Cóbónú un ná ɖɔ nǔ e jɛ é nú mi ɔ, mi nú ma ɖɔ lěe un bɛ́ sinsɛnzɔ́ hwebǐnu tɔn gbɔn é nú mi hwɛ̌.

È ji mì ɖo 1942 ɖo tɔtɛ́ntinto ɖɛkpɛ ɖɛkpɛ Curaçao tɔn mɛ, ɖo Caraïbes. Suriname nu wɛ nyí tɔ́ ce, bɔ azɔ̌ wɛ zɔ́n bɔ é sɛ tɛn wá tɔtɛ́ntinto ɔ mɛ. É bló batɛ́mu ɖo Curaçao bo húzú Kúnnuɖetɔ́ Jexóva tɔn é ɔ, xwe ɖé lɛ́ ko wá yi cóbɔ è ji mì; é ɖo mɛ nukɔntɔn ɖěɖěe mɔ nǔgbó ɔ ɖo fínɛ́ lɛ́ é mɛ. a Mǐ mɛ vǐ tɔn lɛ́ nɔ ba ná kplɔ́n nǔ hwebǐnu ǎ có, é ka nɔ kplɔ́n Biblu xá mǐ ɖo aklúnɔzángbla lɛ́ bǐ mɛ. Hwenu e un ɖó xwe 14 é ɔ, tɔ́ ce sɛ tɛn nú xwédo mǐtɔn yi Suriname, bo ná dó kpé nukún dó nɔ tɔn e ko nyí mɛxó é wú.

Ée mǐ jɛ Suriname é ɔ, un jɛ xɔ́ntɔn zun xá mɛ wínnyáwínnyá e ɖo agun ɔ mɛ, bo nɔ ɖó kan dó Jexóva sinsɛn wú lɛ́ é jí. Mɛxó kpɛɖé jɛ́n yě nyí nú mì, bo ka ko nyí gběxosín-alijítɔ́ hwebǐnu tɔn. Ényí yě ɖo xó ɖɔ dó nǔ e yě mɔ kpɔ́n ɖo sinsɛnzɔ́ ɔ mɛ lɛ́ é wú wɛ ɔ, un nɔ mɔ lě do yě ɖó awǎjijɛ sɔ é. Ðo kplé agun tɔn lɛ́ sín vivɔnu ɔ, nyi kpó xɔ́ntɔn ce lɛ́ kpó nɔ ɖɔ xó dó xóta Biblu tɔn lɛ́ jí. Hweɖélɛ́nu ɔ, kɔ́xo wɛ mǐ nɔ jínjɔ́n bo nɔ ɖo sunví lɛ́ kpɔ́n wɛ. Xɔ́ntɔn énɛ́ lɛ́ d’alɔ mì bɔ un mɔ nǔ e ba wɛ un ɖe ɖo gbɛzán ce mɛ é; un ba ná w’azɔ̌ nú Jexóva. Énɛ́ wú ɔ, un bló batɛ́mu hwenu e un ɖó xwe 16 é. Nukɔnmɛ, hwenu e un ɖó xwe 18 é ɔ, un bɛ́ gběxosín-alijítɔ́ hwebǐnu tɔn sín azɔ̌.

Gběxosín-alijítɔ́ e un nyí é zɔ́n bɔ un kplɔ́n nǔ gěgé, bɔ nǔ énɛ́ lɛ́ d’alɔ mì ɖo sinsɛnzɔ́ hwebǐnu tɔn e un wa é blěbú mɛ. Ði kpɔ́ndéwú ɔ, nǔ nukɔn nukɔntɔn e un kplɔ́n lɛ́ é ɖokpó wɛ nyí ɖɔ é ɖo tají ɖɔ è ní nɔ kplɔ́n azɔ̌ mɛ ɖěvo lɛ́. Hwenu e un bɛ́ gběxosín-alijítɔ́zɔ́ é ɔ, mɛsɛ́dó ɖokpó nɔ nyí Willem van Seijl bɔ nǔ ce nɔ ɖu ayi mɛ n’i tawun. b  É kplɔ́n nǔ gěgé mì dó lěe un ná kpé nukún dó nǔ lɛ́ wú ɖo agun ɔ mɛ gbɔn é wú. Hwenɛ́nu ɔ, un lin ɖɔ un ná wá ɖó hudó azɔ̌ énɛ́ e kplɔ́n mì wɛ é ɖe é tɔn sɔmɔ̌ ǎ. Xwe e bɔ d’é wú é mɛ ɔ, è sɔ́ mì bɔ un húzú gběxosín-alijítɔ́ titewungbe, bɔ énɛ́ gúdo ɔ, un jɛ nukún kpé dó gbɛ̌ta e jɛ zɔ tawun ɖo zungbó Suriname tɔn mɛ lɛ́ é wú jí. Azɔ̌ énɛ́ e nɔví lɛ́ kplɔ́n mì dó hwetɔnnu é su nukún ce mɛ tawun! Sín hwenɛ́nu ɔ, un tɛ́n kpɔ́n bo nɔ xwedó kpɔ́ndéwú yětɔn, lobo nɔ ba hwenu bo nɔ kplɔ́n azɔ̌ mɛ ɖěvo lɛ́.

Nǔ wegɔ́ e un kplɔ́n é wɛ nyí le e ɖo gbɛzán e bɔkun, bo ka lɛ́ ɖo tuto jí é mɛ é. Ðo bǐbɛ́mɛ sun ɖokpó ɖokpó tɔn ɔ, mǐ mɛ we e ɖo kpɔ́ bo ɖo gběxosín-alijítɔ́zɔ́ wa wɛ lɛ́ é nɔ bló tuto nǔɖuɖu kpó nǔ ɖěvo e sín hudó mǐ ná ɖó ɖo aklúnɔzángbla e ja lɛ́ é mɛ é tɔn. Énɛ́ gúdo ɔ, mǐ mɛ we lɛ́ ɖokpó nɔ yi azinkan to ɔ tɔn bo nɔ yi xɔ nǔ e sín hudó mǐ ɖó lɛ́ é. Mǐ ɖó ná zán akpomɛkwɛ́ e mǐ nɔ yí ɖo sun ɖokpó ɖokpó mɛ é ganjí, bo ɖu nǔ ɖó jlɛ̌ jí bónú nǔ lɛ́ ní ma vɔ cóbónú sun ɔ fó ó. Ényí nǔɖé wá hwedó mǐ ɖo zungbó énɛ́ e jɛ zɔ é mɛ ɔ, vlafo wɛ mǐ ná mɔ mɛɖé bɔ é ná d’alɔ mǐ. Un mɔ ɖɔ kplɔ́n e un kplɔ́n bo zán gbɛ e bɔkun é ɖo wǐnnyáwínnyá mɛ, lobo lɛ́ nɔ tuto jí é d’alɔ mì bɔ un sɔ́ ayi ɖó azɔ̌ Jexóva tɔn wiwa jí ɖo gbɛzán ce bǐ mɛ.

Nǔ atɔngɔ́ e un kplɔ́n é wɛ nyí le e ɖo nǔ kplɔ́nkplɔ́n mɛ lɛ́ dó anɔ̌nugbe yětɔn mɛ mɛ é. Un nɔ dó Jǎnmagbe, Glɛ̌nsigbe, Papiamento kpó Sranantongo, éé nyí gbe e mɛ lɛ́ nɔ dó ɖo Suriname ɖo kpaa mɛ é kpó; é wɛ è nɔ lɛ́ ylɔ́ ɖɔ Sranan. Un mɔ ɖɔ ɖo zungbó ɔ mɛ ɔ, ényí è jlá wɛn ɔ mɛ lɛ́ dó anɔ̌nugbe yětɔn mɛ ɔ, yě nɔ yí ganjí. Gbe énɛ́ lɛ́ ɖé lɛ́ dídó vɛ́ wǔ nú mì tawun; Saramacca ɖo gbe énɛ́ lɛ́ mɛ; kɔnugbe e è nɔ zán dó ɖɔ xó ɖo gbe énɛ́ mɛ é nɔ gbɔn vo sɔgbe xá xó e ná ɖɔ wɛ è ɖe é. Amɔ̌, gǎn e un dó é nyí sin kɔn nyi kpákpá nɛgbé ǎ. Ðo xwe lɛ́ vlamɛ ɔ, un kpé wú bo kplɔ́n nǔgbó ɔ mɛ gěgé d’é jí, ɖó un kpé wú bo kplɔ́n anɔ̌nugbe yětɔn wútu.

É ɖo mɔ̌ có, un mɔ wǔvɛ́ ɖé lɛ́. Ði kpɔ́ndéwú ɔ, un nɔ kplɔ́n Biblu xá mɛ e nɔ dó Saramacca é ɖé, bɔ hweɖénu wá su bɔ un jló ná kan lěe é ɖe gbɔn é byɔ́ ɛ, ɖó é ɖo wǔvɛ́ se wɛ ɖo adɔgo mɛ. Amɔ̌, nǔ e un kanbyɔ́ ɛ é wɛ nyí ɖɔ é ɖo xo wɛ a jí. É sɔ́ byɔ́ ɖɔ má ɖɔ ǎ, nǔ énɛ́ e un kanbyɔ́ é cí kliwun n’i. Un wa nǔ mɔ̌hun lɛ́ nyi do có, un nɔ tɛ́n kpɔ́n hwebǐnu bá jlá wɛn ɔ mɛ lɛ́ dó anɔ̌nugbe yětɔn mɛ.

Ðo 1970 ɔ, è jɔ wǔ mì bɔ un húzú nukúnkpénǔwútɔ́ lɛ̌dó tɔn. Xwe énɛ́ xwe ɔ, un xwlé xóɖiɖɔ e mɛ ɖiɖe ɖěbɔdóɖěwú lɛ́ ɖe é ɖé gbɛ̌ta vovo e jɛ zɔ ɖo zungbó énɛ́ mɛ lɛ́ é; xóta tɔn wɛ nyí: “Une visite au siège mondial des Témoins de Jéhovah.” Bo ná dó yi yě gɔ́n ɔ, nyi kpó nɔví súnnu ɖé lɛ́ kpó nɔ zɔn tɔjíhún e è sɔ́ kpo gaga ɖé lɛ́ dó bló, b’ɛ lɛ́ yi jǐ é mɛ, bo nɔ gbɔn tɔsisa zungbó ɔ tɔn jí yi yě gɔ́n. Nǔ e mǐ hɛn dó mǐɖée jí ɖo tɔjíhún ɔ mɛ lɛ́ é ɖíe: Glǔpu ɖokpó, sánsin sín gbǎ ɖokpó, myɔ́tágbɛ́n e nɔ zán kalozíin lɛ́ é kpó yɛwúnkɔnnyidǒwú sín azɔ̌wanú lɛ́ kpó. Ée mǐ wá jɛ te é ɔ, mǐ ɖó ná bɛ́ azɔ̌wanú énɛ́ lɛ́ bǐ yi fí e ná bló tuto ɔ ɖe wɛ è ɖe é. Nǔ e un flín dó tomɛyiyi énɛ́ lɛ́ wú hú gǎn é wɛ nyí lěe mɛ énɛ́ lɛ́ e ɖo fí e jɛ zɔ tawun  lɛ́ é yí wǎn nú tuto lɛ́ sɔ é. É víví nú mì tawun ɖɔ un d’alɔ mɛ ɖěvo lɛ́ bɔ yě kplɔ́n nǔ dó Jexóva kpó tutoblónúnǔ tɔn sín akpáxwé e ɖo ayǐkúngban jí é kpó wú. Nyɔ̌ná gbigbɔ tɔn e un mɔ lɛ́ é hú gǎn vɔ̌ ɖěbǔ e un sá bo dó w’azɔ̌ Jexóva tɔn lɛ́ é flaflá tɔn.

Hwenu e un ɖo tlɛnmɛ bo ɖo sinsɛnzɔ́ wa nú Jexóva wɛ é ɔ, un mɔ nyɔ̌ná gěgé có, un lɛ́ mɔ ɖɔ un ɖó hudó alɔgɔ́tɔ́ ɖé tɔn. Énɛ́ wú ɔ, un jɛ ɖɛ xó jí bo ná sixú mɔ asi e ná dɛ ɖo wǔvɛ́ e è nɔ mɔ ɖo sinsɛnzɔ́ hwebǐnu tɔn wiwa ɖo zungbó ɔ mɛ é nu kpó awǎjijɛ kpó é. Xwe ɖokpó mɔ̌ gúdo ɔ, un jɛ tíntɔ́n xá Ethel e nyí gběxosín-alijítɔ́ titewungbe bo nɔ sɔ́ éɖée dó sá vɔ̌ tawun é jí. Sín hwenu e Ethel ɖo wǐnnyáwínnyá mɛ é wɛ é yí wǎn nú kpɔ́ndéwú mɛsɛ́dó Pɔ́lu tɔn tawun, bo jló ná wa nǔ e wú é kpé é bǐ ɖo sinsɛnzɔ́ ɔ mɛ Pɔ́lu ɖɔhun. Mǐ wlí alɔ ɖo septembre 1971, bo bɛ́ nukúnkpénǔwútɔ́ lɛ̌dó tɔn sín azɔ̌.

Xwédo Ethel tɔn ɖó nǔ káká ɖé ǎ, énɛ́ wú ɔ, é kpé wú bo húzú sɔgbe xá tomɛyiyizɔ́ wiwa ɖo zungbó ɔ mɛ. Ði kpɔ́ndéwú ɔ, ényí mǐ ɖo nǔ sɔ́ wɛ bo ná yi ba agun e jɛ zɔ tawun ɖo zungbó ɔ mɛ lɛ́ é kpɔ́n ɔ, mǐ nɔ hɛn nǔ káká ɖé ǎ. Mǐ nɔ nya avɔ mǐtɔn lɛ́ ɖo tɔsisa ɔ tó, bo nɔ lɛ́ lɛ wǔ ɖo tɔsisa ɔ mɛ. Mǐ lɛ́ kplɔ́n bo nɔ ɖu nǔ ɖěbǔ e nɔví lɛ́ ná mǐ é; é sixú nyí iguanes, alǒ piranhas, kabǐ nǔ ɖěvo ɖěbǔ e yě sixú hu ɖo zungbó ɔ mɛ, alǒ wlí ɖo tɔ mɛ é. Gannú ma ɖe ǎ ɔ, mǐ nɔ zán kwékwéma dó ɖu nǔ. Cíví ma ɖe ǎ ɔ, mǐ nɔ ɖu nǔ kpó alɔ kpó. Ethel kpó nyi kpó mɔ ɖɔ vɔ̌ énɛ́ e mǐ sá ɖó kpɔ́ hwenu e mǐ ɖo sinsɛnzɔ́ wa nú Jexóva wɛ é zɔ́n bɔ mǐ cí kan atɔn e è gbɛ ɖó kpɔ́ é ɖɔhun. (Nǔt. 4:12) Nǔ ɖě sixú nɔ nǔ énɛ́ lɛ́ e mǐ mɔ kpɔ́n lɛ́ é tɛnmɛ nú mǐ ǎ!

Hwenu e mǐ ko yi ba nɔví lɛ́ kpɔ́n ɖo zungbó ɔ mɛ gbe ɖokpó, bo lɛ́ kɔ ja xwé é wɛ nǔ e xó un ɖɔ nú mi ɖo bǐbɛ́mɛ é jɛ. Hwenu e tɔjíhún ɔ jɛ fí e tɔ ɔ ɖo adǎn jí ɖe é ɔ, é syɔ́ bléwún, bo ka lɛ́ yá wǔ wá aga. Mawu bló bɔ mǐ dó awu e nɔ zɔ́n bɔ è ma nɔ kú tɔ ǎ é (Gilet  de sauvetage), b’ɛ nɛ́ zɔ́n bɔ mǐ j’ayǐ sín tɔjíhún ɔ mɛ ǎ. Amɔ̌, sin gɔ́ tɔjíhún ɔ bǐ. Mǐ húzú nǔɖuɖu e ɖo gannú mǐtɔn lɛ́ mɛ lɛ́ é bǐ kɔn nyi tɔ ɔ mɛ, bo zán gannú énɛ́ lɛ́ dó xwá sin sín tɔjíhún ɔ mɛ.

Ðó nǔɖuɖu mǐtɔn lɛ́ bǐ vɔ bɔ mǐ ma ka ko jɛ te sín tɔ ɔ jí ǎ wútu ɔ, mǐ jɛ hwe gbé nya jí. Amɔ̌, mǐ kpé hwe ɖé wú bo wlí ǎ. Énɛ́ wú ɔ, mǐ xo ɖɛ sɛ́dó Jexóva bo byɔ́ ɛ ɖɔ é ní ná nǔ e mǐ ná ɖu gbe énɛ́ gbe é mǐ. Ée mǐ xo ɖɛ gúdo tlóló é ɔ, nɔví lɛ́ ɖokpó nyi ɖɔ tɔn dó tɔ ɔ mɛ, bo wlí hweví gěgé, bɔ é kpé mǐ mɛ atɔ́ɔ́n lɛ́ bǐ lobɔ mǐ ɖu nǔ gɔ́ xo zǎn énɛ́ mɛ.

Ée nyi kpó Ethel kpó wa nukúnkpénǔwútɔ́zɔ́ nú xwe atɔ́ɔ́n gúdo é ɔ, mǐ mɔ nyɔ̌ná maɖónukún ɖé; mǐ ná húzú mɛjitɔ́. Wɛn ɖagbe énɛ́ e un se é dó xomɛhunhun nú mì, có un ka tuun nǔ e sɔ hɛn nu nú mǐ é ǎ. Nyi kpó Ethel kpó ɖo biba wɛ vɛ́návɛ́ná bá kpo ɖo sinsɛnzɔ́ hwebǐnu tɔn ɔ wa wɛ, lěe é nyɔ́ bló gbɔn é. Ðo 1976 ɔ, mǐ ji vǐ súnnu mǐtɔn Ethniël. Bɔ ɖo xwe we adaɖé gúdo ɔ, mǐ ji vǐ súnnu mǐtɔn wegɔ́ ɔ Giovanni.

Ðó hudó e tíin ɖo Suriname hwe ɔ nu é wútu ɔ, alaxɔ bló tuto bónú mǐ ná kpo ɖo nukúnkpénǔwútɔ́ sín azɔ̌ wa wɛ, lobo lɛ́ ɖo nukún kpé dó vǐ mǐtɔn lɛ́ wú wɛ. Ée vǐ súnnu mǐtɔn lɛ́ jɛ susu jí é ɔ, è sɔ́ lɛ̌dó e mɛ agun ma sukpɔ́ ɖe sɔmɔ̌ ǎ é ɖé nú mì. Énɛ́ nɔ zɔ́n bɔ un nɔ wa nukúnkpénǔwútɔ́zɔ́ nú aklúnɔzángbla ɖé lɛ́ ɖo sun ɖokpó ɖokpó mɛ, bo nɔ zán hwenu e kpo é dó wa gběxosín-alijítɔ́zɔ́ ɖo agun e mɛ è sɛ́ mǐ dó é. Ényí un ɖo agun e ma lín dó xwé mǐtɔn ǎ lɛ́ é ba kpɔ́n wɛ ɔ, Ethel kpó vǐ súnnu mǐtɔn lɛ́ kpó nɔ xwedó mì. Amɔ̌, ényí un xwe agun e ɖo zungbó ɔ mɛ lɛ́ é ba kpɔ́n gbé, bo ná lɛ́ yi bló kpléɖókpɔ́ xá yě ɔ, nyiɖokpó wɛ nɔ yi.

Un ɖó ná bló tuto nú nyiɖée ganjí, bo ná dó kpé nukún dó azɔ̌ ce lɛ́ wú. Un nɔ tɛ́n kpɔ́n bɔ mǐ nɔ sɛn Mawu ɖo xwédo mɛ ɖo aklúnɔzángbla lɛ́ bǐ mɛ. Ényí un yi agun e ɖo zungbó ɔ mɛ lɛ́ é ba kpɔ́n gbé ɔ, Ethel wɛ nɔ kpé nukún dó Mawu sinsɛn ɖo xwédo mɛ wú. Amɔ̌ hwɛhwɛ ɔ, mǐ nɔ tɛ́n kpɔ́n bo nɔ wa nǔ lɛ́ ɖó kpɔ́ ɖo xwédo ɔ mɛ, lěe é nyɔ́ bló gbɔn é. Hwɛhwɛ wɛ Ethel kpó nyi kpó nɔ ɖe ayi ɖ’ayǐ xá vǐ mǐtɔn lɛ́; mǐ nɔ d’ayihún, alǒ ɖi sa yi fí e dɔn mɛ bo sɛkpɔ́ xwé mǐtɔn lɛ́ é. Hwɛhwɛ wɛ un nɔ nɔ zǎnwunzɛn dó sɔ́ nǔ nú Axɔ́súɖuto ɔ sín azɔ̌ e un ɖó lɛ́ é. Gɔ́ ná ɔ, nyɔ̌nu jɔ nyɔ̌nu e xó Nǔnywɛ́xó 31:15 ɖɔ é wɛ Ethel nyí; é nɔ yá wǔ  fɔ́n zǎn, bo nɔ d’alɔ bɔ mǐ nɔ bló tɛ́si zǎnzǎn lɛ́, lobo nɔ tɛ́n kpɔ́n bɔ mǐ nɔ mɔ nǔɖé bo nɔ ɖu ɖó kpɔ́ cóbɔ vǐ lɛ́ nɔ ɖidó azɔ̌mɛ. É su nukún ce mɛ tawun ɖɔ un ɖó asi e nɔ sɔ́ éɖée dó sá vɔ̌ é ɖé; hwebǐnu wɛ é nɔ d’alɔ mì bɔ un nɔ wa azɔ̌ e Jexóva sɔ́ d’así nú mì lɛ́ é!

Ðó mǐ nyí mɛjitɔ́ wútu ɔ, mǐ w’azɔ̌ syɛ́nsyɛ́n bo d’alɔ vǐ mǐtɔn lɛ́ bónú yě ná yí wǎn nú Jexóva kpó sinsɛnzɔ́ ɔ kpó. Mǐ ba ɖɔ vǐ mǐtɔn lɛ́ ní wa sinsɛnzɔ́ hwebǐnu tɔn, é ka ná nyí ɖɔ mǐ ba mɔ̌ kpowun wú wɛ ǎ, loɔ, é ná nyí gbeta e kɔn yěɖésúnɔ wá é. Hwebǐnu wɛ mǐ nɔ ɖɔ xó nú yě dó awǎjijɛ e ɖo sinsɛnzɔ́ hwebǐnu tɔn mɛ é wú. Mǐ nɔ ɖɔ nú yě ɖɔ wǔvɛ́ ɖo azɔ̌ ɔ kɔn, amɔ̌, mǐ nɔ lɛ́ dó zǒgbe lěe Jexóva nɔ d’alɔ xwédo mǐtɔn, bo nɔ lɛ́ kɔn nyɔ̌ná dó mǐ jí gbɔn é jí nú yě. Mǐ nɔ lɛ́ d’alɔ yě bónú yě ní zun xɔ́ntɔn xá Kúnnuɖetɔ́ hǎtɔ́ e sɔ́ Jexóva sinsɛn ɖó tɛn nukɔntɔn ɔ mɛ ɖo gbɛzán yětɔn mɛ lɛ́ é.

Ée mǐ ɖo vǐ mǐtɔn lɛ́ kplɔ́n wɛ é ɔ, Jexóva nɔ ná mǐ nǔ e sín hudó mǐ ɖó lɛ́ é bǐ. Un tɛ́n kpɔ́n hwebǐnu bo w’azɔ̌ e nyí ce é. Hwenu e un ma ko wlí alɔ ǎ, bo nyí gběxosín-alijítɔ́ titewungbe ɖo zungbó ɔ mɛ é ɔ, nǔ e un mɔ kpɔ́n lɛ́ é d’alɔ mì bɔ un nɔ sɛ akwɛ́ xwe nú nǔ e sín hudó mǐ ná ɖó lɛ́ é. Amɔ̌, hweɖélɛ́nu ɔ, mǐ ná bo tlɛ dó gǎn gbɔn ɖěbǔ ɔ, mǐ nɔ kpé wú bo nɔ sú nǔ e hudó mǐ é sín do ɖo ninɔmɛ ɖé lɛ́ mɛ ǎ. Ðo ninɔmɛ énɛ́ lɛ́ mɛ ɔ, un kú d’é jí ɖɔ Jexóva d’alɔ mǐ. Ði kpɔ́ndéwú ɔ, ɖo 1986 jɛ 1992 ɔ, hunnyahunnya ɖé fɔ́n ɖo Suriname. Ðo xwe énɛ́ lɛ́ vlamɛ ɔ, é tlɛ nɔ vɛ́ wǔ bɔ è ná mɔ nǔ e ɖo dandan lɛ́ é. É ka ɖo mɔ̌ có, Jexóva kpé nukún dó mǐ wú.—Mat. 6:32.

Ðo gbɛzán mǐtɔn bǐ mɛ ɔ, Jexóva kpé nukún dó mǐ wú, bo lɛ́ ná mǐ awǎjijɛ, lobɔ nǔ e mǐ ɖó é lɛ́ kpé mǐ. Nyɔ̌ná ɖé wɛ vǐ mǐtɔn lɛ́ nyí nú mǐ; wǔjɔmɛ ɖé wɛ é nyí ɖɔ mǐ kplɔ́n yě bɔ yě ɖo Jexóva sɛn wɛ. Xomɛ hun mǐ tawun ɖɔ yě lɔmɔ̌ wá gbeta ɔ kɔn bo ná wa sinsɛnzɔ́ hwebǐnu tɔn nú gbɛzán yětɔn bǐ. Ethniël kpó Giovanni kpó bǐ yi Wěmaxɔmɛ nú wɛnɖagbejlátɔ́ Axɔ́súɖuto ɔ tɔn lɛ́, bo yí kúnnuɖewéma, bɔ din ɔ, yě ɖo sinsɛnzɔ́ wa wɛ ɖo alaxɔ Suriname tɔn mɛ kpó asi yětɔn lɛ́ kpó.

Ethel kpó nyi kpó ko nyí mɛxó tawun din có, mǐ nyí gběxosín-alijítɔ́ titewungbe, bo kpo ɖo azɔ̌ syɛ́nsyɛ́n wa nú Jexóva wɛ. Nǔgbó ɔ, alɔnu mǐtɔn ján sɔmɔ̌ bɔ, káká jɛ din ɔ, un ko kpé wú bo kplɔ́n tɔ linlin ǎ! Amɔ̌, é vɛ́ nú mì kpɔ́n ǎ! Ényí un dó nukún nǔ e jɛ wá yi lɛ́ é mɛ kpɔ́n ɔ, un ná ɖɔ xójɔxó ɔ, un mɔ ɖɔ gbeta e kɔn un wá ɖo wǐnnyáwínnyá mɛ bo sɔ́ sinsɛnzɔ́ hwebǐnu tɔn dó ɖó azɔ̌ e un ná wa ɖo gbɛzán ce mɛ é ɖo gbeta ɖagbe hú gǎn e kɔn un wá lɛ́ é mɛ.