Nú è ɖɔ è gbɛ́ wǎn nú mɛɖé, alǒ gbɛ̌ta ɖé hǔn, mɛ énɛ́ alǒ gbɛ̌ta énɛ́ sín nǔ nɔ vɛ́ mɛ wú, kabǐ nɔ jɛ mɛtɔn jí ɖěbǔ kpálíkpálí ǎ nɛ́. É syɛ́n hú xomɛ e è sin dó mɛɖé nú táan ɖé kpowun é.

Hwɛjijɔ gěgé wú wɛ mɛ lɛ́ nɔ jɛ wǎn gbɛ́ nú mɛ ɖěvo lɛ́ jí. Hwɛhwɛ ɔ, é nyí nǔ e mɛ lɛ́ nɔ wa é dandan wú wɛ mɛ ɖěvo lɛ́ nɔ gbɛ́ wǎn nú yě ǎ, loɔ, mɛ alɔkpa e yě nyí é wú wɛ é nɔ sín. Mɛ ɖěvo lɛ́ nɔ mɔ mɛ e è gbɛ́ wǎn ná lɛ́ é dó mɔ mɛ nyanya, mɛ e kán ɖ’é jí bá wa nǔ nyanya lɛ́ é, alǒ mɛ e ma sixú húzú gbeɖé ǎ lɛ́ é. Yě sixú nɔ lɛ́ mɔ ɖɔ yě kún hwɛ́n nǔɖé ó, nyí nǔgbɛ́gba alǒ yě wɛ nɔ zɔ́n bɔ tagba lɛ́ nɔ tíin. Mɛ ɖěɖěe nɔ gbɛ́ wǎn nú mɛ ɖěvo lɛ́ é sixú nɔ se wǔvɛ́ dǎkaxixo, nǔagɔwaxámɛ, alǒ nǔ ɖěvo e sixú zɔ́n bɔ wǎngbɛ́númɛ dó ɖɔ do ɖo ayi yětɔn mɛ lɛ́ é tɔn.

Hweɖélɛ́nu ɔ, mɛɖé lɛ́ nɔ gbɛ́ wǎn nú mɛ e yě ma tlɛ xo go kpɔ́n ǎ lɛ́ é. Ði kpɔ́ndéwú ɔ, hwɛhwɛ ɔ, lěe nǔ nɔ cí nú xwédo e mɛ mɛ lɛ́ ɖe é, alǒ xɔ́ntɔn yětɔn lɛ́ dó gbɛ̌ta ɖé wú é wɛ é nɔ cí nú yě lɔmɔ̌. Énɛ́ wú ɔ, ényí mɛ e ɖo xwédo ɖé mɛ é ɖé lɛ́ gbɛ́ wǎn nú gbɛ̌ta ɖé ɔ, tlóló jɛ́n mɛ ɖěvo e kpo ɖo xwédo ɔ mɛ lɛ́ é bǐ nɔ jɛ nǔ ɖokpó ɔ wa jí.

Ényí mǐ tuun lěe wǎngbɛ́númɛ nɔ yá wǔ vun kan sɔ é ɔ, énɛ́ nɔ zɔ́n bɔ mǐ nɔ tuun nǔ e wú mɛ gěgé nɔ gbɛ́ wǎn nú mɛ ɖěvo lɛ́ é. Amɔ̌, bó ná dó ɖu ɖo wǎngbɛ́númɛ e fɔ́n bó ɖo jijɛjí wɛ é jí ɔ, mǐ ɖó ná tuun fí e wǎngbɛ́númɛ bɛ́sín é. Biblu sixú d’alɔ mǐ bɔ mǐ ná kpé énɛ́ wú.

WǍNGBƐ́NÚMƐ JƆ ÐO GBƐTƆ́ LƐ́ TƐ́NTIN Ǎ. Hwenu e wɛnsagun e ɖo jǐxwé lɛ́ é ɖokpó fɔ́n gǔ dó Mawu jí é wɛ è se wǎngbɛ́númɛ xó azɔn  nukɔntɔn; wɛnsagun énɛ́ wɛ è wá ylɔ́ ɖɔ Satáan Awǒvi. Awǒvi ɔ “mɛhutɔ́ wɛ é ko nyí sín do,” hwenu e é bɛ́ gǔfínfɔ́n é. “Ðó éɖésúnɔ bǐ wɛ ko nyí adingbannɔ, bó nyí adingbannɔ lɛ́ sín tɔ́” wútu ɔ, é kpo ɖo wǎngbɛ́númɛ kpó adǎkaxixo kpó sɔ́ su wɛ. (Jaan 8:44; 1 Jaan 3:11, 12) Biblu tínmɛ ɖɔ é nyí hwɛdómɛtɔ́, alǒ wǎngbɛ́númɛtɔ́, xomɛsinnɔ, lobo lɛ́ nyí dǎkaxotɔ́.—Jɔbu 2:7; Nǔɖexlɛ́mɛ 12:9, 12, 17.

É BƆ WǓ BƆ GBƐTƆ́ HWƐHUTƆ́ LƐ́ NÁ GBƐ́ WǍN NÚ MƐ. Adámu e nyí súnnu nukɔntɔn ɔ é, xo kpóɖó nú Satáan ɖo hwɛhuhu tɔn mɛ. Wǎgbɔ tɔn ɔ, gbɛtɔ́ lɛ́ bǐ ɖu hwɛhuhu gú. (Hlɔ̌manu lɛ́ 5:12) Wǎngbɛ́númɛ sísɛ́ Kanyɛ́ɛ éé nyí Adámu sín vǐ nukɔntɔn ɔ é, bɔ é hu nɔví tɔn Abɛ́li. (1 Jaan 3:12) Nǔgbó wɛ ɖɔ káká jɛ din ɔ, mɛ gěgé nɔ ɖe wǎnyíyí kpó wǔvɛ́sexámɛ kpó xlɛ́. Amɔ̌, ɖó hwɛhuhu gú e mǐ ɖu é wútu ɔ, mɛ gěgé nyí cejɛ́nnábínɔ, mɛnújlótɔ́ kpó goyítɔ́ kpó; jijɔ énɛ́ lɛ́ nɔ zɔ́n bɔ yě nɔ gbɛ́ wǎn nú mɛ ɖěvo lɛ́.—2 Timɔtée 3:1-5.

MƐ E MA NƆ BA MƐ ÐĚVO LƐ́ XÓ Ǎ, ÐÓ YĚ GBƆN VO WÚTU LƐ́ É NÁ ÐIBLA GBƐ́ WǍN NÚ MƐ. Gbɛ ɔ nɔ sɔ́ linlin kpó nǔwalɔ kpó ɖěɖěe ma sɔgbe ǎ lɛ́ é ɖ’ajo, bó nɔ lɛ́ ba ɖɔ mɛ lɛ́ ní ma nɔ kú nǔbláwǔ nú mɛ ɖěbǔ ó; é nɔ wa mɔ̌, bó ná dó flɔ́ zo dó glɔ̌ nú wǎngbɛ́númɛ. Linlin agɔ ɖíɖó, nǔagɔwaxámɛ, xó gblégblé lɛ́ ɖiɖɔ, nǔɖɔbamɛ kpó nǔwadómɛwú kpó fɔ́n bó ɖo kan vun wɛ, ɖó ‘gbɛ ɔ bǐ ɖo Satáan Awǒvi e nyí mɛ nyanya ɔ é sín acɛ mɛ.’—1 Jaan 5:19.

Amɔ̌, é nyí fí e wǎngbɛ́númɛ gosín é kɛ́ɖɛ́ xó wɛ Biblu ɖɔ ǎ. É lɛ́ ɖɔ lěe è sixú hɔn ɖɔ ná gbɔn é.