Nɛ̌ È ka Sixu Ðu Ðò Kɛntɔ́ E Nyí Kú É Jí Gbɔn?
TÓNÚMASE Adamu kpo Ɛvu kpo tɔn dɔn hwɛhuhu kpo kú kpo wá gbɛtɔ́ lɛ bǐ jí có, linlin e Mawu ɖó nú gbɛtɔ́ví lɛ é huzu ǎ. Mawu tɛɖɛ̌ jí ɖò Xó tɔn Biblu ɔ mɛ azɔn gegě ɖɔ linlin emitɔn enɛ kún huzu ó.
-
“[Ayikúngban] ɔ na nyí hwɛjijɔnɔ lɛ tɔn, bɔ ye na nɔ [jí] kaka sɔyi.”—Ðɛhan 37:29.
-
“Mawu Mavɔmavɔ na sú kú sín kún dó kaka sɔyi; Aklunɔ Mavɔmavɔ na súnsún ɖasin sín nukúnmɛ nú mɛ bǐ.”—Ezayíi 25:8.
-
“Kɛntɔ́ gudo tɔn e sín kún è na sú dó ɔ wɛ nyí kú.”—1 Kɔlɛntinu lɛ 15:26.
-
“Kú sɔ́ na tíìn ǎ, aluwɛ sɔ́ na tíìn ǎ, alěnina sɔ́ na tíìn ǎ, wuvɛ̌ mimɔ sɔ́ na tíìn ǎ.”—Nǔɖexlɛ́mɛ 21:4.
Nɛ̌ Mawu ka “na sú kú sín kún dó” gbɔn? Biblu ɖɔ nyi wɛn ɖɔ ‘hwɛjijɔnɔ na nɔ gbɛ̀ kaka sɔyi.’ Amɔ̌, é lɛ́ ɖɔ, “Gbɛtɔ́ hwɛjijɔnɔ e nɔ wà ɖagbe bo ma nɔ hu hwɛ ǎ é ɖokpo géé tíìn ɖò ayikúngban jí fí ǎ.” (Nǔnywɛtɔ́xó 7:20) Mawu ka na wɔn ya nú nǔgbododó éɖesunɔ tɔn lɛ bo na dó ɖu ɖò kú jí wɛ à? Nǔ sixu nyí mɔ̌ kpɔ́n ǎ. É na wà mɔ̌ gbeɖé ǎ, ɖó “Mawu . . . nɔ ɖó adingban ǎ.” (Titu 1:2) Bɔ etɛ Mawu ka na wà bɔ linlin e é ɖó bo dá gbɛtɔ́ lɛ é na jɛnu?
MAWU “NA SÚ KÚ SÍN KÚN DÓ KAKA SƆYI.”—EZAYÍI 25:8
È ÐU ÐÒ KÚ JÍ GBƆN NǓSISƆ NÚ GBƐXIXƆ ÐÉ GBLAMƐ
Jehovah sɔnǔ nú nǔnina ɖé kpo wanyiyi kpo, bo na dó xɔ gbɛtɔ́ lɛ sín kú sí gbɔn gbɛxixɔ ɔ gblamɛ. Linlin taji gbɛxixɔ tɔn wɛ nyí axɔ́ e sɔgbe pɛ́ɛ xá nǔ e è hɛn gblé é ɖé súsú, alǒ nǔ e sɛ́n byɔ lɛ é wiwa. Ðó gbɛtɔ́ lɛ bǐ wɛ hu hwɛ bo jɛxa kú wutu ɔ, Biblu ɖɔ nyi wɛn ɖɔ: “Gbɛtɔ́ sixu xɔ gbɛ̀ nú mɛɖé ǎ; é ka sixu xɔ gbɛ̀ nú éɖée ɖò Mawu sí ǎ. Akwɛ e na xɔ gbɛ̀ nú gbɛtɔ́ ɖokpo ɔ na sukpɔ́ dín, mɛɖé sixu kpéwú bo sú ǎ kpowun bɔ xó fó.”—Ðɛhan 49:8, 9.
Enyi hwɛhutɔ́ ɖé kú ɔ, hwɛ éɖesunɔ tɔn lɛ sín axɔ́ jɛn é sixu sú; é sixu xɔ gbɛ̀ nú éɖée ǎ, mɔ̌ jɛn é ma ka sixu lɛ́ sú hwɛ mɛ ɖevo ɖebǔ tɔn sín axɔ́ ǎ é nɛ. (Hlɔmanu lɛ 6:7) Mǐ ɖó hudo mɛ e ma ɖó blɔ̌ ɖě ǎ, bo ma ka lɛ́ hu hwɛ ɖě ǎ é tɔn, bonu é na sɔ́ gbɛ̀ tɔn jó; é ka na kú dó hwɛ éɖesunɔ tɔn lɛ tamɛ ǎ, loɔ, mǐtɔn lɛ tamɛ wɛ é na kú dó.—Eblée lɛ 10:1-4.
Nǔ e sín tito Mawu bló é pɛ́ɛ nɛ. É sɛ́ Vǐ tɔn Jezu dó sín jixwé bɔ è jì i ɖò ayikúngban jí, lobɔ é nyí mɛ maɖóblɔ̌, bo ka lɛ́ hu hwɛ ɖě ǎ. (1 Piyɛ́ɛ 2:22) Jezu ɖɔ emi wá “bo na sɔ́ gbɛ̀ [emitɔn] jó dó xɔ gbɛ̀ nú mɛ gegě.” (Maki 10:45) É kú bo na dó ɖu ɖò kɛntɔ́ mǐtɔn kú ɔ jí, bonu mǐ na nɔ gbɛ̀.—Jaan 3:16.
HWETƐNU È KA NA ÐU ÐÒ KÚ JÍ?
Égbé ɔ, ɖó nǔɖɔɖ’ayǐ Biblu tɔn ɖò jijɛ wɛ wutu ɔ, mǐ ɖò gbɛ̀ nɔ wɛ ɖò “hwenu vɛwǔ lɛ” mɛ; enɛ xlɛ́ ɖɔ mǐ ɖò gbɛ̀ nɔ ɖò “azǎn gudogudo tɔn” gbɛ̀ nyanya elɔ tɔn lɛ mɛ wɛ. (2 Timɔtée 3:1) Azǎn gudogudo tɔn lɛ na wá vivɔnu ɖò “gbè e gbè [è] na wá ɖó hwɛ nú mɛ nyanya lɛ, bo na vɔ ye dó é.” (2 Piyɛ́ɛ 3:3, 7) Amɔ̌, mɛ e yí wǎn nú Mawu lɛ é na gán ɖ’emɛ, bo na mɔ “gbɛ̀ mavɔmavɔ.”—Matie 25:46.
Jezu wá “bo na sɔ́ gbɛ̀ [tɔn] jó dó xɔ gbɛ̀ nú mɛ gegě.”—Maki 10:45
È na hun gbɛ̀ mavɔmavɔ sín ali nú gbɛtɔ́ livi mɔkpan ɖevo lɛ, hwenu e è na fɔ́n ye sín kú é. Jezu fɔ́n mɛɖé sín kú hwenu e é yì toxo Nayinu tɔn mɛ é. Sunnuví ɖokpo géé e asúkúsi ɖé ɖó é kú, “nǔ tɔn blawǔ” nú Jezu, bɔ é fɔ́n vǐ ɔ wá gbɛ̀. (Luki 7:11-15) Gɔ́ na ɔ, mɛsɛ́dó Pɔlu ɖɔ: “Un ka ɖò nukún ɖó Mawu wɛ . . . Mawu na wá fɔ́n mɛ ɖagbe lɛ, kpodo mɛ nyanya lɛ kpo sín kú.” Nukúnɖiɖó syɛnsyɛn enɛ nyí xlɛ̌ jiwǔ wanyiyi e Mawu ɖó nú gbɛtɔ́ lɛ é tɔn.—Mɛsɛ́dó 24:15.
Gbɛtɔ́ liva mɔkpan sixu ɖó nukún na nɔ gbɛ̀ kaka sɔyi. Biblu ɖɔ: “[Ayikúngban] ɔ na nyí hwɛjijɔnɔ lɛ tɔn, bɔ ye na nɔ [jí] kaka sɔyi.” (Ðɛhan 37:29) Ðò hwenɛnu ɔ, ye na mɔ bɔ xógbe akpakpa sɔ́ mɛ tɔn elɔ lɛ e lɛ́ dó wusyɛn lanmɛ nú mɛ, bɔ mɛsɛ́dó Pɔlu ko wlan sín xwè 2 000 mɔ̌ ɖíe é na jɛnu: “Kú, fitɛ ɖuɖeji towe ɖè? Kú, fitɛ acɛ towe e a nɔ dó wà nǔ nyanya na ɔ ɖè?” (1 Kɔlɛntinu lɛ 15:55) È na ɖu ɖò kɛntɔ́ baɖabaɖa gbɛtɔ́ lɛ tɔn kú ɔ jí!