Jlǒ mɔhun nyla wɛ à? Ðebǔ ǎ! Biblu ɖɔ nú mǐ ɖɔ Mawu sɔ́ jlǒ enɛ dó ayi mǐtɔn mɛ. (Nǔnywɛtɔ́xó 3:11) É lɛ́ ɖɔ ɖɔ “Mawu ɔ, wanyiyi wɛ é nyí.” (1 Jaan 4:8) É ka na sɔgbe ɖɔ Mawu wanyiyinɔ ɖé ni dá mǐ kpo jlǒ ɔ kpo ɖɔ mǐ na nɔ gbɛ̀ kaka sɔyi, bɔ enɛ gudo ɔ, é na bló bɔ jlǒ enɛ na gɔn jijɛnu à?

É ɖò wɛn ɖɔ, mɛ ɖě kún nɔ ba na kú ó. Nǔgbo ɔ, Biblu ylɔ́ kú ɔ ɖɔ “kɛntɔ́” e mɛɖé ma nɔ ba xó tɔn ǎ é ɖé. (1 Kɔlɛntinu lɛ 15:26) Mɛɖé lɛ nɔ yawǔ kú, mɛ ɖevo lɛ nɔ dɔ́ji. Amɔ̌, kú ɔ nɔ wá wá jɛn wɛ. Tamɛ linlin dó kú jí nɔ dó xɛsi mɛ gegě. È ka na wá ɖu ɖò kɛntɔ́ enɛ jí gbè ɖokpo à? É ka na nyɔ́ bló dóo à?

Enyi a sè ɖɔ Mawu kún jló gbeɖé ɖɔ gbɛtɔ́ ni kú ó ɔ, é na kpaca we wɛ à? Wema Bǐbɛ̌mɛ tɔn xlɛ́ nyi wɛn ɖɔ Mawu jló ɖɔ gbɛtɔ́ lɛ ni nɔ gbɛ̀ kaka sɔyi ɖò ayikúngban jí. Jehovah Mawu sɔnǔ nú ayikúngban ɔ ganji, bonu é na nyí xwé gbɛtɔ́ví lɛ tɔn. Enɛ gudo ɔ, é da sunnu nukɔntɔn ɔ Adamu, bo sɔ́ ɛ ɖó palaɖisi ɖé, alǒ jikpá ɖé mɛ ɖò Edɛni. Enɛ gudo ɔ, “Mawu mɔ ɖɔ nǔ e emi bló lɛ bǐ ɔ, nǔ ɖagbe wɛ ye nyí tawun.”—Bǐbɛ̌mɛ 1:26, 31.

Mawu dá Adamu bɔ é nyí mɛ maɖóblɔ̌, ɖò akpajlɛ éɖesunɔ tɔn mɛ. (Sɛ́nflínmɛ 32:4) Adamu sín asì Ɛvu lɔ ɖó blɔ̌ ɖě ǎ; nǔ ɖě jɛ dò ɖò linlin tɔn  kpo agbaza tɔn kpo wu ǎ. Jehovah ɖɔ nú ye ɖɔ: “Mi jì, mi gbà kún, bo kpé ayikúngban ɔ jí, bo sɔ́ ɛ ɖó acɛ mitɔn glɔ́. Mi sɔ́ hweví lɛ ɖó acɛ mitɔn glɔ́, bo sɔ́ xɛ lɛ ɖó acɛ mitɔn glɔ́, bo sɔ́ kanlin e ɖò ayikúngban jí lɛ bǐ ɖó acɛ mitɔn glɔ́.”—Bǐbɛ̌mɛ 1:28.

É na byɔ táan gegě cobɔ kúnkan yetɔn na kpé ayikúngban ɔ jí. Ɛvu na jì vǐ lɛ, vǐ enɛ lɛ lɔ na jì vǐ kaka bɔ ayikúngban ɔ jí na gɔ́ lee Mawu ba gbɔn é. (Ezayíi 45:18) Enyi Adamu kpo Ɛvu kpo ma na nɔ gbɛ̀ nú táan gegě, bo mɔ vǐ yetɔn lɛ, alǒ vlafo ɔ, vivǔ yetɔn lɛ, bo ma ka na lɛ́ tuùn fí e é na fó ɖó é gbeɖé ǎ ɔ, nukúnɖiɖó enɛ e Mawu na ye é ka na sɔgbe à?

Lɛ̌ lin tamɛ dó azɔ̌ e Mawu sɔ́ d’así nú ye ɖɔ ye ni sɔ́ kanlin lɛ dó acɛ yetɔn glɔ́ é jí. È ɖɔ nú Adamu ɖɔ é ni na nyikɔ kanlin lɛ, enɛ ka na byɔ hwenu. (Bǐbɛ̌mɛ 2:19) Amɔ̌, nú é na sɔ́ ye dó acɛ tɔn glɔ́ ɔ, é byɔ ɖɔ é ni kplɔ́n nǔ dó ye wu bo tuùn lee é na kpé nukún ye wu gbɔn é. Enɛ na ko byɔ táan gegě.

Enɛ wu ɔ, gbeɖiɖe Mawu tɔn e ɖɔ ɖɔ ye ni jì, bo gbakpé ayikúngban jí, lobo sɔ́ kanlin lɛ ɖó acɛ yetɔn glɔ́ é xlɛ́ ɖɔ è dá asú kpo asì kpo nukɔntɔn ɔ bɔ ye na nɔ gbɛ̀ nú táan gegě. Nǔgbo ɔ, Adamu nɔ gbɛ̀ nú táan gegě.

Biblu xlɛ́ ɖɔ jì e gbɛtɔ́ lɛ nɔ dɔ́ ɖ’ayǐ é zɛ égbé tɔn wu flaflá tɔn. É ɖɔ: “Xwè afɛnɛ kantɔn wǒ (930) wɛ Adamu ɖó bo kú.” Enɛ gudo ɔ, è slɛ́ sunnu ayizɛ́n ɖevo bɔ ye nɔ gbɛ̀ nú xwè 900 jɛji. Ye wɛ nyí Sɛti, Henɔci, Kenani, Yɛlɛdi, Mɛtucɛlaxi kpo Nɔwée kpo. Ye bǐ wɛ nɔ gbɛ̀ jɛ nukɔn nú Sinvɔgbɛ Nɔwée hwenu tɔn ɔ; bɔ Nɔwée nɔ gbɛ̀ nú xwè 600 cobɔ sin vɔ gbɛ̀ ɔ. (Bǐbɛ̌mɛ 5:5-27; 7:6; 9:29) Nɛ̌ nǔ ka nyí gbɔn bɔ gbɛtɔ́ nɔ gbɛ̀ nú táan gegě sɔmɔ̌?

Adamu kpo Ɛvu kpo hɛn gbɛ̀ maɖóblɔ̌ yetɔn bú é ɔ, é lín dín cobɔ è jì mɛ enɛ lɛ ǎ. Nǔ taji e sixu ko zɔ́n bɔ ye dɔ́ji sɔmɔ̌ é nɛ. Amɔ̌, nɛ̌ gbɛtɔ́ maɖóblɔ̌ nyínyí ka cá kan xá jì didɔ gbɔn? Nɛ̌ è ka na wá ɖu ɖò kú jí gbɔn? Bo na dó mɔ xósin nú nǔkanbyɔ enɛ lɛ ɔ, mǐ ɖó na mɔ nukúnnú jɛ nǔ e wu mǐ nɔ kpò bo nɔ kú é mɛ hwɛ̌.