1. Étɛ́ mǐ ka sixú ɖó nukún? Étɛ́ jí mǐ ka sixú kú dó?

 MǏ SIXÚ ɖó nukún ɖɔ ényí mǐ ɖo wɛnɖagbejíjlázɔ́ mǐtɔn wa wɛ ɔ, mɛ lɛ́ ná klán gbe xá mǐ. Gbeklánxámɛ énɛ́ sixú jɛjí ɖo sɔgúdo. (Dan. 11:44; 2 Tim. 3:12; Nǔɖe. 16:21) Amɔ̌, mǐ sixú ɖeji ɖɔ Jexóva ná d’alɔ e sín hudó mǐ ɖó é mǐ. Aniwú? Hwebǐnu wɛ Jexóva nɔ d’alɔ mɛsɛntɔ́ tɔn lɛ́ bɔ yě nɔ kpé azɔ̌ yětɔn lɛ́ wú, ényí azɔ̌ lɛ́ ná bo tlɛ vɛ́ wǔ gbɔn ɖěbǔ ɔ nɛ́. Ði kpɔ́ndéwú ɔ, mi nú mǐ ní gbéjé nǔ e jɛ ɖo gbɛzán gbeyíɖɔ Ezekiyɛ́li tɔn mɛ é ɖé lɛ́ kpɔ́n. Gbeyíɖɔ énɛ́ wɛ ɖɔ Mawuxó nú Jwifu ɖěɖěe è wlí ahwankannumɔ yětɔn yi Babilɔ́nu lɛ́ é.

2. Étɛ́ Jexóva ka ɖɔ dó mɛ e ɖo fí e Ezekiyɛ́li nɔ ɖɔ Mawuxó gbɔn lɛ́ é wú? Étɛ́ lɛ́ mǐ ka ná gbéjé kpɔ́n ɖo xóta élɔ́ mɛ? (Ezekiyɛ́li 2:3-6)

² Mɛ alɔkpa tɛ́ lɛ́ ka ɖo fí e Ezekiyɛ́li ɖɔ Mawuxó gbɔn é? Jexóva ɖɔ dó yě wú ɖɔ “yě nɔ se tónú ǎ,” “yě gbɛ́ hɛn,” bo nɔ lɛ́ “fɔ́n gǔ.” Yě nɔ gblé wǔ mɛ wunkan ɖɔhun, bo nɔ ɖó wǔvɛ́ nú mɛ hɔnkéklě ɖɔhun. Yǎyá wú wɛ Jexóva ɖɔ xó élɔ́ nú Ezekiyɛ́li azɔn mɔ̌kpán ǎ: “Ma . . . ɖi xɛsi nú yě ó”! (Xa Ezekiyɛ́li 2:3-6.) Ezekiyɛ́li kpé wú bo wa wɛnɖagbejíjlázɔ́ tɔn ɖó hwɛjijɔ atɔn élɔ́ lɛ́ wú: (1) Jexóva wɛ sɛ́ ɛ dó, (2) gbigbɔ mímɛ́ ná ɛ hlɔ̌nhlɔ́n, (3) Xó Mawu tɔn ná hlɔ̌nhlɔ́n nǔɖiɖi tɔn. Nɛ̌ nǔ atɔn énɛ́ lɛ́ ka d’alɔ Ezekiyɛ́li gbɔn? Nɛ̌ yě ka nɔ d’alɔ mǐ lɔmɔ̌ ɖo égbé gbɔn?

3. Xógbe tɛ́ lɛ́ ka ná ko ná gǎnjɛwú Ezekiyɛ́li? Nɛ̌ Jexóva ka ná ɛ gǎnjɛwú ɖɔ émí ɖo kpɔ́ xá ɛ gbɔn?

³ Jexóva ɖɔ nú Ezekiyɛ́li ɖɔ: “Un sɛ́ we dó.” (Ezek. 2:3, 4) Xógbe énɛ́ lɛ́ ɖó ná ko ná hlɔ̌nhlɔ́n Ezekiyɛ́li. Aniwú? É ɖo wɛn ɖɔ é flín ɖɔ Jexóva ko zán xógbe mɔ̌hun lɛ́ hwenu e é zɔ́n azɔ̌ Mɔyízi kpó Ezayíi kpó ɖɔ yě ní wa gbeyíɖɔzɔ́ é. (Tín.  3:10; Eza. 6:8) Ezekiyɛ́li lɛ́ tuun lěe Jexóva d’alɔ gbeyíɖɔ we énɛ́ lɛ́ bɔ yě wa azɔ̌ syɛ́nsyɛ́n e é sɔ́ d’así nú yě lɛ́ é gbɔn é. Énɛ́ wú ɔ, hwenu e Jexóva ɖɔ nú Ezekiyɛ́li azɔn we ɖɔ: “Un sɛ́ we dó” é ɔ, gbeyíɖɔ ɔ ɖó hwɛjijɔ ɖagbe e wú é ná ɖeji ɖɔ Jexóva ná d’alɔ émí é. Gɔ́ ná ɔ, hwɛhwɛ wɛ è nɔ mɔ nukɛgbe élɔ́ ɖo wěma Ezekiyɛ́li tɔn mɛ: ‘Jexóva ɖɔ nú mì ɖɔ.’ (Ezek. 3:16; 6:1) É ɖo wɛn ɖɔ Ezekiyɛ́li kú d’é jí ɖɔ Jexóva wɛ sɛ́ émí dó. Gɔ́ ná ɔ, ɖó vɔ̌sánúxwlémawutɔ́ sín vǐ wɛ Ezekiyɛ́li nyí wútu ɔ, tɔ́ tɔn sixú ko kplɔ́n nǔ i dó lěe Jexóva ná gǎnjɛwú gbeyíɖɔ tɔn lɛ́ ɖɔ émí ná d’alɔ yě hwebǐnu gbɔn é wú. Ði kpɔ́ndéwú ɔ, Jexóva ɖɔ nú Izáki ɖɔ: “Un ɖo kpɔ́ xá we.” É lɛ́ ɖɔ xó ɖokpó ɔ nú Jakɔ́bu kpó Jelemíi kpó.—Bǐb. 26:24; 28:15; Jel. 1:8.

4. Xógbe gbɔdónúmɛ tɔn tɛ́ lɛ́ ka dó gbɔ nú Ezekiyɛ́li?

⁴ Nɛ̌ Izlayɛ́li ví lɛ́ gěgé ka ná yí wɛn e Ezekiyɛ́li ná dó yě é gbɔn? Jexóva ɖɔ: “Izlayɛ́li ví lɛ́ ka ná ba ná ɖótó we ǎ, ɖó yě jló ná se xó ce ǎ.” (Ezek. 3:7) Gbɛ̌ e togun ɔ gbɛ́ Ezekiyɛ́li é xlɛ́ ɖɔ Jexóva gbɛ́ wɛ é ɖe mɔ̌ nɛ́. Xógbe énɛ́ lɛ́ ná gǎnjɛwú Ezekiyɛ́li ɖɔ gbɛ̌ e togun ɔ gbɛ́ ɛ é kún xlɛ́ ɖɔ é xo gbeyíɖɔzɔ́ tɔn kpo ó. Jexóva lɛ́ ná gǎnjɛwú Ezekiyɛ́li ɖɔ hwenu e wɛn hwɛɖónúmɛ tɔn e é jlá lɛ́ é ná jɛnu é ɔ, togun ɔ “ná tuun ɖɔ gbeyíɖɔ Mawu tɔn ɖokpó ɖo émí mɛ.” (Ezek. 2:5; 33:33) É ɖo wɛn ɖɔ xógbe gbɔdónúmɛ tɔn énɛ́ lɛ́ ná Ezekiyɛ́li hlɔ̌nhlɔ́n e sín hudó é ɖó bo ná wa sinsɛnzɔ́ tɔn é.

5. Sɔgbe xá Ezayíi 44:8 ɔ, fítɛ́ mǐ ka nɔ ba hlɔ̌nhlɔ́n sín?

⁵ Tuun e mǐ tuun ɖɔ Jexóva wɛ sɛ́ mǐ lɔ dó é nɔ ná hlɔ̌nhlɔ́n mǐ. É wlí yɛ̌yi nú mǐ bo nɔ ylɔ́ mǐ ɖɔ “Kúnnuɖetɔ́” tɔn lɛ́. (Eza. 43:10) Wǔjɔmɛ ɖaxó tɛ́ ɖíe! Jexóva ɖɔ nú Ezekiyɛ́li ɖɔ é ní “ma . . . ɖi xɛsi nú yě ó,” b’ɛ  cí ɖɔ é ɖo ɖiɖɔ nú mǐ lɔmɔ̌ wɛ ɖɔ “mi ma ɖi xɛsi ó” ɖɔhun. Étɛ́wú mǐ ma ka ɖó hwɛjijɔ ɖěbǔ bo ná ɖi xɛsi nú gbeklánxámɛtɔ́ mǐtɔn lɛ́ ǎ? Ðó Ezekiyɛ́li ɖɔhun ɔ, Jexóva wɛ sɛ́ mǐ dó, bo ka ɖo gǔdo nú mǐ.—Xa Ezayíi 44:8.

6. (a) Nɛ̌ Jexóva ka nɔ ná mǐ gǎnjɛwú ɖɔ émí ɖo kpɔ́ xá mǐ gbɔn? (b) Étɛ́ ka nɔ dó gbɔ nú mǐ, bo nɔ lɛ́ ná mǐ hlɔ̌nhlɔ́n?

⁶ Jexóva ná mǐ gǎnjɛwú ɖɔ émí ná ɖo gǔdo nú mǐ. Ði kpɔ́ndéwú ɔ, cóbónú é ná ɖɔ: “Midɛɛ lɛ́ wɛ nyí Kúnnuɖetɔ́ ce” ɔ, é ɖɔ: “A ɖo tɔ mɛ gbɔn wɛ ɔ, un ná ɖo kpɔ́ xá we; a ɖo tɔ gbo wɛ ɔ, a ná kú tɔ ǎ. A ɖo zɔnlin ɖi gbɔn myɔ mɛ wɛ ɔ, a ná ji myɔ ǎ, myɔ ná wa nǔɖé nú we ǎ.” (Eza. 43:2) Ðo sinsɛnzɔ́ ɔ mɛ ɔ, mǐ nɔ wá mɔ wǔvɛ́ ɖé lɛ́ bɔ è sixú sɔ́ yě jlɛ́ dó tɔ wú, bo sixú sɔ́ tagba syɛ́nsyɛ́n e mɛ mǐ nɔ gbɔn lɛ́ é jlɛ́ dó myɔ wú. Amɔ̌, Jexóva ná d’alɔ mǐ bɔ mǐ ná kpo ɖo wɛn ɖagbe ɔ jlá wɛ. (Eza. 41:13) Lěe é nyí gbɔn ɖo Ezekiyɛ́li hwenu é ɔ, mɛ gěgé nɔ gbɛ́ wɛn mǐtɔn ɖo égbé. Mǐ nɔ kpo ɖo hinhɛn d’ayi mɛ wɛ ɖɔ gbɛ̌ e yě gbɛ́ wɛn e jlá wɛ mǐ ɖe é kún xlɛ́ ɖɔ mǐ xo Kúnnuɖetɔ́ Mawu tɔn e mǐ nyí é sín azɔ̌ kpo ó. Tuun e mǐ tuun ɖɔ nǔ mǐtɔn nɔ nyɔ́ Jexóva nukúnmɛ, ɖó mǐ kpo ɖo wɛn tɔn jlá wɛ kpó gbejíninɔ kpó wútu é nɔ dó gbɔ nú mǐ, lobo nɔ lɛ́ ná mǐ hlɔ̌nhlɔ́n. Mɛsɛ́dó Pɔ́lu ɖɔ: “Mɛ ɖokpó ɖokpó ná mɔ lěe é wa nǔ gbɔn ɔ sín ajɔ yí ɖo Mawu sí.” (1 Kɔ. 3:8; 4:1, 2) Nɔví nyɔ̌nu e ɖo gběxosín-alijítɔ́zɔ́ wa wɛ sín hwenu línlín ɖíe é ɖokpó ɖɔ: “Tuun e un tuun ɖɔ Jexóva nɔ d’ajɔ mǐ ɖó gǎndídó mǐtɔn lɛ́ wú é nɔ d’awǎjijɛ nú mì.”

7. Ényí Ezekiyɛ́li lin tamɛ dó nǔ e é mɔ ɖo nǔmimɔ mɛ é jí hweɖébǔnu ɔ, nɛ̌ nǔ ka ná ko nɔ cí n’i? (Kpɔ́n ɖiɖe e ɖo akpa ɔ jí é.)

⁷ Ezekiyɛ́li mɔ lě do gbigbɔ mímɛ́ Mawu tɔn ɖó hlɔ̌nhlɔ́n sɔ é. Nǔ e Ezekiyɛ́li mɔ ɖo nǔmimɔ mɛ é d’alɔ ɛ bɔ é kú d’é jí ɖɔ gbigbɔ mímɛ́ Jexóva tɔn ɖo alɔ dó wɛnsagun hlɔ̌nhlɔ́nnɔ lɛ́ wɛ, bo lɛ́ ɖo tɛn sɛ nú ahwankɛkɛ́ ɖaxó jǐxwé tɔn ɔ wɛ. (Ezek. 1:20, 21) Ée Ezekiyɛ́li mɔ nǔ énɛ́ é ɔ, nɛ̌ é ka wa nǔ gbɔn? É wlán ɖɔ: “Ée un mɔ mɔ̌ ɔ, un xwe agbɔ̌nnusú do.” Nǔ e Ezekiyɛ́li mɔ é jí wǔ n’i sɔmɔ̌ bɔ é xwe agbɔ̌nnusú do. (Ezek. 1:28) Ényí Ezekiyɛ́li lin tamɛ dó nǔmimɔ jí wú énɛ́ jí hweɖébǔnu ɔ, é ná ko nɔ ná hlɔ̌nhlɔ́n kán e é kán ɖ’é jí ɖɔ kpó alɔdó gbigbɔ mímɛ́ Mawu tɔn tɔn kpó ɔ, émí ná kpé sinsɛnzɔ́ émítɔn wú é.

8-9. (a) Ée Jexóva ɖɔ nú Ezekiyɛ́li ɖɔ é ní “sí te” é ɔ, étɛ́ ka jɛ? (b) Nɛ̌ Jexóva ka lɛ́ dó gǎn gǎn jí nú Ezekiyɛ́li ɖó azɔ̌ syɛ́nsyɛ́n e é sɔ́ d’así n’i é wú gbɔn?

⁸ Jexóva ɖe gbe nú Ezekiyɛ́li ɖɔ: “Hwi gbɛtɔ́ ɔ, sí te bo nɔ te, un ɖó xó ɖé bo ná ɖɔ nú we.” Gbe énɛ́ e Jexóva ɖe é kpó gbigbɔ mímɛ́ tɔn kpó ná Ezekiyɛ́li hlɔ̌nhlɔ́n e sín hudó é ɖó bá sí te sín kɔ́mɛ é. Ezekiyɛ́li wlán ɖɔ: “[Gbigbɔ] Mawu tɔn wá jǐ ce, bo zé mì sí te.” (Ezek. 2:1, 2) Sín hwenɛ́nu káká jɛ vivɔnu sinsɛnzɔ́ Ezekiyɛ́li tɔn tɔn ɔ, Mawu xlɛ́ ali i kpó hlɔ̌nhlɔ́n tɔn kpó, énɛ́ wɛ nyí, kpó gbigbɔ mímɛ́ tɔn kpó. (Ezek. 3:22; 8:1; 33:22; 37:1; 40:1) Gbigbɔ mímɛ́ Mawu tɔn ná hlɔ̌nhlɔ́n Ezekiyɛ́li ɖo azɔ̌ e è sɔ́ d’así n’i é kɔn, énɛ́ wɛ nyí Mawuxó e é ná ɖɔ nú ‘nǔgbɛ́hɛn kpó mɛ e ali ma yi tó yětɔn mɛ ǎ lɛ́ é kpó’ é. (Ezek. 3:7) Jexóva ɖɔ nú Ezekiyɛ́li ɖɔ: “Un ná sɔ́ hwi lɔ dó húzú nǔgbɛ́hɛn, ali ná yi tó hwi lɔ tɔn mɛ ǎ yěɖɔhun. Un ná sɔ́ we dó húzú mɛɖé bɔ a ná syɛ́n awǐnnya xɔ akwɛ́ diamáá ɖɔhun; a ná syɛ́n hú só. Énɛ́ ɔ wú ɔ, ma ɖi xɛsi nú yě ó.” (Ezek. 3:8, 9) È ná ɖɔ xójɔxó ɔ, ɖiɖɔ nú Ezekiyɛ́li wɛ Jexóva ɖe ɖɔ: ‘Ma lɔn nú lě do togun ɔ syɛ́n ta sɔ é ní dó awakanmɛ kú nú we ó. Un ná ná hlɔ̌nhlɔ́n we.’

⁹ Énɛ́ gúdo ɔ, gbigbɔ mímɛ́ Mawu tɔn d’alɔ Ezekiyɛ́li bɔ é wa sinsɛnzɔ́ tɔn. Ezekiyɛ́li  wlán ɖɔ: ‘Hlɔ̌nhlɔ́n Jexóva tɔn wá jǐ ce bɔ é syɛ́n ɖésú.’ Aklúnɔzángbla ɖokpó wɛ é byɔ́ ɖo gbeyíɖɔ ɔ sí cóbɔ é kplɔ́n wɛn e ná jlá mɛ lɛ́ wɛ é ɖe é, lobo lɛ́ mɔ nǔ jɛ mɛ. (Ezek. 3:14, 15) Énɛ́ gúdo ɔ, Jexóva ɖɔ n’i ɖɔ é ní yi tɔdo ɖé mɛ; fínɛ́ wɛ ‘gbigbɔ Mawu tɔn wá jǐ tɔn’ ɖe. (Ezek. 3:23, 24) Ezekiyɛ́li ɖo gbesisɔmɛ bo ná bɛ́ sinsɛnzɔ́ tɔn.

10. Alɔdó tɛ́ sín hudó mǐ ka ɖó bo ná wa wɛnɖagbejíjlázɔ́ mǐtɔn? Aniwú?

¹⁰ Alɔdó tɛ́ sín hudó mǐ ka ɖó, bo ná wa wɛnɖagbejíjlázɔ́ mǐtɔn? Bo ná dó mɔ xósin ɔ ɔ, mi nú mǐ ní lɛ́ lin tamɛ dó nǔ e jɛ dó Ezekiyɛ́li jí é jí. Cóbónú é ná jɛ wɛn ɖagbe ɔ jlá jí ɔ, gbigbɔ mímɛ́ Mawu tɔn ná ɛ hlɔ̌nhlɔ́n e sín hudó é ɖó é. Lěe é nyí gbɔn ɖo ninɔmɛ Ezekiyɛ́li tɔn mɛ é ɔ, égbé ɔ, gbigbɔ mímɛ́ Mawu tɔn jɛ́n sixú nyí tɔn bɔ mǐ ná kpé wɛnɖagbejíjlázɔ́ mǐtɔn wú. Aniwú? Ðó Satáan tɔ́n ahwan mǐ, bo ba ná ɖó wɛnɖagbejíjlázɔ́ mǐtɔn te. (Nǔɖe. 12:17) Ðo gbɛtɔ́ nukúnmɛ ɔ, é cí ɖɔ Satáan ɖó hlɔ̌nhlɔ́n tawun bɔ mǐ kún sixú ɖu ɖo ahwan e fun xá ɛ wɛ mǐ ɖe é jí ó ɖɔhun. Amɔ̌, gbɔn wɛnɖagbejíjlázɔ́ mǐtɔn gblamɛ ɔ, mǐ nɔ ɖu ɖo jǐ tɔn! (Nǔɖe. 12:9-11) Ðo ali tɛ́ nu? Ényí mǐ nɔ ɖ’alɔ ɖo sinsɛnzɔ́ ɔ mɛ hǔn, xlɛ́xlɛ́ wɛ mǐ ɖe mɔ̌ ɖɔ mǐ kún ɖo xɛsi ɖi nú ahwan e tɔ́n mǐ wɛ Satáan ɖe é ó nɛ́. Hweɖébǔnu e mǐ ɖɔ Mawuxó é ɔ, é nɔ cí ɖɔ Satáan cí ahwan wɛ ɖɔhun. Énɛ́ wú ɔ, gbeklánxámɛ lɛ́ nɔ ɖo fínɛ́ có, mǐ nɔ kpé wú bo nɔ wa wɛnɖagbejíjlázɔ́ mǐtɔn. Étɛ́ énɛ́ ka xlɛ́? Énɛ́ xlɛ́ ɖɔ gbigbɔ mímɛ́ Mawu tɔn nɔ ná hlɔ̌nhlɔ́n mǐ, lobɔ nǔ mǐtɔn lɛ́ nyɔ́ Jexóva nukúnmɛ.—Mat. 5:10-12; 1 Pi. 4:14.

11. Étɛ́ gbigbɔ mímɛ́ Mawu tɔn ka ná wa nú mǐ? Étɛ́ mǐ ka sixú wa bo ná kpo ɖo mimɔ wɛ?

¹¹ Ényí mǐ nɔ lin tamɛ dó lěe Jexóva ná hlɔ̌nhlɔ́n e sín hudó Ezekiyɛ́li ɖó bo ná jlá wɛn ɖagbe ɔ gbɔn é jí ɔ, nǔ ɖěvo tɛ́ énɛ́ ka sixú kplɔ́n mǐ? Gbigbɔ mímɛ́ Mawu tɔn sixú ná mǐ hlɔ̌nhlɔ́n e sín hudó mǐ ɖó bo ná ɖí xwi xá wǔvɛ́ ɖěbǔ e mǐ ná mɔ ɖo sinsɛnzɔ́ ɔ mɛ é. (2 Kɔ. 4:7-9) Bɔ étɛ́ mǐ ka  sixú wa bo ná dó kú d’é jí ɖɔ mǐ kpo ɖo gbigbɔ mímɛ́ Mawu tɔn mɔ wɛ? Mǐ ɖó ná nɔ xo ɖɛ kpó kanɖódónǔwú kpó dó byɔ́, lobo kú d’é jí ɖɔ Jexóva ná se ɖɛ e xo sɛ́dó è wɛ mǐ ɖe lɛ́ é. Jezu kplɔ́n ahwanvú tɔn lɛ́ ɖɔ: “Mi ní nɔ ɖo byɔ̌byɔ́ wɛ, . . . mi ní nɔ ɖo biba wɛ, . . . mi ní nɔ ɖo hɔn xúxú wɛ.” Wǎgbɔ tɔn ɔ, Jexóva ná “ná gbigbɔ mímɛ́ mɛ e nɔ ɖo byɔ̌byɔ́ ɛ wɛ lɛ́ é.”—Luk. 11:9, 13, nwt; Mɛ. 1:14; 2:4.

12. Sɔgbe xá Ezekiyɛ́li 2:9–3:3 ɔ, fítɛ́ wěma mlámlá ɔ ka gosín? Étɛ́ ka ɖ’é mɛ?

¹² Gbigbɔ mímɛ́ Mawu tɔn ná Ezekiyɛ́li akɔ́nkpinkpan e sín hudó é ɖó bo ná jlá wɛn ɖagbe ɔ é. Amɔ̌, Xó Mawu tɔn lɔ ná hlɔ̌nhlɔ́n nǔɖiɖi Ezekiyɛ́li tɔn. Ðo nǔ e Ezekiyɛ́li mɔ é mɛ ɔ, é mɔ alɔ ɖé bɔ é hɛn wěma mlámlá ɖokpó. (Xa Ezekiyɛ́li 2:9–3:3.) Fítɛ́ wěma mlámlá ɔ ka gosín? Étɛ́ ka ɖ’é mɛ? Nɛ̌ Ezekiyɛ́li ka ɖu wěma mlámlá ɔ gbɔn? Mi nú mǐ ní kpɔ́n. Axɔ́súzinkpo Mawu tɔn nukɔn wɛ wěma mlámlá ɔ gosín. É cí ɖɔ wɛnsagun ɛnɛ e Ezekiyɛ́li mɔ wá yi lɛ́ é ɖokpó wɛ Jexóva zán bɔ é hɛn wěma mlámlá ɔ wá nú Ezekiyɛ́li. (Ezek. 1:8; 10:7, 20) Xó Mawu tɔn wɛ ɖo wěma mlámlá ɔ mɛ. Wɛn hwɛɖónúmɛ tɔn e Ezekiyɛ́li ná dó gǔfɔ́ntɔ́ e è wlí ahwankannumɔ yětɔn lɛ́ é wɛ gɔ́ wěma mlámlá énɛ́ mɛ. (Ezek. 2:7) Gǔdo nukɔn bǐ wɛ wɛn ɔ gbɔn ɖo wěma mlámlá énɛ́ jí.

13. Étɛ́ Jexóva ka ɖɔ nú Ezekiyɛ́li ɖɔ é ní sɔ́ wěma mlámlá ɔ dó wa? Étɛ́wú wěma mlámlá ɔ ka víví?

¹³ Jexóva ɖɔ nú gbeyíɖɔ tɔn ɖɔ é ní ɖu wěma mlámlá ɔ “bónú adɔgo [tɔn] ní gɔ́.” Ezekiyɛ́li se tónú, bo ɖu wěma mlámlá ɔ bǐ. Étɛ́ ka nyí tínmɛ nǔmimɔ ɔ sín akpáxwé énɛ́ tɔn? Ezekiyɛ́li ɖó ná mɔ nǔ jɛ wɛn e ná dó wɛ é ɖe é mɛ ganjí. É ɖó ná ɖi nǔ nú wɛn énɛ́; énɛ́ wɛ ná sísɛ́ ɛ bɔ é ná jlá. Énɛ́ gúdo ɔ, nǔ maɖónukún ɖé jɛ. Ezekiyɛ́li ɖ’ayi wú ɖɔ wěma mlámlá ɔ “víví ɖo nu [émítɔn] mɛ wǐin ɖɔhun.” (Ezek. 3:3) Aniwú? Wǔ e è jɔ Ezekiyɛ́li bɔ é ná sɔ́ afɔ Jexóva tɔn ɖó te é víví n’i, bo lɛ́ ná ɛ awǎjijɛ tawun. (Ðɛh. 19:9-12) Nǔ tɔn e nyɔ́ Jexóva nukúnmɛ, bɔ é sɔ́ ɛ bónú é ná nyí gbeyíɖɔ tɔn é su nukún tɔn mɛ tawun.

14. Étɛ́ ka d’alɔ Ezekiyɛ́li bɔ é ɖo gbesisɔmɛ bo ná bɛ́ sinsɛnzɔ́ tɔn?

¹⁴ Nukɔnmɛ ɔ, Jexóva ɖɔ nú Ezekiyɛ́li ɖɔ: “Ðǒtó xó e ɖɔ nú we gbé un ja é céɖécéɖé bo hɛn ayi mɛ.” (Ezek. 3:10) Ðiɖɔ nú Ezekiyɛ́li wɛ Jexóva ɖe gbɔn mɔ̌ ɖɔ é ní sɛ nǔ e ɖo wěma mlámlá ɔ jí lɛ́ é xwe dó ayi mɛ, lobo nɔ lin tamɛ dó yě jí. Ée Ezekiyɛ́li wa mɔ̌ é ɔ, nǔɖiɖi tɔn lí dǒ. Wěma mlámlá ɔ lɛ́ d’alɔ ɛ bɔ é tuun wɛn agbɔ̌nnɔ e ná jlá mɛ lɛ́ wɛ é ɖe é. (Ezek. 3:11) Wɛn Mawu tɔn e ɖo ayi Ezekiyɛ́li tɔn mɛ, bo lɛ́ ɖo nu tɔn é zɔ́n bɔ é ɖo gbesisɔmɛ bo ná bɛ́ sinsɛnzɔ́ tɔn, bo lɛ́ wa yi fó.—Sɔ́ jlɛ́ dó Ðɛhan 19:15 wú.

15. Bo ná dó kpo ɖo sinsɛnzɔ́ mǐtɔn wa wɛ ɔ, étɛ́ mǐ ka ɖó ná “hɛn ayi mɛ”?

¹⁵ Bo ná dó kpo ɖo sinsɛnzɔ́ mǐtɔn wa wɛ ɔ, mǐ lɔmɔ̌ ɖó ná yí gbe bɔ Xó Mawu tɔn ná kpo ɖo hlɔ̌nhlɔ́n ná nǔɖiɖi mǐtɔn wɛ. Mǐ ɖó ná nɔ “hɛn” nǔ e ɖɔ nú mǐ wɛ Jexóva ɖe lɛ́ é bǐ “ayi mɛ.” Éhɔ́nmɛ ɔ, Jexóva nɔ ɖɔ xó nú mǐ gbɔn Xó tɔn Biblu gblamɛ. Nɛ̌ mǐ ka sixú kú d’é jí ɖɔ Xó Mawu tɔn kpo ɖo azɔ̌ wa wɛ ɖo linlin mǐtɔn lɛ́, lěe nǔ nɔ cí nú mǐ é kpó nǔ e nɔ sísɛ́ mǐ bɔ mǐ nɔ wa nǔ lɛ́ é kpó wú gbɔn?

16. Nɛ̌ mǐ ka sixú wa gbɔn bo ná mɔ nukúnnú jɛ Xó Mawu tɔn mɛ ganjí?

¹⁶ Ényí mǐ ɖu nǔ bónú adɔkan mǐtɔn lɛ́ li nǔɖuɖu ɔ gúdo ɔ, é nɔ ná hlɔ̌nhlɔ́n agbaza mǐtɔn. Mɔ̌ ɖokpó ɔ, ényí mǐ kplɔ́n Xó  Mawu tɔn bo lɛ́ lin tamɛ d’é jí ɔ, nǔɖiɖi mǐtɔn nɔ lí dǒ. Mǐ nɔ hɛn nǔkplɔ́nmɛ e kúnkplá wěma mlámlá lɛ́ é ayi mɛ. Jexóva ba ɖɔ Xó émítɔn ní ‘gɔ́ adɔgo mǐtɔn’ mɛ, énɛ́ wɛ nyí ɖɔ mǐ ní mɔ nukúnnú jɛ Xó émítɔn mɛ ganjí. Ðɛ xixo, nǔ kplɔ́nkplɔ́n kpó tamɛ linlin dó nǔ e mǐ kplɔ́n lɛ́ é jí kpó sixú d’alɔ mǐ bɔ mǐ ná kpé énɛ́ wú. Mǐ nɔ tó xo ɖɛ hwɛ̌, bo nɔ sɔ́ nǔ nú ayi mǐtɔn bónú é ná ɖo gbesisɔmɛ nú linlin Mawu tɔn e kplɔ́n gbé mǐ ja é. Énɛ́ gúdo ɔ, mǐ nɔ xa akpáxwé Biblu tɔn ɖé. Mǐ wa mɔ̌ gúdo ɔ, mǐ nɔ yi agbɔ̌n jí bo nɔ lin tamɛ ganjí dó nǔ e mǐ xa é jí. Étɛ́ mɛ é ka nɔ tɔ́n kɔ dó? Lě do mǐ lin tamɛ sɔ é ɔ, mɔ̌ do wɛ mǐ nɔ mɔ nukúnnú jɛ Xó Mawu tɔn mɛ sɔ, bɔ énɛ́ nɔ ná hlɔ̌nhlɔ́n nǔɖiɖi mǐtɔn.

17. Étɛ́wú é ka ɖo tají ɖɔ mǐ ní nɔ lin tamɛ dó nǔ e mǐ xa ɖo Biblu mɛ é jí?

¹⁷ Étɛ́wú é ka ɖo tají ɖɔ mǐ ní nɔ xa Biblu, lobo nɔ lɛ́ lin tamɛ d’é jí? Mɔ̌ wiwa nɔ ná mǐ hlɔ̌nhlɔ́n e sín hudó mǐ ɖó bá mɔ tɛn dó jlá wɛn ɖagbe Axɔ́súɖuto ɔ tɔn din, bo lɛ́ jlá wɛn hwɛɖónúmɛ tɔn syɛ́nsyɛ́n ɔ ɖo malínmálín mɛ é. Gɔ́ ná ɔ, ényí mǐ nɔ lin tamɛ dó jijɔ ɖaaɖagbe Jexóva tɔn lɛ́ jí ɔ, xɔ́ntɔn e mǐ zun xá ɛ é ná lɛ́ vɛ́ d’é jí. Wǎgbɔ tɔn ɔ, mǐ ná ɖu le nǔ e víví, bo lɛ́ jɛmɛ nú mɛ é ɖé tɔn; énɛ́ wɛ nyí fífá ayi mɛ tɔn kpó nǔ e è ɖó é ní kpé mɛ kpó.—Ðɛh. 119:103.

18. Étɛ́ mɛ e ɖo fí e mǐ nɔ ɖɔ mawuxó gbɔn lɛ́ é ka ɖó ná tuun? Aniwú?

¹⁸ Ezekiyɛ́li ɔ gbeyíɖɔ wɛ, amɔ̌ mǐdɛɛ lɛ́ nyí gbeyíɖɔ ǎ. É ɖo mɔ̌ có, mǐ kán ɖ’é jí bo ná kpo ɖo wɛn Jexóva tɔn e jí é nya xɛ ɖe, bɔ è wlán dó Xó tɔn Biblu ɔ mɛ é jlá wɛ, káká jɛ hwenu e wɛnɖagbejíjlázɔ́ ɔ ná fó dó é. Hwenu e è ná ɖó hwɛ nú gbɛtɔ́ lɛ́ é su ɔ, mɛ e ɖo fí e mǐ nɔ ɖɔ mawuxó gbɔn lɛ́ é sɔ́ ná ɖó hwɛjijɔ ɖěbǔ bo ná ɖɔ ɖɔ è kún gb’akpá nú émí ó, alǒ Mawu wɔn ya nú émí ǎ. (Ezek. 3:19; 18:23) É nyɔ́ wa ɔ, yě ɖó ná yí gbe ɖɔ wɛn e jlá wɛ mǐ ɖe é ɔ, Mawu gɔ́n wɛ é gosín.

19. Étɛ́ ka ná ná mǐ hlɔ̌nhlɔ́n bɔ mǐ ná kpé sinsɛnzɔ́ mǐtɔn wú bá wa?

¹⁹ Étɛ́ ka ná ná mǐ hlɔ̌nhlɔ́n bɔ mǐ ná kpé sinsɛnzɔ́ mǐtɔn wú bá wa? Nǔ atɔn e ná hlɔ̌nhlɔ́n Ezekiyɛ́li lɛ́ é wɛ. Mǐ nɔ kpo ɖo wɛn ɔ jlá wɛ, ɖó mǐ tuun ɖɔ Jexóva wɛ sɛ́ mǐ dó, bɔ gbigbɔ mímɛ́ tɔn nɔ ná mǐ hlɔ̌nhlɔ́n, lobɔ Xó tɔn nɔ lɛ́ ná hlɔ̌nhlɔ́n nǔɖiɖi mǐtɔn. Alɔ e dó mǐ wɛ Jexóva ɖe é zɔ́n bɔ akpakpa nɔ sɔ́ mǐ dó sinsɛnzɔ́ mǐtɔn wú, bɔ mǐ ná dɛ “káká jɛ vivɔnu.”—Mat. 24:13.