LĚE È SIXÚ ÐU ÐO WǍNGBƐ́NÚMƐ JÍ GBƆN É
1 | Ma nɔ ɖe mɛɖé ɖó vo ɖo mɛɖé mɛ ó
Nǔ e Biblu ɖɔ é:
“Mawu . . . nɔ ɖe mɛɖé ɖó vo ɖo mɛɖé mɛ [ǎ]. Loɔ, ɖo akɔta ɖěbǔ mɛ ɔ, mɛ e nɔ ɖó sísí n’i, bó nɔ xwedó hwɛjijɔ ɔ, mɛ énɛ́ sín nǔ nɔ nyɔ́ nukún tɔn mɛ.”—MƐSƐ́DÓ 10:34, 35.
Tínmɛ tɔn:
Jehovah * Mawu nɔ kpɔ́n dó to mǐtɔn, akɔ mǐtɔn, sinmɛ agbaza tɔn mǐtɔn, alǒ aca mǐtɔn wú dó dá hwɛ nú mǐ ǎ. É nyɔ́ wa ɔ, é nɔ sɔ́ ayi ɖó nǔ tají ɔ jí, énɛ́ wɛ nyí mɛ e mǐ nyí ɖo xomɛ é. Nǔgbó ɔ, “nǔ e ɖo wěxo ɔ wɛ gbɛtɔ́ nɔ kpɔ́n, ayixa mɛ wɛ . . . Mawu Mavɔmavɔ ka nɔ kpɔ́n.”—1 Samuwɛ́li 16:7.
Nǔ e a sixú wa é:
Nǔgbó wɛ ɖɔ mǐ kún sixú tuun nǔ e ɖo mɛ ɖěvo lɛ́ sín ayi mɛ é ó, amɔ̌, mǐ sixú tɛ́n kpɔ́n bó nɔ wa nǔ Mawu ɖɔhun, lobo ná nɔ ɖe mɛɖé ɖó vo ɖo mɛɖé mɛ ǎ. Dǒ gǎn bó nɔ sɔ́ ayi ɖó jijɔ mɛ ɖokpó ɖokpó tɔn jí, ma nɔ xwe mɛ bǐ dó ahwan ɖokpó ɔ mɛ ó. Ényí a ɖó ayi wú ɖɔ lěe nǔ nɔ cí nú we dó mɛ ɖěvo lɛ́, é sixú nyí mɛ e gosín akɔ, alǒ to ɖěvo mɛ lɛ́ é wú é jɛ hǔzúhúzú jí dó nyanya jí hǔn, xo ɖɛ sɛ́dó Mawu, bó byɔ́ ɛ ɖɔ é ní d’alɔ we bónú a ní hɔn ɖɔ nú linlin énɛ́ e ɖo ayi towe mɛ é. (Ðɛhan 139:23, 24) Ényí a byɔ́ Jehovah kpó ayi bǐ kpó ɖɔ é ní d’alɔ émí bónú émí ma sɔ́ ɖe mɛɖé ɖó vo ɖo mɛɖé mɛ ó ɔ, a sixú ɖeji ɖɔ é ná d’alɔ we.—1 Piyɛ́ɛ 3:12.
^ Jehovah wɛ nyí nyǐkɔ Mawu tɔn.—Ðɛhan 83:18, nwt.
“Nyi kpó yovó ɖě kpó ko jínjɔ́n kpɔ́, bó ɖɔ xó ɖo fífá mɛ kpɔ́n gbeɖé ǎ. . . Din ɔ, un ɖo kplékplé nɔví lɛ́ tɔn e gbɔn gbɛ ɔ bǐ mɛ é ɖé mɛ; kplékplé énɛ́ ɖɔhun ɖě sɔ́ ɖe ǎ.”—TITUS
