Wěɖexámɛ Biblu tɔn: “Mi ma jó miɖée dó nú wanyiyi nú akwɛ ɖu ɖò mi jí ó; nǔ e ɖò mi sí ɔ ni kpé mi.”—Eblée lɛ 13:5.

Nǔ e gbɛtɔ́ lɛ nɔ mɔ ɖɔ è ɖó na ɖó lɛ é gegě wɛ nɔ vunbla mǐ ɖò égbé. Amɔ̌, Biblu ɖɔ ɖɔ “nǔ e ɖò mi sí ɔ ni kpé mi.” Gbɔn nɛ̌ é?

Nyi alɔ nú “wǎn yí nú akwɛ.” Gbɛtɔ́ lɛ nɔ sɔ́ lanmɛ na nɔ ganji, xwédo, xɔ́ntɔn e ye zun lɛ é, walɔ ɖagbe, kaka jɛ wi e ɖò ta nú ye é jí sɔ́ dó savɔ̌ ɖó “wǎn yí nú akwɛ” wu. (1 Timɔtée 6:10) Vɔ̌ enɛ sɔgbe ɖebǔ ǎ. Wǎgbɔ tɔn ɔ, “akwɛ nɔ kpé” mɛ e yí wǎn nú dɔkun é “gbeɖé ǎ.”—Nǔnywɛtɔ́xó 5:9.

Gbɛtɔ́ ni xɔ akwɛ nú we hú nǔɖokan lɛ. Nǔgbo wɛ ɖɔ agbaza sín nǔ lɛ nɔ wà ɖagbe ɖò ali ɖé lɛ nu. Amɔ̌, ye sixu yí wǎn nú mǐ ǎ, gbɛtɔ́ lɛ kɛɖɛ jɛn sixu wà mɔ̌. Nú mǐ ɖó “xɔ́ntɔn [nǔgbo ɖé]” ɔ, é na zɔ́n bɔ mǐ na vo ɖò gbɛmɛ.—Nǔnywɛxó 17:17.

Wěɖexámɛ Biblu tɔn: “Ayi jɛ ayǐ nú mɛ ɔ, azɔn nɔ yawǔ gbɔ.”—Nǔnywɛxó 17:22.

Awǎjijɛ cí amasin ɖagbe ɖé ɖɔhun, bo sixu ɖ’alɔ mǐ bɔ mǐ na ɖí xwi xá azɔn. Amɔ̌, nɛ̌ mǐ ka sixu ɖó awǎjijɛ gbɔn hwenu e mǐ ɖò azɔn jɛ wɛ é?

Nǔ ni nɔ sù nukún towe mɛ. Enyi mǐ nɔ ɖò tamɛ lin dó tagba mǐtɔn lɛ jí wɛ ɔ, “azǎn lɛ bǐ” na nɔ cí azǎn nyanya ɖɔhun nú mǐ. (Nǔnywɛxó 15:15, nwt) É nyɔ́ wà ɔ, Biblu ɖɔ: “Mi tuùn nǔ e Mawu wà nú mi ɔ n’i.” (Kolosinu lɛ 3:15) Kplɔ́n bonu nǔ e tlɛ nyí kpɛví hugǎn ɖò gbɛ̀ ɔ mɛ lɛ é ni nɔ sù nukún towe mɛ. Nǔ elɔ lɛ sixu zɔ́n bɔ gbɛ̀ mǐtɔn na lɛ́ ɖó awǎjijɛ hugǎn: hwe gbà amizɛ́n, jɔhɔn flɛ́flɛ́ ɖé, nǔkiko mɛ e è yí wǎn na é tɔn.

Nɔ d’alɔ mɛ ɖevo lɛ. Enyi lanmɛ towe ma tlɛ ɖò ganji ǎ hǔn, tuùn ɖɔ “nǔnamɛ nɔ dó xomɛhunhun nú mɛ hú nǔyiɖomɛsí.” (Mɛsɛ́dó 20:35) Enyi gǎn e mǐ nɔ dó lɛ é nɔ sù mɛ ɖevo lɛ sín nukúnmɛ ɔ, é nɔ víví nú mǐ, bɔ ayi mǐtɔn nɔ lɛ́ gosin tagba mǐtɔn lɛ jí. Enyi mǐ nɔ d’alɔ mɛ ɖevo lɛ bonu gbɛzán yetɔn kpɔ́n te ɔ, é na zɔ́n bɔ gbɛzán mǐtɔn na kpɔ́n te hugǎn.

Wěɖexámɛ Biblu tɔn: “Mɔ dò nú nǔ e nyí nǔjɔnǔ hugǎn lɛ é.”—Filipunu lɛ 1:10, nwt.

Asú kpo asì kpo e nɔ zán hwenu kpɛɖé ɖó kpɔ́ lɛ é nɔ wà nǔ dó alɔwliwli yetɔn wu. Nǔnywɛnú wɛ é na nyí nú asú kpo asì kpo lɛ ɖɔ ye ni sɔ́ alɔwliwli yetɔn dó ɖó nǔ taji; nǔ e ɖò taji hugǎn ɖò gbɛmɛ lɛ é ɖokpo nɛ.

Mi nɔ wà nǔ ɖó kpɔ́. Ma nɔ cí hwiɖokponɔ bo nɔ nya nǔ e na nyí ɖagbe nú we lɛ é gbé ó, loɔ, blǒ tuto bonu mi nɔ wà nǔ ɖó bǔ. Biblu ɖɔ: “Mɛ we ɖó gbè kpɔ́ bo wà azɔ̌ ɔ, é nyɔ́ hú è nɔ mɛ ɖokpo géé.” (Nǔnywɛtɔ́xó 4:9) Mi sixu ɖa nǔ, ba lanmɛ kpɔ́n, nu ahan fífá ɖé dó ɖè ayi ɖ’ayǐ, alǒ wà nǔ e mi yí wǎn na é ɖé ɖó kpɔ́.

Xlɛ́ ɖɔ emi yí wǎn nú mɛ e emi da é. Biblu dó wusyɛn lanmɛ nú asú kpo asì kpo lɛ ɖɔ ye ni yí wǎn nú yeɖée lobo ɖó sísí nú yeɖée. (Efɛzinu lɛ 5:28, 33) Nǔkiko yɛ́ɛ ɖé, mɛ zunfán alǒ nǔnina ɖé sixu d’alɔ mɛ bɔ alɔwliwli ɖé na lidǒ. É ɖò wɛn ɖɔ mɛ e è wlí alɔ xá é kɛɖɛ wɛ è ɖó na nɔ ɖè jlǒ xóɖóxámɛ tɔn xlɛ́.—Eblée lɛ 13:4.