔ ɖé mɛ. Ðò nǔ e Jaan mɔ lɛ é ɖokpo mɛ ɔ, é mɔ nǔjiwǔ ɖé bɔ wɛnsagun ɖé ɖó “Wɛnɖagbe mavɔmavɔ ɖé,” bo ɖò didó “tò bǐ, akɔta bǐ, gbè bǐ kpodo togun bǐ kpo” wɛ. (Nǔɖe. 1:10; 14:6) É ɖò wɛn ɖɔ nǔ e Jehovah ba ɖɔ mǐ ni wà égbé é wɛ nyí ɖɔ mǐ ni ɖ’alɔ ɖò kúnnuɖiɖezɔ́ ɖaxó enɛ mɛ kaka jɛ hwenu e é na fó dó é.

6. Nɛ̌ mǐ ka sixu sɔ́ ayi ɖó wɛnjijlazɔ́ ɔ jí gbɔn?

⁶ Nú mǐ nɔ lin tamɛ dó nǔ tobutobu e wà wɛ Jehovah ɖè bo na d’alɔ mǐ é jí ɔ, mǐ sixu sɔ́ ayi ɖó wɛnjijlazɔ́ ɔ jí. Ði kpɔ́ndéwú ɔ, é ɖò nǔɖuɖu gbigbɔ tɔn e túnflá é na mǐ wɛ gbɔn wema  e è zín lɛ é, ee ɖò Ɛntɛnɛti jí lɛ é, xóyidókanji lɛ, video lɛ, kpo Televiziɔn JW tɔn sín tuto lɛ kpo gblamɛ. Lin tamɛ kpɔ́n kpɛɖé: Nǔ e ɖò tɛn Ɛntɛnɛti tɔn mǐtɔn e sɔgbe ɖò sɛ́n linu é jí lɛ é ko ɖò gbè 1 000 jɛji mɛ! (Mat. 24:45-47) Gbɛ̀ ɔ klán ɖó vogbingbɔn toxóɖiɖɔ kpo sinsɛn kpo tɔn wu, bo lɛ́ klán ɖó mɛ ɖě nyí dɔkunnɔ bɔ mɛ ɖě nyí wamamɔnɔ wu, é ɖò mɔ̌ có, Mawu sɛntɔ́ livi tantɔn jɛji ɖò bǔ nǔgbo nǔgbo ɖò kplékplé nɔví lɛ tɔn ɖé mɛ. Ði kpɔ́ndéwú ɔ, ɖò vendredi 19 avril 2019 ɔ, Kúnnuɖetɔ́ e gbɔn gbɛ̀ ɔ bǐ mɛ lɛ é nɔ bǔ bo bló tɛ́si. Ðò gbadanu tɔn ɔ, gbɛtɔ́ 20 919 041 wɛ kplé bo flín kú Jezu tɔn. Enyi mǐ nɔ lin tamɛ dó wǔjɔmɛ e mǐ ɖó bo nɔ mɔ nǔjiwǔ e bló wɛ Mawu ɖè ɖò égbé é, kpo alɔ e ɖó ɖ’emɛ wɛ mǐ ɖè é kpo jí ɔ, enɛ na sísɛ́ mǐ bɔ mǐ na sɔ́ ayi ɖó Axɔ́suɖuto jijlazɔ́ ɔ jí.

7. Nɛ̌ kpɔ́ndéwú Jezu tɔn xwixwedó ka na d’alɔ mǐ bɔ mǐ na sɔ́ ayi ɖó azɔ̌ ɔ jí gbɔn?

⁷ Kpɔ́ndéwú Jezu tɔn xwixwedó wɛ nyí ali ɖevo e nu mǐ sixu sɔ́ ayi ɖó wɛnjijlazɔ́ ɔ jí ɖè é. É lɔn nú nǔɖe fɛ́ ayi tɔn sín kúnnuɖiɖe nú nǔgbo ɔ jí ǎ. (Jaan 18:37) “Axɔ́suɖuto gbɛmɛ fí tɔn lɛ, kpodo dɔkun yetɔn lɛ kpan” e Satáan xwlé è é flú i ǎ; mɔ̌ jɛn ba e gbɛtɔ́ lɛ ba na sɔ́ ɛ axɔ́su é ma ka lɛ́ byɔ nukún mɛ n’i ǎ é nɛ. (Mat. 4:8, 9; Jaan 6:15) Jlǒ dɔkun jijɛ tɔn dó jɔ n’i ǎ; mɔ̌ jɛn gbeklánxámɛ syɛnsyɛn ma dó xɛsi i ǎ é nɛ. (Luk. 9:58; Jaan 8:59) Nú nǔɖiɖi mǐtɔn gbɔn tɛnkpɔn mɛ, bonu mǐ ka flín wěɖexámɛ mɛsɛ́dó Pɔlu tɔn ɔ, mǐ sixu sɔ́ ayi ɖó azɔ̌ ɔ jí. É dó wusyɛn lanmɛ nú Klisanwun lɛ ɖɔ ye ni xwedó kpɔ́ndéwú Jezu tɔn, enɛ ɔ ‘awakanmɛ na kú ye, nú nǔ na cikɔ nú ye ǎ’!—Ebl. 12:3.

8. Etɛ ka nyí suúluɖiɖó? Aniwu è ka ɖó hudo tɔn tawun dìn?

⁸ Suúluɖiɖó ɔ, nǔwukpíkpé e nɔ zɔ́n bɔ è nɔ nɔ xwíi nú ninɔmɛ ɖé na ɖyɔ é wɛ. Nú mǐ ɖò nukúnɖiɖó mɛ ɖɔ ninɔmɛ nyanya ɖé na wá vivɔnu, alǒ nǔ e ɖó nukún wɛ mǐ ɖè sín hwenu línlín ɖíe é ɖé na jɛ jlɔ́ ɔ, mǐ ɖó na ɖó suúlu. Gbeyiɖɔ Xabakuku jló tawun ɖɔ ninɔmɛ baɖabaɖa e tíìn ɖò Judáa lɛ é ni wá vivɔnu. (Xab. 1:2) Ahwanvu Jezu tɔn lɛ ɖó nukún ɖɔ ‘tlolo wɛ’ Axɔ́suɖuto Mawu tɔn na “bɛ́” azɔ̌, bo na hwlɛn ye sín yadonúmɛ Hlɔmanu lɛ tɔn sí. (Luk. 19:11) Kpo akpakpa sɔ́ mɛ kpo wɛ mǐ ɖò nukún ɖó hwenu e Axɔ́suɖuto Mawu tɔn na ɖè nǔnyanyawiwa lɛ bǐ síìn, bo na kplá mǐ byɔ gbɛ̀ yɔyɔ̌ e mɛ è na wà nǔ kpo hwɛjijɔ kpo ɖè é mɛ é wɛ. (2 Pi. 3:13) Amɔ̌, mǐ ɖó na ɖó suúlu bo nɔte kpɔ́n hwenu e Jehovah ɖó dó é. Mǐ ni kpɔ́n ali e nu Jehovah nɔ kplɔ́n mǐ ɖè, bonu mǐ na ɖó suúlu é ɖé lɛ.

9. Kpɔ́ndéwú tɛ lɛ ka xlɛ́ ɖɔ Jehovah nɔ ɖó suúlu?

⁹ Jehovah sɔ́ kpɔ́ndéwú maɖóblɔ̌ ɖé ɖ’ayǐ ɖò suúluɖiɖó linu. É na hwenu e kpé é Nɔwée, bɔ é bló tɔjihun ɔ, bo lɛ́ w’azɔ̌ ɖi “Mawuxóɖɔtɔ́ nǔjlɔjlɔwiwa tɔn ɖé.” (2 Pi. 2:5, nwt; 1 Pi. 3:20) Jehovah ɖótó Ablaxamu hwenu e é ɖò nǔ kanbyɔ ɛ wɛ magbokɔ dó gbeta e kɔn é wá bo na sú kún dó nú mɛdídá e ɖò toxo Sodɔmu kpo Gomɔ́ɔ kpo tɔn mɛ lɛ é wu é. (Bǐb. 18:20-33) Nú xwè kanweko mɔ̌kpan ɔ, Jehovah ɖó suúlu dó akɔta Izlayɛli tɔn gbejimanɔtɔ́ ɔ wu tawun. (Nɛɛ. 9:30, 31) Mǐ nɔ mɔ kúnnuɖenú suúluɖiɖó Jehovah tɔn tɔn égbé, ɖó é jó hwenu dó nú mɛ e é dɔn lɛ é bǐ bonu ye  ni “lɛkɔ sín nǔnyanyawiwa gudo.” (2 Pi. 3:9; Jaan 6:44; 1 Tim. 2:3, 4) Kpɔ́ndéwú Jehovah tɔn na mǐ hwɛjijɔ ɖagbe e wu mǐ na ɖó suúlu, bo na kpò ɖò wɛn jlá mɛ lɛ wɛ, bo lɛ́ kpò ɖò nǔ kplɔ́n ye wɛ é. É lɛ́ kplɔ́n mǐ suúluɖiɖó gbɔn nǔjlɛdonǔwu e ɖò Xó tɔn mɛ é ɖé gblamɛ.

10. Etɛ kpɔ́ndéwú glesi lɛ tɔn e ɖò Jaki 5:7, 8 mɛ é ka kplɔ́n mǐ?

¹⁰ Xà Jaki 5:7, 8. Kpɔ́ndéwú glesi e dó jinukún é tɔn kplɔ́n mǐ lee mǐ na ɖó suúlu gbɔn é. Nǔgbo wɛ ɖɔ jinukún ɖé lɛ nɔ yawǔ sù. Amɔ̌, gegě ɖevo lɛ tíìn bo nɔ bló táan gegě cobɔ sínsɛ́n yetɔn lɛ nɔ zin. Ðò Izlayɛli ɔ, nǔkún lɛ sín susu nɔ ɖu sun ayizɛ́n mɔ̌. Enyi jǐ nukɔntɔn ɔ ja gudo ɖò nǔkúndidó hwenu ɔ wɛ glesi ɖé nɔ dó nǔ, bo nɔ wá ya ɖò hwenu e jǐ gudo tɔn ɔ ja dó ɖò nǔkún-yiya hwenu é. (Mak. 4:28) Nǔnywɛnú wɛ é na nyí ɖɔ mǐ ni xwedó kpɔ́ndéwú suúluɖiɖó tɔn glesi lɛ tɔn. Amɔ̌, é sixu nɔ ma bɔwǔ.

11. Nɛ̌ suúluɖiɖó ka na d’alɔ mǐ ɖò sinsɛnzɔ́ mǐtɔn mɛ gbɔn?

¹¹ Hwɛhwɛ ɔ, gbɛtɔ́ hwɛhutɔ́ lɛ nɔ ba na mɔ nǔ e mɛ gǎndidó yetɔn lɛ na tɔ́n kɔ dó é ɖò yiyǎ mɛ. Enyi mǐ ba ɖɔ gle mǐtɔn ni na sínsɛ́n ɔ, mǐ ɖó na nɔ kpé nukún d’ewu ganji; é wɛ nyí ɖɔ mǐ ɖó na lɛ̀, dó nǔ, nɔ jlaɖó, bo nɔ lɛ́ hú sin na. Nǔ kplɔnkplɔn mɛ lɛ bonu ye na huzu ahwanvu sín azɔ̌ ɔ lɔ nɔ byɔ ɖɔ è ni nɔ dó gǎn. É nɔ byɔ hwenu cobɔ mǐ na d’alɔ Biblu kplɔntɔ́ mǐtɔn lɛ bɔ ye na nɔ ɖè mɛɖé ɖó vo ɖò mɛ mɛ ǎ, lobo lɛ́ yí wǎn nú mɛ. Suúluɖiɖó na d’alɔ mǐ bɔ enyi tagba lɛ wá xwetɔ́n ɔ, awakanmɛ na kú mǐ ǎ. Enyi mɛɖé lɛ sɔ́ jlǒ dó ɖò tó ɖó mǐ wɛ, bo lɛ́ ɖò nǔ kplɔ́n wɛ ɔ, mǐ ɖó na lɛ́ ɖó suúlu. Mǐ sixu dó cɔcɔ nú Biblu kplɔntɔ́ ɖé bonu é na ɖi nǔ ǎ. É tlɛ  vɛwǔ nú ahwanvu Jezu tɔn lɛ hweɖelɛnu bɔ ye na mɔ nǔ jɛ nǔ e kplɔ́n ye wɛ Jezu ɖè lɛ é wu. (Jaan 14:9) Mi nú mǐ ni flín ɖɔ mǐ sixu dó nǔkún, bo hú sin na, amɔ̌ Mawu wɛ nɔ bló bɔ é nɔ sù.—1 Kɔ. 3:6.

12. Nɛ̌ mǐ ka sixu ɖó suúlu hwenu e mǐ ɖò kúnnu ɖè nú hɛ̌nnumɔ mǐtɔn nǔmaɖitɔ́ lɛ wɛ é gbɔn?

¹² É sixu vɛwǔ nú mǐ bɔ mǐ na ɖó suúlu hwenu e mǐ ɖò kúnnu ɖè nú hɛ̌nnumɔ mǐtɔn e ma nyí Kúnnuɖetɔ́ ǎ lɛ é wɛ é. Nǔgbododó e ɖò Nǔnywɛtɔ́xó 3:1, 7 mɛ é sixu d’alɔ mǐ. É ɖɔ: “Hwenu e è na nɔ abwɛ dó ɔ ɖè, bɔ hwenu e è na ɖɔ xó dó é ɖè.” Mǐ sixu jó walɔ ɖagbe mǐtɔn lɛ dó bɔ ye na ɖekúnnu ɖó tɛn mǐtɔn mɛ, amɔ̌, mǐ ɖó na ɖò acéjí hwebǐnu dó ali e na hun nú mǐ bɔ mǐ na ɖɔ xó dó nǔgbo ɔ jí nú ye lɛ é wu. (1 Pi. 3:1, 2) Mǐ ɖó na jlá wɛn ɔ lobo kplɔ́n nǔ mɛ kpo akpakpa sɔ́ mɛ kpo, amɔ̌, mǐ ɖó na nɔ ɖó suúlu dó mɛ lɛ bǐ wu hwebǐnu kaka jɛ hɛ̌nnumɔ mǐtɔn lɛ jí.

13-14. Kpɔ́ndéwú suúluɖiɖó tɔn tɛ lɛ mǐ ka sixu xwedó?

¹³ Kpɔ́ndéwú gbejinɔtɔ́ hwexónu tɔn kpo azǎn mǐtɔn gbè kpo tɔn lɛ sixu kplɔ́n nǔ mǐ dó suúluɖiɖó wu. Xabakuku ɖò nukún ɖó wɛ ɖɔ nǔnyanyawiwa ni wá vivɔnu, amɔ̌ é ɖɔ kpo jiɖiɖe kpo ɖɔ: “Nyɛ Xabakuku ɔ, un na ɖò te ɖò azɔ̌ ce jí.” (Xab. 2:1) Mɛsɛ́dó Pɔlu jló tawun bo na “wà” sinsɛnzɔ́ tɔn “yì fó,” bá mɔ ajɔ tɔn jixwé tɔn ɔ yí. Amɔ̌, é ɖó suúlu, bo kpò ɖò “Wɛnɖagbe e ɖɔ xó dó fɛ́nú Mawu tɔn wu é [jlá] wɛ.”—Mɛ. 20:24.

¹⁴ Ðǒ ayi kpɔ́ndéwú elɔ wu. È sɛ́ asú kpo asì kpo e yí kúnnuɖewema Galadi tɔn é ɖé dó tò e mɛ Kúnnuɖetɔ́ ma sukpɔ́ ɖè ǎ, bɔ mɛ kaka ɖé ma nɔ ba na kplɔ́n Biblu ǎ é ɖé mɛ. Amɔ̌, mɛ e kpo ye kpo yì Galadi bo ɖò tò ɖevo mɛ lɛ é nɔ ɖɔ sɛ́dó ye ɖɔ emi ɖò Biblu kplɔ́n xá mɛ gegě wɛ bɔ ye ɖò nukɔn yì wɛ. Azɔ̌ ɔ ɖò nukɔn kaka ɖé yì wɛ ɖò fí e asú kpo asì kpo ɔ ɖè é ǎ có, ye ka ɖó suúlu, bo kpò ɖò wɛn ɔ jlá wɛ. Ee ye jlá wɛn ɔ ɖò xá enɛ mɛ nú xwè tantɔn gudo é ɔ, é víví nú ye ɖɔ mɛ e kplɔ́n Biblu xá wɛ ye ɖè lɛ é ɖokpo bló baptɛm. Etɛ kpɔ́ndéwú hwexónu kpo égbé kpo tɔn enɛ lɛ ka kplɔ́n mǐ? Gbejinɔtɔ́ enɛ lɛ jó gbè ǎ, ye ka lɛ́ gɔn azɔ̌ wà ǎ, bɔ Jehovah dó nú suúluɖiɖó yetɔn. Mi nú mǐ ni “xwedó xlɛ̌ mɛ e ɖi nǔ bo ɖó sɔxwixwe, bo nɔ mɔ nǔ e sín akpá Mawu dó ɔ yí, ɖó enɛ wu lɛ é tɔn.”—Ebl. 6:10-12.

15. Ðɔ ali e nu nǔɖiɖi nɔ na hlɔnhlɔn kán e mǐ kánɖeji bo na jlá wɛn ɔ é ɖè é ɖokpo.

¹⁵ Mǐ ɖi nǔ nú wɛn e jlá wɛ mǐ ɖè é, enɛ wu ɔ, akpakpa nɔ sɔ́ mǐ bɔ mǐ nɔ jlá mɛ gegě lee é nyɔ́ bló gbɔn é. Mǐ ɖeji dó akpá ɖěɖee ɖò Xó Mawu tɔn mɛ lɛ é wu. (Ðɛh. 119:42; Eza. 40:8) Mǐ mɔ bɔ nǔɖɔɖ’ayǐ Biblu tɔn lɛ ɖò jijɛnu wɛ ɖò égbé. Enyi mɛ lɛ jɛ wěɖexámɛ Biblu tɔn lɛ xwedó jí ɔ, mǐ nɔ mɔ ɖɔ gbɛzán yetɔn nɔ huzu dó ɖagbe jí. Enɛ na jiɖe mǐ d’eji ɖɔ mɛ bǐ wɛ ɖó na sè wɛnɖagbe Axɔ́suɖuto ɔ tɔn.

16. Sɔgbe xá Ðɛhan 46:2-4 ɔ, nɛ̌ nǔ ɖiɖi nú Jehovah ka nɔ na hlɔnhlɔn kán e mǐ kánɖeji bo na jlá wɛn ɔ é gbɔn? Nɛ̌ nǔ ɖiɖi nú Jezu lɔ ka nɔ d’alɔ mǐ gbɔn?

¹⁶ Mǐ lɛ́ ɖó nǔɖiɖi nú Jehovah e nyí Jɔtɛn wɛn e jlá wɛ mǐ ɖè é tɔn é, kpo Jezu e nyí axɔ́su e é sɔ́ ɖó Axɔ́suɖuto tɔn nu é é kpo. (Jaan 14:1) Ninɔmɛ ɖebǔ na bo kpannukɔn mǐ ɔ, Jehovah na nyí bibɛtɛn mǐtɔn kpo hlɔnhlɔn mǐtɔn kpo tɛgbɛ. (Xà Ðɛhan 46:2-4.) Gɔ́ na ɔ, mǐ  ɖeji ɖɔ Jezu ɖò hlɔnhlɔn kpo acɛ e Jehovah na ɛ é kpo zán wɛ sín jixwé, bo ɖò ali xlɛ́ mǐ wɛ ɖò wɛnjijlazɔ́ ɔ kɔn.—Mat. 28:18-20.

17. Nǎ kpɔ́ndéwú e xlɛ́ ɖɔ mǐ ɖó na kpò ɖò wɛn ɔ jlá wɛ é ɖé.

¹⁷ Nǔɖiɖi nɔ bló bɔ mǐ nɔ ɖeji hugǎn ɖɔ Jehovah na dó nú gǎndidó mǐtɔn lɛ, bɔ ɖò hweɖelɛnu ɔ, ali e nu mǐ ma ɖó nukún tɔn ɖè ǎ lɛ é wɛ é nɔ wà mɔ̌ ɖè. (Nǔt. 11:6) Ði kpɔ́ndéwú ɔ, gbè bǐ gbè wɛ gbɛtɔ́ afatɔ́n mɔ̌kpan nɔ gbɔn tavo kpo kɛkɛví kpo e jí mǐ tɛ́ wema mǐtɔn lɛ dó é nukɔn. Wlɛnwín wɛnjijla tɔn enɛ lɛ ka nɔ w’azɔ̌ à? Ganji. Sinsɛnzɔ́ Axɔ́suɖuto ɔ Tɔn Mǐtɔn, novembre 2014 tɔn ɖɔ xó dó kplɔnyiji-alavɔví e jló na wlán nǔ dó Kúnnuɖetɔ́ Jehovah tɔn lɛ wu é ɖé wu. É kpéwú bo mɔ Kpléxɔ Axɔ́suɖuto ɔ tɔn ɖé ǎ, amɔ̌, é mɔ bɔ wema mǐtɔn lɛ ɖó títɛ́ ɖò tavo ɖé jí ɖò kplɔnyiji-alavɔxwé ɔ, bɔ Kúnnuɖetɔ́ lɛ na ɛ nǔ e sín hudo é ɖó bo na wlán nǔ tɔn é. Nukɔnmɛ ɔ, é bló baptɛm, bo nyí gbexosin-alijitɔ́ hwebǐnu tɔn ɖé. Nǔ mɔ̌hun lɛ nɔ sɔ́ akpakpa mǐ, bɔ mǐ nɔ kpò ɖò wɛn ɔ jlá wɛ ɖó é nɔ xlɛ́ ɖɔ mɛ lɛ kpò bo ba na sè wɛn Axɔ́suɖuto ɔ tɔn.

18. Etɛwu mǐ ka ɖeji ɖɔ Axɔ́suɖuto jijlazɔ́ ɔ na wá vivɔnu lee Jehovah ba gbɔn é?

¹⁸ Mǐ sixu kúdeji ɖɔ wɛn Axɔ́suɖuto ɔ tɔn jijla na wá vivɔnu ɖò hwenu e jɛxa dó é. Kpɔ́n nǔ e jɛ ɖò Nɔwée hwenu é. Jehovah xlɛ́ ɖɔ emi nyí Ganmɛjinɔtɔ́ ɖagbe hugǎn ɔ. Xwè 120 mɔ̌ jɛ nukɔn ɔ, Jehovah sɔ́ azǎn e jí Sinvɔgbɛ ɔ na bɛ́ é. Xwè gegě gudo ɔ, Jehovah ɖɔ nú Nɔwée ɖɔ é ni bló tɔjihun ɔ. Vlafo nú xwè 40 alǒ 50 jɛ nukɔn nú bǐbɛ̌ Sinvɔgbɛ ɔ tɔn ɔ, Nɔwée nɔ ɖò azɔ̌ wà wɛ syɛnsyɛn. Mɛ lɛ nɔ ɖótó è ǎ có, é kpò ɖò wɛn akpágbánúmɛ tɔn ɔ jlá wɛ kaka jɛ hwenu e Jehovah ɖɔ é ni bɛ́ kanlin lɛ dó tɔjihun ɔ mɛ é. Enɛ gudo ɔ, ‘Jehovah sú hɔn ɔ’ hwenu e é jɛxa dó é.—Bǐb. 6:3; 7:1, 2, 16.

19. Enyi mǐ ma gɔn azɔ̌ wà ǎ ɔ, etɛ mǐ ka sixu ɖó nukún?

¹⁹ Zaanɖé dìn ɔ, Jehovah na ɖó nǔ wɛnjijlazɔ́ ɔ nu; ɖò ali ɖé nu ɔ, é na ‘sú hɔn’ dó gbɛ̀ Satáan tɔn, bo na hun nǔ sín gbɛ̀ yɔyɔ̌ ɔ nu. Kaka jɛ hwenɛnu ɔ, mi nú mǐ ni xwedó kpɔ́ndéwú Nɔwée, Xabakuku kpo mɛ ɖevo e ma gɔn azɔ̌ wà ǎ lɛ é kpo tɔn. Mi nú mǐ ni nɔ sɔ́ ayi ɖó azɔ̌ ɔ jí, nɔ ɖó suúlu, bo nɔ ɖó nǔɖiɖi e lidǒ é nú Jehovah kpo akpá tɔn lɛ kpo.