1-2. (a) Nǔkanbyɔ́ tɛ́ lɛ́ jí mǐ ka ná ɖɔ xó dó? (b) Étɛ́ ka xlɛ́ ɖɔ Jexóva jló vɛ́návɛ́ná bá d’alɔ mǐ?

 JEXÓVA sixú d’alɔ mǐ bɔ mǐ ná ɖí xwi xá wǔvɛ́ e mɔ wɛ mǐ ɖe ɖo gbɛzán mǐtɔn mɛ lɛ́ é, lobo sɛn ɛ kpó awǎjijɛ kpó. Ali tɛ́ lɛ́ nu é ka nɔ d’alɔ mǐ ɖe? Nɛ̌ mǐ ka sixú ɖu le alɔ e Jexóva nɔ dó mǐ é tɔn bǐ mlɛ́mlɛ́ gbɔn? Mǐ ná mɔ xósin nǔkanbyɔ́ énɛ́ lɛ́ tɔn ɖo xóta élɔ́ mɛ. Amɔ̌, cóbónú mǐ ná jɛ xósin nǔkanbyɔ́ énɛ́ lɛ́ tɔn ba jí ɔ, mi nú mǐ ní tó ɖɔ xó dó nǔkanbyɔ́ élɔ́ jí hwɛ̌: Jexóva ka ɖo gbesisɔmɛ dóó bá d’alɔ mǐ a?

² Xógbe e mɛsɛ́dó Pɔ́lu zán ɖo wěma e é sɛ́ dó Eblée lɛ́ é mɛ é ɖokpó sixú d’alɔ mǐ bɔ mǐ mɔ xósin ɔ. Pɔ́lu wlán ɖɔ: ‘Jexóva wɛ nyí mɛ e nɔ d’alɔ mì é. Un ná ɖi xɛsi nú nǔɖé ǎ. Étɛ́ mɛɖé ka sixú wa nú mì?’ (Ebl. 13:6) Wěma alɔdlɛ́ndónǔ tɔn Biblu tɔn ɖé ɖɔ ɖɔ xógbe “d’alɔ” e è zán ɖo wěmafɔ ɔ mɛ é nɔ dó gesí mɛ e kán wezun, bo ná yi d’alɔ mɛ e ɖo xó sú dó byɔ́ alɔdó wɛ é ɖé é. Dǒ nukún mɛ kpɔ́n, Jexóva ɖo hwlɛndó jí bo ná yi hwlɛ́n mɛ e ɖo aluwɛ mɛ é ɖé. É ɖo wɛn ɖɔ a ná yí gbe ɖɔ tínmɛ énɛ́ ɖe jlǒ e Jexóva ɖó, ɛɛn, akpakpa e ɖo sísɔ́ ɛ wɛ bónú é ná d’alɔ mǐ é xlɛ́. Jexóva ɖo ahwan mǐtɔn mɛ ɔ, mǐ sixú dɛ ɖo wǔvɛ́ mǐtɔn lɛ́ nu kpó awǎjijɛ kpó.

3. Ðɔ ali e nu Jexóva nɔ d’alɔ mǐ bɔ mǐ nɔ dɛ ɖo wǔvɛ́ mǐtɔn lɛ́ nu kpó awǎjijɛ kpó ɖe é atɔn.

³ Ali tɛ́ lɛ́ nu mɔ̌ Jexóva ka nɔ d’alɔ mǐ bɔ mǐ nɔ dɛ ɖo wǔvɛ́ mǐtɔn lɛ́ nu kpó awǎjijɛ kpó ɖe? Bo ná dó mɔ xósin ɔ ɔ, mi nú mǐ ní gbéjé akpáxwé ɖé lɛ́ kpɔ́n ɖo wěma Ezayíi  tɔn mɛ. Aniwú? Nǔɖɔɖayǐ e Jexóva sɔ́ dó ayi mɛ nú Ezayíi bɔ é wlán lɛ́ é gěgé kúnkplá mɛsɛntɔ́ Mawu tɔn lɛ́ ɖo égbé. Gɔ́ ná ɔ, hwɛhwɛ wɛ Ezayíi zán xógbe e bɔkun tawun lɛ́ é dó ɖɔ xó dó Jexóva wú. Mǐ ní kpɔ́n kpɔ́ndéwú tɔn ɖokpó ɖo Ezayíi wěmata 30gɔ́ ɔ mɛ. Ðo wěmata énɛ́ mɛ ɔ, Ezayíi zán nǔjlɛ́dónǔwú ɖaaɖagbe lɛ́, dó tínmɛ lěe Jexóva nɔ d’alɔ togun tɔn gbɔn é; é wlán ɖɔ Jexóva nɔ wa nǔ élɔ́ lɛ́ dó d’alɔ mǐ: (1) nɔ ɖótó ɖɛ mǐtɔn lɛ́ kpó sɔxwixwe kpó, bo nɔ lɛ́ ná xósin nú yě, (2) nɔ ɖe wě xá mǐ, (3) nɔ kɔn nyɔ̌ná lɛ́ dó mǐ jí din, bo ná lɛ́ wa mɔ̌ ɖo sɔgúdo. Din ɔ, mǐ ná ɖɔ xó dó ali atɔn énɛ́ lɛ́ e nu Jexóva nɔ d’alɔ mǐ ɖe lɛ́ é jí.

4. (a) Étɛ́ Jexóva ka ɖɔ dó Jwifu e nɔ gbɛ ɖo Ezayíi hwenu lɛ́ é wú? Étɛ́ Jexóva ka yí gbe bɔ é jɛ dó yě wú? (b) Nukúnɖíɖó tɛ́ Jexóva ka sɔ́ ɖó te nú gbejínɔtɔ́ e ɖo yě mɛ lɛ́ é? (Ezayíi 30:18, 19, nwt)

⁴ Ðo bǐbɛ́mɛ Ezayíi wěmata 30gɔ́ ɔ tɔn ɔ, Jexóva ylɔ́ Jwifu lɛ́ ɖɔ “vǐ gǔfɔ́ntɔ́,” alǒ tasyɛ́ntɔ́, éé nɔ ɖo “hwɛ hu dó hwɛ jí wɛ” é. É ɖɔ gɔ́ ná ɖɔ: ‘Ðó gǔfɔ́ntɔ́ wɛ nú yě. Vǐ ɖé wɛ yě nyí bo nɔ nyi Jexóva sɛ́n ɔ ɖěbǔ ǎ.’ (Eza. 30:1, 9) Ðó togun ɔ gbɛ́ ɖɔ émí kún ná se tónú ó wútu ɔ, Ezayíi ɖɔ ɖ’ayǐ ɖɔ Jexóva ná jó yě dó bɔ awě ná xo yě. (Eza. 30:5, 17; Jel. 25:8-11) Bɔ nǔgbó ɔ, Babilɔ́nunu lɛ́ wá wlí yě hɛn yi kannumɔgbénu. Amɔ̌, gbejínɔtɔ́ ɖé lɛ́ ɖo Jwifu énɛ́ lɛ́ mɛ, bɔ Ezayíi ɖó wɛn nukúnɖíɖó tɔn ɖé nú yě. É ɖɔ nú yě ɖɔ ayǐ ɖé ná wá hɔ́n bɔ Jexóva ná bló bɔ yě ná lɛ́ lɛ́ kɔ yi Jeluzalɛ́mu, bo nɔ dɔ̌n. (Xa Ezayíi 30:18, 19, nwt.) Bɔ nǔ e ka jɛ pɛ́ɛ́ é nɛ́. Jexóva ɖe yě sín kannumɔgbénu ɖo Babilɔ́nu. É ɖo mɔ̌ có, é nyí tlóló tlóló wɛ hwlɛngán yětɔn wá ǎ. Nukɛgbe “Jexóva ɖó suúlu bo ɖo te, bo ná kú nǔbláwǔ nú mi” ɔ xlɛ́ ɖɔ hwenu ɖé ná wá yi cóbɔ è ná hwlɛ́n gbejínɔtɔ́ lɛ́ gán. Nǔgbó ɔ, Izlayɛ́li ví lɛ́ nɔ kannumɔgbénu ɖo Babilɔ́nu nú xwe 70, cóbɔ ali ɔ hun nú Izlayɛ́li ví e kpo ɖo gbɛ lɛ́ é bɔ yě lɛ́ kɔ wá yi Jeluzalɛ́mu. (Eza. 10:21; Jel. 29:10) Ée yě lɛ́ kɔ wá yi xwé é ɔ, ɖasin awǎjijɛ tɔn lɛ́ wɛ jɛ wǔvɛ́ sín avǐ e yě nɔ ya ɖo kannumɔgbénu é tɛnmɛ.

5. Gǎnjɛwú tɛ́ Ezayíi 30:19 ka ná mǐ?

⁵ Égbé ɔ, xó élɔ́ lɛ́ sixú dó gbɔ nú mǐ: “Hwenu e a ná sú xó ylɔ́ Mawu é ɔ, é ná ɖo gbesisɔmɛ bo ná ɖótó we.” (Eza. 30:19) Ezayíi ná mǐ gǎnjɛwú ɖɔ Jexóva ná ɖótó xó e sú ylɔ́ ɛ wɛ mǐ ɖe lɛ́ é kpó sɔxwixwe kpó, bo ka ná lɛ́ yá wǔ ná xósin nú ɖɛ mǐtɔn lɛ́. Ezayíi ɖɔ gɔ́ ná ɖɔ: “É se gbe towe lě tlóló ɔ, é ná sɔ nú we.” Xógbe énɛ́ lɛ́ e vɔ́ gǎnjɛwú ná mɛ é nɔ flín mǐ ɖɔ Tɔ́ mǐtɔn ɖo gbesisɔmɛ, ɛɛn, akpakpa ɖo sísɔ́ ɛ wɛ bónú é ná d’alɔ mɛ ɖěɖěe nɔ byɔ́ alɔdó tɔn lɛ́ é. Énɛ́ tuuntuun nɔ d’alɔ mǐ bɔ mǐ nɔ dɛ kpó awǎjijɛ kpó.

6. Nɛ̌ xó e Ezayíi ɖɔ lɛ́ é ka xlɛ́ ɖɔ Jexóva nɔ ɖótó ɖɛ mɛsɛntɔ́ tɔn lɛ́ ɖokpó ɖokpó tɔn gbɔn?

⁶ Nǔ ɖěvo tɛ́ wěmafɔ énɛ́ ka kplɔ́n mǐ dó ɖɛxixo wú? Jexóva nɔ ɖótó ɖɛ mǐ mɛ ɖokpó ɖokpó tɔn kpó sɔxwixwe kpó. Aniwú mǐ ka sixú ɖɔ mɔ̌? Ðo akpáxwé nukɔntɔn Ezayíi wěmata 30gɔ́ ɔ tɔn mɛ ɔ, togun ɔ bǐ ɖɔ xó ná wɛ è ɖe. Amɔ̌, ɖo wěmafɔ 19gɔ́ ɔ mɛ ɔ, mɛ ɖokpó ɖokpó ɖɔ xó ná wɛ è ɖe. Ezayíi ɖɔ: “A sɔ́ ná ya avǐ kpɔ́n gbeɖé ǎ.” “É ná ɖo gbesisɔmɛ bo ná ɖótó we”; “é ná sɔ nú we.” Ðó Jexóva nyí Tɔ́ wǎnyíyínɔ ɖé wútu ɔ, é nɔ ɖɔ xó lěhun lɛ́ nú vǐ súnnu tɔn, alǒ vǐ nyɔ̌nu tɔn e awakanmɛ ko kú é ɖé ǎ: “A mɔ lěe nɔví súnnu towe énɛ́, alǒ nɔví nyɔ̌nu towe énɛ́ nɔ dó gǎn sɔ é a? A ɖó ná dó gǎn éɖɔhun.” Éǒ, é nɔ wa mɔ̌ ǎ. É nyɔ́ wa ɔ, é nɔ kpé nukún dó mǐ mɛ ɖokpó ɖokpó wú, bo nɔ lɛ́ ɖótó ɖɛ mǐ mɛ ɖokpó ɖokpó tɔn ganjí.—Ðɛh. 116:1; Eza. 57:15.

7. Nɛ̌ Ezayíi kpó Jezu kpó ka tɛɖɛ̌ lě do é ɖo tají sɔ ɖɔ è ní nɔ ɖo ɖɛ xo wɛ é jí gbɔn?

 ⁷ Ényí mǐ xo ɖɛ sɛ́dó Mawu bo ɖɔ nǔ e ɖo ayimɛya dó nú mǐ wɛ lɛ́ é n’i ɔ, nǔ nukɔntɔn e Jexóva sixú wa é wɛ nyí ɖɔ é ná ná hlɔ̌nhlɔ́n e sín hudó mǐ ɖó bá dɛ ɖ’é nu é mǐ. Gɔ́ ná ɔ, ényí wǔvɛ́ mǐtɔn lɛ́ ná bo ma tlɛ nɔ te lěe ɖó nukún tɔn gbɔn wɛ mǐ ɖe é ǎ ɔ, mǐ sixú lɛ́ kpo ɖo byɔ̌byɔ́ Jexóva wɛ ɖɔ é ní ná hlɔ̌nhlɔ́n mǐ bónú mǐ ná sixú dɛ ɖ’é nu. Nǔ e é byɔ́ mǐ ɖɔ mǐ ní nɔ wa é nɛ́. Énɛ́ tɔ́n ɖo xógbe élɔ́ lɛ́ e Ezayíi zán é mɛ: ‘Mi ma ná gbɔjɛ Jexóva ó.’ (Eza. 62:7) Étɛ́ ka nyí tínmɛ énɛ́ tɔn? Mǐ ɖó ná nɔ ɖo ɖɛ xo sɛ́dó Jexóva wɛ hwebǐnu, cí nǔ ɖɔ mǐ kún ɖo agbɔ̌n ná ɛ wɛ ó ɖɔhun. Xó énɛ́ lɛ́ e Ezayíi ɖɔ é flín mǐ nǔjlɛ́dónǔwú Jezu tɔn e kúnkplá ɖɛxixo, bo ɖo Luki 11:8-10, 13 mɛ é. Jezu dó wǔsyɛ́n lanmɛ nú mǐ ɖo fínɛ́ ɖɔ mǐ ní nɔ xo ɖɛ, bo nɔ ɖo gbigbɔ mímɛ́ “byɔ́” wɛ, lobo nɔ ɖo “tagba” tɔn dó nú Mawu wɛ. Mǐ sixú lɛ́ byɔ́ Jexóva ɖɔ é ní ɖe wě e sín hudó mǐ ɖó é xá mǐ, bónú mǐ ná sixú nɔ wá gbeta ɖagbe lɛ́ kɔn.

8. Nɛ̌ xó e ɖo Ezayíi 30:20, 21 mɛ é ka jɛnu ɖo hwexónu gbɔn?

⁸ Xa Ezayíi 30:20, 21, nwt. Hwenu e ahwankpá Babilɔ́nu tɔn wá ɖó gɔnu ɖó Jeluzalɛ́mu nú xwe ɖokpó adaɖé é ɔ, togun ɔ se wǔvɛ́ káká bɔ é wá dó étɔn wɔ̌xúxú e é nɔ ɖu ayǐhɔ́ngbe ayǐhɔ́ngbe é kpó sin e é nɔ nu gbe bǐ gbe é kpó ɖɔhun. Amɔ̌, sɔgbe kpó wěmafɔ 20 kpó 21gɔ́ ɔ kpó ɔ, Jexóva d’akpá nú Jwifu lɛ́ ɖɔ ényí yě lɛ́ kɔ sín hwɛ yětɔn lɛ́ gúdo, bo ɖyɔ́ nǔwalɔ yětɔn lɛ́ ɔ, émí ná hwlɛ́n yě. Ezayíi ylɔ́ Jexóva ɖɔ “Mɛ̌si ɖaxó” yětɔn, bo ná gǎnjɛwú togun ɔ ɖɔ Jexóva ná kplɔ́n yě lěe yě ná sɛn ɛ gbɔn b’ɛ ná nyɔ́ nukún tɔn mɛ é. Xó énɛ́ lɛ́ jɛnu hwenu e è ɖe Jwifu lɛ́ nyi te sín kannumɔgbénu é. Jexóva ɖe xlɛ́ ɖɔ émí nyí Mɛ̌si ɖaxó yětɔn. Ali e é xlɛ́ togun tɔn é zɔ́n bɔ togun ɔ lɛ́ kpé wú bo vɔ́ Mawu sinsɛn nǔgbó ɔ ɖó ayǐ. Nyɔ̌ná ɖé wɛ é nyí ɖɔ Jexóva nyí Mɛ̌si ɖaxó mǐtɔn égbé.

9. Ðɔ ali e nu Jexóva nɔ xlɛ́ ali mǐ ɖe égbé lɛ́ é ɖokpó.

⁹ Ðo wěmafɔ énɛ́ lɛ́ mɛ ɔ, Ezayíi ɖɔ azɔn we ɖɔ mǐ cí wěmaxɔmɛví lɛ́ ɖɔhun bɔ Jexóva ɖo nǔ kplɔ́n mǐ wɛ. Jɛ nukɔn hwɛ̌ ɔ, é ɖɔ: “A ná mɔ Mɛ̌si ɖaxó towe kpó nukún towe lɛ́ ɖésú kpó.” Ðo nǔjlɛ́dónǔwú énɛ́ mɛ ɔ, é cí ɖɔ mɛ̌si e xó ɖɔ wɛ Ezayíi ɖe é ɖo te ɖo wěmaxɔmɛví tɔn lɛ́ nukɔn wɛ ɖɔhun. Wǔjɔmɛ ɖaxó wɛ é nyí ɖɔ Mawu ɖo nǔ kplɔ́n mǐ wɛ égbé. Nɛ̌ Jexóva ka nɔ kplɔ́n nǔ mǐ gbɔn? É nɔ wa mɔ̌ gbɔn tutoblónúnǔ  tɔn gblamɛ. É su nukún mǐtɔn mɛ tawun ɖɔ tutoblónúnǔ Jexóva tɔn nɔ ɖe wě e za wě lɛ́ é xá mǐ! Wě e é nɔ ɖe xá mǐ ɖo kplé mǐtɔn lɛ́ kpó kpléɖókpɔ́ lɛ́ kpó hwenu é, gɔ́ nú wě e é nɔ ɖe xá mǐ gbɔn wěma lɛ́, tito televizyɔn jí tɔn lɛ́ kpó ali gěgé ɖěvo lɛ́ kpó nu lɛ́ é nɔ d’alɔ mǐ, bɔ mǐ nɔ dɛ kpó awǎjijɛ kpó ɖo wǔvɛ́ lɛ́ hwenu.

10. Ali tɛ́ nu mǐ ka nɔ “se gbe ɖé ɖo gǔdo [mǐtɔn]” ɖe?

¹⁰ Ezayíi ɖɔ ali wegɔ́ e nu Jexóva nɔ kplɔ́n nǔ mǐ ɖe é bo ɖɔ: “A ná se gbe ɖé ɖo gǔdo towe.” Gbeyíɖɔ ɔ tínmɛ ɖɔ Jexóva cí mɛ̌si e sín ayi ɖo te, bɔ é ɖo zɔnlin ɖi wɛ ɖo wěmaxɔmɛví tɔn lɛ́ gúdo, bo ɖo ali e yě ná mlɛ́ é xlɛ́ yě wɛ é ɖɔhun. Éhɔ́nmɛ ɔ, mǐ nɔ se gbe Mawu tɔn ɖo gǔdo mǐtɔn. Gbɔn nɛ̌ é? É ko lín tawun din bɔ è wlán xó e Mawu sɔ́ dó ayi mɛ nú mɛ lɛ́ é dó Biblu mɛ. Énɛ́ wú ɔ, ényí mǐ ɖo Biblu xa wɛ ɔ, é nɔ cí ɖɔ mǐ ɖo gbe Mawu tɔn se wɛ ɖo gǔdo mǐtɔn ɖɔhun.—Eza. 51:4.

11. Bo ná dó dɛ kpó awǎjijɛ kpó ɔ, afɔ tɛ́ lɛ́ mǐ ka ɖó ná ɖe? Aniwú?

¹¹ Nɛ̌ mǐ ka sixú ɖu le wě e Jexóva nɔ ɖe xá mǐ gbɔn tutoblónúnǔ tɔn kpó Xó tɔn kpó gblamɛ é tɔn bǐ mlɛ́mlɛ́ gbɔn? Ð’ayi wú ɖɔ nǔ we xó wɛ Ezayíi ɖɔ. Nukɔntɔn ɔ, “ali ɔ ɖíe.” Wegɔ́ ɔ, “wlǐ bo ɖidó.” (Eza. 30:21) É ko kpé kpowun ɖɔ è ní tuun “ali ɔ” ǎ. Mǐ ɖó ná “wlí bo ɖidó.” Xó Jexóva tɔn kpó tínmɛ e tutoblónúnǔ tɔn nɔ ná lɛ́ é kpó nɔ kplɔ́n mǐ nǔ e Jexóva byɔ́ ɖo mǐ sí lɛ́ é. Mǐ nɔ lɛ́ kplɔ́n lěe mǐ ná zán nǔ e mǐ kplɔ́n lɛ́ é gbɔn é. Bo ná dó dɛ kpó awǎjijɛ kpó ɖo Jexóva e sɛn wɛ mǐ ɖe é mɛ ɔ, mǐ ɖó ná ɖe afɔ we énɛ́ lɛ́. Mɔ̌ jɛ́n mǐ ɖó ná wa cóbó ná ɖu nyɔ̌ná Jexóva tɔn lɛ́ sín le.

12. Sɔgbe kpó Ezayíi 30:23-26 kpó ɔ, nɛ̌ Jexóva ka kɔn nyɔ̌ná dó togun tɔn jí gbɔn?

¹² Xa Ezayíi 30:23-26. Nɛ̌ nǔɖɔɖayǐ énɛ́ ka jɛnu dó Jwifu ɖěɖěe gosín kannumɔgbénu ɖo Babilɔ́nu bo lɛ́ kɔ yi Izlayɛ́li lɛ́ é wú gbɔn? Yě ɖu nyɔ̌ná gěgé sín le ɖo agbaza kpó gbigbɔ kpó lixo. Jexóva ná nǔɖuɖu togun tɔn bɔ é túnflá. Amɔ̌, tají hú gǎn ɔ, é ná yě nǔ e sín hudó yě ɖó bo ná vɛ́ kpó é kpó, lobo lɛ́ jɛ sinsɛn ɛ jí ɖo ali e sɔgbe é nu lɛ́ é bǐ. Nyɔ̌ná gbigbɔ tɔn e sín vǐví togun ɔ ɖu hwenɛ́nu é zɛ éé sín vǐví togun ɔ ko ɖu wá yi lɛ́ é bǐ wú. Lěe wěmafɔ 26gɔ́ ɔ xlɛ́ gbɔn é ɔ, Jexóva bló bɔ wěziza nǔgbó ɔ tɔn hɔ́n d’é jí. (Eza. 60:2) Nyɔ̌ná Jexóva tɔn lɛ́ d’alɔ mɛsɛntɔ́ tɔn lɛ́ bɔ yě kpo ɖo sinsɛn ɛ wɛ kpó awǎjijɛ kpó, bo nɔ lɛ́ wa mɔ̌ kpó kanɖódónǔwú kpó “ɖó ninɔmɛ ayi mɛ tɔn ɖagbe e yě ɖó é wú.”—Eza. 65:14, nwt.

13. Nɛ̌ nǔɖɔɖayǐ e kúnkplá Mawu sinsɛn nǔgbó ɔ vívɔ́ ɖ’ayǐ é ka jɛnu ɖo hwe mǐtɔn nu gbɔn?

 ¹³ Nǔɖɔɖayǐ e kúnkplá Mawu sinsɛn nǔgbó ɔ é ka kan mǐ ɖo égbé a? Ganjí! Ðo ali tɛ́ nu? Sín 1919 H.M. tɔn ɔ, gbɛtɔ́ lǐvi mɔ̌kpán ko gosín Babilɔ́nu ɖaxó e nyí kplékplé sinsɛn nǔvú lɛ́ bǐ tɔn é kannu. Fí ɖagbe e nyɔ́ hú gǎn Akpádídó yíkúngban e ɖo Izlayɛ́li é wɛ è kplá yě yi. Palaɖísi gbigbɔ tɔn ɖé mɛ wɛ è kplá yě yi. (Eza. 51:3; 66:8) Étɛ́ ka nyí palaɖísi gbigbɔ tɔn ɔ?

14. Étɛ́ ka nyí palaɖísi gbigbɔ tɔn ɔ? Mɛ̌ mɛ̌ e ka ɖ’é mɛ? (Kpɔ́n Tínmɛ ɖé lɛ́.)

¹⁴ Sín 1919 H.M. tɔn ɔ, mɛ yí ami dó ɖe lɛ́ ko ɖo vǐví palaɖísi gbigbɔ tɔn ɖé tɔn ɖu wɛ. b Hwenu ɖo yiyi wɛ é ɔ, mɛ ɖěɖěe ɖó nukúnɖíɖó ayǐkúngban jí tɔn lɛ́ é, énɛ́ wɛ nyí “lɛ̌ngbɔ́ ɖěvo lɛ́” lɔmɔ̌ wá palaɖísi gbigbɔ tɔn énɛ́ mɛ, bo ɖo nyɔ̌ná maxamaxa Jexóva tɔn lɛ́ sín vǐví ɖu wɛ.—Jaan 10:16; Eza. 25:6; 65:13.

15. Fítɛ́ palaɖísi gbigbɔ tɔn ɔ ka ɖe?

¹⁵ Fítɛ́ palaɖísi gbigbɔ tɔn ɔ ka ɖe ɖo égbé? Jexóva sɛntɔ́ lɛ́ nɔ nɔ fí vovo lɛ́ ɖo ayǐkúngban ɔ bǐ jí. Énɛ́ wú ɔ, palaɖísi gbigbɔ tɔn e mɛ yě ɖe é lɔ gbɔn gbɛ ɔ bǐ mɛ. Égbé ɔ, mǐ ná bo tlɛ nɔ nɔ fí ɖěbǔ ɖo ayǐkúngban ɔ jí ɔ, mǐ sixú nɔ palaɖísi gbigbɔ tɔn énɛ́ mɛ, ényí mǐ vɛ́ ko ɖo gǔdo nɔ nú Mawu sinsɛn nǔgbó ɔ wɛ hwebǐnu ɔ nɛ́.

16. Nɛ̌ mǐ ka sixú kpo ɖo ayi sɔ́ ɖó ɖɛkpɛ e palaɖísi gbigbɔ tɔn mǐtɔn nyɔ́ é jí wɛ gbɔn?

¹⁶ Bo ná dó kpo ɖo palaɖísi gbigbɔ tɔn ɔ mɛ ɔ, nǔ e mǐ ná wa é ɖokpó wɛ nyí ɖɔ kplékplé nɔví lɛ́ tɔn mǐtɔn e gbɔn gbɛ ɔ bǐ mɛ é ná kpo ɖo nukún mǐtɔn mɛ su wɛ. Nɛ̌ mǐ ka sixú wa énɛ́ gbɔn? Mǐ ná nɔ sɔ́ ayi ɖó jijɔ ɖagbe nɔví mǐtɔn lɛ́ tɔn jí, é ná nyí dó nǔwanyido yětɔn lɛ́ jí ǎ. (Jaan 17:20, 21) Étɛ́wú énɛ́ ka ɖo tají tawun? Lin tamɛ dó nǔjlɛ́dónǔwú élɔ́ jí. Lěe atín vovo e ɖo jikpá ɖé mɛ lɛ́ é nɔ zɔ́n bɔ jikpá ɔ nɔ nyɔ́ ɖɛkpɛ gbɔn é ɔ, mɔ̌ wɛ gbɛtɔ́ vovo e ɖo palaɖísi gbigbɔ tɔn mǐtɔn mɛ lɛ́ é nɔ zɔ́n bɔ agun ɔ nɔ nyɔ́ ɖɛkpɛ gbɔn é nɛ́. (Eza. 44:4; 61:3) Mǐ ɖó ná wa nǔ e wú mǐ kpé é bǐ bo  ná kpo ɖo ayi sɔ́ ɖó lě do “jikpá ɔ” bǐ nyɔ́ ɖɛkpɛ sɔ é jí wɛ, é ná nyí dó lěe “atín” e sɛkpɔ́ mǐ é ɖé lɛ́ ɖó blɔ̌ gbɔn é jí ǎ. Mǐ ɖó ná lɔn nú nǔwanyido mǐɖésúnɔ tɔn lɛ́, alǒ nǔwanyido mɛ ɖěvo e ɖo agun ɔ mɛ lɛ́ é tɔn ná ɖe ayi mǐtɔn sín ɖɛkpɛ e agun klisánwun tɔn e gbɔn gbɛ ɔ bǐ mɛ é nyɔ́ é jí ǎ.

17. Étɛ́ mǐ mɛ ɖokpó ɖokpó ka sixú wa dó gɔ́ so nú bǔninɔ ɖo agun ɔ mɛ?

¹⁷ Étɛ́ mǐ mɛ ɖokpó ɖokpó ka sixú wa dó gɔ́ so nú bǔninɔ ɖo agun ɔ mɛ? Mǐ sixú nɔ xo fífá kan. (Mat. 5:9; Hlɔ̌. 12:18) Hweɖébǔnu e mǐ ɖe afɔ nukɔntɔn ɔ dó xo fífá kan ɖo agun ɔ mɛ é ɔ, ɖɛkpɛ e palaɖísi gbigbɔ tɔn mǐtɔn nyɔ́ é gɔ́ so ná wɛ mǐ ɖe mɔ̌ nɛ́. Mǐ nɔ hɛn dó ayi mɛ ɖɔ Jexóva wɛ dɔn mɛ ɖěɖěe ɖo palaɖísi gbigbɔ tɔn ɔ mɛ lɛ́ é ɖokpó ɖokpó, bónú yě ná sɛn ɛ lěe é ba gbɔn é. (Jaan 6:44) Ényí Jexóva mɔ mǐ bɔ mǐ ɖo tíntɛ́nkpɔ́n wɛ bá gɔ́ so nú fífá kpó bǔninɔ kpó e ɖo mɛsɛntɔ́ tɔn e xɔ akwɛ́ tawun n’i lɛ́ é tɛ́ntin é ɔ, dǒ nukún lě do xomɛ nɔ hun i sɔ é mɛ kpɔ́n!—Eza. 26:3; Ajée 2:7.

18. Étɛ́ jí mǐ ka ɖó ná nɔ lin tamɛ dó hwɛhwɛ? Aniwú?

¹⁸ Jexóva nɔ ná nǔ ɖagbe gěgé mɛsɛntɔ́ tɔn lɛ́. Énɛ́ wú ɔ, nɛ̌ mǐ ka sixú ɖu le nǔ énɛ́ lɛ́ tɔn bǐ mlɛ́mlɛ́ gbɔn? Mǐ sixú nɔ lin tamɛ dó nǔ e mǐ nɔ kplɔ́n ɖo Xó Mawu tɔn kpó wěma mǐtɔn lɛ́ kpó mɛ é jí. Nǔ énɛ́ lɛ́ kplɔ́nkplɔ́n kpó tamɛ linlin dó yě jí kpó ná d’alɔ mǐ bɔ mǐ ná sɔ́ nǔ nú jijɔ klisánwun tɔn e ná sísɛ́ mǐ, bɔ mǐ ná nɔ ɖe “wanyiyi nɔví nɔví tɔn” kpó “wǎnyíyí ɖaxó” kpó xlɛ́ mɛ e ɖo agun ɔ mɛ lɛ́ é. (Hlɔ̌. 12:10, nwt) Ényí mǐ nɔ lin tamɛ dó nyɔ̌ná e mɔ wɛ mǐ ɖe din lɛ́ é jí ɔ, mǐ nɔ bló bɔ xɔ́ntɔn e mǐ zun xá Jexóva é nɔ lɛ́ vɛ́ d’é jí. Gɔ́ ná ɔ, tamɛ linlin dó nyɔ̌ná ɖěɖěe Jexóva sɔ́ ɖó sɛxwetɛn nú mǐ lɛ́ é jí ná zɔ́n bɔ nukúnɖíɖó e mǐ ɖó bo ná sɛn ɛ káká sɔ́yi é ná ɖo gbɛ. Nǔ énɛ́ lɛ́ bǐ ná gɔ́ so nú awǎjijɛ e mǐ nɔ mɔ ɖo Jexóva sinsɛn mɛ din é.

19. (a) Sɔgbe xá Ezayíi 30:18 ɔ, gǎnjɛwú tɛ́ mǐ ka sixú ɖó? (b) Étɛ́ ka ná d’alɔ mǐ bɔ mǐ ná dɛ kpó awǎjijɛ kpó?

¹⁹ Jexóva “ná sí te” bo wa nǔ dó takún mǐtɔn mɛ hwenu e é ná sú kún dó nú gbɛ nyanya élɔ́ é. (Eza. 30:18, nwt) Mǐ kú d’é jí ɖɔ Jexóva e nyí “Mawu hwɛjijɔnɔ” é kún ná jó gbɛ Satáan tɔn dó bɔ é ná lɛ́ nɔ ayǐ nú kéze ɖokpó d’é jí hú gǎn lěe é ná nyí gbɔn é ó. (Eza. 25:9) Mǐ ɖo te kpɔ́n azǎn e gbe Jexóva ná hwlɛ́n mǐ é kpó suúlu kpó. Din hwɛ̌ ɔ, mǐ kán ɖ’é jí bo ná kpo ɖo bo wlí nú wǔ e è jɔ mǐ bɔ mǐ ná nɔ xo ɖɛ, kplɔ́n Xó Mawu tɔn bo nɔ lɛ́ zán, lobo nɔ lɛ́ lin tamɛ dó nyɔ̌ná mǐtɔn lɛ́ jí é wɛ. Ée mǐ ná ɖo mɔ̌ wa wɛ é ɔ, Jexóva ná d’alɔ mǐ bɔ mǐ ná dɛ, lobo sɛn ɛ kpó awǎjijɛ kpó.