Sín hwenu e Gbɛɖotɔ́ mǐtɔn dá gbɛtɔ́ lɛ é wɛ é nɔ ɖɔ xó nú ye gbɔn wɛnsagun lɛ kpo gbeyiɖɔ lɛ kpo jí. Gɔ́ na ɔ, é ba ɖɔ è ni wlán xó emitɔn lɛ kpo nyɔna e sín akpá emi dó lɛ é kpo. Akpá Mawu tɔn enɛ lɛ kúnkplá sɔgudo towe. Enɛ wu ɔ, fitɛ a ka sixu mɔ akpá Mawu tɔn lɛ ɖè ɖò égbé?

Nǔwlanwlán Mímɛ́ lɛ mɛ wɛ xó Mawu tɔn lɛ ɖè. (2 Timɔtée 3:16) Nɛ̌ Mawu ka zán gbeyiɖɔ lɛ dó wlán xó tɔn gbɔn? Mawu sɔ́ linlin tɔn lɛ dó ayi mɛ nú nǔwlantɔ́ lɛ, bɔ enɛ gudo ɔ, ye wlán ye ɖ’ayǐ. (2 Piyɛ́ɛ 1:21) Nǔ ɖokpo ɔ wɛ nɔ jɛ ɖò égbé. Enyi azɔ̌gán ɖé zɔ́n wěgbojinɔtɔ́ tɔn ɖɔ é ni wlán wema ɖé ɖò nyikɔ emitɔn mɛ ɔ, mǐ na yí gbè ɖɔ azɔ̌gán ɔ tɔn wɛ xó e ɖò wema ɔ mɛ é nyí. Mɔ̌ ɖokpo ɔ, nú Mawu na bo tlɛ zán gbɛtɔ́ lɛ dó wlán xó tɔn ɔ, é wɛ nyí Dǒwatɔ́ Nǔwlanwlán Mímɛ́ lɛ tɔn.

Xó Mawu tɔn ɖò taji sɔmɔ̌, bɔ é ba ɖɔ mɛ lɛ bǐ ni xà, bo mɔ nukúnnú jɛ mɛ. Égbé ɔ, “wɛnɖagbe mavɔmavɔ” ɔ tíìn ɖò “tò bǐ, akɔta bǐ, gbè bǐ” mɛ. (Nǔɖexlɛ́mɛ 14:6) Nyɔna Mawu tɔn zɔ́n bɔ Nǔwlanwlán Mímɛ́ lɛ blebu alǒ akpáxwé tɔn ɖé ɖò gbè 3 000 jɛji mɛ, bo sukpɔ́ hugǎn wema ɖevo ɖebǔ flaflá tɔn.